1 Ndien idahaemi ami, Moroni, nyaka iso ndinɔ mbuk Jared ye eyeneka esie.

2 Koro edikem ke ini Jehovah ama ekebeŋe mme itiat emi eyeneka Jared ekemende ɔdɔk oduk obot, eyeneka Jared ama ɔsuhɔde ɔwɔrɔ ke obot edi, ndien enye ama esin mme itiat oro ke mme ubom emi ekebeŋede, kiet ke utit kiet kiet; ndien sese, mmɔ ema enɔ uŋwana ke mme ubom oro.

3 Ndien ke ntem ke Jehovah akanam mme itiat eyama ke ekim, ndinɔ mme idenowo, iban, ye nditɔ uŋwana, man mmɔ ekube mme ikpɔ mmɔŋ oro ke ekim.

4 Ndien edikem ete ke ini mmɔ ema eketim kpukpru utɔ udia, man otodo mmɔ eka iso edu uwem ke mmɔŋ oro, ye ŋko udia ndinɔ mme erɔŋ ye mme ufene mmɔ, ye unam-ikɔt mme unam mme inuen ekededi emi mmɔ edimende ye mmɔ—ndien edikem ete ke ini mmɔ ema ekenam kpukpru mme ŋkpɔ emi mmɔ ema eduk mme ubom mme mme ubom-mmɔŋ mmɔ, ndien etɔŋɔ uwat eka ke inyaŋ, eyak idem mmɔ enɔ Jehovah Abasi mmɔ.

5 Ndien edikem ete ke Jehovah Abasi ama anam ete ɔkpɔsɔŋ ofum abara ke enyɔŋ iso mme mmɔŋ, akade isɔŋ eŋwɔŋɔ; ndien ke ntem ema etop mmɔ ke enyɔŋ mme mbufit inyaŋ ke iso ofum.

6 Ndien edikem ete ke ediwak ini ema enyini mmɔ ke mme udem inyaŋ, ke ntak mme ikpɔ mbufit-mmɔŋ emi ekemende mmɔ, ye ŋko ikpɔ ye mme enyene ndik oyobio emi eketode nte ofum oro ɔkɔsɔŋde.

7 Ndien edikem ete ke ini ekenyinide mmɔ ke udem mmɔŋ ndomo kiet ikiduhe emi ekekemede ndifiomo mmɔ, mme ubom mmɔ ke ekesiride nte usan, ndien ŋko mmɔ ekesiri nte ubom Noah; ke ntak oro ke ini mme ediwak mmɔŋ ekekanade mmɔ ekuk mmɔ ema eseme enɔ Jehovah, ndien enye ama afiak ada mmɔ edi ke enyɔŋ mme mmɔŋ.

8 Ndien edikem ete ke ofum ikitreke ndifum nka isɔŋ eŋwɔŋɔ ke ini mmɔ ekedude ke enyɔŋ mme mmɔŋ; ndien ke ntem ema ebin mmɔ eka ke iso ofum.

9 Ndien mmɔ ema ekwɔ mme itoro enɔ Jehovah; iŋ, eyeneka Jared ama ɔkwɔ mme itoro ɔnɔ Jehovah, enye ama ndien ɔkɔm onyuŋ otoro Jehovah ke ofuri usen; ndien ke ini okoneyo ekedide, mmɔ ikitreke nditoro Jehovah.

10 Ndien ke ntem ke ekebin mmɔ eka iso; ndien idiɔk-unam inyaŋ ndomo kiet ikikemeke ndisuan mmɔ, mme isɔnsi ikikemeke ndibiat mmɔ; ndien mmɔ ema enyene uŋwana eka iso, mme ekedi ke enyɔŋ mmɔŋ mme ke idak mmɔŋ.

11 Ndien ke ntem ema ebin mmɔ eka iso, usen ikita ye aba ye inaŋ ke enyɔŋ mmɔŋ.

12 Ndien mmɔ ema edian ke mben-inyaŋ isɔŋ eŋwɔŋɔ. Ndien ke ini mmɔ ekedoride ikpat ke mme mben inyaŋ eke isɔŋ eŋwɔŋɔ mmɔ ema esuk idem mmɔ enɔ isɔŋ ke iso isɔŋ oro, enyuŋ esuhɔde idem mmɔ ke iso Jehovah, enyuŋ etua eyet idaresit ke iso Jehovah, ke ntak udim mme mmem mmem mbɔm esie ɔnɔ mmɔ.

13 Ndien edikem ete mmɔ eka ke enyɔŋ iso isɔŋ oro, enyuŋ etɔŋɔ nditibi isɔŋ.

14 Ndien Jared ekenyene nditɔ iden inaŋ; ndien ekekot mmɔ Jacom, ye Gilgah, ye Mahah, ye Orihah.

15 Ndien eyen eka Jared ŋko ama obon nditɔ iden ye nditɔ iban.

16 Ndien mme ufan Jared ye eyen eka esie ekedi ke ibat ŋkpɔ nte edip ye ukpɔŋ iba; ndien mmɔ ŋko ema ebon nditɔ iden ye nditɔ iban mbemiso mmɔ edi isɔŋ eŋwɔŋɔ; ndien ke ntak oro mmɔ etɔŋɔ ndidi ediwak.

17 Ndien ema ekpep mmɔ ndisaŋa ke nsuhɔdeidem ke iso Jehovah; ndien ema ekpep mmɔ ŋko eto ke enyɔŋ.

18 Ndien edikem ete ke mmɔ ema etɔŋɔ ndisuana ke iso isɔŋ, ye nditɔt ye nditibi isɔŋ; ndien mmɔ ema ekop odudu ke isɔŋ oro.

19 Ndien eyen eka Jared ɔtɔŋɔ ndisɔŋ, ndien okut ete ke ana nte enye ke mibighike ɔsuhɔde oduk udi; ke ntre enya ama ɔdɔhɔ Jared ete: Yak nnyin ibok ɔtɔkiet ikɔt nnyin man nnyin ibat mmɔ, man nnyin ifiɔk ito mmɔ se mmɔ ediyomde ito nnyin mbemiso nnyin isuhɔde iduk mme udi nnyin.

20 Ndien ke ntre ema ebok mme owo ɔtɔkiet. Idahaemi ibak nditɔ iden ye nditɔ iban eyeneka Jared ekedi edip ye mme ukpɔŋ iba; ndien ibat nditɔ iden ye nditɔ iban Jared ekedi duopeba, enye ekenyenede nditɔ iden inaŋ.

21 Ndien edikem ete ke mmɔ ema ebat ikɔt mmɔ; ndien ke ini mmɔ ema ekebat mmɔ, mmɔ ema eyom eto mmɔ mme ŋkpɔ emi mmɔ ekeyomde ete mmɔ enam mbemiso mmɔ esuhɔde eduk ke mme udi mmɔ.

22 Ndien edikem ete ke mme owo ema eyom eto mmɔ ete yak mmɔ eyet eyen eden mmɔ kiet adan ete edi edidem ɔnɔ mmɔ.

23 Ndien idahaemi, sese, emi ekedi mfuhɔ ɔnɔ mmɔ. Ndien eyeneka Jared ama ɔdɔhɔ mmɔ ete: Ke akpanikɔ ŋkpɔ emi ada aka ŋkpɔkɔbi.

24 Edi Jared ama ɔdɔhɔ eyen eka esie ete: Yak mmɔ enyene edidem. Ndien ke ntak oro enye ama ɔdɔhɔ mmɔ ete: Emek esio ke otu nditɔ iden nnyin edidem, kpa emi mbufo emekde.

25 Ndien edikem ete ke mmɔ ema emek kpa akpa eyen eke eyen eka Jared; ndien enyiŋ esie ekedi Pagag. Ndien edikem ete ke enye ama esin inyuŋ iyomke ndidi edidem mmɔ. Ndien mme owo ema eyom ete yak ete esie enyik enye, edi ete esie esin; ndien enye ɔnɔ mmɔ uyo ete yak mmɔ ekunyik owo ndomo kiet ete edi edidem mmɔ.

26 Ndien edikem ete ke mmɔ ema emek kpukpru nditɔ eka iden Pagag, ndien mmɔ ikiyomke.

27 Ndien edikem ete ke nditɔ iden Jared ŋko ikiyomke, kpa kpukpru ibɔhɔke ke ekedi kiet; ndien ema eyet Orihah adan ndidi edidem nnɔ mme owo.

28 Ndien enye ɔtɔŋɔ ndikara, ndien mme owo etɔŋɔ ndiforo; ndien mmɔ ekabade enyene ŋkpɔ ata eti eti.

29 Ndien edikem ete ke Jared ama akpa, ye eyen eka esie ŋko.

30 Ndien edikem ete ke Orihah ama asaŋa ke nsuhɔde idem ke iso Jehovah, ndien ama eti mme utɔ ikpɔ ŋkpɔ emi Jehovah akanamde ɔnɔ ete esie, ndien ŋko ekpep ikɔt esie mme utɔ ikpɔ ŋkpɔ emi Jehovah akanamde ɔnɔ mme ete mmɔ.