1 Ndien edikem ete ke Orihah ama anam ubiereikpe ke isɔŋ ke edinen ido ke ofurimme usen esie, mme usen esie emi ekewakde ata eti eti.

2 Ndien enye ama obon nditɔ iden ye iban, iŋ, enye ama obon edipoduop ye kiet ke otu mmɔ ekedide nditɔ iden edip ye ita.

3 Ndien edikem ete ke enye ŋko ama obon Kib ke usɔŋ esie. Ndien edikem ete ke Kib ama akara ke itie esie; ndien Kib ama obon Corihor.

4 Ndien ke ini Corihor ekedide isua edipoduop ye iba enye ama ɔsɔŋibuot ye ete esie, ndien aka onyuŋ okoduŋ ke isɔŋ Nehor; ndien enye ama obon mme nditɔ iden ye nditɔ iban, ndien mmɔ ema ekabade eye ata eti eti; ke ntre Corihor ama ada ediwak owo ɔnɔ idem esie.

5 Ndien ke ini enye ama okobok mbon ekɔŋ ɔtɔ kiet enye ama ɔdɔk edi isɔŋ Moron emi edidem okoduŋde, ndien omum enye nte owo ŋkpɔkɔbi, emi akanamde osu se eyen eka Jared eketiŋde ete ke eyeda mmɔ esin ke ŋkpɔkɔbi.

6 Idahaemi isɔŋ Moron, emi edidem okoduŋde, ama ekpere isɔŋ emi mme Nephite ekotde Desolation.

7 Ndien edikem ete ke Kib okoduŋ ke ŋkpɔkɔbi, ndien ikɔt esie ke idak Corihor eyen esie, tutu enye ama ɔsɔŋ ata eti eti; edi Kib ama obon Shule ke ini usɔŋ esie, ke ini enye okosuk odude ke ŋkpɔkɔbi.

8 Ndien edikem ete ke Shule ama ayatesit ye eyeneka esie; ndien Shule ama okop odudu, onyuŋ akabade okpon ke odudu edenowo; ndien enye ŋko ama okpon ke ubiereikpe.

9 Ke ntre, enye ama edi obot Ephraim, ndien enye ama atara osio ke obot oro, onyuŋ anam mme akaŋkaŋ osio ke ukwak ɔnɔ mbon emi enye akadade ɔwɔrɔ ye enye; ndien ke ini enye ama ɔkɔnɔ mmɔ mme akaŋkaŋ enye afiak ɔnyɔŋ obio Nehor, ndien ɔnɔ eyeneka esie Corihor ekɔŋ, oto ke emi enye ɔbɔ obio ubɔŋ oro onyuŋ afiak ɔnɔ ete esie Kib.

10 Ndien idahaemi ke ntak ŋkpɔ emi Shule akanamde, ete esie ama ɔnɔ enye obio ubɔŋ; ke ntak oro enye ama ɔtɔŋɔ ndikara ke itie ete esie.

11 Ndien edikem ete ke enye ama ebiereikpe ke edinen ido; ndien enye ama atat obio ubɔŋ esie ke ofuri iso isɔŋ, koro ikɔt esie ema ekabade ewak ata eti eti.

12 Ndien edikem ete ke Shule ŋko ama obon ediwak nditɔ iden ye nditɔ iban.

13 Ndien Corihor ama akabade esit ke mme ediwak idiɔk emi enye akanamde; ke ntre Shule ama ɔnɔ enye odudu ke obio ubɔŋ esie.

14 Ndien edikem ete ke Corihor ama enye ediwak nditɔ iden ye nditɔ iban. Ndien ke otu nditɔ iden Corihor kiet ama odu emi enyiŋ esie ekedide Noah.

15 Ndien edikem ete ke Noah ama ɔsɔŋ ibuot ye Shule, edidem, ŋko ye ete esie Corihor, ndien ada Cohor eyen eka esie ɔwɔrɔ, ŋko ye kpukpru nditɔeka esie ye ediwak mme owo.

16 Ndien enye ɔnɔ Shule ekɔŋ, edidem, ke emi enye ama ɔbɔ isɔŋ akpa inyene mmɔ; ndien enye akabade edi edidem ke ŋkaŋ isɔŋ oro.

17 Ndien edikem ete ke enye ama afiak ɔnɔ Shule ekɔŋ, edidem, onyuŋ omum Shule, edidem, ndien emen enye ɔwɔrɔ nte owo ŋkpɔkɔbi oduk Moron.

18 Ndien edikem ete nte enye okoyomde ndiwot enye, mme nditɔ iden Shule enyɔni eduk ufɔk Noah ke okoneyo enyuŋ ewot enye, ndien ewuri usuŋ ufɔk ŋkpɔkɔbi enyuŋ esio ete mmɔ, ndien edori enye ke ebekpo esie ke obio ubɔŋ esie.

19 Ke ntre, eyen Noah ama ɔbɔp obio ubɔŋ esie ke itie esie; edimmɔ ikinyeneke odudu aba ke idem edidem Shule, ndien mbon emi ekedude ke idak ukara edidem Shule ema eforo ata eti eti enyuŋ ekɔri

20 Ndien ema ebahade obio; ndien mme obio ubɔŋ iba ekedu, obio ubɔŋ Shule, ye obio ubɔŋ Cohor, eyen Noah.

21 Ndien Cohor, eyen Noah, ama anam ete yak ikɔt esie enɔ Shule ekɔŋ, ke emi Shule ama akan mmɔ ndien ama owot Cohor.

22 Ndien idahaemi Cohor ama enyene eyen emi ekekotde Nimrod; ndien Nimrod ama ayak obio ubɔŋ Cohor ɔnɔ Shule, ndien enye ama okut mfɔn ke enyin Shule; ke ntre Shule ama ɔnɔ enye ediwak mme ufon, ndien enye ama anam ke obio ubɔŋ Shule nte asaŋade ye mme udɔŋ esie.

23 Ndien ŋko ke ini ukara Shule mme prophet ema edi ke otu mme owo, emi ekedɔŋde eto Jehovah, etiŋ nte prophet ete ke ibak ye ukpono ndem eke mme owo kada isuŋi ɔsɔk isɔŋ, ndien ke ana nte ewot mmɔ edieke mmɔ mikabakede esit.

24 Ndien edikem ete ke mme owo ema esuŋi mme prophet oro, enyuŋ esak mmɔ. Ndien edikem ete ke edidem Shule ama anam ubiere ikpe ɔnɔ kpukpru mbon emi ekesuŋide mme prophet.

25 Ndien enye ama anam mbet ke ofuri isɔŋ, emi ɔkɔnɔde mme prophet odudu ete yak mmɔ eka ebiet ekededi emi mmɔ eyomde; ndien oto ke emi ema eda mme owo edi edikabade esit.

26 Ndien ke ntak emi mme owo ekekabakede esit ke mme ukwaŋ-ŋkpɔ ye ukpono ndem mmɔ Jehovah ama afen ɔnɔ mmɔ, ndien mmɔ ema etɔŋɔ ndifiak mforo ke isɔŋ. Ndien edikem ete ke Shule ama obon mme nditɔ iden ye nditɔ iban ke ini usɔŋ esie.

27 Ndien mme ekɔŋ ikiduhe aba ke mme usenShule; ndien enye ama eti mme ikpɔ ŋkpɔ emi J ehovah akanamde ɔnɔ mme ete esie ke ndida mmɔ mbe akwa utuŋɔnsin ke isɔŋ enwɔŋɔ; ke ntre enye ama anam ubiereikpe ke edinen ido ke ofuri mme usen esie.