1 Ndien edikem ete eyeneka Jared, (idahaemi ibat ubom emi ekebeŋede ekedi itiaita) aka ke obot oro, emi mmɔ ekekotde obot Shelem, ke ntak ata edikoŋ esie, onyuŋ atara osio ke akamba itiat mkpri itiat efitekiet; ndien mmɔ ema efia enyuŋ esana, kpa nte glass emi ekutde ŋkaŋ oko; ndien enye amakama mmɔ ke mme ubɔk esie ɔdɔk enyɔŋ obot oro, onyuŋ afiak eseme ɔnɔ Jehovah, ete:

2 O Jehovah, afo ɔmɔdɔhɔ ete ke ana nte mme ukwɔ ekanade nnyin ekuk. Idahaemi sese, O Jehovah, ndien kuyatesit ye isuŋutom fo ke ntak mmemidem esie ke iso fo; koro nnyin imifiɔk ite ke afo edi edisana onyuŋ oduŋ ke mme heaven, ŋko ke nnyin idotke ke iso fo; ke ntak iduɔ oro mme obot nnyin ekabade idi idiɔk kpukpru ini, edi, O Jehovah, afo ɔmɔnɔ nnyin ibet ete ke ana nte nnyin ikot fi, man oto ke afo nnyin ikeme ndibɔ nte asaŋade ye mme udɔŋ nnyin.

3 Sese, O Jehovah, afo amamia nnyin ke ntak ukwaŋ-ŋkpɔ nnyin, onyuŋ ebin nnyin ika, ndien ke mme ediwak isua emi nnyin imidu ke wilderness; edi, afo amenyene mbɔm abaŋa nnyin. O Jehovah, se mi ke mbɔm, nyuŋ wɔŋɔde iyatesit fo kpɔŋ ikɔt fo emi, ndien kuyak ete mmɔ ekebe utuŋɔ iyatest emi ke ekim, edi se mme ŋkpɔ emi ami ntatde nsio ke akamba itiat.

4 Ndien ami mɔfiɔk O Jehovah, nte ke afo emenyene kpukpru odudu, onyuŋ ekeme ndinam ŋkpɔ ekededi emi afo oyomde ɔnɔ ufɔn owo; ke ntak oro tuk mme itiat emi, O Jehavah, ye nnuenubɔk fo, nyuŋ beŋe mmɔ ete mmɔ eyama ewɔrɔ ke ekim; ndien mmɔ eyeyama ewɔrɔ enɔ nnyin ke mme ubom emi nnyin ikibeŋede, man nnyin inyene uŋwana ke ini nnyin idibede inyaŋ emi.

5 Sese, O Jehovah, afo emekeme ndinam emi. Nnyin imifiɔk ite ke afo emekeme ndisio nwut akwa odudu, emi etiede nte ekpri ɔnɔ ifiɔk mme owo.

6 Ndien edikem ete ke ini eyeneka Jared ama eketiŋ mme ikɔ emi, sese, Jehovah ama anyanade ubɔk esie onyuŋ otuk mme itiat oro kiet kiet ye nnuenubɔk esie. Ndien ema emen ufukiso esio ke mme enyin eyeneka Jared, ndien enye ama okut nnuenubɔk Jehovah; ndien enye eketie nte nnuenubɔk edenowo, nte obuk ye iyip; ndien eyeneka Jared ama ɔduɔ ke isɔŋ ke iso Jehovah, koro ndik ama omum enye.

7 Ndien Jehovah okut ete ke eyeneka Jared ama ɔduɔ ke isɔŋ; ndien Jehovah ɔdɔhɔ enye ete: Dahada, ntak emi afo ɔduɔde?

8 Ndien enye ɔdɔhɔ Jehovah ete: Ami nkokut nnuenubɔk Jehovah, ndien ami mfehe ndik mbak enye idimia mi; koro ami ŋkɔfiɔkke nte ke Jehovah enyene obuk ye iyip.

9 Ndien Jehovah ɔdɔhɔ enye ete: Ke ntak mbuɔtidem fo afo omokut ete ke ami nyeda nnɔ idem mi obuk ye iyip; ndien akananam owo idighe ke iso mi ye utɔ ɔkpɔsɔŋ mbuɔtidem nte afo edide; koro ekpedi ikidighe ntre afo ukpukukwe nnuenubɔk mi. Ndi ama okut akan emi?

10 Ndien enye ama ɔbɔrɔ ete: Iŋ iŋ; Jehovah, wut mi idem fo.

11 Ndien Jehovah ama ɔdɔhɔ enye ete:Ndi afo ɔmɔbuɔt idem ke mme ikɔ emi ami nditiŋde?

12 Ndien enye ama ɔbɔrɔ ete: Iŋ, Jehovah, ami mɔfiɔk nte ke afo etiŋ akpanikɔ, koro afo edi Abasi akpanikɔ, ndien ukumeke ndisu nsu.

13 Ndien ke ini enye ama eketiŋ mme ikɔ emi, sese, Jehovah ama owut enye idem esie, onyuŋ ɔdɔhɔ ete: Ke ntak emi afo ɔfiɔkde mme ŋkpɔ emi efak fi esio ke iduɔ; ke ntak oro efiak eda fi edi ke iso mi; ke ntak oro ami nwut fi idem mi.

14 Sese, ami ndi enye emi ekebeŋede idem tɔŋɔ ke ntɔŋɔ ererimbot ete ndifak ikɔt mi. Sese, ami ndi Jesus Christ. Ami ndi Ete ye Eyen. Ke ami ke ofuri ubon owo edinyene uwem, ndien eke nsinsi, kpa mbon emi edibuɔtde idem ke enyiŋ mi; ndien mmɔ eyekabade edi nditɔ iden mi ye nditɔ iban mi.

15 Ndien akananam ami nwutke owo idem mi emi ami nkobotde, koro akananam owo ibuɔtke idem ke ami nte afo. Afo omokut ete ke ebot fi ke mbiet mi? Iŋ, kpa kpukpru owo ke ekebot ke editɔŋɔ ke mbiet mi.

16 Sese, idem emi, emi afo okutde idahaemi, edi idem spirit mi; ndien owo ke ami nkobot ke mbiet idem spirit mi; ndien kpa nte ami ŋwɔrɔde nnɔ fi ndidu ke spirit ke ami ndiwɔrɔ nnɔ ikɔt mi ke obukidem.

17 Ndien idahaemi, nte ami, Moroni, nkɔdɔhɔde ke nkekemeke ndinam ofuri mbuk mbaŋa mme ŋkpɔ emi emi ekewetde, ke ntak oro ekem mi ndidɔhɔ nte ke Jesus ama owut edenowo emi idem esie ke spirit, kpa ke utɔ ye ke mbiet ukem idem oro kpa nte enye okowutde mme Nephite idem esie.

18 Ndien enye ama anam utom ɔnɔ enye kpa nte enye akanamde utom ɔnɔ mme Nephite; ndien kpukpru emi, man edenowo emi ɔfiɔk ete ke enye ekedi Abasi, ke ntak mme ediwak ikpɔ utom emi Jehovah ama kowut enye.

19 Ndien ke ntak ifiɔk edenowo emi owo ikikanke ikpan enye ndikut esit ikpehe; ndien enye ama okut nnuenubɔk Jesus, emi, ke ini enye okokutde, enye ɔduɔ ye ndik; koro enye ama ɔfiɔk ete ke ekedi nnuenubɔk Jehovah; ndien enye ikibuɔtke idem aba koro enye ama ɔfiɔk, iyikke ndomo kiet.

20 Ke ntre, ke enyenede mfɔnmma ifiɔk emi abaŋa Abasi, owo ikikanke ikpan enye ndiduk ikpehe; ke ntak oro enye ama okut Jesus; ndien enye ama anam utom ɔnɔ enye.

21 Ndien edikem ete Jehovah ama ɔdɔhɔ eyeneka Jared ete: Sese, afo uduyakke mme ŋkpɔ emi emi afo okutde onyuŋ okopde eka ke ererimbot, tutu ini edi emi ami ndinɔde enyiŋ mi ubɔŋ ke obukidem; ke ntre, afo eyetim enim mme ŋkpɔ emi afo okutde onyuŋ okopde, ndien uwutke owo ndomo kiet enye.

22 Ndien sese, ke ini afo edidide itiene mi, afo eyewet mmɔ onyuŋ esiri mmɔ, man owo ndomo kiet okukan ukabade mmɔ; koro afo eyewet mmɔ ke usem emi owo midikanke ikot mmɔ.

23 Ndien sese, mme itiat iba emi ke ami ndinɔ fi, ndien afo eyesiri mmɔ ŋko ye mme ŋkpɔ emi afo ediwetde.

24 Koro sese, usem emi afo ediwetde ami metimede; ke ntre ami nyanam ke ekemini mi ete mme itiat emi eyenam aŋwaŋa ke enyin mme owo mme ŋkpɔ emi emi afo ediwetde.

25 Ndien ke ini Jehovah ama ketiŋ mme ikɔ emi, enye ama owut eyeneka Jared kpukpru mme andiduŋ ke ererimbot emi ekedude, ŋko ye kpukpru emi edidude; ndien enye ikisioho mmɔ ifep ke enyin esie, kpa tutu ke mme utit ererimbot.

26 Koro enye ama ɔdɔhɔ enye ke mme ini ekebede, ete ke edieke enye edibuɔtde idem ke enye ete ke enye ekeme ndiwut enye kpukpru ŋkpɔ—emi anade nte ewut enye; ke ntak oro Jehovah ikikanke idip enye ŋkpɔ ndomo kiet, koro enye ama ɔfiɔk ete ke Jehovah ekeme ndiwut enye kpukpru ŋkpɔ.

27 Ndien Jehovah ama ɔdɔhɔ enye ete: Wet mme ŋkpɔ emi nyuŋ siri mmɔ; ndien ami nyowut mmɔ ke ekemini mi nnɔ nditɔ owo.

28 Ndien edikem ete ke Jehovah ama ɔnɔ enye uyo ete enye esiri mme itiat iba emi emi enye ɔkɔbɔde, ndien okuwut mmɔ, tutu Jehovah emen mmɔ owut nditɔ owo.