Mataupu 23

“Sa Le Itiiti Le Auaunaga”

“O le toatele o i tatou o le a na o ni tagata e le pisa, e le lauiloa … o e faia a tatou galuega e aunoa ma le faalauaiteleina. Ia i latou atonu e faapea … e le o ta’uta’ua, ou te fai atu “e le itiiti [la outou] auaunaga” nai lo le toatele o le au lauiloa o a outou paaga.

Mai le Soifuaga o Howard W. Hunter

Sa lauiloa Peresitene Huner e le gata o se taitai tuuto ma se perofeta alofagia, ae mo ala le leoa na ia auauna ai. Sa ia silafia o le auauna atu lava ia e taua, ae le o lona mauaina o se faamamaluga. Sa ta’ua e Elder Neal A. Maxwell o le Korama a le Toasefululua e uiga ia te ia, “O Peresitene Howard W. Hunter o se alii agamalu. … O le alii agamaualalo lava lea e tasi, ina ua ou ala a’e ina ua mavae se aso o le vaivai ma le pefua faatasi ma ia i so ma tofiga i Aikupito, sa ia faaiilaina ma le leoa o’u seevae, o se galuega sa ia faia ma le faamoemoe ia uma e aunoa ma lo’u iloaina.”¹

Na muai vaaia e Peresitene Thomas S. Monson le ala lotomaualalo e auauna atu ai Peresitene Hunter, o le taimi na faapaia ai le Malumalu o Los Angeles Kalefonia i le 1956, i nai tausaga a o lei tofia se tasi o i laua o se Aposetolo. Na ia toe manatuaina:

O lo’u … muai iloaina o Peresitene Hunter o le taimi sa ia auauna ai o se Peresitene o le Siteki a Pasadena Kalefonia, ma sa ia te ia le tiutetauave e faamaopoopo ia fuafuaga i le lotoifale mo le faapaiaga o le Malumalu o Los Angeles (Kalefonia). Sa ou maua le avanoa e lolomi ai pepa ulufale. O lona tofiga e tele naua. Sa na o le vaega lena e faatatau i pepa ulufale na ou vaai i ai, na faavasega i lanu, faaigoa lelei, ma faanumera i le faiga e sili ona faatulagaina lelei ua ou vaai i ai. Sa ia tuuina atu ma le agalelei le faamalo i isi ma faamautinoa e le faaaogaina soo lona igoa, e ui o ia o se tagata taua sa faatulagaina uma nei taumafaiga.”²

Sa toe ta’ua foi e Elder James E. Faust o le Korama a le Toasefululua: “Sa le tau manaomia ona patipatia o ia. Faatasi ai ma lana faautautaga uma, sa mafai ona saofai faatasi ma lana usoga ma e le tele sana upu e fai. Sa matua atoatoa lona filemu ia te ia lava.”³

Sa malamalama Peresitene Hunter e taua taga uma o le auaunaga i le silafaga a le Atua, tusa lava pe le aloaia, pe tau le iloa foi. I ni nai vaiaso a o lei maliu Peresitene Hunter, sa fesili ai se uo, “Le Peresitene Pele e, o le a le tulaga po o le valaauga e aupito faaeaina—o se uo pele ma le faatuatuaina, po o se perofeta a le Atua? Ina ua uma ona faafofoga atu i le fesili, “sa mafaufau loloto ma le filemu le Peresitene mo ni nai minute; ona ia uu malieina lea o le lima o lana uo ma faliu sa’o atu lona ulu ia te ia, faatasi ai ma se loimata o tafe ifo i lona alafau, na ia tali atu, “o ni valaauga paia uma na o le faatuatuaina.”⁴

E toatele e tuuina atu se auaunaga e suia ai olaga “ae e le o vaaia, e le o maua foi le faalauiloaga a le lalolagi.”

O Aoaoga a Peresitene Howard W. Hunter

O i latou e auauna atu gugu, ma tau le iloa, e “le itiiti se auaunaga” nai lo i latou o e o loo patipatia e le lalolagi.

Na ta’ua e uiga i le Taitaiau talavou ma le lototoa o Moronae: “Ana pei tagata uma sa iai ma o i ai ma o le a iai o Moronae, faauta, po ua luluina i lalo e faavavau mana o seoli, ioe, po ua le maua e le tiapolo se mana i luga o loto o le fanauga a tagata.” (Alema 48:17.)

Se saafiafiga ina a maoae i se tagata lauiloa ma le malosi! Ou te le iloa se saafiafiga e sili ona atoatoa mai se tasi tagata i se isi. I fuaiupu e lua mulmuli ane o se faaupuga e uiga ia Helamana ma ona uso, o e na faatinoina se matafaioi e lei lauiloa tele nai lo Moronae: “O lenei faauta, sa le itiiti foi le auaunaga a Helamana ma ona uso i le nuu nai lo Moronae.” (Alema 48:19.)

I se isi faaupuga, e ui ina sa lei matauina gofie ia Helamana pe lauiloa e pei o Morone, ae sa le itiiti lana auaunaga; o lona uiga sa tutusa lona aoga ma Moronae.

E manino lava, e mafai ona tatou manuia tele i le suesueina o le olaga o Kapeteni Moronae. O ia o se faataitaiga o le faatuatua, auaunaga, tuuto, tautino atu, ma le tele o isi uiga faaleatua. Peitai, nai lo le taulai atu i lenei tagata iloga, ae ua ou filifili e tilotilo ia i latou e le o faalauiloaina, o e e le o patipatia e le lalolagi, ae “e le itiiti la latou auaunaga,” e pei ona faaupu mai e le mau.

O le a le tutusa i tatou uma ma Moronae, e maua saafiafiga a a tatou paaga i le aso atoa ma aso uma. O le tele o i tatou o le a le pisa, e matua le iloa lava e tagata o e fai mai ma foi atu, ma faia a tatou galuega e aunoa ma se faalauiloa. Ia i latou o e atonu e faapea o lea [manatu] e le amanaia pe taufaafefe pe na o le le taualoa lava, ou te fai atu, e “le itiiti au auaunaga” nai lo le toatele o au paaga taualoa. O oe foi, o se itutino o le autau a le Atua.

Mafaufau, mo se faataitaiga, i le auaunaga maoae a se tina po o se tama e tuuina atu filemu ma le le taualoa i se aiga agavaa o le Au Paia o Aso e Gata Ai. Manatu i faiaoga o Aoaoga Faavae o le Talalelei ma taitaipese a le Peraimeri ma Taitai Sikauti ma faiaoga asiasi a le Aualofa o e auauna atu ma faamanuiaina ai le fia miliona, ae o le a le patipatia lava faalauaitele o latou igoa pe faalauiloa mai i faasalalauga a atunuu.

O le fiasefulu afe o tagata e le mavaaia o loo mafai ai ona tatou maua avanoa ma le fiafia i aso uma. E pei ona ta’ua mai e le mau, e “le itiiti foi le auaunaga” nai lo i latou o loo i itulau pito i luma o nusipepa.

O le logologoa o le talafaasolopito ma le gauai atu i le taimi nei ua tele ina taulai i le toatasi nai lo le toatele Ua tele ina ’i’o ese mai taitasi tagata mai a latou uo ma sii i luga faalauiloa o ni toa. Ou te faailoa atu o lena ituaiga o gauai, o se tasi o auala e iloa ai mea e faamemelo i ai tagata pe avea o se mea e taua. Ae o nisi taimi o lena faalauiloaga e le o se mea e onomea, pe atonu foi o loo sami ai ni mea sese ua faatauaina.

E tatau ona tatou filifili ma le poto o tatou toa ma faataitaiga, ae ia tuu atu foi le faafetai i le anoanoai o na uo ma tagatanuu o e le taualoa tele ae e “le itiiti le auaunaga” nai lo le mau Moronae o o tatou olaga. ⁵

I tusitusiga paia, e toatele tagata o e sa auauna atu i le atalafoia o isi, sa faia ni sao

Atonu e mafai ona outou mafaufau faatasi ma au i nisi o tagata lelei mai tusitusiga paia o e lei maua se faalauiloaga ae a tatou iloiloina le talafaasolopito, ona faamaonia ai lea o i latou lava o ni toa mao’i.

E toatele ua faitau i le tala o le perofeta maoae o Nifae ma toetoe lava ina misi atoa le isi atalii lototoa o Liae, o lona igoa o Sama. O Nifae o se tasi o tagata lauiloa i le Tusi a Mamona atoa . Ae a Sama? E na o le faasefulu ona ta’ua le igoa o Sama iina. Ina ua apoapoaia e Liae ma faamanuia lana fanau, sa ia fai atu ia Sama:

“Amuia oe, ma au fanau, ona o le a fai ma ou tofi le laueleele e pei o lou uso o Nifae. Ma o le a faitauina au fanau faatasi ma ana fanau; ma o le a avea oe e pei lava o lou uso, ma o lau fanau e pei o lana fanau,ma o le a faamanuiaina oe i ou aso uma. (2 Ni. 4:11.)

O le matafaioi a Sama o le lagolago ma fesoasoani i lona uso laitiiti sa sili atu ona lauiloa, ma sa ia mauaina moni faamanuiaga ia na folafola ia Nifae ma ana fanau. E leai se mea na folafola ia Nifae na taofia mai ia Sama faamaoni, ae e matuai itiiti lava se mea ua tatou iloa e uiga i le auaunaga a Sama ma lona sao. Sa toetoe lava ina le iloa o ia i le olaga, ae sa manino lava o ia o se taitai manumalo ma o se siamupini i faamaumauga o le faavavau.

E toatele e le leoa o latou sao. Sa malaga Isamaeli ma le aiga o Nifae i se osigataulaga tele, sa feagai ma “mafatiaga e tele, fia aai, fia feinu, ma le vaivai.” (1 Ni. 16:35.) Ma i le lotolotoi o nei mafatiaga, sa lagomau o ia i le vao. E i ai nisi o i tatou e mafai ona amata malamalama i le osigataulaga a sea tagata i na aso o faanuupo ma tulaga. Atonu pe ana mamao la tatou vaai ma le malamalama, semanu tatou te faavauvau foi, e faapei ona faia e ona afafine i le vao, mo se mea na ofo atu e se tagata faapea—ma lafoai!—ina ia mafai ona tatou maua le ‘Tusi a Mamona i le aso.

O igoa ma manatua o ia ituaiga o tane ma fafine o e e “le itiiti se auaunaga” e tele naua i le Tusi a Mamona. Pe o le Tina o Sarai po o le mafine o Apiso, le auauna fafine a le masiofo sa Lamana, na tofu sao uma ae e le o faalauiloaina i mata o tagata ae e le o misi i le silafaga a le Atua.

E na o le sefululua fuaiupu o le tusitusiga paia o loo ta’ua ai le soifuaga o Mosaea, le tupu o le nuu o Saraemila ma le tama o le Tupu tautaua o Peniamina. Ae sa lei faalauiloaina lana auaunaga i tagata. Sa ia taitaiina le nuu i “talaiga ma valoaga e tele. Ma sa tima’ia i latou e le aunoa i le afioga a le Atua.” (Ominae 1:13.) O Limae, Amoleka, ma Paorana—o le o loo ta’ua mulimuli sa agafaatamalii ma ia le tuua’ia ina ua tuua’i seseina—o isi faataitaiga ia o tagata sa auauna atu ma le le faatuaoia ae maua e isi le faalauiloaga.

O le fitafita o Teanekuma, o le sa ositaulagaina lona lava soifua, po o Lakoniu, le faamasino sili lea sa aoaoina tagata ia salamo i le taimi o le luitauina e le au Katianetona, po o faifeautalai e le o ta’ua o Ominae ma Himinae, o i latou uma e “le itiiti se auaunaga” nai lo a latou soa, ae sa itiiti lava se gauai atu i ai i tusitusiga paia.

E le tele so tatou iloa ia Sepulona, le atalii faamaoni o Alema lea e omia lona talaaga i le va o tala o Helamana, le taitai i le lumanai, ma Korianetona, le sa solitulafono; ae e taua ona o loo faamatalaina o ia, o se “tagata [o le] sa savali ma le amiotonu i luma o le Atua.” (Alema 63:2.) O le perofeta maoae o Nifae, o loo ta’ua i le tusi a Helamana, e i ai sona uso e igoa ia Liae, o le e puupuu lava lona ta’ua ae o loo matauina e faapea “sa le itiiti mai o ia i tua [o Nifae] e faatatau i mea tau le amiotonu.” [Helamana 11:19; tagai foi fuaiupu 18.]⁶

Ina ua pa’i atu Apiso (tauagavale) i le lima o le masiofo a sa Lamana, sa tulai ae le masiofo mai le eleele (tagai Alema 19:15–29).

E ui atonu tatou te le lauiloa, ae e mafai ona tatou tuuina atu se auaunaga tele i le malo. Ioe, e i ai foi faataitaiga o nei auaunaga taitoatasi i lo tatou tisipenisione.

Ioe, e i ai foi faataitaiga o nei auaunaga taitoatasi i lo tatou tisipenisione. O Oliva Kurena o se tagata e le gaoia, ma lagolagosua i aso e gata ai, ma sa manatua o ia e le Alii i le vaega e 117 o le Mataupu Faavae ma Feagaiga. Atonu e le masani le toatele i le igoa o Oliva, o lea la o le a ou faamatala atu ai lenei tagata lototoa.

Sa sefulutasi tausaga e matua atu ai Oliva Kurena nai lo Iosefa Samita, ma e pei foi o le Perofeta, e sau o ia mai Niu Ioka. Ona o le matuitui o le malulu ma le aafia ai i le malulu ina ua tolusefulutolu ona tausaga, o lea sa tele ina faaleagaina ai le vaai a Oliva. E ui ina tapulaa lana vaai, ae na faatolu ona ia faamisiona. Sa faigaluega foi o ia i le Malumalu o Katelani ma sa i ai i le fono a fautua maualuga a Katelani.

Ina ua tuliesea le toatele o le Au Paia mai Katelani, Ohio, sa i ai ni aitalafu a le Ekalesia e lei totogia. Sa tofia Oliva e fai ma sui o Iosefa Samita ma le Au Peresitene Sili e ala i le toe foi i Katelani e faamaea pisinisi a le Ekalesia. O lenei tiute, o loo tusia i le Mataupu Faavae ma Feagaiga: “O lea ia tuu atu ia te ia e finafinau faamaoni mo le laveaiina o le Au Peresitene Sili o la’u Ekalesia, ua fetalai mai ai le Alii.” (MF&F 117:13.)

Sa ia faatinoina lenei tofiga i se tulaga faamalieina lelei ma e na nofo aitalafu ai ma sa tusia ai e se tasi o i latou: “O le faafoega e Oliva Kurena o le fuafuaga mo le totogiina o aitalafu a tagata ua masii atu i Fa Uesi, i le faataunuuina o a latou tautinoga ma tausisia ai la latou amiotonu, e matuai viia lava, ma ua agavaa ai o ia mo la’u vaaiga aupito maualuga, ma ua tatau ai le lotofaafetai uma. (Horace Kingsbury, e pei ona ta’ua ai e Iosefa Samita, History of the Church, 3:174.)

I le taimi sa i ai Oliva Kurena i Katelani, sa i ai nisi e aofia ai ma tagata sa le fiafia i le Ekalesia, sa taumafai e tauleagaina le Au Peresitene Sili ma fesiligia ai la latou amiotonu e ala i le faasalalauina o tuuaiga sese. Sa “faasaoina e [Oliva Kurena] i ana faatinoga le Au Peresitene Sili”e ala i lana tautua faamaoni. … Na fetalai le Alii e uiga ia Oliva Kurena, “o le a manatua i le paia lona igoa mai lea tupulaga i lea tupulaga, e faavavau faavavau lava.” (MF&F 117:12.) “O le a ou siitia la’u auauna o Oliva Kurena, ma aumaia mo ia se igoa sili i le fogaeleele, ma o’u tagata, ona o le faamaoni o lona agaga.” (History of the Church, 3:350.)

Ina ua maliu o ia i le 1841, e ui ina toaitiiti le Au Paia sa totoe ai i le itu o Katelani, ma e toaitiiti foi ni uo a le Au Paia, ae sa matuai toatele tagata mai taulaga tuaoi sa auai atu i le falelauasiga o Oliva Kurena.

E ui ina e le lauiloa Oliva Kurena i le taimi nei e faapei o isi taitai muamua o le Ekalesia, ae o ia o se tagata maoae ma le taua i le auaunaga sa ia tuuina atu i le malo. Ae tusa lava foi pe na o le Alii e manatuaina lona igoa, ua lava ma totoe lea faamanuiaga mo ia—po o se isi lava o i tatou.⁷

O Nifae o se faataitaiga o le manatuaina o le Atua, o le punavai o lona malosiaga ma faamanuiaga.

Ou te manatu e ao ina tatou iloa, e mafai ona i ai se tulaga matautia faaleagaga ia i latou e le malamalama i le ofoofogia o le i ai pea i le taulaiga o le vaai. E ono oo ina latou manao fua i le tulaga lauiloa ona galo ai lea o le taua o le auaunaga e tuuina atu.

E le tatau ona tatou faatagaina i tatou lava e taulai atu i minute pupuu o le lauiloa pe saili atu mo lena lauiloa e suitulaga i le galuega moni ae le mailoa, lea e aumaia ai le gauai a le Atua, tusa lava pe le aumaia i talafou o le afiafi pe le lauiloa foi. O le mea moni, e mafai ona avea le patipatia ma le gauai ma vaivaiga faaleagaga o e aupito talenia o i tatou.

Afai e tatau ona avea oe ma autu o le taulaiga i se taimi o lou olaga, e lelei pe a e mulimuli i faataitaiga a i latou o i tusitusiga paia o e na lauiloa. O Nifae o se tasi o faataitaiga maoae. Ina ua ia ausia mea uma a o malaga ai i le vao ma lona aiga, sa taulai atu pea lava ona uiga i mea e sili atu ona taua. Fai mai a ia:

“Ma pe a ou fia olioli e oi loʼu loto ona o aʼu agasala e ui i lea ua ou iloa lē ua ou faalagolago iai.

“Sa avea loʼu Atua ma oʼu lagolago; sa ia taitaia aʼu e ala mai i oʼu puapuaga i le vao ma sa ia faasaoina aʼu i luga o vai o le moana loloto.

“Ua ia faatumuina aʼu i lona alofa ua oo lava ina mu ai loʼu tino.

“Sa ia faafememeaiina oʼu fili e oo i le faagateteina o i latou i oʼu luma.” (2 Ni. 4:19–22.)

E lei avea le taulai atu ia Nifae ma mea e tauaso ai o ia i le punavai o lona malosi ma ona faamanuiaga.⁸

A tatou malamalama i le mafuaaga tatou te auauna atu ai, o le a tatou le popole lava po o fea tatou te auauna ai.

I taimi o le gauai ma le lauiloa, e ono aoga mo i tatou ona tali i le fesili, Aisea tatou te auauna atu ai? A tatou malamalama pe aisea, o le a tatou le popole po o fea tatou te auauna atu ai.

Na aoao mai e Peresitene J. Reuben Clark Jr., le mataupu faavae taua lea i lona lava soifua. I le konafesi aoao ia Aperila 1951, sa lagolagoina ai Peresitene Tavita O. MaKei e avea ma Peresitene o le Ekalesia ina ua mavae le maliu o Peresitene Siaosi Alapati Samita. E oo atu i le taimi lea, o galue Peresitene Clark o se Fesoasoani Muamua ia Peresitene Ipa J. Kurene ma sosoo ai ma Peresitene Siaosi Alapati Samita. Na avea Peresitene MaKei ma Fesoasoani Lua i tamalii uma ia e toalua.

I le taimi o le sauniga faaiu o le konafesi, ina ua faagasolo pisinisi a le Ekalesia, sa tofia Uso Stephen L. Richards i le Au Peresitene Sili ma lagolago ai e avea ma Fesoasoani Muamua. Ona lagolagoina ai lea o Peresitene J. Reuben Clark, Jr. e avea ma Fesoasoani Lua. Ina ua maea le lagolagoina o taitai o le Ekalesia, sa faamalamalama e Peresitene MaKei le mafuaaga na ia filifilia ai ona fesoasoani i le faasologa lena. Fai mai a ia:

“Sa ou lagonaina o se tasi o mataupu faavae taiala i lenei filifiliga o le mulimuli lea i le faasologa na seei mai ai i le Aufono [a le Toasefululua]. Sa alaala nei tamalii e toalua i o la nofoa i lena tino pulefaamalumalu i le Ekalesia, ma sa musuia au o se utaga poto le faaauau o lena tulaga i le korama fou a le Au Peresitene Sili.” (I le Conference Report, 9 Aperila 1951, i. 151.)

Ona talosagaina lea o Peresitene Clark e saunoa pe a maea Peresitene MaKei. Sa puupuu lana saunoaga i lea taimi ae sa aoao mai ai se lesona mamana “I le galuega a le Alii, e le o le mea e te auauna ai ae o le auala e te auauna ai. I le Ekalesia a Iesu Keriso o le Au Paia o Aso e Gata Ai, e tulai mai le e tofia i le tulaga e tofia ai, ma o lea tulaga e le sailia e se tasi pe teena foi. Ou te ofoina atu ia Peresitene MaKei ma Peresitene Richards le auaunaga tuuto atoa ma le lotonuu, i le galuega o le a oo mai i le fuataga atoa o lo’u malosi ma tomai, ma fai e tusa ma le mea ou te mafaia, e faatino ai, po o le a lava lo’u le gafataulimaina. (Ibid., p. 154.)

O le lesona na aoao mai e Peresitene Clark o loo faailoa mai i se tasi ala i le solo lea na tusia e Meade McGuire, lea ua faalogo soo foi i ai:

“Tama, o fea ou te galue ai i le aso?”
Ua solo foi le mafana o lo’u alofa ma saoloto.
Ona ia faasino mai lea o si togi laitiiti.
Ma fai mai, Vaai le mea le la mo au.”
Sa ou tali vave atu, “Oi leai, e le o lena mea!
E leai lava se isi o le a vaai i ai.
Po o le a lava le lelei o la’u galuega e fai;
E le o lena mea iti.”
O le upu foi na Ia fai mai, e le saua;
Sa Ia tali malu mai:
Le tamaitiiti e, sailiili lou fatu.
Pe o e galue mo i latou po o au?
O Nasareta e laitiiti,
E faapena foi Kalilaia.”

[Tagai Best-Loved Poems of the LDS People, tuufaatasia e Jack M. Lyon ma isi (1996), 152.]

Na tautino mai e le Tupu o Peniamina: “Faauta ou te fai atu ia te outou ona ua ou fai atu ia te outou sa ou faaaoga oʼu aso e auauna atu ai ia te outou, ou te lē fia mitamitavale ona sa na o loʼu auauna atu lava lea i le Atua. Ma faauta ua ou taʼu atu nei mea ia te outou ina ia mafai ona outou aoaoina le poto ina ia mafai ona outou aoaoina pe a outou auauna atu i o outou uso-a- tagata ua na o lo outou auauna atu lava lea i lo outou Atua.” (Mosaea 2:16–17.)⁹

E “sili ona tatou fiafia ma faamanuiaina i le olaga” pe a “o lua mea tatou te naunau i ai ma le tuuina atu o le fesoasoani i isi ma fesoasoani ia latou maua le ala.”

E ao ina tatou auauna atu ma le faamaoni ma le le leoa, ma faaeteete i faaviivii a isi.

E sili lona fiafia ma faamanuiaina i le olaga aua e o lua mea e naunau i ai ma le tuuina atu o le fesoasoani i isi ma fesoasoani ia latou maua le ala.”

O le faailo i le fetaulaiga o ala e kolosi ai nofoaafi lea e lapataia ai i tatou e tu, vaai, ma faalogo e mafai ona avea ma taiala mo i tatou. Taofi a o tatou faanatinati atu i le olaga. Vaavaai mo mea uma e lelei, magafagafa, faaaloalo e mafai ona tatou faia, ma manaoga iti uma faaletagata soifua e mafai ona tatou faatutumu. Faalogologo atu i isi ma aoao i o latou faamoemoega ma faafitauli ina ia mafai ai ona tatou saofaga atu i ni nai mea iti mo lo latou manuia ma le fiafia.¹⁰

Fai mai Peresitene Ezra Taft Benson, “O le auaunaga faaKeriso e faaeaina. … Ua folafola mai e le Alii o i latou e maumau o latou ola i le auauna atu i isi, o le a maua e i latou lava. Na ta’u mai e le Perofeta o Iosefa Samita e ao ona tatou ‘faaaoga ia uma o tatou olaga’ i le faataunuuina o Ona faamoemoega. (MF&F 123:13.)” (Ensign, Nov. 1989, i. 5–6.)

Afai e te manatu o mea o loo e faia e te le o lauiloa ai, aua e te lotovaivai. O le toatele o tagata na soifua ai, e lei lauiloa tele foi. Galue ma tuputupu ae, ma le faamaoni ma le le leoa. Ia faaeteete e tusa ai ma le faaviivii a tagata. Na fetalai Iesu i le Lauga i luga o le Mauga:

“Ia outou nei avatu ni a outou meaalofa i luma o tagata, ina ia iloa ai e i latou: a faapea ona leai ai lea o so outou taui mai lo outou Tama oi le lagi

“ O lea a e avatu ai ni meaalofa, aua nei e ilia le pu i ou luma, pei ona faia e tagata pepelo i sunako ma ala, ina ia viia o i latou e tagata. E moni ou te fai atu ia te outou, ua maua e i latou lo latou taui,

“A e avatu ni meaalofa aua nei iloa e lou lima tauagavale le mea ua faia e lou lima taumatau.

“Ina ia lilo au meaalofa o lou Tama foi o le silafia i le mealilo o ia lava na te avatu faaaliali se taui ia te oe.” (Mata. 6:1–4.)

Ia taui atu e lo tatou Tama i le Lagi outou e le aunoa. ¹¹

Fautuaga mo Suesuega ma le Aoaoina Atu

Fesili

O le a se mea o taumafai Peresitene Hunter e fessoasoani ia tatou malamalama ai e ala i le faamamafaina mai faapea o Helamana ma ona uso e “le itiiti se auaunaga” nai lo Kapeteni Moronae? (Tagai vaega 1.) E mafai faapefea e lenei malamalama ona fesoasoani ia te oe?
O le a se mea e mafai e faataitaiga faatusi paia i le vaega e 2 ona aoao ai i tatou? E mafai faapefea e nei faataitaiga ona faatosina ai o tatou lava lagona pe a tatou auauna atu? Ua faamanuiaina faapefea oe e isi o e sa auauna atu ma le filemu, ma le le leoa?
O le a se mea e mafai ona tatou aoao mai le tala a Peresitene Hunter e uiga ia Oliva Kurena? (Tagai vaega e 3.) Aisea e le tatau ai ona tatou popole i le mauaina o se faalauiloaga pe a tatou auauna atu?
E mafai faapefea ona matautia “le lauiloa e tagata lautele” po o le tautaua? (Tagai vaega e 4.) O le a se mea e mafai e le faataitaiga a Nifae ona aoao ai oe pe faapefea ona “taulai atu i mea e sili ona taua”?
Toe iloilo le tala ia Peresitene J. Reuben Clark Jr. i le vaega e 5. O le a se mea e faagaeetia ai oe i le uiga faaalia ma upu a Peresitene Clark? Mafaufau i lau tali i le fesili “Pe aisea ou te auauna atu ai?” E mafai faapefea ona tatou atinae se uiga faaaliga o le ofoina atu o le mea sili tatou te mafai tusa lava po o fea tatou te auauna atu ai?
I le vaega e 6, o loo ta’ua e Peresitene Hunter le folafolaga a le Alii “o i latou e maumau o latou ola e auauna atu ai i isi, o le a latou maua” (tagai Mataio 10:39; 16:25). O le a le uiga o lenei mea? E faapefea ona e iloa e moni lenei mea? E aumaia faapefea le fiafia ia te oe ona o le auauna atu?

Mau Fesootai

Mataio 6:2–7, 24; 20:25–28; Iakopo 1:27; MF&F 76:5–7; 121:34–37

Fesoasoani mo Suesuega

“Faasoa mea ua e aoaoina. A o e faia, o le a manino atili ou mafaufauga ma o le a faateleina lou mana e faatumauina ai” (O Le Aoao Atu e Leai Se Isi Valaauga e Sili Ai [1999], 17).