1 Ndien edikem ete ke Jared ye eyeneka esie, ye mbon ufɔk mmɔ ye ŋko mme ufan Jared ye eyeneka esie ye mbon ufɔk mmɔ, ema esuhɔde eduk ke itighede emi ekedide ke edere edere, (ndien enyiŋ itighede oro ekedi Nimrod, ke ekekotde edian akwa atautop oro) ye mme ufene mmɔ emi mmɔ eketaŋde ebok kiet, ayara ye uman, ke kpukpru oruk.

2 Ndien mmɔ ŋko ema ekɔk mme afia enyuŋ emum mme inuen enyɔŋ; ndien mmɔ ŋko ema enam ŋkpɔ udɔŋ-ŋkpɔ, emi mmɔ ekedade emen iyak mme mmɔŋ ye mmɔ.

3 Ndien mmɔ ema emen ŋko ye mmɔ deseret, emi, ke ndikabade, edi ɔkwɔk ;ndien ke ntem mmɔ ema emen ye mmɔ mme udim ɔkwɔk, ye kpukpru oruk ŋkpɔ emi okodude ke iso isɔŋ, mme mkpasip eke kpukpru oruk.

4 Ndien edikem ete ke ini mmɔ ema ekesuhɔde eduk itighede Nimrod Jehovah ama ɔsuhɔde edi onyuŋ etiŋ ikɔ ye eyeneka Jared; ndien enye okodu ke obubit enyɔŋ, ndien eyeneka Jared ikikwe enye.

5 Ndien edikem ete ke Jehovah ama ɔnɔ mmɔ uyo ete yak mmɔ eka ekeduk wilderness, iŋ, eduk ŋkaŋ oro emi akananam owo miduhe. Ndien edikem ete ke Jehovah ama aka ke iso mmɔ, ndien ama etiŋ ikɔ ye mmɔ nte enye akadade ke obubit enyɔŋ, onyuŋ ɔnɔ ndausuŋ abaŋa ebiet emi mmɔ edikade.

6 Ndien edikem ete ke mmɔ ema esaŋa ke wilderness, enyuŋ ekɔŋ mme ubom, emi mmɔ ekedade ebe mme ediwak mmɔŋ, ke edide ke ubɔk Jehovah akada usuŋ kpukpru ini.

7 Ndien Jehovah ikiyakke ete mmɔ etre ke ebede inyaŋ ke wilderness, edi enye oyom ete mmɔ edi tutu kpa ke isɔŋ eŋwɔŋɔ, emi ekemekde esioke kpukpru mme isɔŋ eken, emi Jehovah Abasi eketimde enim ɔnɔ mme ndinen owo.

8 Ndien enye ama otomo ke iyatesit esie ɔnɔ eyeneka Jared, ete ke owo ekededi emi edinyenede isɔŋ eŋwɔŋɔ emi, tɔŋɔde ke ini oro ka iso ye ke nsinsi, ana nte anam utom ɔnɔ enye, akpanikɔ ye nkukure Abasi, midighe eyekwok mmɔ esio ke ini uyɔhɔ iyatesit esie edidide ididoro mmɔ ke idem.

9 Ndien idahaemi, nnyin imikeme ndikut ewuhɔ Abasi kabaŋa isɔŋ emi, ete ke edi isɔŋ eŋwɔŋɔ; ndien obio ekededi emi edinyenede enye ana anam utom ɔnɔ Abasi, midighe eyekwɔk mmɔ esio ke ini uyɔhɔ iyatesit esie edidide ididoro mmɔ ke idem. Ndien uyɔhɔ iyatesit esie oyodoro mmɔ ke idem ke ini mmɔ edatde ke ukwaŋ-ŋkpɔ.

10 Koro sese, emi edi isɔŋ emi emekde esio ke kpukpru mme isɔŋ eken; ke ntre enye emi enyenede enye ana anam utom ɔnɔ Abasi midighe ekwɔk esio; koro edi nsinsi ewuhɔ Abasi. Ndien idighe tutu uyɔhɔ ukwaŋ-ŋkpɔ ke otu nditɔ owo ke isɔŋ oro, ke edikwɔk mmɔ isio.

11 Ndien emi edi ɔnɔ mbufo, O mbufo mme Gentile, man mbufo efiɔk mme ewuhɔ Abasi—man mbufo ekabade esit, ndien ikaha iso ke mme ukwaŋ-ŋkpɔ mbufo tutu uyɔhɔ edi, man mbufo ekumen esuhɔde edi uyɔhɔ iyatesit Abasi enɔ idem mbufo nte mme andiduŋ ke isɔŋ oro ekenamde mbemiso ini emi.

12 Sese, emi edi isɔŋ emi emekde, ndien obio ekededi emi edinyenede enye ɔyɔbɔhɔ ufin, ye ŋkpɔkɔbi, ye kpukpru mme obio eken ke idak heaven, edieke mmɔ edinamde utom inɔ Abasi isɔŋ oro, emi edide Jesus Christ, emi ema ekeyarade ke mme ŋkpɔ emi nnyin iwetde.

13 Ndien idahaemi ami nyaka iso ye mbuk mi; koro sese, edikem ete ke Jehovah ama ada Jared ye mme nditɔ ete esie edi ke kpa akwa inyaŋ oro emi abahade mme isɔŋ. Ndien nte mmɔ edisimde inyaŋ mmɔ ewuk mme tent mmɔ; ndien mmɔ ekot enyiŋ ebiet oro Moriancumer; ndien mmɔ ekeduŋ ke mme tent, ndien ekeduŋ ke mme tent ke mben inyaŋ ke ufaŋ isua inaŋ.

14 Ndien edikem ke utit isua inaŋ ete ke Jehovah ama afiak edi etiene eyeneka Jared, ndien ada ke obubit enyɔŋ onyuŋ etiŋ ikɔ ye enye. Ndien ke ufaŋ hour ita ke Jehovah eketiŋ ikɔ ye eyeneka Jared, onyuŋ ɔtunɔ enye ke ntak emi enye mikitihi ndikot enyiŋ Jehovah.

15 Ndien eyeneka Jared ama akabade esit ke idiɔk emi enye akanamde, ndien ama okot enyiŋ Jehovah ɔnɔ nditɔ ete esie emi ekedude ye enye. Ndien Jehovah ɔdɔhɔ enye ete: Ami nyefen nnɔ fi ye nditɔ ete fo ke mme idiɔk ŋkpɔ mmɔ; edi mbufo idinamke idiɔk ŋkpɔ aba, koro mbufo eyeti ete ke Spirit mi idiyɔhɔ ye owo kpukpru ini; ke ntre, edieke mbufo edinamde idiɔk ŋkpɔ tutu mbufo edat ewɔrɔ eyesibe mbufo esio ke iso Jehovah. Ndien emi edi mme ekikere mi kabaŋa isɔŋ emi ami ndinɔde mbufo nte inyene mbufo; koro enye edidide isɔŋ emi emekde esio ke kpukpru mme isɔŋ eken.

16 Ndien Jehovah ɔdɔhɔ ete: Ka kanam utom nyuŋ bɔp, nte utɔ mme ubom emi afo ɔkɔkɔŋde mbemiso ini emi. Ndien edikem ete ke eyeneka Jared ama akanam utom, ŋko ye mme nditɔ ete esie, enyuŋ ekɔŋ mme ubom ke utɔ usuŋ emi mmɔ ekekɔŋde, nte asaŋade ye mme item Jehovah. Ndien mmɔ ekedi mkpri, ndien mmɔ ekedi mfefere ke enyɔŋ mmɔŋ, kpa nte unen eferede ke mmɔŋ.

17 Ndien ekekɔŋ mmɔ ke utɔ usuŋ anade nte mmɔ esire ata eti eti, tutu ete ke mmɔ ekeme ndikama mmɔŋ nte usan; ndien idak esie ama esire nte usan; ndien mme ŋkaŋ esie ema esire nte usan; ndien mme etiŋe esie edi nsɔsɔp; ndien enyɔŋ esie ama esire nte usan; ndien uniɔŋ esie ekedi uniɔŋ eke eto; ndien usuŋ esie, ke ini eberide, ama esire nte usan.

18 Ndien edikem ete ke eyeneka Jared ama eseme ɔnɔ Jehovah, ete: O Jehovah, ami manam utom emi afo ɔkɔnɔde mi uyo, ndien ami manam mme ubom nte afo eketemede mi.

19 Ndien sese, O Jehovah, ke mmɔ unwana iduhe; mmɔŋ ke idiwat? Ndien ŋko nnyin iyikpa koro ke mmɔ nnyin ikanke ikot ibifik, ibɔhɔke edi ofum emi odude ke esit mmɔ; ke ntak oro nnyin iyikpa.

20 Ndien Jehovah ɔdɔhɔ eyeneka Jared ete: Sese, afo ayanam odudu ke enyɔŋ, ye ŋko ke idak; ndien ke ini mbufo ediyomde ofum mbufo eyeberede odudu oro enyuŋ ebɔ ofum. Ndien edieke edide ke mmɔŋ oduk edisim mbufo, sese, mbufo eyesiri odudu oro, man mbufo ekukpa ke ukwɔ oro.

21 Ndien edikem ete ke eyeneka Jared ama anam ntre, nte asaŋade nte Jehovah ɔkɔnɔde uyo.

22 Ndien enye afiak eseme ɔnɔ Jehovah ete: O Jehovah, sese ami manam kpa nte afo ɔkɔnɔde mi uyo; ndien manam mme ubom nnɔ ikɔt mi, ndien sese uŋwana iduhe ke mmɔ. Sese, O Jehovah, ndi afo ayayak ete nnyin ibe akwa mmɔŋ emi ke ekim?

23 Ndien Jehovah ɔdɔhɔ eyeneka Jared ete: Nso ke afo oyom ete ami nnam man mbufo enyene uŋwana ke mme ubom mbufo? Koro sese, mbufo ikemeke ndinyene mme window, koro eyemia mmɔ esuan mbio-mbio; ŋko mbufo ikemeke ndikama ikaŋ ye mbufo, koro mbufo idisaŋake ke uŋwana ikaŋ.

24 Koro sese, mbufo editie nte isɔnsi ke ufɔt inyaŋ; koro mme obot mbufit mmɔŋ eyedimia mbufo. Edi, ami nyafiak nsio mbufo ke mme udem inyaŋ; koro mme ofum ewɔrɔ mi ke inua, ndien ŋko mme edim ye mme ukwɔ ke ami ndɔŋ eka.

25 Ndien sese, ami mbeŋe mbufo idem mbaŋa mme ŋkpɔ emi; koro mbufo ikemeke ndibe akwa utuŋɔ emi ibɔhɔke ami mbeŋe mbufo idem mbaŋa mme mbufit inyaŋ, ye mme ofum emi ebede iso, ye mme ukwɔ emi edidide. Ke ntak oro nso ke afo oyom ete ami mbeŋe mbufo idem man mbufo enyene uŋwana ke ini mbufo ebuhɔde ke mme udem inyaŋ?