1 Ndien edikem ete ke mme usen Ether ekedi ke mme usen Coriantumr; ndien Coriantumr ekedi edidem ke ofuri isɔŋ oro.

2 Ndien Ether ekedi prophet Jehovah; ke ntre Ether ɔkɔwɔrɔ edi ke mme usen Coriantumr, onyuŋ ɔtɔŋɔ nditiŋ nte prophet nnɔ mme owo, koro enye ikikemeke ndimum idem esie ke ntak Spirit Jehovah emi okodude ye enye.

3 Koro enye ama ɔkwɔrɔ tɔŋɔ ke usenubɔk, tutu edisuhɔde utin, eteme mme owo ete ebuɔtidem ke Abasi enɔ edikabade esit midighe esobo mmɔ, ɔdɔhɔ mmɔ ete ke oto ke mbuɔtidem ke kpukpru ŋkpɔ osu—

4 Ke ntre, owo ekededi emi ɔbuɔtde idem ke Abasi ye akpanikɔ ekeme ndidorienyin ke ererimbot emi ɔfɔnde akan, iŋ, kpa itie ke ubɔk nnasia Abasi, idorenyin emi otode ke mbuɔtidem, anamde anchor ɔnɔ mme ukpɔŋ owo, emi edinamde mmɔ esɔŋɔ enyuŋ esɔŋeda, kpukpru ini anamde mmɔ eyɔhɔ ke mme nti utom, ke edade usuŋ ndinɔ Abasi ubɔŋ.

5 Ndien edikem ete ke Ether ama etiŋ nte prophet ikpɔ ye mme utibe ŋkpɔ ɔnɔ mme owo, emi mmɔ mikibuɔtke idem, koro mmɔ mikikwe mmɔ.

6 Ndien idahaemi, ami Moroni, nyetiŋ ekpri mbaŋa mme ŋkpɔ emi; ami nyowut ererimbot nte ke mbuɔtidem edi mme ŋkpɔ emi edoride enyin ebaŋa edi ikwe; ke ntre, ekuneni koro mbufo mikwe, koro mbufo inyeneke ntiense tutu edomo mbuɔtidem mbufo.

7 Koro ekedi ke mbuɔtidem ke Christ okowut mme ete mbufo idem, ke ini enye ama ekeset ke mkpa; ndien enye ikiwutke mmɔ idem esie tutu mmɔ ema ekenyene mbuɔtidem ke enye; ke ntre, ana nte edi ete ke usuk ema enyene mbuɔtidem ke enye, koro enye ikiwutke ererimbot idem esie.

8 Edi ke ntak mbuɔtidem mme owo enye owut ererimbot idem esie, onyuŋ ɔnɔ enyiŋ Ete ubɔŋ, onyuŋ enim usuŋ ete oto ke odo mbon efen ekeme ndidi mme andibuana ke enɔ eke heaven, man mmɔ edori enyin enɔ mme ŋkpɔ emi mmɔ mikwe.

9 Ke ntre, mbufo ŋko emekeme ndinyene idorenyin, enyuŋ ebuana ke enɔ oro, edieke mbufo edinyenede mbuɔtidem.

10 Sese ekedi ke mbuɔtidem ke mmɔ ke eset ke ekekot edian edisana utɔ Abasi.

11 Ke ntre, ke mbuɔtidem ke ekenɔ mbet Moses. Edi ke enɔ Eyen esie ke Abasi ebeŋe usuŋ emi ɔfɔnde akan; ndien edi ke mbuɔtidem ke enye edisu.

12 Koro edieke mbuɔtidem miduhe ke otu nditɔ owo Abasi ikemeke ndinam utibe ŋkpɔ ndomokiet ke otu mmɔ, ke ntre, enye iwutke idem esie tutu mbuɔtidem mmɔ.

13 Sese, ekedi mbuɔtidem Alma ye Amulek akanam ufɔk ŋkpɔkɔbi ɔduɔ ke isɔŋ.

14 Sese, ekedi mbuɔtidem Nephi ye Lehi akada ukpuhɔde edi ɔnɔ mme Lamanite, emi akanamde mmɔ eduɔk mmɔŋ ye ikaŋ ndien ye Edisana Spirit.

15 Sese, ekedi mbuɔtidem Ammon ye nditɔ eka iden esie akanam utɔ akamba utibe ŋkpɔ ke otu mme Lamanite.

16 Iŋ, ndien kpa kpukpru mbon emi ekenamde mme utibe ŋkpɔ ekenam mmɔ ke mbuɔtidem, kpa mbon emi ekedude mbemiso Christ ŋko ye mbon ekedu ke ini oro ebede.

17 Ndien ekedi ke mbuɔtidem ke mme mbet ita oro ekebɔ eŋwɔŋɔ ete ke inaha nte mmɔ etabi mkpa; ndien mmɔ ikibɔhɔ eŋwɔŋɔ tutu ke ini mbuɔtidem mmɔ.

18 Ndien ini ndomo kiet iduhe emi anamde mme utibe ŋkpɔ ke midighe tutu ke ini mbuɔtidem mmɔ; ke ntre mmɔ ekebem iso ebuɔtidem ke Eyen Abasi.

19 Ndien ediwak ema edu emi mbuɔtidem mmɔ ɔkɔsɔŋde ata eti eti, kpa mbemiso Christ edi, emi mikikemeke inim ke esit ɔfɔŋ ufukiso, edi ke akpanikɔ ema ekut ke enyin mmɔ mme ŋkpɔ emi mmɔ ekekutde ke enyin mbuɔtidem, ndien mmɔ ema enem esit.

20 Ndien sese, nnyin imikut ke ŋwed emi ite ke kiet ke otu emi ekedi eyeneka Jared; koro ata ɔkpɔsɔŋ ekedi mbuɔtidem esie ke Abasi, ete ke ini Abasi akayande nnuen-ubɔk esie enye ikikanke idip enye ke iso eyeneka Jared, ke ntak ikɔ esie emi enye eketiŋde ɔnɔ enye, ikɔ emi enye ɔkɔbɔde ke mbuɔtidem.

21 Ndien ke ini eyeneka Jared ama okokut nnuen-ubɔk Jehovah, ke ntak eŋwɔŋɔ emi eyeneka Jared ɔkɔbɔde ke mbuɔtidem, Jehovah ikikanke idip ŋkpɔ ndomo kiet ke enyin esie, ke ntre enye ama owut enye kpukpru ŋkpɔ, koro ikikemeke inim enye aba ke aŋwa ikpehe.

22 Ndien edi ke mbuɔtidem ke mme ete mi ebɔ eŋwɔŋɔ ete ke ana nte mme ŋkpɔ emi edisim nditɔ eka mmɔ oto ke mme Gentile; ke ntak oro Jehovah ama ɔnɔ mi uyo, iŋ, kpa Jesus Christ.

23 Ndien ami mma ndɔhɔ enye nte: Jehovah, mme Gentile eyesak mme ŋkpɔ emi, ke ntak mmem idem nnyin ke ndiwet ŋkpɔ; koro Jehovah afo amanam nnyin ikpon ke ikɔ oto ke mbuɔtidem, edi afo unamke nnyin ikpon ke ndiwet ŋkpɔ; koro afo amanam kpukpru mbon emi ete mmɔ ekan etiŋ ediwak ikɔ, ke ntak Edisana Spirit emi afo ɔnɔde mmɔ;

24 Ndien afo amanam nnyin ete nnyin ikan iwet edi ekpri, ke ntak etikwo ubɔk nnyin. Sese, afo unamke nnyin ikpon ke ndiwet ŋkpɔ nte eyeneka Jared, koro afo amanam enye ete mme ŋkpɔ emi enye ekewetde ema ekpon kpa nte afo edide, ke ndikan owo odudu ete okot enye.

25 Afo ŋko amanam mme ikɔ nnyin enyene odudu enyuŋ ekpon, tutu ete ke nnyin ikanke iwet mmɔ; ke ntre, ke ini nnyin iwetde nnyin ikut mmem idem nnyin, inyuŋ iduɔ ke ntak nte enimde mme ikɔ nnyin.

26 Ndien ke ini mma nketiŋ emi, Jehovah ama etiŋ ikɔ ɔnɔ mi, ete: Mme ndisime esak, edi mmɔ eyefuhɔ; ndien mbɔm mi ekem mbon nsuhɔde idem udeme, ete ke mmɔ idikanke ke ntak mmem idem mbufo;

27 Ndien edieke mme owo edide etiene mi ami nyowut mmɔ mmem idem mmɔ. Ami nnɔ mme owo mmem idem man mmɔ esuhɔde idem; ndien mfɔn mi ekem ofuri owo udeme emi esuhɔde idem ke iso mi; koro edieke mmɔ esuhɔde idem ke iso mi, enyuŋ enyene mbuɔtidem ke ami, ke ini oro ke ami ndinam mme mmem mmem ŋkpɔ ekabade esɔŋ idem ɔnɔ mmɔ.

28 Sese, ami nyowut mme Gentile mmem idem mmɔ, ndien ami nyowut mmɔ nte ke mbuɔtidem, idorenyin ye ima eda esɔk mi—ntɔŋɔ kpukpru edinen ido.

29 Ndien ami, Moroni, ke mma nkokop mme ikɔ emi, mma nyene ndɔŋ-esit, ndien ndɔhɔ ete: O Jehovah, ayanam edinen ido fo, koro ami mɔfiɔk nte ke afo anam ɔnɔ nditɔ owo nte asaŋade ye mbuɔtidem mmɔ.

30 Koro eyeneka Jared ama ɔdɔhɔ obot Zerin ete, Daha—ndien ema emen esio. Ndien edieke enye mikpinyeneke mbuɔtidem enye ikpikidahake; ke ntre afo anam utom ke mme owo ema enyene mbuɔtidem.

31 Koro ke ntem ke afo okowut idem fo ɔnɔ mme mbet fo; koro ke ini mmɔ ema ekenyene mbuɔtidem, enyuŋ etiŋ ikɔ ke enyiŋ fo, afo ama owut mmɔ idem fo ke akamba odudu.

32 Ndien ami ŋko meti nte ke afo ɔmɔdɔhɔ ete ke afo emebeŋe ufɔk ɔnɔ owo, iŋ, kpa ke mme ikpɔ ufɔk Ete fo, emi owo edikemede ndinyene idorenyin emi ɔfɔnde ama; ke ntre ana nte owo enyene idorenyin, midighe ntre enye ikemeke ndibɔ inyene ke ebiet emi afo enimde.

33 Ndien ŋko, ami meti nte ke afo ɔmɔdɔhɔ ete ke afo amama ererimbot, kpa ke ndiyak uwem fo nnim nnɔ ererimbot, man afo afiak emen enye man ebeŋe ebiet enim ɔnɔ nditɔ owo.

34 Ndien idahaemi ami mɔfiɔk nte ke ima emi emi afo enyenede ɔnɔ nditɔ owo edi ata ima; ke ntre, ibɔhɔke mme owo eyenyene ata ima mmɔ idikemeke ndinyene ebiet oro emi afo ebeŋede ke mme ikpɔ ufɔk Ete fo.

35 Ke ntre, ami mɔfiɔk ke oto ke ŋkpɔ emi emi afo etiŋde, nte ke edieke mme Gentile minyeneke ata ima, ke ntak mmem idem nnyin, nte ke afo eyedomo mmɔ, onyuŋ emen talent mmɔ osio, iŋ, kpa oro emi mmɔ ebɔde, ndien ɔnɔ mmɔ emi edinyenede iwak ikan.

36 Ndien edikem ete ke ami mma mbɔŋ akam nnɔ Jehovah nte yak enye ɔnɔ mme Gentile mfɔn, mam mmɔ enyene ata ima.

37 Ndien edikem ete ke Jehovah ama ɔdɔhɔ mi ete: Edieke mmɔ minyeneke ata ima idighe ŋkpɔ inɔ mi, afo ɔmɔbuɔtidem; ke ntre, eyenam mme ewura fo esana. Ndien ke ntak emi afo okutde mmem idem fo eyenam fi ɔsɔŋ idem, kpa tutu ke nditie ke ebiet emi ami mbeŋede ke mme ikpɔ ufɔk Ete mi.

38 Ndien idahaemi ami, Moroni, ŋkɔm mme Gentile uyɔŋ, iŋ, ŋko ye nditɔ eka mi emi ami mmade, tutu nnyin isobo ke itie ikpe Christ, emi kpukpru owo edifiɔkde ete ke mme ewura mi inyeneke ntɔi iyip mbufo.

39 Ndien idaha oro ke mbufo edifiɔk ete ke ami mokut Jesus, ndien ke enye etiŋ ikɔ ye ami iso ye iso, ndien ke enye ama ɔdɔhɔ mi ke aŋwa aŋwa nsuhɔde idem, kpa nte owo ɔdɔhɔde owo efen ke usem mi, kabaŋa mme ŋkpɔ emi;

40 Ndien ekpri ikpɔŋ ke ami nwet, ke ntak mmem idem mi ke ndiwet ŋkpɔ.

41 Ndien idahaemi, ami nyeteme fi nte oyom Jesus emi emi mme prophet ye mme apostle ewetde ebaŋa, man mfɔn Abasi Ete, ŋko ye Jehovah Jesus Christ, ye Edisana Spirit, emi etiede ntiense abaŋa mmɔ, okpodu onyuŋ oduŋ ye mbufo ke nsinsi. Amen.