1 Ndien Jehovah ama ɔnɔ eyeneka Jared uyo ete ɔsuhɔde ɔwɔrɔ ke obot ɔwɔrɔ ke iso Jehovah, onyuŋ ewet mme ŋkpɔ emi enye ama okokut; ndien ema ekpan mmɔ ndidisim nditɔ owo tutu ke ini ema ekemenede enye edɔk ke cross ama ebe; ndien ke ntak emi ke edidem Mosiah ekenim mmɔ, man mmɔ ekuduk ererimbot tutu Christ ama okowut ikɔt esie idem esie.

2 Ndien ke ini Christ ke akpanikɔ ama okowut ikɔt esie idem esie enye ama ɔnɔ uyo ete eyarede mmɔ.

3 Ndien idahaemi, ke oro ebede, mmɔ kpukpru ema etaha ke unana edinim; ndien owo ndomo kiet iduhe ibɔhɔke mme Lamanite, ndien mmɔ esin gospel Christ; ke ntak oro enɔ mi uyo ete ke ana nte mfiak ndip mmɔ ke isɔŋ.

4 Sese, ami mewet ke mme usan emi mme ata ŋkpɔ emi eyeneka Jared okokutde; ndien iduhe mme ikpɔ ŋkpɔ emi ekenamde eyarade ekan mbon emi ekenamde eyarade enɔ eyeneka Jared.

5 Ke ntre Jehovah ama ɔnɔ mi uyo ete nwet mmɔ; ndien ami mewet mmɔ. Ndien enye ama ɔnɔ mi uyo ete yak ami nsiri mmɔ; ndien enye ŋko ama ɔnɔ uyo ete yak nsiri edikabade oro; ke ntak oro mesiri mme akabade ikɔ, nte asaŋade ye mbet Jehovah.

6 Koro Jehovah ama ɔdɔhɔ mi ete: Mmɔ idikaha itiene mme Gentile tutu usen emi mmɔ edikabade esit ke ukwaŋ-ŋkpɔ mmɔ, ndien ekabade esana ke iso Jehovah.

7 Ndien ke usen oro emi mmɔ edinyenede mbuɔtidem ke ami, Jehovah ɔdɔhɔ, kpa nte eyeneka Jared ekenyenede, man mmɔ ekabade esana ke ami, idaha oro ke ami ndiyarade nnɔ mmɔ mme ŋkpɔ emi eyeneka Jared okokutde, tutu esim ndimen nwut mmɔ kpukpru mme ediyarade mi, Jesus Christ, Eyen Abasi, Ete mme enyɔŋ ye isɔŋ ɔdɔhɔ, ndien kpukpru mme emi edude ke mmɔ edu.

8 Ndien enye emi edinenide ye ikɔ Jehovah, yak esuŋi enye; ndien enye emi edikaŋde mme ŋkpɔ emi, yak esuŋi enye; koro mmɔ ke ami mendiwutke mme ŋkpɔ emi ekponde ekan emi, Jesus Christ ɔdɔhɔ; koro ami ndi enye emi etiŋde.

9 Ndien ke uyo mi ke eberede mme heaven enyuŋ eberi; ndien ke ikɔ mi isɔŋ eyenyeŋe; ndien ke uyo mi mme andiduŋ do eyebe efep, kpa ntre ke ikaŋ.

10 Ndien enye emi mibuɔtke idem ke mme ikɔ mi ibuɔtke idem ke mme mbet mi; ndien edieke edide ete ke ami ntiŋke, mbufo ebiere; koro mbufo eyefiɔk ete ke edi ami ntiŋ, ke akpatre usen.

11 Edi enye emi ɔbuɔtde idem ke mme ŋkpɔ emi emi ami ntiŋde, enye ke ami ndidise ye mme ediyarade Spirit mi, ndien enye eyefiɔk onyuŋ etie ntiense. Koro ke ntak Spirit mi enye ɔyɔfiɔk ete ke mme ŋkpɔ emi edi akpanikɔ; koro enye ekpek mme owo ete enam eti.

12 Ndien ŋkpɔ ekededi emi ekpekde mme owo ete enam eti oto mi; koro eti itoho ke ndomo kiet ke mibɔhɔke enye edi ke ami. Ami ndi ukem emi adade mme owo ete enam kpukpru eti; enye emi midibuɔtke idem ke mme ikɔ mi idibuɔtke idem ke ami—ete ami ndodu; ndien enye emi midibuɔtke idem ke ami idibuɔtke idem ke Ete emi ɔkɔdɔŋde mi. Koro sese, ami ndi Ete, ami ndi uŋwana, ye uwem, ye akpanikɔ ererimbot.

13 Edi etiene mi, O mbufo mme Gentile, ndien ami nyowut mbufo mme ŋkpɔ ekponde ekan, ifiɔk emi emi edipde ke ntak unana edinim ke akpanikɔ.

14 Edi etiene mi, O mbufo ufɔk Israel, ndien eyenam eyarade enɔ mbufo nsutɔ mme ikpɔ ŋkpɔ emi Ete enimde ɔnɔ mbufo, tɔŋɔ ke ntɔŋɔ ererimbot; ndien enye idighe itiene mbufo, ke ntak unana edinim ke akpanikɔ.

15 Esese, ke ini mbufo ediwakde ikpehe unana edinim ke akpanikɔ oro emi anamde mbufo esuhɔ ke idiɔk idaha ibak mbufo, ye isɔŋ-esit, ye nnan esit, idahaoro ke ikpɔ ye mme utibe ŋkpɔ emi ekedipde mbufo tɔŋɔ ke ntɔŋɔ ererimbot—iŋ, ke ini emi mbufo edikotde Ete ke enyiŋ mi, ke nbuŋɔ esit ye spirit anuakhade, idahaoro ke mbufo edifiɔk ete ke Ete ama eti ediomi emi enye akanamde ɔnɔ mme ete mbufo, O ufɔk Israel.

16 Ndien idahaoro ke mme ediyarade mi emi ami nnamde isuŋ-utom mi John ewet ediyarade ke enyin kpukpru owo. Eti, ke ini mbufo edikutde mme ŋkpɔ emi, mbufo eyefiɔk ete ke ini ekpere emi ediyarade mmɔ ke kpa edinam oro.

17 Ke ntak oro, ke ini emi mbufo edibɔde ŋwed emi mbufo eyefiɔk ete ke utom Ete ɔtɔŋɔ ke ofuri iso isɔŋ.

18 Ke ntak oro, ekabade esit kpukpru mbufo mme utit ererimbot, enyuŋ edi etiene mi, enyuŋ ebuɔtidem ke gospel mi, enyuŋ eduɔmmɔŋ ke enyiŋ mi; koro enye emi ɔbuɔtdeidem onyuŋ ɔduɔkdemmɔŋ ke edinyaŋa; edi enye emi mibuɔtkeidem oyobiom ikpe; ndien mme idiɔŋɔ eyetiene mmɔ emi ebuɔtdeidem ke enyiŋ mi.

19 Ndien ɔfɔfɔn ɔnɔ enye emi ekutde ete ke ɔbuɔtidem ɔnɔ enyiŋ mi ke akpatre usen, koro eyemenede enye ete ediduŋ ke obio ubɔŋ emi ekenimde enɔ enye tɔŋɔ ke ntɔŋɔ ererimbot. Ndien sese edi ami ntiŋ enye. Amen.