1 Ndien edikem ete ke Coriantumr ama okop nsɔŋidem ke mme unan esie, enye ɔtɔŋɔ nditi mme ikɔ emi Ether eketiŋde ɔnɔ enye.

2 Enye ama okut ete ke ema ewot ke akaŋkaŋ kaŋa ŋkpɔ nte mme million ikɔt esie iba, ndien enye ɔtɔŋɔ ndifuhɔ ke esit esie; iŋ, ema ewot ikpɔ idenowo mme million iba, ŋko ye mme iban mmɔ ye nditɔ mmɔ.

3 Enye ama ɔtɔŋɔ ndikabade esit ke idiɔk emi enye ekenamde; enye ama ɔtɔŋɔ nditi mme ikɔ emi eketiŋde ke inua mme prophet, ndien enye ama okut mmɔ ete ke mmɔ ema esu esim ini emi, ofuri ofuri; ndien ukpɔŋ esie ama ɔfuhɔ onyuŋ esin ndibɔ idɔŋesit.

4 Ndien edikem ete ke enye ama ewet ŋwed ɔnɔ Shiz, oyom enye ete enye ɔsuhɔ uwem mme owo oro, ndien ke enye ayayak obio ubɔŋ ke ntak uwem mme owo oro.

5 Ndien edikem ete ke ini Shiz ɔkɔbɔde ŋwed esie enye ama ewet ŋwed ɔnɔ Coriantumr, ete ke edieke enye ediyakde idem esie inɔ, ete enye owot enye ye akaŋkaŋ esie, ete ke enye ɔyɔsuhɔ uwem mme owo oro.

6 Ndien edikem ete ke mme owo ikikabakede esit ke ukwaŋ-ŋkpɔ mmɔ; ndien ikɔt Coriantumr ema edemede ke iyatesit ebaŋa ikɔt Shiz; ndien ikɔt Shiz ema edemede ke iyatesit ebaŋa ikɔt Coriantumr; ke ntre, ikɔt Shiz ema enɔ ikɔt Coriantumr ekɔŋ.

7 Ndien ke ini Coriantumr okokutde ete ke enye ɔmɔŋ akpa enye afiak efehe ke iso ikɔt Shiz.

8 Ndien edikem ete ke enye ama edi ke mme mmɔŋ Ripliancum, emi, ke ndikabade, edi akamba, mme ndikan kpukpru; ke ntre, ke ini mmɔ edisimde mme mmɔŋ emi mmɔ ewuk mme tent mmɔ; ndien Shiz ŋko owuk mme tent esie ekpere mmɔ; ndien ke ntak oro ke mkpɔŋ mmɔ ema edi ekɔŋ.

9 Ndien edikem ete ke mmɔ ema eŋwana ata ɔkpɔsɔŋ ekɔŋ, emi Coriantumr akafiakde enyene unan, ndien enye ama ɔsuhɔ ye unana iyip.

10 Ndien edikem ete ke mme mbon ekɔŋ Coriantumr ema eŋwana ye mme mbon ekɔŋ Shiz tutu mmɔ ekan mmɔ, ete mmɔ enam mmɔ ete efehe ke iso mmɔ; ndien mmɔ ema efehe enɔ usuk usuk, ndien ema ewuk mme tent mmɔ ke ebiet emi ekekotde Ogath.

11 Ndien edikem ete ke mbon ekɔŋ Coriantumr ema ewuk mme tent mmɔ ediana obot Ramah; ndien ekedi kpa obot oro ke ete mi Mormon ekedip mme ŋwed oro ɔnɔ Jehovah, emi ekedide edisana.

12 Ndien edikem ete ke mmɔ ema esobo ɔtɔ kiet kpukpru mme owo ke ofuri iso isɔŋ oro, emi owo mikiwotke, ibɔhɔke ekedi Ether.

13 Ndien edikem ete ke Ether ama okut kpukpru edinam mme owo; ndien enye ama okut ete ke mme owo emi ekedade enɔ Coriantumr ke ema eboho kiet ye mbon ekɔŋ Coriantumr; ndien mbon emi ekedade enɔ Shiz ema eboho kiet ye mbon ekɔŋ Shiz.

14 Ke ntre, mmɔ ke ufaŋ isua inaŋ ekebok mme owo kiet, man mmɔ ekan enyene kpukpru emi ekedude ke iso isɔŋ oro, ndien man mmɔ ekan ebɔ ofuri ukeme emi okodude ete mmɔ ekan ebɔ.

15 Ndien edikem ete ke ini mmɔ kpukpru ekebohode kiet, kpukpru owo ye mbon ekɔŋ emi enye oyomde, ye iban mmɔ ye nditɔ mmɔ—iden mbiba, iban, ye nditɔ emi ekamade mme ŋkpɔ ekɔŋ, enyenede mme otu-ekɔŋ, ye mme ikpanesit, ye mme usan-ibuot, ndien ke esinede ɔfɔŋ ke usuŋ ekɔŋ—mmɔ ema esaŋa eka iso kiet ye eken ndiŋwana ekɔŋ; ndien mmɔ ema eŋwana ke ofuri usen oro, edi ikanke.

16 Ndien edikem ete ke ini ekedide okoneyo idem ama emem mmɔ, enyuŋ enyɔŋ nna-ekɔŋ mmɔ; ndien ke ini mmɔ ema ekenyɔŋ nna-ekɔŋ mmɔ mmɔ ema etɔŋɔ nditua mfiori enyuŋ eseme ke ntak edinana eke mbon mmɔ emi ekewotde; ndien ata akamba ekedi mme eyet mmɔ, mme nditua mfiori ye mme eseme mmɔ, ete ke mmɔ ema esiak enyɔŋ ata eti eti.

17 Ndien edikem ete ke mkpɔŋ mmɔ ema efiak eka ekɔŋ, ndien akamba ye enyene ndik ke usen oro ekedi; edi, mmɔ ikikanke, ndien ke ini okoneyo akafiakde edi mmɔ ema esiak enyɔŋ ye mme eyet mmɔ, ye mme nditua mfiori, ye mme mfuhɔ mmɔ, ke ntak edinana eke mbon mmɔ emi ekewotde.

18 Ndien edikem ete ke Coriantumr ama afiak ewet ŋwed ɔnɔ Shiz, oyom ete yak enye okudi ekɔŋ aba, edi ete yak enye ada obio ubɔŋ oro, onyuŋ ɔsuhɔ mme uwem mme owo.

19 Edi sese, Spirit Jehovah ama etre ndikpep mmɔ, ndien Satan ama enyene ofuri odudu ke esit mme owo; koro ema eyak mmɔ enɔ isɔŋesit mmɔ, ye nnan esit mmɔ man esobo mmɔ; ke ntre mmɔ efiak eka ekɔŋ.

20 Ndien edikem ete ke mmɔ ema eŋwana ke ofuri usen oro, ndien ke ini okoneyo ekedide mmɔ ema ena ke mme akaŋkaŋ mmɔ.

21 Ndien ke mkpɔŋ mmɔ ema eŋwana tutu okoneyo edi.

22 Ndien ke ini okoneyo ekedide mmɔ ema eyuhɔ ye iyaresit, kpa nte owo emi ɔyuhɔde ye mmiŋ; ndien mmɔ ema efiak ena ke mme akaŋkaŋ mmɔ.

23 Ndien ke mkpɔŋ mmɔ ema efiak eŋwana; ndien ke ini okoneyo ekedide mmɔ kpukpru ema eduɔ ke akaŋkaŋ ibɔhɔke ekedi abayeduop ye iba eke ikɔt Coriantumr, ye ata ye usukkiet eke ikɔt Shiz.

24 Ndien edikem ete mmɔ ema ena ke mme akaŋkaŋ mmɔ okoneyo oro, ndien ke mkpɔŋ mmɔ ema efiak eŋwana, ndien mmɔ ema eŋwana ke ukeme mmɔ ye mme akaŋkaŋ mmɔ ye mme otu-ekɔŋ mmɔ, ke ofuri usen oro.

25 Ndien ke ini okoneyo ekedide edip ye duopeba eke ikɔt Shiz ekedu, ndien edip ye itiaba eke ikɔt Coriantumr ekedu.

26 Ndien edikem ete ke mmɔ ema edia ŋkpɔ enyuŋ ede idap, enyuŋ ebeŋe idem enɔ mkpa ke mkpɔŋ. Ndien mmɔ ekedi ikpɔ ye mme enyene odudu idenowo ke odudu idenowo.

27 Ndien edikem ete ke mmɔ ema eŋwana ke ufaŋ hour ita, ndien mmɔ ema esuhɔ ke ntak unana iyip.

28 Ndien edikem ete ke ini mme idenowo Coriantumr ekebɔde odudu emi ekemde man mmɔ ekan esaŋa, mmɔ ema ebeŋe idem ndifehe ke ntak uwem mmɔ; edi sese, Shiz ama adaha ada, ŋko ye mme idenowo esie, ndien enye ama otomo ke iyatesit esie ete ke enye eyewot Coriantumr midighe ke enye ayakpa ke akaŋkaŋ.

29 Ke ntre, enye ama ebine mmɔ, ndien ke mkpɔŋ enye ama esime mmɔ; ndien mmɔ ema efiak eŋwana ye akaŋkaŋ. Ndien edikem ete ke ini mmɔ kpukpru ema ekeduɔŋɔ ke akaŋkaŋ, ibɔhɔke ke ekedi Coriantumr ye Shiz, sese Shiz ama ɔsuhɔ ke ntak unana iyip.

30 Ndien edikem ete ke ini Coriantumr ekebere ke akaŋkaŋ esie, man enye ɔduɔk odudu ekpri, enye ama esibe ibuot Shiz osio.

31 Ndien edikem ete ke ini enye ama ekesibe ibuot Shiz osio, ete ke Shiz ama emenede idem ke mme ubɔk esie ndien ɔduɔ; ndien ke enye ama aŋwana oyom ibifik, enye akpa.

32 Ndien edikem ete ke Coriantumr ama ɔduɔ ke isɔŋ, ndien akabade etie nte enye ikinyeneke uwem.

33 Ndien Jehovah ama etiŋ ikɔ ɔnɔ Ether, onyuŋ ɔdɔhɔ enye ete: Ka iso. Ndien enye ama aka iso, onyuŋ okut ete ke mme ikɔ Jehovah kpukpru ema osu; ndien enye ama okure ŋwed esie; (ndien ubak ikie ami nwetke) ndien enye ama edip mmɔ ke usuŋ emi mbon Limhi ekutde mmɔ.

34 Idahaemi mme akpatre ikɔ emi Ether ewetde edi emi: Edieke Jehovah oyomde ete emen mi edɔk ke enyɔŋ, mme ete ami nkut uduak Jehovah ke obukidem, idighe akpan, edieke edide ete ke enyaŋa mi ke obio ubɔŋ Abasi. Amen.