1 Ndien edikem ete ke enye ama obon Omer, ndien Omer ama akara ke itie esie. Ndien Omer obon Jared; ndien Jared obon mme nditɔ iden ye mme nditɔ iban.

2 Ndien Jared ɔsɔŋ-ibuot ye ete esie, ndien edi onyuŋ oduŋ ke isɔŋ Heth. Ndien edikem ete ke enye ama enem inua ye ediwak owo, ke ntak mme ŋkari ikɔ esie, tutu enye ama enyene ibio obio ubɔŋ oro.

3 Ndien ke ini enye ama ekenyene ibio obio ubɔŋ oro enye ama ɔnɔ ete esie ekɔŋ, ndien enye ama emen ete esie esin ke ŋkpɔkɔbi, onyuŋ anam enye anam utom ke ŋkpɔkɔbi.

4 Ndien idahaemi, ke mme usen ukara Omer enye okodu ke ŋkpɔkɔbi ke ibio mme usen esie. Ndien edikem ete ke enye ama obon mme nditɔ iden ye mme nditɔ iban, ke otu emi ekedude Esrom ye Coriantumr;

5 Ndien mmɔ ema eyat esit ata eti eti ke ntak mme edinam Jared eyeneka mmɔ, tutu ete ke mmɔ ema emenede mbon ekɔŋ enyuŋ enɔ Jared ekɔŋ. Ndien edikem ete ke mmɔ ema enɔ enye ekɔŋ ke okoneyo.

6 Ndien edikem ete ke ini mmɔ ema ekewot mbon ekɔŋ Jared mmɔ ema eyom ndiwot enye ŋko; ndien enye ekpe mmɔ ubɔk man mmɔ ekuwot enye, ndien enye eyeyak obio ubɔŋ ɔnɔ ete esie. Ndien edikem ete ke mmɔ ema enɔ enye uwem esie.

7 Ndien idahaemi Jared ama akabade ɔfuhɔ ata eti eti ke ntak edinana obio ubɔŋ oro, koro enye ama odori esit esie ke obio ubɔŋ oro ye ke ubɔŋ ererimbot.

8 Idahaemi eyen anwan Jared ke ɔfiɔkde ŋkari ata etieti, ye ke okutde mme mfuhɔ ete esie, ekere ndisio uduak emi enye edibɔde obio ubɔŋ inɔ ete esie.

9 Idahaemi eyen anwan Jared ama eye ata eti eti. Ndien edikem ete ke enye ama eneme nneme ye ete esie, onyuŋ ɔdɔhɔ enye ete: Ntak emi ete mi ɔfuhɔde eti eti? Ndi enye ikotke mbuk emi mme ete nnyin ekeda ebe akwa utuŋɔ? Sese, ndi mbuk iduhe emi abaŋade mbon eset, emi mmɔ ke mme ndedebe uduak mmɔ ema ebɔ mme obio ubɔŋ ye akwa ubɔŋ?

10 Ndien idahaemi, ke ntak oro, yak ete mi ɔdɔŋ ekekot Akish, eyen Kimnor; ndien sese, ami meye, ndien ami nyenek unek ke iso esie, ndien nyanam esit enem enye, man enye oyom mi nte ŋwan; ke ntre edieke ediyomde ito fi ete yak afo ɔnɔ mi enye nte ŋwan, ini oro ke afo edidɔhɔ ete: Ami nyɔnɔ enye edieke afo edinɔde mi ibuot ete mi, edidem.

11 Ndien idahaemi Omer ekedi ufan ɔnɔ Akish; ke ntre, ke ini Jared ɔkɔdɔŋde ekekot Akish, eyen aŋwan Jared ama enek unek ke iso esie ete enye enem enye esit, tutu ete ke enye ama oyom enye nte ŋwan. Ndien edikem ete ke enye ama ɔdɔhɔ Jared ete: Nɔ mi enye nte ŋwan.

12 Ndien Jared ɔdɔhɔ enye ete: Ami nyɔnɔ i enye, edieke afo edinɔde mi ibuot ete mi, edidem.

13 Ndien edikem ete ke Akish ama obok ke esit ufɔk Jared kpukpru mme iman esie, ndien ɔdɔhɔ mmɔ ete: Ndi mbufo eyetomo enɔ mi ete ke mbufo eyeda ye ami ke ŋkpɔ emi ami ndiyomde nto mbufo?

14 Ndien edikem ete ke mmɔ kpukpru ema etomo enɔ enye, ke Abasi heaven, ŋko ye ke mme heaven, ŋko ye ke ererimbot, ye ke mme ibuot mmɔ, ete ke owo ekededi emi edisinde uŋwam emi Akish oyomde ana nte anana ibuot esie; ndien owo ekededi emi ediyarade ŋkpɔ ekededi emi Akish akanamde mmɔ efiɔk, ukem oro ana nte anana uwem esie.

15 Ndien edikem ete ke ntem mmɔ ema enyime ye Akish. Ndien Akish ama ɔnɔ mmɔ mme uŋwɔŋɔ emi mbon eset ekenɔde owo emi okoyomde odudu ŋko, emi ekeyakde enɔ kpa tɔŋɔ ke Cain, emi ekedide owot-owo tɔŋɔ ke editɔŋɔ.

16 Ndien ekenim mmɔ ke odudu satan ete enam mme uŋwɔŋɔ emi enɔ mme owo, man enim mmɔ ke ekim, man aŋwam utɔ emi oyomde odudu man enyene odudu, ye ndiwot, ye ndikan ubɔk, ye ndisu-nsu, ye ndinam kpukpru utɔ ibak ye mme akpara.

17 Ndien ekedi eyen aŋwan Jared ekesin enye ke esit esie ete ɔduŋɔde mme ŋkpɔ eset emi; ndien Jared esin enye ke esit Akish; ke ntre, Akish anam enye ɔnɔ iman ye mme ufan esie, ada mmɔ ɔwɔrɔ ye mme ndiye uŋwɔŋɔ ete enam ŋkpɔ ekededi emi enye okoyomde.

18 Ndien edikem ete ke mmɔ ema esiak ebuana ŋkari, kpa nte mmɔ ke eset; ebuana emi edide mbubiam ye ibak akan kpukpru, ke iso Abasi;

19 Koro Jehovah inamke mme ebuana ŋkari, ŋko enye iyomke ete owo ɔduɔk iyip, edi ke kpukpru ŋkpɔ akpan enye, tɔŋɔ ke editɔŋɔ owo.

20 Ndien idahaemi ami, Moroni, ŋwetke edu mme uŋwɔŋɔ ye mme ebuana mmɔ, koro ema enam mi mfiɔk nte ke enyene mmɔ ke otu kpukpru mme owo, ndien enyene mmɔ ke otu mme Nephite.

21 Ndien mmɔ enam nsobo mme owo emi emi ami ntiŋde mbaŋa idahaemi, ŋko ye nsobo eke mbon Nephi.

22 Ndien obio ekededi emi edidade ye utɔ mme ebuana ŋkari oro, man enyene odudu ye udori, tutu mmɔ esuana eyɔhɔ ke obio, sese, eyesobo mmɔ; koro Jehovah idiyakke ete iyip ndisana owo esie, emi mmɔ ediduɔkde, esiseme enɔ enye eto isɔŋ eyom usiene abaŋa mmɔ ndien edi enye isioho mmɔ usiene.

23 Ke ntre, O mbufo mme Gentile, edi ifiɔk ke Abasi ete ewut mbufo mme ŋkpɔ emi, man otodo mbufo ekeme ndikabade esit ke mme idiɔk ŋkpɔ mbufo, ndien ekuyak ete mme ebuana mkpa emi edidoro mbufo, emi esiakde man enyene odudu ye udori—ndien utom, iŋ, kpa utom nsobo edisim mbufo, iŋ, kpa akaŋkaŋ edinen Nsinsi Abasi eyedidoro mbufo, man edorode enyuŋ esobo mbufo edieke mbufo ediyakde mme ŋkpɔ emi edu.

24 Ke ntre, Jehovah ɔnɔ mbufo uyo, ke ini mbufo edikutde mme ŋkpɔ emi edide ke otu mbufo man mbufo edemede ke ifiɔk idiɔk idaha mbufo, ke ntak ebuana ŋkari emi edidude ke otu mbufo; midighe ɔyɔdiɔk ɔnɔ enye, ke ntak iyip mmɔ emi ewotde; koro mmɔ eseme eto ke ntan eyom usiene enɔ enye, ŋko ye enɔ mbon emi ekesiakde enye.

25 Koro eyedikem ete ke owo ekededi emi asiakde enye oyom ndibiat uwɔrɔ ufin eke ofuri isɔŋ, mme idut ye mme obio, ndien enye ada nsobo kpukpru mme owo edi, koro edi satan asiak enye, emi edide ete kpukpru nsu; kpa ukem osu-nsu oro emi akabiaŋade akpa ete ye eka nnyin, iŋ, kpa ukem osu-nsu oro emi akanamde owo owot owo tɔŋɔ ke editɔŋɔ; emi anamde esit mme owo esɔŋ tutu mmɔ ewot mme prophet, enyuŋ etɔ mmɔ ke itiat, ndien ebin mmɔ esio tɔŋɔ ke editɔŋɔ.

26 Ke ntre, ami, Moroni, enɔ mi uyo ete ŋwet mme ŋkpɔ emi man esio idiɔk efep, ndien man ini edi ete Satan okenyene odudu ke mme esit nditɔ owo, edi man ekpek mmɔ ete enam eti kpukpru ini, man mmɔ edi etiene ntɔŋɔ ofuri edinen enyuŋ ebɔhɔ.