Mataupu 22

Aoao Atu le Talalelei

“O le faamoemoega o le aoao atu … [o le] ina ia avea i tatou o se meafaigaluega i aao o le Alii i le suia o le loto o se tagata.”

Mai le Soifuaga o Howard W. Hunter

I le konafesi aoao ia Aperila 1972, o Elder Howard W. Hunter, i le taimi lena o avea o se tasi o le Korama a Aposetolo e Toasefululua, o se tasi o failauga faaiu i se tasi o sauniga. Sa ia saunia se lauga, ae e lei lava se taimi na totoe o le sauniga na te tuuina atu ai. “I le matauina o le uati,” na saunoa mai ai Elder Hunter, “Ua ou gaugauina le tusiga sa ou saunia ma tuu i la’u taga.” Ae sei ou faamatalaina si mea itiiti na oo mai ai se uunaiga ia te au a o ou laitiiti. Na oo mai lenei mea i lo’u mafaufau, ina ua ta’ua faapea o loo tatou mafuta iinei ma se vaega toatele o tagata tuuto o loo aoaoina le autalavou.

“O se aso i le taumafanafana i le taeao po. Sa ou tutu i autafa o le faamalama. Sa punitia au e ie faamalama mai ni manuiti se lua i luga o le laufanua. O le tasi o se manulele lapoa a o le isi o se tamai manulele, na iloagofie lava e faatoa o ese mai i se faamoega. Sa ou vaaia le manulele lapoa o musamusa solo i luga o le vao, ona tutu lea o lona vae ae ea i luga lona ulu. Sa ia ave ane se anufe tele mai le vao ona toe musamusa mai lea i tua. Sa faamaga le gutu o le tamai manulele, ae sa folo e le manulele lapoa le anufe.

“Ona ou vaaia lea o le manulele lapoa ua lele i luga o se laau tele. Sa suasua e ia le pa’u o le laau mo sina taimi ona toe foi mai lea ma se mea i lona gutu. Sa faamaga le gutu, o le tamai manulele ae peitai sa folo foi e le manulele lapoa le iniseti. Sa tagitagi le fiafia [le manulele laitiiti].

“Sa lele ese le manulele lapoa, ma ou te lei toe vaaia, ae sa ou matauina le tamai manulele. Ina ua mavae sina taimi, sa musamusa le tamai manulele i luga o le vao, tutu ona vae, ea i luga lona ulu ma toso mai se anufe lapoa mai le vao.

“Ia faamanuia e le Atua tagata lelei o loo aoaoina a tatou fanau ma la tatou autalavou.”

Sa lolomi ma faasalalauina le savali puupuu a Elder Hunter i lalo o se ulutala “O Se Faiaoga.”¹

E masani ona faamamafa e Elder Hunter le taua o le aoao atu lelei i le Ekalesia. Na ia tuuina mai mataupu faavae—e pei o le taua o le aoao atu e ala i faataitaiga, lea na faapupula mai i le tala i manulele—lea e mafai ona fesoasoani i faiaoga ia mataalia atili o ni faiaoga i le faamanuiaina o olaga o i latou latou te faiaoga ai. E tele taimi e saunoa ai o ia i faiaoga o tamaiti ma le autalavou, e fesoasoani ia latou malamalama i lo latou tiutetauave paia mo i latou o tupulaga faia’e. I se tasi sauniga na ia saunoa ai:

“Ua ou vaai atu i o’u luma i nisi o agaga filifilia o le lalolagi. … Ua ou taumafai e vaai faalemafaufau [ia te outou faiaoga] i le galuega i o outou tofiga patino. Ou te le iloa po o a ituaiga o fua o la outou galuega o le a fua mai. Mata o le a leaga nisi o na fua ona e te lei suaina pe faato’a le palapala na tuuina atu ia te oe e tausi ma vaai; pe na faato’aina atoa le palapala ina ia maua mai ai se fuata lelei tele?

“I a outou uarota ma siteki … o loo nonofo ai le toatele o fanau a lo tatou Tama. E faapei o outou, e taua i latou i lana silafaga; peitai e le pei o outou, e toatele e le o i ai se poto masani ma e toatele foi e fou i le Talalelei. O lou tiutetauave mo i latou e tele naua. O o latou olaga e mafai ona faatosinaina, e faigofie ona lolo’u, e faigofie ona fetuunai, e faigofe ona taitai, pe afai e mafai ona outou maua lo latou talitonuga ma faagauai mai o latou loto. O oe o lo latou leoleo mamoe. E tatau ona e taialaina i latou i le “fanua lanulauava.” …

“Se luitau ina a tele, se galuega ina a fiafia, se tiutetauave ina a paia o lou tiute i le taimi nei! … maeu le manatunatu, maeu le magafagafa, maeu le agalelei, maeu le agamalu, maeu le loto ina a mama, maeu le i ai o lena alofa e le manatu faapito e pei ona i ai i le Alii, maeu le loto ina a maualalo, maeu le lototatalo ua tatau ona e i ai a o e toe amatalia lau galuega o le fafagaina o tamai mamoe e pei ona tau atu e le Alii ia te oe e fai!”²

O le aoao atu o fanau i le lotu e lagolago ai matua i le aoaoina i le fale.

O Aoaoga a Howard W. Hunter

Fesoasoani i isi e atiae se talitonuga i tusitusiga paia.

Ou te uunaia malosi outou ina ia faaaoga ia tusitusiga paia i a outou aoaoga ma faia mea uma i lo outou malosi e fesoasoani ai i tamaiti aoga e faaaoga ma maua le lagona mafanafana i tusitusiga paia. Ou te manao i o tatou talavou ina ia i ai le talitonuga i tusitusiga paia ma ou te manao ina ia outou faaliliuina lena fuaitau i ni auala se lua.

Muamua, matou te mananao i tamaiti aoga ina ia i ai le talitonuga i le malosiaga ma upumoni o tusitusiga paia, le talitonuga o loo fetalai moni mai pea lo latou Tama Faalelagi ia i latou e ala i tusitusiga paia, ma le talitonuga e mafai ona latou liliu atu i tusitusiga paia ma sue ni tali i o latou faafitauli ma a latou tatalo. O se tasi na o talitonuga ou te faamoemoe e te tuuina atu i au tamaiti aoga, ma e mafai ona e tuuina atu ia i latou pe a e faaalia ia i latou i aso uma, itula uma, e te faatuatuaina tusitusiga paia i lena lava auala. Faaali atu ia i latou o oe lava ia e te talitonu o loo i ai i tusitusiga paia tali i le tele—ioe i le tele lava—o faafitauli o le olaga. A e aoao la, aoao mai tusitusiga paia.

O se uiga [lona lua] o loo ta’ua i le fasifuaitau “talitonuga i tusitusiga paia” o le matua aoaoina lelei lea o tamaiti aoga i tusitusiga faavae ina ia mafai ai ona latou faaaogaina ma le talitonuga, aoaoina ia mau taua ma lauga ma tusiga o loo i ai. Matou te faamoemoe e leai se tasi o au tamaiti aoga e tuua lou potuaoga ma le fefe pe maasiasi pe matamuli ona ua latou le mafai ona maua le fesoasoani latou te manaomia ona e le o lava lelei lo latou iloaina o tusitusiga paia e sue ai fuaitau talafeagai. Tuu atu i talavou nei ia lava se poto masani i le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele ina ia latou maua uma ai ituaiga talitonuga e pei ona sa faatoa ou ta’ua.

E tele taimi ou te mafaufau ai o le a pei lava o tatou tupulaga talavou i le Ekalesia o isi e i fafo atu o le Ekalesia, pe afai latou te le atiae ni tomai anoa i le faaaogaina o tusitusiga faavae. Tou te manatuaina uma ia fuaiupu na tusia e le Perofeta o Iosefa mai le taimi sa i ai i le Falepuipui o Liperate. Na ia tusia foi, Aua o loo i ai nei tagata e toatele i luga o le lalolagi i totonu o lotu uma, vaega, ma tapuaiga, o e ua faatauasoina i le taufaasese poto o tagata, lea ua latou taooto faapupuna ai e faasese, ma o e ua nao na taofia mai le upumoni ona ua latou lēiloa le mea e maua ai” (MF&F 123:12; ua faaopoopo le faamamafa ).

Ua i ai so tatou tiutetauave tele o loo i ai nei o ni [faiaoga] i le Ekalesia e faamautinoa o o tatou lava tagata, ma o tatou lava autalavou, e le pauu atu i lena vaega le manuia o le faatauasoina o alii ma tamaitai talavou lelei, manuia, ma agavaa o e ua taofia mai upumoni o tusitusiga paia ona latou te le iloa le mea e maua ai na upumoni ma ona latou te le o mauaina le talitonuga [i le faaaogaina]o a latou tusitusiga faavae.³

Aoao atu i le Agaga.

Sauniuni ma ola i se ala e te maua ai le Agaga o le Alii i au aoaoga. E matua tele naua mea i lo tatou lalolagi e faataumaoia ai le lagona o le Agaga, ma e matua tele naua ua taofia ai i tatou mai le mafutaga ma le Agaga. E manaomia ona tatou faia o mea uma tatou te mafaia mo nei talavou, o e o loo osofaia pea i faiga faalelalolagi o loo siomia ai i latou. E manaomia lo tatou faia o mea uma e mafaia ina ia latou lagonaina ai le mafutaga matagofie, ma le faamautinoa a le Agaga o le Alii. …

I se tasi o faaaliga iloga o lenei tisipenisione, na fetalai ai le Alii, “ Ma o le a tuu atu ia te outou le Agaga e ala i le tatalo o le faatuatua; ma afai tou te lē maua le Agaga aua tou te aoao atu” (MF&F 42:14).}

Ou te tilotilo i lea fuaiupu o lona uiga e le gata ina le tatau ona tatou aoao atu e aunoa ma le Agaga, ae e matuai le mafai foi ona tatou aoao atu e aunoa ma ia. O le aoaoina o mea faaleagaga e le mafai ona faia e aunoa ma le mafutaga faaleaoaoga ma le faamautinoa a le Agaga o le Alii. E foliga mai e ioeina e Iosefa Samita: “E tatau i tagata uma ona folafola atu le Talalelei, e ala i le mana ma le faatosinaga a le Agaga Paia; ma e leai se tagata e mafai ona folafola atu le Talalelei e aunoa ma le Agaga Paia”[Aoaoga a Peresitene o le Ekalesia: Iosefa Samita (2007), 332].

… Ou te popole pe a foliga mai e fenumiai lena lagona malosi po o le maligi gofie o loimata ma le faatasi mai o le Agaga. E moni lava, e mafai e le Agaga o le Alii ona aumaia lagona malolosi, e aofia ai loimata, ae o le faaaliga mai fafo e le tatau ona faaluafesasi ai le i ai o le Agaga lava ia.

Ua ou matauina le toatele o o’u uso i le tele o tausaga, ma ua matou fefaasoaai faatasi foi i nisi o aafiaga faaleagaga e le mafaamatalaina. E matua eseese uma lava na aafiaga, e faapitoa mea taitasi i lona lava tulaga, ma o na foi taimi paia atonu e i ai pe leai foi ni loimata e aumai ai. E tele taimi o le mea lena e i ai, ae o nisi foi taimi e o mai faatasi ma le matuai taaligoligoa. O isi taimi e o mai faatasi ma le olioli. E masani ona aumai faatasi i se faaaliga tele o le upumoni, o le faaaliga i le loto.

Tuu atu i au tamaiti aoga upumoni o le talalelei e aoao atu ma le mana; o le auala lena e avatu ai ia te i latou se aafiaga faaleagaga. Tuu atu ia oo mai lava e pei ona i ai, atonu e maligi ai loimata, ae pe atonu foi e leai. Afai e moni le mea o loo e tautala atu ai, ma e te fai atu foi i le mama aiai ma le talitonuga maumaututu faamaoni, o le a lagonaina e na tamaiti aoga le agaga o le upumoni sa aoaoina atu ia i latou, ma o le a latou iloaina lena musumusuga ma le faaaliga ua oo atu i o latou loto. O le auala lena tatou te fausiaina ai le faatuatua. O le auala lena tatou te faamalolosia ai molimau—i le mana o le upu a le Atua o loo aoaoina i le mama atoa faatasi ai ma le talitonuga maumaututu.

Faalogo mo le upumoni, gauai atu i le aoaoga faavae, ma tuu atu ia oo mai le faaaliga a le Agaga Paia e faapei ona oo mai i le tele o auala eseese. Ia tumau i mataupu faavae mautu; aoao atu mai se loto e mama. Ona molioo atu lea e le Agaga i lou mafaufau ma lou loto ma mafaufau ma loto uma o au tamaiti aoga.⁴

Valaaulia tamaiti e saili sa’o i le Atua le Tama ma Iesu Keriso.

Ou te talitonu ua e iloaina le tulaga matautia e ono oo mai … i le fausiaina e au tamaiti aoga o se tautinoga ia te oe ae le o le talalelei. … O le mafuaaga lena e tatau ai ona e valaaulia au tamaiti aoga ia totofu ifo i latou lava i tusitusiga paia, ae la na ona e avatu i ai o au lava faauigaga ma aoaoga. O le mafuaaga lena e tatau ai lava ona e valaaulia au tamaiti aoga ia lagonaina le Agaga o le Alii, ae le na ona avatu i ai o lou lava iloa i lena mea. O le mafuaaga lena, o le tulaga maualuga, e tatau lava ona e valaaulia au tamaiti aoga ia faasino tonu ia Keriso, ae le na o lē o loo aoaoina atu ana aoaoga faavae, tusa lava po o le a le lelei. O le a e lē avanoa mo nei tamaiti i taimi uma. …

O la tatou galuega tele o le faavae o nei tamaiti aoga i mea e mafaiona latou tauaveina i le olaga, e faasino atu ai i latou ia te ia o le e alofa ia te i latou ma mafai ai ona taialaina i latou i le mea o le a leai se isi o i tatou e i ai. Faamolemole ia mautinoa e avatu le faamaoni a’ia’i a nei tamaiti aoga i tusitusiga paia ma le Alii ma aoaoga faavae a le Ekalesia toefuataiina. Faasino atu i latou i le Atua ma lona Alo Pele e Toatasi, o Iesu Keriso, faapea le au taitai o le Ekalesia moni. …Avatu ia i latou meaalofa o le a fesoasoani ia i latou pe a tatau ai ona latou tutu na o i latou. A e faia lenei mea, o le a faamanuiaina le Ekalesia atoa mo augatupulaga fai mai.⁵

“Taumafai i le mea sili e te mafaia e mafaufau ai i [tamaiti aoga] taitoatasi, ia latou lagonaina ai se popolega patino ma le faapitoa mai ia te oe, lo latou faiaoga.”

Taumafai e aapa atu i le toatasi.

E faagaeetiaina lava au i taimi uma [i le iloa] e taulimaina patino e le Alii i tatou taitoatasi. E tele mea tatou te faia i ni vaega i le Ekalesia, ma e tatou te manaomia foi faalapotopotoga e fai si toatele ina ia mafai ai ona tatou taitaia lelei le Ekalesia, ae e tele naua ni mea taua—o mea e siliona taua—e faia taitasi. Tatou te faamanuiaina pepe taitoatasi i le taimi, tusa lava pe o se masaga lua pe masaga tolu. Tatou te papatisoina ma faamau tamaiti taitoatasi i le taimi. Tatou te aai ma feinu i le faamanatuga, e faauuina i le perisitua, pe faia foi sauniga o le malumalu o ni tagata taitoatasi—a o atiae e le tagata e toatasi se sootaga ma lo tatou Tama i le Lagi. Atonu o i ai nisi i o tatou autafa i nei aafiaga, pei foi ona i ai nisi i o outou potuaoga, ae o le faamamafa a le lagi ua i ai lea i tagata taitasi, i tagata uma taitoatasi.

Ina ua afio atu Keriso ia sa Nifae, sa ia fetalai atu:

“Tutulai ia ma o mai ia te au, ina ia outou tuu mai o outou lima i lou itu, ma ina ia outou tagotago foi i tulaga o fao o i ou lima ma ou vae. …

“Ma sa oo ina o atu le motu o tagata i luma, ma tuu atu o latou lima i lona itu, ma latou tagotago i tulaga o fao i ona lima ma ona vae; ma sa latou faia lenei mea, i le o atu i luma taitoatasiseia oo ina latou o atu uma ma vaai i o latou mata ma tago atu i ai o latou lima, ma latou iloa mautinoa ai ma molimau ai” (3 Nifae11:14–15; faamamafa faaopoopo).

Na umi se taimi i lena aafiaga, peitai sa taua ona sa maua e tagata taitoatasi lena aafiaga, sa tofu maua e mata uma ma lima uma lena molimau, patinofaamautinoa. Mulimuli ane sa faapena foi ona faia e Keriso i fanau a sa Nifae. “Sa ia ave a latou fanau laiti taitoatasi ma faamanuia i latou ma tatalo atu i le Tama mo i latou”(3 Nifae 17:21; ua faaopoopo le faamamafa).

O le a faigata ia te oe ona tuu atu uma le gauai patino i nisi o au tamaiti aoga e manaomia, ae taumafai i le mea sili e te mafaia e mafaufau ai ia i latou taitoatasi, ia latou lagonaina se mea e patino ma faapitoa o loo popole i ai oe, lo latou faiaoga. Tatalo ia e iloa po o le fea tamaitiiti aoga e manaomia [se fesoasoani] ae po o le a foi le ituaiga fesoasoani, ma ia nofouta pea mo na uunaiga pe a oo mai. … Manatua o le aoao atu e aupito sili ona lelei, o le aoao taitoatasi lea, ma e tele ina faia i fafo atu o le potuaoga. …

I lau sailiga mo le aoaoina taitoatasi o tamaiti aoga, e toetoe lava ina mautinoa e te mauaina nisi e le o matua lelei e pei o isi, ma e i ai foi nisi e le o o mai lava i le vasega. Ia i ai sou naunau patino i ituaiga tamaiti aoga faapena; fai se isi taumafaiga faaopoopo e valaaulia ai mamoe ua se e foi mai i le lafu. “Ia manatua ua tele lava le taua o agaga i le silafaga a le Atua” (MF&F 18:10). Ua uma ona totogi se tau e le mafuatia e lo tatou Faaola mo i tatou uma taitoatasi, ma o la tatou matafaioi o le faia o mea uma tatou te mafaia e fesoasoani ai ia te ia i lana galuega. O la tatou matafaioi o le faamautinoa ua tuuina atu le meaalofa o le Togiola i alii talavou po o tamaitai talavou o loo tatou aoaoina. I lou tulaga la, o lona uiga o le tausisia lea o i latou ia gauai atoatoa atu i au vasega.

Avatu se gauai faapitoa ia i latou atonu o loo feagai ma tauiviga, ma o atu pe a tatau ai e saili mai mamoe ua se. O se kata tusitusia, o se valaau atu i le telefoni, pe a mafai foi, o se asiasiga patino i le fale i le tele lava o tulaga, o le a i ai se taunuuga matagofie. O se gauai atu patino i se talavou ua faatoa amata ona se ese atu, e ono faasaoina ai le tele o itula—ioe, tele o tausaga—o ni taumafaiga mulimuli ane i a tatou taumafaiga e toe tau aumai lena tagata ia toe toaga mai. Faia mea uma e te mafaia e puipuia ai le tagata o loo malosi, ma toe faamalolosi mai ai i latou ua vaivai i le vaitausaga lenei. ⁶

Aoao atu i Faataitaiga

E matua manaomia lava mo i tatou [o ni faiaoga] ona faia se faataitaiga lelei, ia maelega ma faautauta i o tatou lava olaga, ia tausisia le paia o le Aso Sapati, ia faamamaluina le au taitai o le uarota, le siteki, ma le Ekalesia. E le tatau ona i ai se mea e le talafeagai e sau mai o tatou gutu lea e ono avatu ai i se tamaitiiti le aia tatau po o se avanoa e faia ai le mea sese. E moni afai tatou te faaupu atu pe faia foi se mea e sese, ua i ai i tamaiti le faatagaga e mulimuli ai.

E tauaveina e le faataitaiga se faatosinaga e sili atu ona malosi nai lo le mataupu. O le e faatauanauina isi ia faia le mea sa’o, e ao foi ona faia e ia lava le mea sa’o. E moni, o le e ola i mataupu lelei ona e lelei ma lē faatagaina ia lava e faatosinaina e le amioletonu a isi, o le a tele lona taui nai lo le tagata e faaupu ae le faia. … E aga atu lava tamaiti e faataitai ia i latou ua latou talitonuina. O le tele o lo latou talitonuga, o le tele foi lena o lo latou saunia ia tosinaina mo le lelei po o le leaga foi. E faaaloalogia e Au Paia lelei uma le agalelei i soo se mea e vaaia ai, ma o le a taumafai e faataitai i faataitaiga lelei uma.⁷

O le fuafaatatau mo se faiaoga maoae, e le na o le ola i poloaiga a le Alii ma fautua atu i poloaiga a le Alii, ae ia maua le agaga o le aoao atu e ala i le tatalo. A tatou mauaina lena agaga ma tausia poloaiga a le Alii, ma savavali i le usiusitai i Ona luma, ona suia lea o olaga o i latou tatou te pa’i atu i ai, ma o le a faaosofia i latou e ola amiotonu.⁸

E tatau i faiaoga uma ona i ai se molimau patino o loo soifua le Atua, o le misiona paia a Iesu Keriso, ma e moni lava sa faaali mai le Tama ma le Alo ia Iosefa Samita. E le gata ina tatau ona i ai sona malamalama ma se molimau, ae e tatau foi ona naunau o ia e faaali atu ona talitonuga maumaututu ia i latou e o mai e aoao. ⁹

O le lelei o le aoaoina atu o le talalelei e tau atu i le “suiga o le agaga o le tagata soifua.”

Ia avea o se meafaigaluega i aao o le Alii e fesoasoani ai i tamaiti aoga ia maua se suiga faavavega o le loto.

A faatino e se faiaoga e pei ona faamoemoeina ai e le Alii, o le a tupu mai se vavega. O le vavega o le Ekalesia i ona po nei, e le o le faamalologa lea ua matuai tele naua, e le o pipili ua savavali, o tauaso ua pupula, o tutuli ua faalogo, po o ma’i ua faamaloloina. O le vavega tele o le Ekalesia ma le malo o le Atua i o tatou taimi, o le suiga lea o agaga o tagata soifua. A o matou femalagaai i siteki ma misiona a le Ekalesia, o le mea lea matou te vaaia—o le suiga o agaga o tagata soifua ona o se tasi sa aoao atua ia mataupu faavae o le upumoni.

E faapei ona tautino mai e Alema, i ona aso i le aoaoina o tagata, ina ua ia fai mai: “Ma o lenei faauta, ou te fesili atu ia te outou, o’u uso e, [ma tuafafine], o le ekalesia, ua fanauina ea outou faaleagaga i la le Atua? Ua outou maua ea ona foliga i o outou mata? Ua oo ea lenei liuga tele i o outou loto?” (Alema 5:14.) O le faamoemoega lenei o le aoao atu O le mafuaaga lea tatou te galulue malosi ai, sailia le Agaga, ma saunia o tatou mafaufau i mea lelei e pei ona poloai mai o le Alii, ina ia mafai ona avea i tatou ma meafaigaluega i aao o le Alii i le suia o loto o tagata taitoatasi. O lo tatou faamoemoega o le totoina lea i loto o le fanau o le manao ia lelei, o le manao ia amiotonu, o le manao e tausi poloaiga a le Alii, o le manao ia lotomaualalo i Ona luma. Afai e mafai ona avea i tatou o se meafaigaluega i aao o le Alii i le faataunuuina o le suiga tele i loto o le fanau, o lona uiga ua tatou faataunuuina le vavega tele a se faiaoga. Ma e moni lava, o se vavega. Tatou te le malamalama pe faapefea ona suia e le Alii loto o tagata, ae Na te faia lava. …

Ou te tuuina atu la’u molimau i le mana toefatufatuai o le Agaga i olaga o tagata o le Ekalesia. Ou te aioi atu ia te outou … ina ia galulue e le uma i le amiotonu ma le paia i luma o le Alii i le faataunuuina o le galuega sa tofia i ai oe.”¹⁰

Fautuaga mo Suesuega ma le Aoaoina Atu

Fesili

Faamatalaga: Atonu e te manao e talanoaina nisi o fesili nei mai le vaaiga o ni matua o loo aoao atu a latou fanau.

Ua fautuaina e Peresitene Hunter ia faiaoga e fesoasoani i tamaiti aoga ia maua le “taitonuga i tusitusiga paia” (vaega 1). O anafea na fesoasoani ai tusitusiga paia ia te oe i lou olaga? O anafea na e maua ai ni tali o au fesili i tusitusiga paia? E mafai faapefea ona tatou aoao atu isi, e aofia ai i latou i o tatou aiga, aoao ia alolofa i tusitusiga paia, ma manuia ai mai lo latou mana?
O a ni mea e mafai ona tatou aoao mai le vaega e 2 e uiga i le aoao atu i le Agaga? O a ni ou aafiaga i le aoao atu ma le aoao mai i le Agaga? O ni mea e mafai ona e faia e fesoasoani ai e te aoao atu i le Agaga?
E mafai faapefea e se faiaoga ona fesoasoani i tamaiti aoga e atiae le faamaoni i tusitusiga paia ma le talalelei, ae le o ia lava? (Tagai vaega 3.) E mafai faapefea e se faiaoga ona fesoasoani e faasino atu tamaiti aoga agai i le Tama Faalelagi ma Iesu Keriso? E mafai faapefea e se faiaoga ona fesoasoani i tamaiti aoga ia mausali le faavae i le talalelei ina ia tumau ai le malolosi “pe a oo ina latou tutu na o i latou”?
Mafaufau i aoaoga a Peresitene Hunter e uiga i le taua o tagata taitoatasi (tagai vaega 4). E mafai faapefea ona e fesoasoani ia i latou e te faiaoga ai ina ia atinae se molimau e silafia e le Atua tagata taitoatasi ma e alofa foi ia i latou? Mafaufau po o le a se mea e mafai ona e faia o se faiaoga, e aapa atu ai ia i latou e te aoaoina taitoatasi.
Ua faamamafa mai e Peresitene Hunter le taua o le aoao atu e ala i faataitaiga (vaega e 5). Aisea e sili atu ai ona mamana a tatou faataitaiga nai lo a tatou upu? Na faapefea ona faamanuiaina oe e se faiaoga sa avea o se faataitaiga lelei? E faapefea i faataitaiga a matua ona aoao ai a latou fanau?
O anafea na e aafia ai i se “vavega tele” lea na faamatala e Peresitene Hunter i le vaega e 6 pe o se faiaoga po o se o loo aoao? Mafaufau i ni faiaoga sa avea ma ni faatosinaga lelei i lou olaga. O le a le mea sa avea ai o se faatosinaga aoga? E mafai faapefea ona tatou aoao atu le talalelei ma le mana tele—i le fale, i se potuaoga, po o se isi lava nofoaga?

Mau Fesootai

Ioane 21:15–17; o1 Korinito12:28; 2 Timoteo 3:14–17; 2 Nifae 33:1; Alema 17:2–3; 31:5; MF&F 11:21–22; 50:17–22; 88:77–80

Fesoasoani mo le Aoaoina Atu

I ni fasipepa eseese, tusi ai fesili mai le faaiuga o le mataupu po o nisi fesili e fesootai ma le mataupu. Valaaulia le vasega e filifili mai se fesili ma suesue i le mataupu mo aoaoga e fesoasoani e tali ai. Fai atu ia i latou e faasoa mai mea sa latou aoaoina.