Mataupu 8

Aveina atu o le Talalelei i le Lalolagi Uma

“O loo tatou i ai i le galuega o le laveaiina o agaga, o le valaaulia o tagata e o mai ia Keriso.”

Mai le Soifuaga o Howard W. Hunter

I le 1979, na saunoa ai Elder Howard W. Hunter a o avea ma sui o le Korama a Aposetolo e Toasefululua i lena taimi: “Ua ou talitonu atoatoa e le o toe mamao ona tatou vaai lea i nisi o faalauiloaga silisili o le salalau o le talalelei i atunuu uma i lenei tisipenisione nai lo se isi lava tisipenisione ua mavae. Ou te talitonu o le a mafai ona tatou toe tilotilo i tua ma tomanatu … ma tusia e faapei ona faia e Luka, ‘Ua tupu foi le afioga a le Atua’(Galuega 6:7).”¹

Ina ua saunoa Elder Hunter i nei upu, sa tele atunuu sa faasa ai i faiga faaupufai ia faifeautalai mai le aoaoina o le talalelei i Europa i Sasae ma Rusia. I totonu o le 10 tausaga, na tele ina amata ona aveesea na sā. I le 1989 ma le 1990 na solovi ai i lalo le Pa i Perelini lea sa vavaeese ai Siamani Sisifo mai Sasae mo le toeitiiti atoa le 30 tausaga. Sa avea Peresitene Hunter ma Peresitene o le Korama a Aposetolo e Toasefululua i lena taimi, ma sa ia faaalia mafaufauga nei i lena mea na tupu i le talafaasolopito, ma isi suiga na tutupu i le lalolagi:

“E tele le gauai sa tuuto atu talu ai i le Pa i Perelini. Ioe, ua tatou fiafia uma lava ina ua vaaia le solovi ifo i lalo o le pa, o se faailoga e pei ona i ai o le saolotoga fou. … A o tatou taumafai ia malamalama i le agaga o le faaleleiga na lagonaina e le lalolagi atoa ma tuu i ai se faauigaga i le aano o le talalelei, ona tatou fesili ifo lea ia i tatou lava: Pe le o le aao ea lea o le Alii ua aveesea ai papupuni faaupufai, ma mea faalavefau ae tatala mai avanoa sa lei maua mo le aoaoina atu o le talalelei, ina ia ogatusa ai ma se fuafuaga paia ma se taimi faatulagaina mai le lagi?”²

Sa lagona e Peresitene Hunter o nei suiga ua tuu mai ai se tiutetauave taua i tagata o le Ekalesia. A o talaia le tele o atunuu mo le galuega faafaifeautalai, fai mai a ia, o le a manaomia le tele atu o faifeautalai e faataunuu le poloaiga e avatu le talalelei i le lalolagi uma. ³

O le vilivilitai o Peresitene Hunter e pa’i atu i fanau uma a le Atua, tusa lava po o le a le atunuu po o le talitonuga, sa iloatino i lana galuega i Sasae Tutotonu. Na tuuina atu ia te ia e le Au Peresitene Sili ni tofiga taua i Ierusalema, e aofia ai le vaaia o le fauina o le Orson Hyde Memorial Garden ma le Nofoaga Tutotonu o le Iunivesite o Polika Iaga mo Near Eastern Studies. E ui ina sa le faatagaina le talaiga i lena itulagi, ae sa fausia e Peresitene Hunter ni faauoga tumau ma i latou sa latou galulue, o tagata Iutaia ma Arapi. “O le faamoemoe o le talalelei a Iesu Keriso o le aumaia lea o le alofa, lotogatasi, ma le usoga o le faatulagaga aupito maualuga,” na ia saunoa ai. ⁴

I lana galuega ma fanau a le Atua i le salafa o le lalolagi, sa tasi lava le savali a Peresitene Hunter: “O i matou o o outou uso-—matou te le vaai faatauvaa lava i se atunuu po o ni tagatanuu. Matou te valaaulia tagata uma … e suesue i la matou savali ma maua la matou faaaumeaga.”⁵

“O le talalelei a Iesu Keriso … o se faatuatuaga e laugatasia ai le lalolagi ma se savali ia talia e tagata uma.

O Aoaoga a Howard W. Hunter

O le talalelei toefuataiina e mo tagata uma, e faavae i le talitonuga maumaututu o tagata uma o fanau a le Atua lava e tasi.

O le talalelei a Iesu Keriso, le talalelei lea matou te aoao atu ma sauniga ia matou te faatinoina, o se faatuatuaga e laugatasia ai le lalolagi ma se savali ia talia e tagata uma. E le faapitoau pe faavaegamea pe faalagolago i le talafaasolopito po o ni tifiga. O lona ute e faalauaitele ma e moni e faavavau. O lana savali e mo le lalolagi uma, na toefuatai mai i nei aso e gata ai e taulima ai manaoga faavae o malo uma, o ituaiga, gagana, ma tagata i le lalolagi. Sa toe faatuina e pei ona sa i ai i le amataga—e faatupu ai le usoga, e faasao ai le upumoni, ma laveai ai agaga. …

I le savali o le talalelei, o le aiga atoa o tagata soifua, o se aiga e tasi na alu ifo mai se Atua e toatasi. O alii uma ma tamaitai e le gata ina i ai se gafa faaletino e tau atu i tua ia Atamu ma Eva, o o latou uluai matua i le lalolagi, ae faapena foi se tupuaga faaleagaga e tau atu i tua i le Atua le Tama e Faavavau. O lea, o tagata uma i le lalolagi o ni uso ma tuafafine tuofe i le aiga o le Atua.

O le malamalama ma le taliaina o lenei tulaga aoao faatama o le Atua, e sili ona mafai e tagata soifua uma ona talisapaia le popolega o le Atua mo i latou ma a latou fegalegaleaiga a le tasi ma le isi. O se savali lea o le olaga ma le alofa e teena i tumasani vevela e faavae i lanu, gagana, tulaga faaletamaoaiga pe faaupufai, tulaga faaleaoaoga, po o aganuu, aua o i tatou uma lava e tasi faaleagaga. O loo i ai so tatou gafa faalelagi; o tagata uma o se atalii/afafine faaleagaga o le Atua.

I le vaaiga a lenei talalelei, e leai se avanoa mo se vaaiga fe’omia’i, vaapiapi, pe faaituau. Na saunoa le Perofeta o Iosefa Samita: “O le alofa o se tasi o uiga autu o le Atua, ma e tatau ona faailoa e i latou e mananao e avea ma atalii o le Atua. O se tagata e faatumulia i le alofa o le Atua, e le faamalieina i faamanuiaga na o lona aiga, ae oo atu i le lalolagi atoa le naunau ia faamanuiaina le fanauga uma a tagata” [Aoaoga a Peresitene o le Ekalesia: Iosefa Samita (2007), 330–31]. …

O le talalelei toefuataiina o se savali o le alofa faalelagi mo tagata uma i soo se mea, e faavae i luga o le talitonuga maumaututu e faapea, o tagata uma o fanau a le Atua e tasi. O le uluai savali faalelotu sa manaia lona faamatalaina i se saunoaga a le Au Peresitene Sili i le aso 15 o Fepuari, 1978, e faapea:

“E faavae i faaaliga anamua ma onaponei, e fiafia lava Le Ekalesia a Iesu Keriso o le Au Paia o Aso e Gata Ai e aoao ma tautino atu le aoaoga faavae faa-Kerisiano e faapea, o alii uma ma tamaitai o ni uso ma tuafafine, e le gata i le sootaga faaletoto mai matua masani i la le tino, ae faapea foi o ni fanau agaga tuofe o se Tama Faalelagi” [Saunoaga a le Au Peresitene Sili e Faatatau i le Alofa o le Atua mo Tagata Uma, 15 Fep. 1978].

Ua i ai i le Au Paia o Aso e Gata Ai se uiga faaalia talileleia i isi e le auai i la tatou tapuaiga. Matou te talitonu o i latou moni lava o ni o tatou uso ma ni tuafafine tuofe, ma o i tatou o ni atalii ma ni afafine o le Tama Faalelagi e tasi. E i ai so tatou gafa masani e tau atu i tua i le Atua. ⁶

E i ai se misiona a le Ekalesia e aoao atu le talalelei i atunuu uma.

O le Ekalesia, i le avea ai ma malo o le Atua i le lalolagi, e i ai se misiona mo atunuu uma. “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama ma le Atalii ma le Agaga Paia:

“Ia outou aoao atu i latou ia tausi i mea uma ua ou fai atu ai ia te outou” (Mata. 28:19–20). O nei upu na fetalai i ai le Matai, e leai se tuaoi; e le o tapulaa i se lanu po o se aganuu. E leai se atunuu e sili ae i lo se isi. E manino le apoapoaiga…“aoao atunuu uma.” …

I le avea ai ma tagata o le Ekalesia a le Alii, e manaomia ona siitia la tatou vaai i luga atu o le faaituau faaletagata lava ia. E manaomia ona tatou iloaina le upumoni a’ia’i e moni lava e le faailoga tagata lo tatou Tama. O nisi taimi tatou te soona faatiga ai i o tatou uso ma tuafafine o isi atunuu e ala i le tofia faapitotasi i se atunuu e tasi nai lo le isi. …

Mafaufau i se tama ma ni atalii se toatele, e tofu le tagata ma le natura, tomai, ma uiga faaleagaga. Mata e faasili lona alofa i se atalii e toatasi nai lo isi? Atonu o le atalii e vaivai le faaleagaga e nofouta, tatalo, ma tele aioiga a le tama mo ia nai lo isi. Pe o lona uiga ea e itiiti lona alofa mo isi? Mata e te faapea e sili atu le alofa o le Tama Faalelagi i le atunuu o se tasi o ana fanau nai lo isi? I le avea ai o ni tagata o le Ekalesia, e manaomia ona tatou manatua le fesili faigata a Nifae: “Tou te le iloa ea e sili atu i le tasi atunuu o i ai? (2 Ni. 29:7). …

I o tatou uso ma tuafafine o tagatanuu uma: Matou te tuuina atu le molimau mautu na fetalai le Atua i o tatou taimi ma aso, na auina mai avefeau o le lagi, ua faaalia e le Atua lona mafaufau i se perofeta, o Iosefa Samita. …

Faapei ona alofa lo tatou Tama i ana fanau uma, e tatau foi ona tatou alolofa i tagata uma—o ituaiga uma, aganuu, ma atunuu uma—-ma aoao i latou i mataupu faavae o le talalelei ina ia mafai ona latou taliaina ma maua ai se malamalama i le paia o le Faaola.⁷

I a tatou taumafaiga faatauvaa e fausia le usoga ma aoao atu upumoni ua faaalia mai, tatou te fai atu i tagata o le lalolagi le mea sa fautuaina mai ma le alofa e Peresitene Siaosi Alapati Samita:

“Ua matou o mai ia le aveesea mai ia te outou le upumoni ma mea lelei ua outou umia. Matou te le o o mai e saili masei ia te outou pe faitioina foi outou. … Teu pea a outou mea lelei uma ua i ai, ae tuu mai sei o matou avatu ia te outou isi mea lelei, ina ia atili ai ona outou fiafia ma ina ia outou saunia ai e ulu atu i le afioaga o lo tatou Tama Faalelagi.”⁸

O loo tatou i ai i le galuega o le laveaiina o agaga, o le valaauliaina o tagata e o mai ia Keriso, o le aumaia o i latou i vai o le papatisoga ina ia mafai ai ona faaauau lo latou alualu i luma i le ala e tau atu i le ola e faavavau. E manaomia e lenei lalolagi le talalelei a Iesu Keriso. Ua saunia e le talalelei le ala e tasi o le a iloa ai e le lalolagi le filemu. ⁹

I le avea ai ma tagata o le Ekalesia a Iesu Keriso, matou te saili e tuufaatasia upumoni uma. Matou te saili e faalautele le li’o o le alofa ma le malamalama i tagata uma o le lalolagi. O lea ua matou taumafai ai e atiae le filemu ma le fiafia, e le gata i totonu o le faa-Kerisiano ae faapea foi i tagata uma. …

Lea na avea ai Iosefa [Samita] ma tufugaaao i le faatuina, o Le Ekalesia a Iesu Keriso o le Au Paia o Aso e Gata Ai, lea ua avea nei ma tapuaiga i le lalolagi, e le faapea ona ua iai ona tagata i le salafa o le lalolagi, ae ona e i ai sana savali manino e le faapitoau, e faavae i le taliaina o upumoni uma, na toefuatai mai e taulima ai manaoga o tagata uma.

Matou te auina atu lenei savali o le alofa ma le faamoemoe i le lalolagi uma. O mai i le Atua o mea moni uma, o le o loo tulei mai pea lava pea i Ana fanau e ala mai i perofeta. Faalogo i Lana savali o Ia le o loo auina atu pea lava Ana auauna e folafola le talalelei e faavavau i nuu uma, ituaiga, gagana, ma tagata. O mai ma taumamafa i le laoai ua laulauina e Le Ekalesia a Iesu Keriso o le Au Paia o Aso e Gata Ai. Tatou mafuta a o tatou saili e mulimuli i le Leoleo Mamoe lelei o le na sauniaina.¹⁰

“O loo tatou i ai i le galuega o le laveaiina o agaga.”

O i latou ua iloa faamanuiaga o le Togiola a Iesu Keriso, ua i ai le matafaioi e tuuina atu molimau ia te Ia.

O le a se faiā a le Togiola ma le galuega faafaifeautalai? O soo se taimi lava tatou te mauaina ai faamanuiaga o le Togiola i o tatou olaga, o le a faigata ona taofia le i ai o so tatou popolega mo le manuia o [isi].

E tele faataitaiga i le Tusi a Mamona e faapupula ai lenei mataupu faavae. Ina ua uma ona ‘ai Liae i le fua o le laau, e faatusa i le ‘ai i le Togiola, na ia fai mai, “Sa amata ona ou manao ia aai ai foi lo’u aiga” (1 Nifae 8:12). Ina ua iloa e Enosa lona liua ma ua mauaina le faamagaloga o ana agasala, ona o lona faatuatua ia Iesu Keriso na ia fai mai ai, “Sa amata ona ou lagonaina se manao mo le manuia o o’u uso, sa Nifae”(Enosa 1:9). Ona ia tatalo lea mo sa Lamana, o fili amioleaga o sa Nifae. E i ai foi le faataitaiga o atalii e toafa o Mosaea—o Amona, Arona, Ominea, ma Himinae— o e sa mauaina se faamagaloga o agasala e ala i le Togiola ona latou galulue ai lea mo ni tausaga i le au sa Lamana e aumaia i latou ia Keriso. O loo tusia i le tala e faapea sa latou le manofonofo i le mafaufau faapea nei fano se agaga se tasi (Mosaea 28:3).

O lenei faataitaiga maoae o e ua osifeagaiga ua mananao e faasoa atu i isi le talalelei, o loo faapupula lelei mai i le faataitaiga a Alema le Itiiti. Ou te fia faitau atu ia te outou lana molimau. …

“… Mai i lena taimi e oo mai i le taimi nei o ou galue e le taofia ina ia mafai ona ou aumai o agaga i le salamo ina ia mafai ona ou aumai i latou e totofo i le olioli tele lea sa ou tofo iai ina ia mafai foi ona fanauina i latou i la le Atua ma faatumuina i le Agaga Paia”[Alema 36:24; tagai foi Alema 36:12–23].

O se tasi o faailo sili o se liua o se tagata o le manao lea ia faasoa atu le talalelei i isi. O lea le mafuaaga na aumai ai e le Alii se matafaioi i tagata uma o le Ekalesia e avea o ni faifeautalai.

Faalogologo i le feagaiga e osia e se tasi pe a papatiso i le Ekalesia:

“O lenei foi, ua outou fia o mai i le lafu mamoe a le Atua, ma ia ta’ua o lona nuu, ma ua loto ina fesui ia outou avega e ave ina ia mama ai;

“Ioe ma outou loto e faanoanoa faatasi ma e e faanoanoa, ioe, ma faamafanafana atu ia te i latou o e e manaomia le faamafanafanaga ma tutu o ni molimau a le Atua i taimi uma ma i mea uma ma i nofoaga uma atonu tou te i ai seia oo lava i le oti ina ia mafai ona togiolaina outou e le Atua ma faitauina faatasi ma i latou o le uluaʼi toetutu ina ia mafai ona outou maua le ola e faavavau”Mosaea18: 8–9

E ao ina tatou tutu o ni molimau a le Atua i taimi uma [ma] i nofoaga uma, e oo lava i le oti. Tatou te faafouina lena feagaiga i le taimi o le faamanatuga pe a tatou osifeagaiga e tauave le suafa o Keriso i o tatou luga.

O le auaunaga faafaifeautalai o se tasi ala lea tatou te tauaveina ai i o tatou luga lona suafa. Na fetalai le Faaola afai tatou te mananao e tauave i o tatou luga lona suafa, ma le faamoemoega atoa o le loto, ua valaauina i tatou e o atu i le lalolagi uma ma talai lana talalelei i tagata uma (tagai MF&F 18:28). …

O i tatou ua tofo i le Togiola ua i ai se matafaioi e tuuina atu molimau faamaoni e uiga i lo tatou Alii ma le Faaola. O le valaau e faasoa atu le talalelei i isi e ta’u mai ai lo tatou alolofa tele i fanau a lo tatou Tama Faalelagi faapea foi lo tatou Faaola ma le mea sa Ia faia mo i tatou. ¹¹

Faatasi ai ma le fesoasoani a le Alii, e mafai ona tatou faatoilaloina faalavefau uma i le faasoaina atu o le talalelei.

E faapei ona solovi i lalo papuipui i Europa i Sasae … ma le tele o isi vaega o le lalolagi, o le a mautinoa foi le alu i luga o le manaomia o nisi mau faifeautalai e faataunuu le poloaiga faalelagi e avatu le talalelei i le lalolagi uma! Pe ua tatou saunia ia ausia lena manaoga mo faifeautalai?

Ina ia faamalieina lea manaoga fou ua tuuina mai ia i tatou i lenei galuega tele faafaifeautalai o aso e gata ai, atonu o nisi o i tatou (aemaise le aumatutua o loo tausia aiga) e manaomia ona fai se auiliiliga maua’i e fuafua ai pe ua tatau ona faasolovi i lalo ia “papuipui” ia na tatou fauina i o tatou lava mafaufau.

Mo se faataitaiga, ae a le “papuipui lagomalie” lea ua foliga mai ua toatele ulugalii ma le au nofofua ua taofia ai mai le o e faamisiona? Ae a “papuipui tautupe” o aitalafu ia e faalavelavea ai nisi o tagata ua tatau ona o, po o “papuipui o fanau a fanau,” po o “papuipui o le soifua maloloina,” po o le “papuipui o le le mautinoa,” po o le “papuipui ua faamalieina ia lava,” po o le “papuipui o le solitulafono,” po o “papuipui o le fefe, masalosalo, po o le faafiaamiotonu? Pe i ai se tasi e le talitonu faapea o le fesoasoani mai o le Alii e mafai ai e ia ona nutililiiina i lalo na papuipui?

Ua faamanuiaina i tatou e fananau mai i nei aso e gata ai, e le pei o tisipenisiona na muamua, e fesoasoani e avatu le talalelei i le lalolagi uma. E leai se isi valaauga e sili atu i le olaga nei. Afai ua faamalieina i tatou e lalafi i tua atu o papuipui na tatou fauina, o lona uiga ua tatou naunau e faapasi faamanuiaga semanu tatou te maua. Ua faamatala mai e le Alii i se faaaliga o ona po nei le manaoga tele:

“Aua faauta, ua sinasina le fanua ua saunia eselesele; ma faauta, o ia o lē e sasau atu lana selesaito ma lona malosi, o ia lava lea ua na faaputu ma teu ina ia lē fano o ia, ae aumai e ia le olataga i lona agaga.” (MF&F 4:4.)

O loo faamalamalama mai foi e le Alii i lea lava faaaliga ia tulaga e agavaa ai ina ia avea o ni faifeautalai lelei. O le silafia lelei o o tatou vaivaiga ma le tele o mea e taofiofia ai i tatou pe a tatou tutu i luma o le faitotoa tele o o tatou papuipui na gaosi, na ia faamautinoa mai ai ia i tatou lena fesoasoani mai le lagi e faatoilalo ai faalavefau o le a oo mai pe afai tatou te faia la tatou vaega, faatasi ai ma se folafolaga faigofie: “Ole atu, ma o le a outou maua ai; tuitui atu, ma o le a tatala mai ia te outou.” (MF&F 4:7.)

Ia faamanuia i tatou e le Atua ina ia aua nei punitia i tatou mai faamanuiaga e mafai ona tatou maua, ona o papupuni o o tatou mafaufau.¹²

Na tuuina mai faafia e lo tatou Alii i le taimi o lana misiona i le olaga nei, se valaau e le gata o se valaaulia ae o se lu’i foi. Na fetalai Keriso ia Peteru ma Aneterea, “Mulimuli mai ia te au, ma o le a ou faia oulua ma faifaiva i tagata”Mata. 4:19). …

Na aoao mai e perofeta na muamua atu, e ao i alii talavou uma e gafatia, ma agavaa ona o e faamisiona talai. Ou te faamamafa atua lea lava manaoga i le aso. O loo i ai foi le tulaga manaomia tele i o tatou taimi, mo ulugalii e gafatia, ma matutua i le galuega faamisiona. Na ta’u atu e Iesu i ona soo, “E tele le saito e seleseleina, a o le aufaigaluega e toaitiiti ia; o lea ia outou aioi ai i le Alii e ana le saito e seleseleina, ina ia aauina mai e ia ni e galulue i lana saito e seleseleina” (Luka 10:2).¹³

Fautuaga mo Suesuega ma le Aoaoina Atu

Fesili

Mafaufau i aoaoga a Peresitene Hunter e uiga i le talalelei e mo tagata uma, e faavae i le mea moni o i tatou uma o ni fanau a le Atua (tagai vaega 1). A o tatou faasoa atu le talalelei, e mafai faapefea ona fesoasoani ia i tatou e manatua o tagata taitoatasi o so tatou uso po o se tuafafine tuofe?
O le a se mea ua tatou aoao mai aoaoga a Peresitene Hunter i le vaega 2 i lagona o le Tama Faalelagi e uiga i Lana fanau? O le a se mea e mafai ona e fai ia atili ai ona e alofa i tagata uma ma faasoa atu i ai le talalelei?
E faapefea ona e taliina le fesili a Peresitene Hunter “O le a le faia a le Togiola ma le galuega faafaifeautalai?” (Tagai vaega 3.) E mafai faapefea ona e faateleina lou naunau e faasoa le talalelei i isi? O a faamanuiaga ua oo mai a o e faasoa atu le talalelei i se tasi—pe faasoa mai foi e se tasi ia te oe?
A maea ona suesue i le vaega e 4, mafaufau i “papuipui” e taofia ai oe mai le mauaina o faamanuiaga o le galuega faafaifeautalai. Talanoaina ni auala e aveesea ai na faalavefau.

Mau Fesootai

Amosa 9:9; 2 Nifae 2:6–8; Mosaea 28:1–3; Alema 26:37; MF&F 18:10–16; 58:64; 68:8; 88:81; 90:11; 123:12; Iosefa Samita—Mataio 1:31

Fesoasoani mo le Aoaoina Atu

“Atonu e musuia e le Agaga Paia se tasi pe sili atu foi o i latou e te aoaoina e fai se sao i malamalamaaga e manaomia e isi ona faalogo i ai. Ia nofouta i musumusuga e te maua e tofi ni tagata patino. Atonu foi e uunaia oe e fesili i se tagata e lei ofo mai, e faamatala mai sona silafia” (Aoao Atu, e Leai Se Isi Valaauga e Sili Atu [1999], 63).