Mataupu 21
Faatuatua ma le Molimau
“O le ausiaga aoao o le olaga o le maua lea o le Atua ma ia iloa o loo soifua o Ia.”
Mai le Soifuaga o Howard W. Hunter
Na amata ona atinae e Howard W. Hunter lana molimau i le popofou o lona tuputupu ae i Boise, Idaho. E ui e lei avea lona tama ma se tasi o le Ekalesia i lena taimi, ae sa tausia o ia e lona tina i le talalelei. “O ona tulivae lava sa matou aoao ai e tatalo,” sa ia toe manatua ai. “Sa ou mauaina se molimau o se tamaititi i tulivae o lo’u tina.”1
Na tuputupu ae le molimau a Howard i le gasologa o tausaga. Ina ua 20 ona tausaga ma sa nofo i Los Angeles, Kalefonia, sa amata ona ia iloaina le taua o le suesue ma le loto i le talalelei. Na ia tusia: “E ui ina sa ou auai i vasega a le Ekalesia i le tele o lo’u olaga, ae o le fagua moni muamua lava o a’u i le talalelei na oo mai i se vasega a le Aoga Sa i [le] Uarota a Atamu lea na faiaoga ai Uso Peter A. Clayton. Sa maoae lona silafia ma le tomai e musuia le autalavou. Sa ou suesue i lesona, faitau isi tusi e atofa mai, ma sa ou tautala foi i mataupu e tofi mai. … Ou te mafaufau i lea vaitaimi o lo’u olaga o le taimi na amata ai ona tatala mai upumoni o le talalelei. Sa i ai pea lava la’u molimau i le talalelei, ae sa faafuasei ona amata ona ou malamalama”2
E tele tausaga mulimuli ane, sa faamatala mai ai e Peresitene Hunter: “E oo mai le taimi tatou te malamalama ai i mataupu faavae o lo tatou foafoaga ma lo tatou faasinomaga. E faafuasei ona faasusuluina mai nei mea ia i tatou ma o uaua o o tatou fatu e gatete. O le taimi lea e ulufale mai ai le molimau i o tatou lava loto, ma tatou iloa ai e aunoa ma se tuufesili ona o se masalosalo, o le Atua o lo tatou Tama—o loo soifua o ia, e moni lava o ia, ma o i tatou moni o ni ana fanau.”3
E faatatau i le faatuatua ma le molimau a Peresitene Hunter, na saunoa Peresitene Gordon B. Hinckley:
“Mo Peresitene Hunter … sa i ai le mana maoae o le faatuatua. Sa ia te ia le mautinoa o le silafia i mea paia ma mea e faavavau. … Sa ia te [ia] se molimau moni ma le mautinoa o le moni o le Atua soifua o lo tatou Tama e Faavavau. Sa ia fofogaina ma le talitonuga maumaututu lana molimau i le paia o le Alii o Iesu Keriso, le Togiola o tagta uma.”4
“O le tulimataiga aupito tele o se sailiga mo le Atua—e iloa ai lona moni, o ona uiga patino, ma maua ai se malamalama i le talalelei a lona Alo o Iesu Keriso.
O Aoaoga a Howard W. Hunter
1
E ala i le faatuatua, e mafai ai ona tatou maua le Atua ma iloa o loo soifua o Ia.
O le ausiaga aoao o le olaga o le maua o le Atua ma iloa e loo soifua o Ia. Pei lava o soo se ausiaga aoga, e na o le pau le ala e maua ai lenei mea e i latou o le a talitonu ma faatuatua i le mea atonu e lei manino mai muamua. 5
A o liliu atu mafaufauga o le tagata i le Atua ma mea e faatatau i le Atua, e ao ona ui atu le tagata i se suiga faaleagaga. E siitia a’e ai o ia mai le nofoaga masani ma tuuina atu ai ia te ia se uiga malualii faale-Atua. Afai tatou te faatuatua i le Atua, ua tatou faaaogaina se tasi o tulafono sili o le olaga. O le malosiaga aupito mamana i le natura o le tagata o le mana faaleagaga o le faatuatua. 6
O le tulimataiga aupito tele o se sailiga mo le Atua—e iloa ai lona moni, o ona uiga patino, ma maua ai se malamalama i le talalelei a lona Alo o Iesu Keriso. E le faigofie ona maua se malamalama atoatoa i le Atua. O le sailiga e manaomia ai taumafaiga faifai pea, ma e i ai nisi e le taitai lava ona gaee e tulimatai lea malamalama. …
Pe o le sailiga o le malamalama i mea moni faasaienitisi po o le iloaina o le Atua, e tatau lava ona i ai le faatuatua. E avea lena ma uluai laasaga. E tele auala sa faauigaina ai le faatuatua, peitai o le faauigaga aupito taatele lea na tuuina mai e le tusitala o le tusi i Eperu i upu anoa nei: “A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia. (Epe. 11:1.) I se isi faaupuga, o le faatuatua e tatou te taitonu ai i mea ua tatou faamoemoe i ai ma faamautinoa ai i mea tatou te le o vaaia. …O i latou e saili ma le faamaoni i le Atua, e le vaai ia te ia, ae latou te iloa lona moni e ala i le faatuatua. E tele atu nai lo le na o le faamoemoe. O le faatuatua e avea ai ma talitonuga maumaututu—o se faamaoniga o mea e le o vaaia.
Ua faaauau le tala a le tusitala o le tusi i Eperu [le Aposetolo o Paulo]: “O le faatuatua ua tatou iloa ai na faia mea uma i le afioga a le Atua; na le faia foi mea ua vaaia i mea ua aliali mai. (Epe. 11:3.) O le faatuatua lea ua faamatala mai o le talitonu po o le i ai o le talitonuga maumaututu faapea na foafoaina le lalolagi i le upu a le Atua. E le mafai ona maua ni molimau e faamaonia ai lenei mea moni, ae ua aumaia e le faatuatua le malamalama o mea o loo tatou vaaia i le matagofie o le lalolagi ma le natura uma, sa foafoaina e le Atua. …
E i ai lo’u talitonuga maumaututu e moni le Atua—o loo soifua o ia. O Ia o lo tatou Tama Faalelagi, ma o i tatou o ana fanau faaleagaga. Na Ia foafoaina le lagi ma le lalolagi ma mea uma i luga o le fogaeleele ma o ia o le tufuga o tulafono faavavau ia e pulea ai le atulaulau. O loo auauai mai nei tulafono o sia mea ma sia mea a o faaauau pea le sailiga a le tagata, ae sa i ai pea lava ma o le a tumau pea lava e le suia e faavavau.7
2
Ina ia maua le malamalama i le moni o le Atua, e tatau ona tatou faia se taumafaiga faamaoni, ia faia Lona finagalo, ma tatalo mo se malamalama.
Ina ia iloa e moni le Atua, e tatau ona tatou mulimuli i le ala sa ia faasino mai mo le tulimataiga. O le ala e taitai atu agai i luga; e manaomia ai le faatuatua ma taumafaiga, ma e le o se ala e faigofie. Ona o lenei le mafuaaga, e toatele tagata o le a le tuuto atu i latou lava i le galuega faigata o le faamaonia mo i latou lava o le moni o le Atua. Nai lo lena, o nisi ua latou ui i le ala faigofie ma faafitia lona soifua, pe na o le mulimuli lava i le ala o le masalosalo ma le le mautinoa. …
… O nisi taimi o le faatuatua o lona uiga o le talitonu i se mea e moni lea e le lava faamaoniga e faavae ai le malamalama. E tatau ona faaauau pea ona tatou saili ma mulimuli i le apoapoaiga: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou.” (Mata. 7:7–8.) …
O le tulafono masani tatou te le mauaina ni mea e taua sei vagana ua tatou naunau e totogi se tau. E le mafai ona atamai le sikola sei vagana ua galue ma taumafai malosi ina ia manuia. Afai e le naunau o ia e faia, mata e mafai ona ia faapea mai e leai se mea e igoa o se sikolasipi? … Ua faapena lava ona faavalevalea se tagata e fai mai e leai se Atua ona e leai sona naunautaiga e saili o ia.
… Ina ia maua e se tagata le malamalama e le maluelue i le moni o le Atua, e tatau ona ola o ia i poloaiga ma aoaoga faavae na fofogaina mai e le Faaola i le taimi o lana misiona patino. … O i latou o e naunau e faia le sailiga, tuu atu i ai se taumafaiga, ma faia le finagalo o le Atua, o le a latou maua le malamalama i le moni o le Atua.
A maua e se tagata le Atua ma malamalama i ona ala, na te aoaoina e leai lava se mea i le atulaulau e oo mai faafuaveta, ae o mea uma e afua mai i se fuafuaga faalelagi na muai fuafuaina. Se faauigaga ina a mauoa ua oo mai i lona olaga! O le malamalama i mea e le oo i ai le aoaoaga faalelalolagi, e a ia lea. O mea matagofie o le lalolagi ua sili atu ona matagofie, o le faatulagaga o le atulaulau ua sili atu ona anoa, o foafoaga uma foi a le Atua ua sili atu ona malamalama i ai a o molimauina e le tagata le oo mai ma le mou atu o taimi a le Atua, ma le auauai mai o lea vaitau ma lea vaitau i lo latou faasologa. 8
Na faamalamalama mai e Keriso, i le taimi o lana misiona, le faiga e mafai ai e le tagata ona iloa le upumoni e uiga i le Atua. Na Ia fetalai mai, “Ai se tasi e fia faia lona finagalo, e iloa e ia le mataupu pe mai le Atua pe ou te tautala fua lava au.” (Ioane 7:17.) Sa faamalamalama mai foi e le Matai le finagalo o le Tama ma le poloaiga sili i le ala lea: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mata. 22:37.) O i latou e taumafai e faia le finagalo o le Atua ma tausi ana poloaiga, o le a mauaina faaaliga patino e faatatau i le paia o le galuega a le Alii e molimau atu ai i le Tama.
Ia i latou o e mananao ia malamalama, ua faamatala mai i upu a Iakopo le ala e mafai ai ona maua. “Afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia.” (Iakopo 1:5.) E le foliga mai sa faasino e Iakopo i le poto moni i le manatu faasaienisi, ae o faaaliga mai luga lea e tali ai fesili a tagata ona o le mulimuli i lenei apoapoaiga o le tatalo. …
O lea la ua tatou maua ai le fuafaatatau mo le sailiga o le Atua ma meafaigaluega e ausia ai le tulimataiga—faatuatua, alofa, ma le tatalo. E ofoofogia mea ua faia e le saienisi mo le tagata, ae e le mafai ona ausia ai mea e tatau ona faia e ia lava, o le mea aupito silisili o le iloa lea o le moni o le Atua. E le faigofie le galuega; e le o se galuega mama; ae e pei ona ta’ua e le Matai, “O le a tele lava lo latou taui ma o le a faavavau lo latou mamalu.” (MF&F 76:6.)9
3
E tatau ona tatou talitonu ina ia mafai ai ona tatou vaai.
Sa manao Toma e vaai a o lei talitonu.
I le afiafi o le aso o le toetu, sa afio atu ai Iesu ma tu atu i ona soo i se potu o loo tapuni. Sa Ia faaali atu ia te i latou ona aao ia na tutui ai fao ma lona itu lea na tu’ia i le tao. Sa lei i ai Toma, o se tasi o le toasefululua, i le taimi na tupu ai le mea lea, ae sa ta’u atu e isi ia sa latou vaai i le Alii ma sa latou talanoa ma Ia. … Sa lei talitonu Toma, ma sa ia fai atu i soo:
… Afai ou te le vaai atu i ona lima i mea na tutui ai fao, ma tuu lo’u tamatamailima i mea na tutui ai fao, ma tuu lo’u lima i lona itu, ou te le talia lava. (Ioane 20:25.)
… I se isi itu, ua tutusa lava Toma ma le uiga masani o tagata o lo tatou vaitau. E le faamalieina lava o ia i soo se mea e le mafai ona ia vaaia, e ui ina sa mafuta o ia ma le Matai ma iloa ana aoaoga e faatatau i le faatuatua ma le masalosalo. … E le mafai e le faatuatua ona suitulaga i le masalosalo pe a tatau i se tasi ona pa’i pe vaai ina ia talitonu ai.
Sa lei naunau Toma e faalagolago i le faatuatua. Sa manao o ia i ni faamaoniga tonu o mea moni. Sa manao o ia i le malamalama, ae le o le faatuatua. O le malamalama fesootai ma le taimi ua tuanai aua o o tatou aafiaga o le taimi ua tuanai, lea tatou te maua ai le malamalama, peitai o le faatuatua e fesootai i le lumanai—i mea e le o iloa lea e lei oo i ai la tatou savaliga.
Tatou te mafaufau ia Toma, o se tasi sa savavali faatasi ma le Matai, ma o le sa filifilia e ia. I o tatou loto tatou te moomoo maimau pe ana mafai e Toma ona liliu atu ma le talitonuga i le lumanai i mea e lei vaaia, nai lo le faapea, “Ina ia talitonu, ia vaai.” …
O le faatuatua e te maua ai le mautinoa o mea e le o vaaia.
I se vaiaso mulimuli ane, sa toe potopoto ai le au soo i le fale lava lea i Ierusalema. O le taimi lea sa faatasi atu ai Toma. Sa tapuni le faitotoa, ae na afio atu Iesu ma tu atu ia i latou ma faapea atu, “Ia outou fifilemu
“Ona fetalai atu lea o ia ia Toma, Aumai ia lou tamatamailima iinei; vaai mai foi i o’u lima; aumai ia foi lou lima ma tuu mai i lo’u itu, aua foi e te masalovale ai ae talitonu.” (Ioane 20:26–27.) …
“Ua fetalai atu Iesu ia te ia, Toma e, ua e talitonu aua ua e vaai mai ia te a’u; Amuia o e le vaai mai ae talitonu mai pea.” ([Ioane] 20:29.)
O lena mea e tulai mai pea o se tasi o lesona sili mo taimi uma. Fai mai Toma, “Ina ia talitonu, ia vaai,” ae tali atu Keriso: “Ina ia vaai, ia talitonu.” …
O le faataitaiga taatele o le faatuatua o loo tusia e le Aposetolo o Paulo i lana tusi i Eperu, “A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia.” (Epe. 11:1.)
O lea faamatalaga e le o faapea ai o se malamalama atoatoa, ae o loo faamatala ai le faatuatua lea e tuuina atu ai i se tasi le faamautinoaga po o se talitonuga i mea o loo i le lumanai. O nei mea atonu o i ai nei, ae e iloa e ala i le faatuatua. O le faatuatua e aumaia ai se lagona o le mautinoa i mea e le o vaaia po o se mea e mafai ona maua ai se faamaoniga moni.
E foliga mai sa lei maua e Toma lona talitonuga i le lumanai. Sa tilotilo o ia i le taimi ua tuanai. Sa manao o ia i se faamaoniga o le mea e le o vaaia. O i latou ua leai se faatuatua, e ola i le taimi ua tuanai—ua leai se faamoemoe mo le lumanai. Se suiga ina a tele e oo mai i le olaga o se tasi e maua se faatuatua mausali e tuuina atu ai le faamautinoaga ma le mautinoa.
“Sa talitonu le tagata tauaso ma sa faatagaina o ia e vaai.”
O le tagata na fanau mai e tauaso sa lei masalosalo; sa talitonu o ia i le Faaola.
Afai tatou te toe sue i le mataupu lona iva o le Ioane, tatou te faitau ai i se isi mea na tupu i Ierusalema i se tagata na fanau mai o tauaso, ae na toe pupula. O le Aso Sapati, ma sa i ai Iesu i le vaega sa i ai le malumalu ma sa ia vaai ai i le tagata tauaso, ma sa fesili ona soo ia te ia:
“ … Rapi e, o ai ea na agasala, po o ia nei, po o ona matua, ina ua fanau mai o ia o tauaso?”
“Ua tali atu Iesu, E lei agasala lenei tagata po o ona matua, peitai ina ia faaalia ai o galuega a le Atua ia te ia.
“E tatau ona ou faia galuega a le na auina mai a’u, manu o ao, e oo i le po, e le mafaia e se tasi ona galue ai.
“Manu o ou i ai i le lalolagi, o a’u o le malamalama o le lalolagi.” (Ioane 9:2–5.)
Ona feanu ai lea o Iesu i le eleele ma faia ai le palapala i le feanuga. Sa Ia nini mata o le tauaso i le palapala ma fai atu ia te ia, e alu ma mulumulu i le taelega i Seloa. Pe ana fai o Toma lea, mata e alu o ia e pei ona poloaiina ai pe o le a ia fesili: “O le a se mea lelei e maua i le mulumulu i se vai to’a o lena vai palapala? po o le “O a ni elemene faafomai o i ai i se faua ua mili faatasi ma le pefu o le eleele?” E ono foliga mai o ni fesili talafeagai nei, ae pe ana le talitonu le tauaso ma tuufesili, semanu e tauaso pea lava. O le i ai o le faatuatua, sa ia talitonu ma faia e pei ona faatonuina ai. Sa alu o ia ma mulumulu i le vai ma foi mai ai ua pupula. Ina ia vaai, ia talitonu. …
“Amuia i latou e lei vaai, ae talitonu mai pea.”
Sa talitonu le tauaso ma sa faatagaina o ia e vaai. Sa musu Toma e talitonu sei vagana ua vaai muamua. Ua tumu le lalolagi i le mau Toma, ae e toatele e faapei o le tauaso o Ierusalema. E fetaiai faifeautalai o le Ekalesia ma ituaiga uma nei i aso uma a o latou tauaveina atu le savali i le lalolagi, o le savali o le talalelei toefuataiina a Iesu Keriso. …O nisi e talitonu, e i ai le faatuatua, ma papatiso. O nisi o le a le taliaina ona e le mafai ona latou vaai pe tagotago foi.
E leai se faamaoniga lelei, mautu, faitino faapea o loo soifua le Atua, ae e faitau miliona ua malamalama o loo soifua ia e ala i lena faatuatua, lea e aofia ai le faamaoniga o mea e le o mafai ona vaaia. E toatele e fai atu i faifeautalai, “O le a ou taliaina le papatisoga pe afai e mafai ona ou talitonu sa asiasi atu le Tama ma le Alo ia Iosefa Samita.” Mo lenei mea moni, e leai se faamaoniga lelei, mautu, faitino, ae ia i latou o e ua pa’i atu i ai le Agaga, o le a suitulaga le faatuatua i lena faamaoniga o mea e le o vaaia. Manatua upu a le Matai sa faasatauroina a o tu o ia i luma o Toma:
“Amuia i latou o e talitonu ae lei vaai, ae talitonu mai pea.” ([Ioane] 20:29.)
O i latou e talitonu e ala i le faatuatua o le a vaai.
Ou te faaopoopo atu la’u molimau i molimau a le fiaafe o faifeautalai o loo soifua le Atua, o Iesu o le Faaola o le lalolagi, ma o i latou o le a talitonu e ala i le faatuatua, o le a mafai ona vaai.10
4
O le faatino e ala i le faatuatua e taitai atu ai i le molimau patino.
A o avea o ni tamaiti, sa tatou taliaina o se mea moni ia mea sa faamatala mai e o tatou matua, po o o tatou faiaoga ona o lo tatou talitonuga sa i ai ia i latou. O le a puna ifo se tamaitiiti mai se mea maualuga e aunoa ma le fefe pe afai e ta’u ia te ia e lona tama, o le a na ia sapoina o ia. E faatuatua le tamaitiiti o le a le tuua e lona tama o ia ia pau. A oo ina matutua tamaiti, ona amata lea ona latou mafaufau mo i latou lava, e fesili ma i ai masalosaloga i na mea e le tinoa ni faamaoniga. Ou te faanoanoa lava mo alii talavou ma tamaitai talavou pe a oo atu ni masalosaloga moni i o latou mafaufau, ma latou nopiai ai i le taua tele o le foiaina o le masalosalo. E mafai ona foia nei masalosaloga, pe afai e i ai so latou manao faamaoni e iloa le upumoni, e ala i le faia o taumafaiga, faaleagaga ma le mafaufau lelei. O le a latou tulai mai lea taua i se faatuatua mausali, malosi atu, ma le tele atu ona o le tauiviga. Ua latou o mai mai se faatuatua faigofie, ma le talitonuina, mai le masalosalo ma le fetoa’i, i se faatuatua mautu tele lea e tulai mai ai se molimau.11
E faaalu e tamaiti aoga le tele o itula i falesuesue faasaienitisi e suesue ai mea moni. Afai latou te faia le mea lea e tasi i le faatuatua, tatalo, lotofaamagalo, lotomaualalo, ma le alofa, o le a latou maua se molimau ia Iesu Keriso, o le ua foai maia nei mataupu faavae. 12
O le talalelei a Iesu Keriso e le na o se talalelei o se talitonuga; o se fuafuaga o le faatinoga. … E lei fai mai o Ia e “matau” la’u talalelei, ae na ia fai mai ia “ola” ai! E lei faapea mai, “Matau lona fausaga ma lona faatusa matagofie”; ae na ia fetalai, “O, fai, vaai, tago, avatu, talitonu!” …
O le faatinoga o se tasi o faavae autu o molimau patino. O le molimau mautinoa o lea e muai maua mai i le aafiaga patino. Ina ua lu’iina e Iutaia le aoaoga faavae na aoao atu e Iesu i le malumalu, sa ia tali atu, “… o la’u mataupu e le a a’u, ae o le na auina mai au.” Ona ia faaopoopo mai lea o le ki i le molimau patino, “Ai se tasi e fia fai lona finagalo e iloa ai e ia le mataupu pe mai le Atua pe ou tautala fua lava a’u.” (Ioane 7:16–17.)
Pe ua tatou faalogo i le taua o lenei tautinoga a le Faaola? “Afai e faia e se tagata … o le a iailoa” Sa maua e Ioane le taua o lenei mea taua ma ia faamamafaina ai lona uiga i lana [tusi]. Fai mai a ia, “O le faapea o loo tumau ia i totonu ia te ia, e tatau ona savali o lena tagata faapei ona savali o ia.” (1 Ioane 2:6.)
O loo fai mai, o le talia, ma le talitonu e le lava lea. E le atoatoa sei vagana ua faaliliu mea o loo ta’u mai ai i se faatinoga anoa o le ola ai i aso taitasi. O lona uiga la, o le punavai aupito lelei lea o le molimau patino. E iloa e se tasi ona ua oo i ai. Na te le taufai mai, “Fai mai Uso Sione e moni, ma ou te talitonu ia te ia.” E mafai ona fai mai, “Ua ou talitonu i lenei mataupu faavae i lo’u lava olaga, ma ua ou iloa e ala i lo’u aafiaga patino e sa’o. Ua ou lagonaina lana faatosinaga, ua tofotofo foi i lona aoga moni, ma ua ou iloa e lelei. E mafai ona ou molimau atu i lo’u lava iloa o se mataupu faavae moni.”
“E toatele tagata ua tauaveina sea ituaiga o molimau i o latou lava olaga ae le o iloaina lona aoga. Talu ai nei sa fai mai ai se tamaitai talavou,” E leai sa’u molimau o le talalelei. Maimau pe a na i ai. Ua ou taliaina ana aoaoga. Ua ou iloa ua aoga i lo’u olaga. Ua ou vaaia le aoga i olaga o isi. Maimau e pe ana tali mai le Alii i a’u tatalo ma aumai ia te au se molimau, semanu o au o se tasi o tagata ola e sili ona fiafia!” O le mea sa manao ai lea tamaitai talavou o se faalavefau faavavega; ae ua uma ona ia vaai i le vavega o le faalauteleina ma le faagaeetiaina o lona lava olaga. Ua tali le Alii i ana tatalo. Sa i ai sana molimau, ae na te lei iloaina i lona tino mai.13
I le avea ai o se Aposetolo faauuina ma se molimau faapitoa a Keriso, ou te tuuina atu la’u molimau maua’i o Iesu Keriso e moni lava o le Alo o le Atua. … O le mana o le Agaga Paia ou te tuu atu ai la’u molimau. Ou te iloa e moni Keriso, e faapei ua ou vaai i ai i o’u mata ma faalogo i ai i o’u taliga. Ua ou iloa foi o le a faamautu e le Agaga Paia le moni o la’u molimau i loto o i latou uma o e faalogo ma se taliga o le faatuatua. 14
Fautuaga mo Suesuega ma le Aoaoina Atu
Fesili
-
Ua aoao mai Peresitene Hunter e faapea, “o le ausiaga aoao o le olaga o le maua lea o le Atua ma iloa o loo soifua o Ia” (vaega 1). O le a le matafaioi a le faatuatua i le ausiaina o lena tulimataiga? O a ni aafiaga na fesoasoani ia te oe e maua ai le Atua ma iloa ai o loo soifua o Ia?
-
Fai mai Peresitene Hunter, “e le faigofie le galuega” ma “ e le mama le galuega” i le mauaina o le malamalama i le moni o le Atua? Aisea e te manatu ai o taumafaiga tuuto e taua mo i tatou e maua ai lena malamalama? Aisea e taua ai le tausi o poloaiga e iloa ai le Atua?
-
I le vaega e 3, o loo faaaoga ai e Peresitene Hunter le faatusatusaga i le va o Toma ma le tauaso, e aoao mai ai afai tatou te talitonu, o le a mafai ona tatou vaai. E mafai faapefea ona faaaoga le malamalamaaga o Peresitene Hunter i nei tala i lou olaga? O mafai faapefea i le faaaogaina o le faatuatua ona e vaai?
-
Iloilo aoaoga a Peresitene Hunter e faapea, o le faatinoina o lo tatou faatuatua o le ki lea i le mauaina o se molimau (tagai vaega e 4). O a ni auala e mafai ai ona e faatinoina lou faatuatua? E mafai faapefea ona faatoilaloina e le faatuatua le masalosalo? Ua faapefea i lou faatinoina o se mea i lou faatuatua ona fesoasoani ia malosi atu lau molimau?
Mau Fesootai
Ioane 17:3; Eperu 11:1–6; Alma 5:45–48; 30:40–41; 32:26e3; Eteru 12:4, 6–22; Moronae 10:4–5; MF&F 42:61
Fesoasoani mo le Aoaoina Atu
“Fai fesili e manaomia ai e tagata aoao ona sue tali i tusitusiga paia ma aoaoga a perofeta o aso e gata ai”(Aoao Atu e Leai Se isi Vaaauga e Sili Ai [1999], 62).