1 Ndien idahaemi ami, Moroni, nyaka iso ye mbuk mi. Ke ntak oro, sese, edikem ete ke ntak mme ebuana ŋkari Akish ye mme ufan esie, sese, mmɔ ema ebɔ obio ubɔŋ Omer.

2 Edi, Jehovah ama enyene mbɔm abaŋa Omer, ŋko ye mme nditɔ iden esie ye mme nditɔ iban esie emi mikiyomke nsobo esie.

3 Ndien Jehovah ama ɔtɔt Omer ke ndap ete yak enye ɔwɔrɔ ke isɔŋ oro; ke ntre Omer ama ɔwɔrɔ ke isɔŋ oro ye mbon ufɔk emana esie, ndien ema esaŋa ke ediwak usen, ndien edi enyuŋ ebe ekpere obot Shim, ndien edi ke ebiet emi ekewotde mme Nephite, ndien otodo aka edem usiaha-utin, ndien edi ke ebiet emi ekekotde Ablom, ke mkpere mben inyaŋ, ndien do enye owuk tent esie, ŋko ye mme nditɔ iden esie ye mme nditɔ iban esie, ye kpukpru mbon ufɔk esie, ibɔhɔke ekedi Jared ye mbon ufɔk emana esie.

4 Ndien edikem ete ke ema eyet Jared aran nte edidem enɔ mme owo, oto ke ubɔk ibak; ndien enye ɔnɔ Akish eyen aŋwan esie nte ŋwan.

5 Ndien edikem ete ke Akish ama oyom uwem ete aŋwan esie; ndien enye ama oyom uŋwam oto mbon emi enye ɔkɔnɔde uŋwɔŋɔ eke mbon eset, ndien mmɔ ema enyene ibuot ete aŋwan esie, nte enye eketiede ke ebekpo esie, akpaŋ utɔŋ ɔnɔ ikɔt esie.

6 Koro ata ɔkpɔsɔŋ ekedi edisuana ibak ye ndedebe ŋka emi ete ke enye ama abiat mme esit kpukpru mme owo; ke ntak oro ema ewot Jared ke ebekpo esie, ndien Akish ama akara ke itie esie.

7 Ndien edikem ete ke Akish ama ɔtɔŋɔ ndifube eyen edenowo esie, ke ntak oro enye ama ɔkɔbi enye ke ufɔk ŋkpɔkɔbi, ndien enim enye ke ekpri mme ikpikpu udia tutu enye akpa.

8 Ndien idahaemi enye eka eyen emi akakpade, (ndien enyiŋ esie ekedi Nimrah) ama ayat esit ye ete esie ke ntak se ete esie akanamde eyen eka esie.

9 Ndien edikem ete ke Nimrah ama ataŋ obok kiet ekpri ibat mme owo, ndien efehe ɔwɔrɔ ke isɔŋ oro, ndien edi enyuŋ ediduŋ ye Omer.

10 Ndien edikem ete ke Akish ama obon mme nditɔ iden efen, ndien mmɔ ema enyene mme esit mme owo, ke misehe mmɔ ema etomo enɔ enye ndinam kpukpru utɔ ukwaŋ-ŋkpɔ nte asaŋade ye oro enye okoyomde.

11 Idahaemi ikɔt Akish ema enyene udɔŋ enɔ udori, kpa nte Akish ekenyenede udɔŋ ɔnɔ odudu; ke ntre, mme nditɔ idenowo Akish ema enɔ mmɔ okuk, oto ke usuŋ oro ema eda ubak mme owo emi ekewakde ekan etiene mmɔ.

12 Ndien ekɔŋ ɔtɔŋɔ ndidu ke ufɔt nditɔ idenowo Akish ye Akish, emi ekebighide ke ufaŋ ediwak isua, iŋ, esim ndisobo ekpri ayak kpukpru mme owo obio ubɔŋ oro, iŋ, kpa ofuri, ibɔhɔke ekedi mme ukpɔŋ edip ye duop, ye mbon emi ekefehede ye mbon ufɔk Omer.

13 Ke ntre, ema efiak emen Omer enim ke isɔŋ inyene esie.

14 Ndien edikem ete ke Omer ama ɔtɔŋɔ ndisɔŋ; edi, ke isua usɔŋ esie enye ama obon Emer; ndien enye ama eyet Emer aran ete edi edidem ndikara ke itie esie.

15 Ndien ke oro ebede ke enye ama ekeyet Emer aran ete edi edidem enye ama okut emem ke ufaŋ isua iba, ndien enye ama akpa, ke okokutde ata ediwak mme usen, emi ekeyɔhɔde ye ukut. Ndien edikem ete ke Emer ama akara ke itie esie, ndien ama asaŋa ke nde-ikpat ete esie.

16 Ndien Jehovah afiak ɔtɔŋɔ ndimen isuŋi oro nsio ŋkpɔŋ isɔŋ oro, ndien mbon ufɔk Emer ema eforo ata eti eti ke idak ukara Emer; ndien ke ufaŋ isua ata ye iba mmɔ ema ekabade ekop odudu ata eti eti, tutu ete ke mmɔ ema ekabade enyene ŋkpɔ ata eti eti—

17 Enyene kpukpru oruk mfri, ye eke mkpasip, ye eke mme silk, ye eke ndiye linen, ye eke gold, ye eke silver, ye eke mme nsɔŋ-urua ŋkpɔ;

18 Ŋko ye kpukpru oruk ufene, oxen, ye mme enaŋ, ye mme edɔŋ, ye mme edi, ye mme ebot, ye ŋko mme ediwak utɔ mme unam efen emi ekenyenede ufɔn nte udia enɔ owo.

19 Ndien mmɔ ŋko ema enyene mme enaŋmbakara, ye mme ass, ndien mme enin ema edu ye mme curelom ye mme cumom; kpukpru emi ekenyenede ufɔn enɔ owo, ndien ata akpan-akpan mme enin ye mme curelom ye mme cumom.

20 Ndien ke ntem Jehovah ama aŋwaŋa mme edidiɔŋ esie ɔnɔ isɔŋ emi, emi ekemekde esio ke kpukpru mme isɔŋ eken; ndien enye ama ɔnɔ uyo ete owo ekededi emi edinyenede isɔŋ oro ana nte enyene enye ɔnɔ Jehovah, midighe ana nte ewot mmɔ ke ini mmɔ ekedatde ke ukwaŋ-ŋkpɔ; koro ke utɔ emi, Jehovah ɔdɔhɔ: ke ami ndidori ɔyɔhɔ iyatesit mi.

21 Ndien Emer ama anam ubiere ikpe ke nennen ke ofuri mme usen esie, ndien enye ama obon ediwak nditɔ iden ye iban; ndien enye ama obon Coriantum, ndien enye ama eyet Coriantum aran ete akara ke itie esie.

22 Ndien ke ini enye ama ekeyet Coriantum aran ete akara ke itie esie enye ama odu uwem isua inaŋ, ndien enye ama okut emem ke isɔŋ oro; iŋ, ndien tutu enye ama okut Eyen Nnennen ido, ndien enye ama adara onyuŋ ada ubɔŋ ke eyo esie; ndien enye ama akpa ke emem.

23 Ndien edikem ete ke Coriantum ama asaŋa ke mme nde-ikpat ete esie, ndien ama ɔbɔp ediwak mme ikpɔ obio, ndien ama anam enye emi ɔkɔfɔnde ɔnɔ ikɔt esie ke ofuri mme usen esie. Ndien edikem ete ke enye ikinyeneke nditɔ kpa tutu enye ɔsɔŋ ata eti eti.

24 Ndien edikem ete ke ŋwan esie ama akpa, ekedide isua ikie ye iba. Ndien edikem ete ke Coriantum ama ada nte ŋwan, ke isua usɔŋ esie, ekpri ofin aŋwan, ndien ama obon nditɔ idenowo ye iban; ke ntre enye ama odu uwem tutu enye edi isua ikie ye aba ye iba.

25 Ndien edikem ete ke enye ama obon Com, ndien Com ama akara ke itie esie; ndien enye ama akara ke isua aba ye usukkiet, ndien enye ama obon Heth; ndien enye ŋko ama obon nditɔ idenowo ye iban efen.

26 Ndien mme owo ema efiak esuana ke ofuri iso isɔŋ, ndien ama afiak ɔtɔŋɔ ndidu ata ɔkpɔsɔŋ ibak ke iso isɔŋ, ndien Heth ama ɔtɔŋɔ ndifiak nyime mme ndedibe uduak eke eset, man ewot ete esie.

27 Ndien edikem ete ke enye ama odorode ete esie nte edidem, koro enye okowot enye ye akaŋkaŋ esie-mmɔŋ; ndien enye ama akara ke itie esie.

28 Ndien mme prophet ema efiak edi ke isɔŋ oro, ekwɔrɔde edikabade esit enɔ mmɔ—ete ke ana nte mmɔ ediɔŋ usuŋ Jehovah midighe ke ana nte isuŋi edi ke iso ofuri isɔŋ; iŋ, kpa ke ana nte akwa akaŋ odu, ke emi anade nte ewot mmɔ edieke mmɔ mikabakede esit.

29 Edi mme owo ikibuɔtke idem ke mme ikɔ mme prophet, edi mmɔ ema etop mmɔ esio; ndien usuk mmɔ mmɔ ema etop esin ke mme obube enyuŋ ekpɔŋ mmɔ ete ekpa. Ndien edikem ete ke mmɔ ekenam kpukpru ŋkpɔ emi nte asaŋade ye uyo edidem, Heth.

30 Ndien edikem ete ke ama ɔtɔŋɔ ndidu akwa unana ke isɔŋ oro, ndien mme andiduŋ ema etɔŋɔ ndikpaŋa ke usɔp ata eti eti ke ntak unana oro, koro edim ikiduhe ke iso isɔŋ.

31 Ndien edikem ete ke mme idiɔk udukikɔt ema edi ŋko ke iso isɔŋ oro, ndien ema ewot ediwak owo. Ndien edikem ete ke mme ufene mmɔ ema etɔŋɔ ndifehe ke iso mme idiɔk udukikɔt emi, eka isɔŋ ke usuk-usuk, emi mme Nephite ekekotde Zarahemla.

32 Ndien edikem ete ke ediwak mmɔ ema edu emi ekekpade ke usuŋ; edi, usuk ema edu emi ekefehede eduk isɔŋ ke usuk-usuk.

33 Ndien edikem ete ke Jehovah ama anam mme udukikɔt ete mmɔ ekubine mmɔ aba, edi ete yak mmɔ ebiɔŋɔ usuŋ man mme owo ekukan ube, man owo ekededi emi odomode ndibe mme idiɔk udukikɔt oro ekɔŋ ewot.

34 Ndien edikem ete ke mme owo ema etiene usuŋ-isaŋ mme unam oro, ndien ema ebume eta mme okpo mmɔ emi ekeduɔde ke usuŋ, tutu mmɔ ema ebume eta mmɔ kpukpru. Idahaemi ke ini mme owo ekekutde ete ke ana nte mmɔ ekpa mmɔ ema etɔŋɔ ndikabade esit mbaŋa mme ukwaŋ-ŋkpɔ mmɔ enyuŋ eseme enɔ Jehovah.

35 Ndien edikem ete ke ini mmɔ ema ekesuhɔde-idem mmɔ nte ekemde ke iso Jehovah enye ama ɔnɔ edim ke iso isɔŋ, ndien mme owo ema efiak etɔŋɔ ndikop odudu, ndien mfri ama ɔtɔŋɔ ndidu ke mme obio emi edude ke edere, ye ke kpukpru mme ŋkan-ŋkuk obio. Ndien Jehovah ama ayarade odudu esie owut mmɔ ke ndikpeme mmɔ mbaŋa akaŋ.