1 Ndien idahaemi ami, Moroni, nkaiso ndikure ŋwed mi kabaŋa nsobo mme owo emi nsuk ŋwetde mbaŋa.

2 Koro sese, mmɔ ema esin kpukpru mme ikɔ Ether; koro ke akpanikɔ enye ama ɔdɔhɔ mmɔ abaŋa kpukpru ŋkpɔ, tɔŋɔ ke ntɔŋɔ owo; ndien ete ke ini mme mmɔŋ ema ekebe ekpɔŋ iso isɔŋ emi enye amakabade edi isɔŋ emi emekde esio ke kpukpru mme isɔŋ eken, isɔŋ emi Jehovah emekde; ke ntre Jehovah oyoyom ete kpukpru mme owo ena nte enam utom enɔ enye emi edude ke iso do.

3 Ndien ekedi ebiet Obufa Jerusalem, emi anade nte ɔsuhɔde ɔwɔrɔ ke heaven edi, ye edisana ebiet Jehovah.

4 Sese, Ether ama okut mme usen Christ, ndien enye ama etiŋ abaŋa Obufa Jerusalem ke isɔŋ emi.

5 Ndien enye ama etiŋ ŋko abaŋa ufɔk Israel, ye Jerusalem emi Lehi editode—ke ini ema esobo enye ana nte efiak ebɔp enye, edisana obio enɔ Jehovah; ke ntre, ikikemeke ndidi obufa Jerusalem koro enye ama odu ke ini eset; edi ana nte efiak ebɔp enye, ndien akabade edi edisana obio Jehovah; ndien ana nte ebɔp enye enɔ ufɔk Israel—

6 Ndien ke ana nte ebɔp Obufa Jerusalem ke isɔŋ emi, enɔ nsuhɔ ubon Joseph, koro ke mme ŋkpɔ emi utɔ ama odu.

7 Koro nte Joseph akadade ete esie ɔsuhɔde edi isɔŋ Egypt, kpa ntre enye akakpa do; ke ntre, Jehovah ama ada nsuhɔ ubon Joseph ɔwɔrɔ ke Jerusalem, man enye enyene mbɔm abaŋa ubon Joseph man mmɔ ekukpa, kpa nte enye ekenyenede mbɔm abaŋa ete Joseph ete enye okukpa.

8 Ke ntre, nsuhɔ ufɔk Joseph ke edibɔp ke isɔŋ emi; ndien enye eyedi isɔŋ inyene mmɔ; ndien mmɔ eyebɔp edisana obio enɔ Jehovah, nte Jerusalem eke eset, ndien mmɔ iditimekede aba, tutu utit edi ke ini ererimbot edibede ifep.

9 Ndien obufa heaven oyodu ye obufa isɔŋ; ndien mmɔ eyetie nte akani ibɔhɔke ke akani ebe efep, ndien kpukpru ŋkpɔ ekabade edi obufa.

10 Ndien ke ini oro ke Obufa Jerusalem edidi; ndien ɔfɔfɔn ɔnɔ mbon emi eduŋde do, koro edi mmɔ ke mme ewura mmɔ edi afia oto ke iyip Eyen erɔŋ; ndien mmɔ edi mbon emi ebatde ke otu nsuhɔ ubon Joseph, emi ekedide eke ufɔk Israel.

11 Ndien ke ini oro ŋko edidi Jerusalem eke eset; ye mme andiduŋ do, ɔfɔfɔŋ ɔnɔ mmɔ, koro eyet mmɔ ke iyip Eyen erɔŋ; ndien mmɔ edi mbon emi ekesuande enyuŋ ebokde eto mbaŋ isɔŋ inaŋ, ye mme obio ke edere, ndien edi mme andibuana ke edisu ediomi emi Abasi akanamde ye ete mmɔ, Abraham.

12 Ndien ke ini mme ŋkpɔ emi edide, adade edisu ikɔ Abasi emi ɔdɔhɔde, mmɔ edi mbon emi ekedide akpa, emi edidade edem; ndien mmɔ edi mbon emi ekedade edem, emi edidide akpa.

13 Ndien ami nkoyom ndiwet se iwakde ikan emi, edi ekpan mi, edi ikpɔ ye utibe ke mme prophecy Ether ekedi; edi mmɔ ese enye ke ikpikpu, enyuŋ ebin enye esio; ndien enye edip idem esie ke aba-itiat ke uwemeyo, ndien ke okoneyo enye ɔwɔrɔ ese mme ŋkpɔ emi anade nte edisim mme owo.

14 Ndien nte enye okoduŋde ke aba-itiat enye ama ewet nsuhɔ ŋwed emi, esede mme nsobo emi ekesimde mme owo, ke okoneyo.

15 Ndien edikem ete ke kpa ke isua oro emi ekebinde enye esio ke otu mme owo akamba ekɔŋ ama ɔtɔŋɔ ndidu ke otu mme owo, koro ediwak ema edu emi ekedahade eda, emi ekedide ikpɔ idenowo, enyuŋ eyomde ndiwot Coriantumr ke mme ndedibe uduak ibak mmɔ, emi eketiŋde ebaŋa.

16 Ndien idahaemi Coriantumr, ke ekpepde, ke idem esie, ke ofuri usɔ ekɔŋ ye ofuri ŋkari ererimbot, ke ntre enye ama ɔnɔ mmɔ ekɔŋ emi ekeyomde ndiwot enye.

17 Edi enye ikikabakede esit, idighe ndiye nditɔ iden mme nditɔ iban esie; idighe ndiye nditɔ idem ye nditɔ iban Cohor; idighe ndiye nditɔ iden ye nditɔ iban Corihor; ke akpatre, ikiduhe ndiye nditɔ iden ye nditɔ iban ke ofuri iso isɔŋ emi ekekabakede esit ke mme idiɔk-ŋkpɔ mmɔ.

18 Ke ntre, edikem ete ke akpa isua emi Ether okoduŋde ke aba-itiat, ediwak mme owo ema edu emi ekewotde ke akaŋkaŋ eke mme ebuana ŋkari oro, enwanade ye Coriantumr man mmɔ enyene obio ubɔŋ oro.

19 Ndien edikem ete ke nditɔ iden Coriantumr ema enwana eti eti ndien iyip ama ɔwɔrɔ eti eti.

20 Ndien ke ɔyɔhɔ isua iba ikɔ Jehovah ama edisim Ether, ete yak enye aka onyuŋ eketiŋ nte prophet ɔnɔ Coriantumr ete, edieke enye edikabade esit, ye ofuri mbon ufɔk esie, Jehovah ɔyɔnɔ enye obio ubɔŋ esie onyuŋ efen ɔnɔ mme owo—

21 Midighe ntre ana nte ewot mmɔ, ye ofuri mbon ufɔk esie ibɔhɔke edi enye. Ndien ana nte enye odu uwem man okut nte mme prophecy esude emi eketiŋde ebaŋa mbon efen ebɔde isɔŋ oro nte inyene mmɔ; ndien ana nte mmɔ ebuk Coriantumr; ndien ana nte ewot kpukpru ukpɔŋ ibɔhɔke enye edi Coriantumr.

22 Ndien edikem ete ke Coriantumr ikikabakede esit, idighe mbon ufɔk esie, idighe mme owo; ndien mme ekɔŋ oro ikitreke; ndien mmɔ eyom ndiwot Ether, edi enye efehe ɔkpɔŋ iso mmɔ onyuŋ afiak edibe ke aba-itiat.

23 Ndien edikem ete ke Shared ama adaha ada, ndien enye ŋko ama ɔnɔ Coriantumr ekɔŋ; ndien enye ama akan enye, tutu ete ke ɔyɔhɔ isua ita enye ama ada enye edisin ke ŋkpɔkɔbi.

24 Ndien nditɔ iden Coriantumr, ke ɔyɔhɔ isua inaŋ, ema ekan Shared, enyuŋ efiak ebɔ obio ubɔŋ enɔ ete mmɔ.

25 Idahaemi ekɔŋ ama ɔtɔŋɔ ndidu ke ofuri iso isɔŋ oro, edenowo kiet kiet ye ŋka esie aŋwana ɔnɔ se enye oyomde.

26 Ndien mme inɔ ema edu, ndien ke akpatre, kpukpru ofuri oruk ibak ke ofuri iso isɔŋ oro.

27 Ndien edikem ete ke Coriantumr ama ayat esit eti eti ye Shared, ndien enye aka ebine enye ye mme mbon ekɔŋ esie ndiŋwana ekɔŋ; ndien mmɔ ema esobo ke ɔkpɔsɔŋ iyatesit, ndien mmɔ ema esobo ke itighede Gilgal; ndien ekɔŋ oro ama akabade ɔsɔŋ eti eti.

28 Ndien edikem ete ke Shared ama aŋwana ye enye ke ufaŋ usen ita. Ndien edikem ete ke Coriantumr ama akan enye, onyuŋ ebin enye tutu enye edisim mme unaisɔŋ Heshlon.

29 Ndien edikem ete ke Shared ama ama afiak ɔnɔ enye ekɔŋ ke mme unaisɔŋ; ndien sese, enye ama akan Coriantumr, onyuŋ afiak ebin enye ɔnɔ edem ekesim itighede Gilgal.

30 Ndien Coriantumr ama afiak ɔnɔ Shared ekɔŋ ke itighede Gilgal, ke emi enye akakande Shared onyuŋ owotde enye.

31 Ndien Shared ama ɔnɔ Coriantumr unan ke ifuhi, emi enye mikikaha ekɔŋ aba ke ufaŋ isua iba, ke ini emi kpukpru mme owo ke iso isɔŋ oro keduɔk iyip, ndien ndomo kiet ikiduhe ndikpan mmɔ.