Mataupu 3

Faigata—O Se Vaega o le Fuafuaga a le Atua mo Lo Tatou Alualu i Luma e Faavavau

“A oo ina faalotomaualaloina ma faaleleia atili i tatou ma aoao ai i tatou ma faamanuia i tatou e [faigata o le olaga nei], e mafai ona avea ma meafaigaluega mamana i aao o le Atua e avea ai i tatou ma tagata e sili atu ona lelei.”

Mai le Soifuaga o Howard W. Hunter

I le konafesi aoao ia Aperila 1980, a o avea Elder Howard W. Hunter ma se tasi o le Korama a Aposetolo e Toasefululua, sa ia faamatalaina le auai ma se potopotoga tele e maimoaina le tuuga fautasi i Samoa. “Sa le manofonofo le aofia,” na ia faamatala ai, “o mata uma foi la e i le sami, e mataitu [vaa] e muamua iloa atu. Sa faafuasei ona feei tagata ina ua vaaia le alia’e mai o vaa. E tofu le fautasi ma se au alovaa malolosi e limasefulu sa taufai eeli le aloina gatusa o apefoe ia na asaina ai e vaa galu ma peau tatafe—o se vaaiga matagofie.

“E lei pine ae iloa uma atu vaa ma le au alo a o taututuu mai i le tini. E ui ina sa alo ma le malosi atoatoa nei alii, ae sa faataututu le mamafa o se vaa o i ai ni tagata e limasefulu ma se malosiaga matua malosi naua ma faigata—o le faatautee o le sami.

“Na oo ina feei leotetele tagata ina ua laasia e le fautasi muamua le tini.”

Ina ua mavae le tautuuga, sa savali atu Elder Hunter i le mea sa tuta i ai vaa ma talanoa ma se tasi o le aualovaa, o le sa faamatalaina o le vaega pito i luma o le vaa, “na fausia ina ia se’e atu ai ma vavae le sami e fesoasoani ai e faatoilalo le aave faatautee lea e telegese ai le saoasaoa o le vaa. Na ia toe faamatala o le eeliina o apefoe faasaga i le faatautee o le vai, e maua ai le malosiaga lea e afua ai ona see i luma le vaa. O le faatautee na te fatuina uma gaoioiga o le faasagatau mai ma le agai i luma.” ¹

Sa faaaoga e Elder Hunter le tuugavaa i Samoa e folasia mai ai se saunoaga e uiga i faamoemoega o faigata. I le taimi o lana auaunaga o se Aposetolo, na ia saunoa ai e uiga i faigata i le tele o taimi, ma tuuina mai fautuaga, faamoemoe, ma le faamalosiauga. Na ia saunoa mai i ni aafiaga patino, ma le onosaia o ma’i sa lamatia ai le soifua atoa ai ma isi tofotofoga. Na ia molimau mai ma se talitonuga maumaututu e faapea, o taimi o mafatiaga, “ua ia Iesu Keriso le mana e faamama ai o tatou mafatiaga ma a tatou avega.” ²

I o tatou tofotofoga, ua tuuina mai ai e le Faaola ia i tatou taitoatasi le valaaulia lea na Ia tuuina atu i le tagata i le taelega i Petesa: “E te fia malolo ea?” (Ioane 5:6).

Aoaoga a Howard W. Hunter

O le faigata o se vaega o le fuafuaga a le Atua mo lo tatou alualu i luma e faavavau.

Ua ou iloaina lena olaga—e tofu le tagata—ma taimi lelei ma taimi le lelei. O le mea moni, ua tatou vaaia le tele o le fiafia ma le tele o faanoanoaga i le olaga, e toatele ua suia fuafuaga ma ma mea e lei faamoemoeina, e tele faamanuiaga e le foliga mai pe lagonaina o ni faamanuiaga, ma o le tele foi e faalotomaualalo ai i tatou ma faaleleia ai lo tatou onosai ma lo tatou faatuatua. Ua tatou tofu oo uma i na aafiaga mai lea taimi i lea taimi, ma ou te manatu o le a tatou feagai ai pea i taimi uma. …

… Na tusia e Peresitene Spencer W. Kimball i se taimi, o le sa silafia le tele o mafatiaga, le fiafia, ma tulaga e le oo i ai le malosi:

“O le uiga faaletagata, tatou te mananao ai e tavavaeese mai i tatou mai tiga faaletino ma le mafaufau, ma faamautinoa ia i tatou lava le ola sologa lelei faifai pea, peitai afai o le a tatou tapunia faitotoa mai le faanoanoa ma le faavauvau, o lona uiga o le a tatou le maua a tatou uo ma fesoasoani aupito sili. O puapuaga e mafai ai ona faapaiaina tagata pe a latou aoao e onosai, faapalepale, ma lotopulea” [Faith Precedes the Miracle (1972), 98].

I lena faamatalaga, o loo ta’ua ai e Peresitene le tapunia o faitotoa i ni aafiaga patino o le olaga. … E masani ona tapunia faitotoa i o tatou olaga, ma o nisi o na faitotoa e afua ai le tiga moni ma le lototiga. Peitai ou te matua talitonu o le mea o tapuni ai se faitotoa, e i ai foi se isi faitotoa e matala mai ai (ma atonu e sili atu i le tasi), faatasi ai ma le faamoemoe ma faamanuiaga i isi vaega o o tatou olaga, atonu semanu tatou te le iloa.

… I ni nai tausaga talu ai, na saunoa ai [Peresitene Marion G. Romney] e faapea, o alii ma tamaitai uma, e aofia ai le au faamaoni ma le au lotonuu aupito sili, o le a feagai ma faigata ma mafatiaga i o latou olaga aua, i upu a Iosefa Samita, “O le a tigaina tagata ina ia latou o mai ai i le Mauga o Siona ma faaeaina ae ai i le lagi” [Aoaoga a Peresitene o le Ekalesia: Iosefa Samita (2007), 245; tagai foi Lipoti o le Koanafesi, Oke. 1969, 57].

Sa saunoa Peresitene Romney:

“E le faapea ai tatou te moomoo ia mafatia. Tatou te aloese mai mea uma tatou te mafaia. Peitai, ua tatou iloa nei, ma ua tatou iloaina uma lava ina ua filifilia i tatou e o mai i le olaga nei, ina ia tofotofoina i tatou i le lotolotoi o faigata ma mafatiaga. …

“[E le gata i lea,] o le fuafuaga a le Tama mo le faamaoniaina [ma le faamamaina] o lana fanau e lei tuusaunoaina ai le Faaola lava ia. O puapuaga na ia oo i ai ina ia onosaia, lea lava na ia onosai ai, e faatusa i le puapuaga tuufaatasi o alii [ma tamaitai uma i soo se mea. O le gatete ma le lavatoto ma le moomoo ia solomuli mai le ipu, na ia fetalai ai,] ‘Ma sa ou inu ma faauma ai a’u tapenapenaga mo le fanauga a tagata’ (MF&F 19:18–19)” (in Conference Report, Oke. 1969, i. 57).

E tatau ia i tatou uma ona faamaea a tatou” tapenapenaga mo le fanauga a tagata” [MF&F 19:19]. O sauniuniga a Keriso e fai lava si eseesega mai lo i tatou, ae e tofu i tatou uma ma tapenaga e fai, ma faitotoa e talai. O le faia o ia tapenaga taua, e tele ina manaomia ai le tiga, o ni nai suiga e le faamoemoeina i le ala o le olaga ma sina gauai atu, “e pei ona usitai atu o se tamaitiiti i lona tama” [Mosaea 3:19]. O le faamaeaina o sauniuniga paia ma le tatalaina o faitotoa faaselesitila e ono manaomia ai i tatou—e aunoa ma se masalosalo—ona alu atoa seia oo i toe itula o o tatou olaga nei. ³

Na tatou o mai i le olaga nei e fetaiai ma mea faatautee. O se vaega o le fuafuaga o lo tatou alualu i luma e faavavau. A aunoa ma faaosoosoga, ma’i, tiga, ma le faanoanoa, e le mafai ona i ai se lelei, amioatua, agaga talisapaia mo le soifua manuia, po o le fiafia. … E tatau ona tatou manatua o malosiaga lava ia e tasi o le faatautee o loo taofia ai lo tatou alualu i luma, tatou te maua ai foi avanoa e faatoilaloina ai. ⁴

O o tatou mafatiaga i le olaga nei, e mo lo tatou tuputupu ae ma le poto masani.

A oo ina faalotomaualaloina ma faaleleia atili i tatou [e faigata o le olaga nei], ma aoao ai ma faamanuia i tatou, e mafai ona avea na mea ma meafaigaluega mamana i aao o le Atua e avea ai i tatou ma tagata e sili atu, ia atili ai ona tatou lotofaafetai, atili ai ona alolofa, ma mafaufau atili ai i isi tagata i o latou foi taimi o faigata.

Ioe, e tofu i tatou uma ma taimi faigata, e le gata i le tagata lava ia ae faapea foi i aiga, ae e ui lava i taimi e aupito matuia, pe o aso anamua pe o ona po nei, o na faafitauli ma valoaga e lei fuafuaina e faia ai se isi lava mea ae ia faamanuiaina ai e amiotonu ma fesoasoani ai i le au amioletonu ina ia fetuleni i luma ma ia salamo. E alofa le Atua ia i tatou, ma ua ta’u mai e le mau na ia “auina mai ai lona atalii e toatasi, ina ia le fano se tasi e faatuatua ia te ia a ia maua e ia le ola e faavauvau” [Ioane 3:16].⁵

Na ta’u atu e le peteriaka maoae o le Tusi a Mamona, o Liae, i lona atalii o Iakopo, o se atalii na fanaua i le vao i le taimi o puapuaga ma feteenaiga. O le olaga o Iakopo e le o le mea lea sa ia faamoemoeina e oo i ai, ma e le o se aafiaga foi sa ia ono manao ai. Sa puapuaga o ia i mafatiaga ma faafitauli, ae sa folafola atu i ai e Liae o ia mafatiaga o le a faapaiaina mo le manuia o lona atalii (tagai2 Nifae 2:2).

Ona faaopoopo lea i ai e Liae o upu nei ua avea ma tala masani:

“E ao lava ina i ai se faafeagai o mea uma.” A leai, … e le mafai ona i ai le amiotonu po o le amioleaga po o le pa’ia po o le pagatia, po o le lelei po o le leaga” 2 Nifae2: 11).

Ua tele tausaga o o’u maua le mafanafana i lea faamalamalamaaga o tiga ma faanoanoaga o le olaga. Ua atili ai foi lo’u mafanafana ona o alii ma tamaitai sili, e aofia ai le Alo o le Atua, sa feagai ma nei lava feteenaiga ina ia atili malamalama lelei ai i le eseesega o le amiotonu ma le amioleaga, o le paia ma le faanoanoa, lelei ma le leaga. Mai le pouliuli, susu, ma le matuia o le Falepuipui o Liperate, sa aoaoina ai e le Perofeta o Iosefa Samita, afai e tofia i tatou e ui atu i puapuaga, e mo lo tatou tuputupu ae ma le poto masani ma o le a iu ina faitaulia mo lo tatou lelei (tagai MF&F 122:5–8).

O le mea e tapunia ai se tasi faitotoa, e tatala mai ai se isi, e oo lava mo se perofeta i le falepuipui. E le lava pea lo tatou poto po o le poto masani e faamasino lelei ai mea uma e mafai ona ulufale mai ma ulufafo atu. Atonu o le maota ua saunia e le Atua mo ana fanau pele taitoatasi e i ai ni alasavali ma ni pa faapitoa, kapeta ma ni ie faamalama faapitoa e finagalo o ia tatou te laasia a o tatou agai atu i luma ma mauaina lena taui. …

I taimi eseese i o tatou olaga, atonu o taimi faisoo i o tatou olaga, tatou te faailoa ai faapea e silafia e le Atua mea tatou te le o iloa, ma silafia mea tatou te le o vaai i ai. “Aua o o’u manatu e le o outou manatu o o’u ala e le o outou ala, ua fetalai mai ai Ieova”(Isaia 55:8).

Afai o e feagai ma ni faaletonu ona o fanau faalogogata, afai e te feagai ma faaletonu tautupe ma mafatiaga faalelagona lea e lamatia ai lou aiga ma lou fiafia, afai foi ua e feagai ma le tulaga fai ifo o le olaga po o le ola maloloina, ia i ai le filemu i lou agaga. O le a le tofotofoina lava i tatou e sili atu i le mea tatou te gafatia [tagai 1 Korinito 10:13; Alema 13:28; 34:39]. O o tatou alaalo ma faanoanoaga o le ala sa’o lea ma le vaapiapi e tau atu ia te Ia. ⁶

A o i ai Iosefa Samita i le Falepuipui i Liperate, sa faaali atu e le Alii ia te ia o faigata e mafai ona tatou maua ai le poto masani ma avea ai ma o tatou lelei.

Ua ia i tatou mafuaaga uma e vaai atu ai ma le faamoemoe ma mautinoa e oo lava i taimi o faigata.

E i ai pea lava faigata i le olaga nei, ma o le a i ai pea lava. Ae o le iloaina o mea ua tatou iloa, ma le ola ai e pei ona tatau ona tatou ola ai, o le a leai ai lava se avanoa, leai se ‘alofaga, mo le lotovaivai ma le faanoanoa.

I lo’u olaga, e lua taua o le lalolagi ua ou vaai i ai, faaopoopo i ai ma Korea, ma Viatename ma [isi]. Sa ou galue i le taimi o le Pa’u Tele o le Tamaoaiga ma sa mafai ona ou aoga faaloia a o tau amata lo’u aiga laitiiti i le taimi lava lea. Sa ou vaaia le faaletonu tele o maketi o fefaatauaiga ma le tamaoaiga o le lalolagi, ma sa ou vaaia ni nai puleaga ma taitai faaletonuga, o ia mea uma na gaepu ai ni faafitauli i le salafa o le lalolagi i le faagasologa.

O lea la ou te faamoemoe o le a outou le talitonu ua faupue uma atu faigata o le lalolagi i lo outou vaitau, pe faapea foi e lei leaga tele faapea le tulaga na i ai nai lo lo outou taimi, pe o le a le toe lelei lava. Ou te faamautinoa atu na sili atu foi ona leaga ma o le a agai pea foi ina lelei. O le a agai pea lava ina lelei—ae maise ai, pe a tatou ola ma alolofa i le talalelei a Iesu Keriso, ma tuu atu se avanoa e lauusiusi ai i o tatou olaga. …

E ese ai mai mea e ono fai mai ai nisi, ua ia te outou mafuaaga uma i lenei lalolagi e fiafia ai, ma i ai le faamoemoe ma le mautinoa. I augatupulaga uma talu mai le amataga, na i ai lava ni nai mea e faatoilalo ma ni faafitauli e galueaiina. ⁷

A oo ina tatou o mai i le Faaola, Na te faamamaina o tatou mafatiaga ma a tatou avega.

“Ia outou o mai ia te au, outou uma o e tigaina ma mafatia i avega, o au foi e malolo ai outou.

Ia outou amoina lau amo, ma ia outou faaaoao ia te au, aua o au le agamalu ma lotomaulalo; ona maua lea e outou le malologa mo outou agaga.

“Aua e avegofie la’u amo, o la’u avega foi e mama ia.” (Mata. 11:28–30.) …

… O lea ofo ofoofogia o le fesoasoani na tuuina mai e le Alo o le Atua lava ia, e lei faatapulaaina mo na o tagata Kalilaia i na ona po. O lea valaau e amo lana avega faigofie ma lana amo mama, e le mo na o augatupulaga ua mavae. O se valaaulia ua laugatasia ai tagata uma, o aai ma malo uma, o alii uma, ma tamaitai, ma fanau i soo se mea.

I o tatou lava taimi o mafatiaga, e le tatau ona tatou faatuatuanai i lenei tali le mafaatoilaloina lava, i popolega ma atugaluga o le lalolagi. O le folafolaga lea mo le filemu ma le puipuiga patino. O le malosi lea e faatoilalo ai le agasala i vaitau uma o le olaga. O i tatou, foi, e tatau ona talitonu o loo ia Iesu Keriso le mana e faamama ai o tatou mafatiaga ma avega. E tatau foi ona tatou o mai ia te ia, e maua ai le malologa mai a tatou galuega.

E moni, e i ai matafaioi e o faatasi ma ia folafolaga. “Ia outou amoina la’u amo,” o lana aioiga lea. I taimi faaletusi paia, o le amo o se mea lea e fesoasoani tele ia i latou e galulue i le fanua. E mafai ai ona maua le malosiaga o se manu lona lua e soofaatasi ai ma faaluaina ai le taumafaiga a se manu e tasi, e tauave ai ma faaitiitia le mamafa o se galuega mamafa a le suotosina po o le taavaletoso. O se avega na lofituina pe atonu foi e le mafai e se toatasi ona tauave, e mafai ona tauaveina lelei e se toalua ua noatia faatasi i se amo masani. O Lana amo e manaomia ai se taumafaiga tele ma le maua’i, ae mo i latou ua liua moni, e faigofie le amo ma e mama ai foi le avega.

Aisea e taulima toatasi ai avega o le olaga, o le fesili a Keriso, pe aisea foi e taulima ai i se fesoasoani faaletino lea e vave ona gausia? Mo i latou o i ai avega faigata, o le amo a Keriso, o le mana lea ma le filemu o le tutu faatasi ma se Atua o le a saunia le lagolago, tulaga paleni, ma le malosiaga e foia ai o tatou luitau ma onosaia la tatou galuega i le olaga nei lea e pei o se eleele maaa e faigata ona sua.

O le mea moni, e eseese lava avega o le olaga a lea tagata ma lea tagata, ae e tofusia uma ai lava i tatou. … Ioe, o nisi faanoanoaga e afua mai le agasala a se lalolagi e le mulimuli i apoapoaiga a [lo tatou] Tama oi le Lagi. Po o le a lava le mafuaaga, e leai se tasi o i tatou e foliga mai ua matua saoloto mai luitau o le olaga. Na fetalai Keriso ia i tatou uma, i se faamamafa: Afai e tatau ona tatou taufai amoina se avega ma amoina se amo, aisea la e le amo ai la’u [amo]? O la’u folafolaga ia te outou e mama la’u amo, ma e mama foi la’u avega. (Tagai Mata. 11:28–30.)⁸

“Ua valaaulia soo o Keriso i augatupulaga uma, ioe ua poloaiina, ina ia faatumulia i se faamoemoe susulu atoatoa.”

E le tatau ona fefefe le Au Paia o Aso e Gata Ai i toatuga o aso amuli.

Ua ta’u mai i tusitusiga paia … o le a i ai vaitau o taimi o le a feagai ai le lalolagi atoa ma ni nai faigata. O le mea e leaga ai, ua tatou iloa i lo tatou tisipenisione o le a iloagofie le amioletonu, ma o le a aumaia ai faigata le maalofia ma tiga ma faasalaga. O le a faaumatia e le Atua lena amioletonu i lona lava taimi, ae o la tatou galuega o le ola atoatoa ai ma le faamaoni, ma aua tatou te soona popolevale fua pe o afea e muta ai toatuga o le lalolagi. O la tatou galuega o le i ai lea o le talalelei i o tatou olaga ma ia avea o se malamalama susulu, o se aai e tu i luga o le mauga, lea e atagia mai ai le matagofie o le talalelei a Iesu Keriso ma le olioli ma le fiafia e maua pea e tagata uma i tupulaga uma, o e tausia poloaiga.

I lenei tisipenisione faaiu, o le a tele mafatiaga. (Tagai Mata. 24:21.) Ua tatou iloa o le a i ai taua ma tala o taua (tagai MF&F 45:26) ma o le a vāvāō le lalolagi uma (tagai MF&F 45:26). Ua tofu tisipenisione uma ma ona taimi o faafanoga, ae o o tatou taimi o le a aofia ai le faafanoga matuia. (Tagai 2 Tim. 3:1.) O le a toatele tagata amioleaga (tagai 2 Tim. 3:13), ae o tagata amioleaga lava ia e masani lava ona toatele. O le a oo mai le malaia ma o le a tele foi le amioleaga. (Tagai MF&F 45:27.)

O taunuuga masani le maalofia lava o nisi o nei ituaiga o valoaga, o le fefe, ae le o le fefe lea e maua ai se tupulaga laiti atu. O le fefe lea e maua uma ai i latou o soo se vaitausaga e le malamalama i mea ua tatou malamalama ai.

Ae ou te fia faamamafa atu o nei lagona e le tatau ona i ai i le Au Paia o Aso e Gata Ai, ma e le mai le Atua foi. I tagata Isaraelu anamua, na fetalai le Ieova silisili:

“Ia outou faamalolosi ma outou lototetele, aua tou te fefefe; aua o Ieova lo outou Atua, lua te o faatasi ma ia; na te le tuuna oe, na te le lafoai foi ia te oe. …

“O Ieova foi, o ia na te savali i ou luma; lua te faatasi ma ia, na te le tuuna oe, na te le lafoai ia te oe, aua e te fefe, aua foi e te mata’u.” (Teut. 31:6, 8.)

Ia te outou foi, lo tatou augatupulaga maoae o Isarelu i ona po nei, ua fetalai mai le Alii:

“O lea, aua le matatau, le lafu itiiti e, fai mealelei; tuu atu i le lalolagi ma seoli e aufaatasi faasaga mai ia te oulua auā afai ua lua atiaʼe i luga o laʼu papa e lē mafai ona latou manumalo. …

“Vaai mai ia te aʼu i mafaufauga uma; aua le masalosalo, aua le fefefe.” (MF&F 6:34, 36.)

O loo i ai pea lava lea fautuaga i tusitusiga uma o ona po nei. Faafofoga i lenei faamautinoaga matagofie: “Aua le matatau, le fanau laiti, ona o outou o a a’u, ma ua ou manumalo i le lalolagi, ma o outou o ni o i latou o e ua tuuina mai e lo’u Tama ia te au.” (MF&F 50:41.) “E moni Ou te fai atu ia te outou aʼu uo aua le matatau, ia faamafanafanaina o outou loto, ioe, ia saga olioli pea ma ia avatu le faafetai i mea uma.” (MF&F 98:1.)

Manatu i lea fautuaga matagofie ua tatou maua, ou te manatu ua aumai ai ia i tatou se matafaioi ia tatou olioli teisi ai ae tuuitiitia le faanoanoa, ia tuuina atu le faafetai mo mea ua tatou maua, ma le tele o faamanuiaga a le Atua mo i tatou, ma tuuitiitia le talanoa e uiga i mea tatou te le o maua po o atuatuvalega e ono o mai faatasi ma taimi faigata i lenei augatupulaga po o se isi foi.

O se taimi o le faamoemoe tele ma le sagisagi fiafia

Mo le Au Paia o Aso e Gata Ai, o se taimi lenei o le faamoemoe tele ma le sagiagi fiafia—o se tasi o vaitau silisili i le Toefuataiga ma o lea, o se tasi o vaitau silisili i soo se tisipenisione, aua o lo tatou tisipenisione e aupito silisili i tisipenisione uma. E manaomia ona tatou faatuatua ma faamoemoe, o uigaatua faavae ia e lua o soo se tulaga faalesoo o Keriso. E tatau ona faaaoga lo tatou faatuatua i le Atua, aua o le mataupu faavae muamua lea i lo tatou talitonuga. E tatau ona tatou talitonu ua i le Atua le mana uma, e alofa o ia ia te i tatou, ma o le a le taofia lava lana galuega pe faalavelaveina i o tatou olaga taitoatasi po o le lalolagi foi. …

Ou te folafola atu ia te outou i le suafa o le Alii o le o loo avea ai a’u ma Ana auauna o le a puipuia ma tausia e le aunoa e le Atua Ona tagata. O le a i ai o tatou faafitauli e pei foi ona i ai faafitauli o augatupulaga uma ma tagata uma. Ae o le talalelei a Iesu Keriso ua i ai ia te outou le faamoemoe uma ma folafolaga ma faamautinoaga. O loo i ai i le Alii le mana i Lana Au Paia ma o le a Ia saunia i taimi uma nofoaga o e filemu, puipuiga, ma le saogalemu mo Ona tagata. A tatou faatuatua i le Atua e mafai ona tatou faamoemoe mo se lalolagi e sili atu le lelei—mo i tatou lava ia ma mo tagata uma. Na aoao mai e le perofeta o Eteru anamua (ma sa ia iloa se mea e uiga i faigata): “O le mea lea soo se tasi e talitonu i le Atua e mafai moni lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua e fai ma taula i agaga o tagata lea o le a latou mautinoa ma mausali ai ma faatumulia ai pea i galuega lelei e le aunoa ma taitaiina ai e viia le Atua.” (Eteru 12:4.)

Ua valaaulia soo o Keriso i augatupulaga uma, ua poloaiina, ina ia faatumulia i se faamoemoega susulu. (Tagai 2 Ni. 31:20.)

Saili e lafoai le fefe

… Afai e taula lo tatou faatuatua ma le faamoemoe ia Keriso, i ana aoaoga, poloaiga, ma folafolaga, ona mafai lea ona tatou faalagolago i se mea e ofoofogia moni, se mea faavavega moni lava, lea e mafai ona vaeluaina ai le Sami Ulaula ma taitai atu ai Isaraelu o ona po nei i se nofoaga “e leai se tasi e faamanualia pe fefe ai.” Viiga, 1985, nu. 17.) O le fefe, lea e mafai ona oo mai i tagata i aso faigata, o se auupega autu lea o auupega uma o loo faaaoga e Satani na te faia ia le fiafia ai tagata. O se e fefe, e le mauaina le malosiaga e tau ai i le olaga i le taua e faasaga i le leaga. O le mea lea, o le mana o le amioleaga e taumafai pea lava e faaosofia le fefe i loto o tagata. O augatupulaga uma lava, ma vaitausaga uma, e feagai ai lava tagata ma le fefe.

Ona o i tatou o fanau a le Atua ma e tupuga mai ia Aperaamo, Isaako, ma Iakopo, e tatau ona tatou saili e lafoai le fefe mai tagata. E le mafai ona fai lelei e se nuu matamuli, ma matatau sa latou galuega, ma e le mafai lava ona latou faia se galuega a le Atua. Ua i ai i tagata o le Au Paia o Aso e Gata Ai se misiona paia ua tofia, e faataunuu ma ia le faatoilaloina lava e le fefe ma le atuatuvale.

Na ta’ua e se Aposetolo a le Alii i ona po ia: O le ki e faatoilalo ai le fefe, ua tuuina mai lea e ala mai i le Perofeta o Iosefa Samita. “Afai ua outou saunia, o le a outou le matata’u.” (MF&F 38:30.) Ua manaomia le saga fai faafia o lena savali paia i le taimi nei i siteki ma uarota uma.” (Elder John A. Widtsoe, i le Conference Report, Ape. 1942, i. 33.)

Pe ua tatou saunia ea e gauai atu i poloaiga a le Atua? Pe ua tatou saunia ea ia tatou manumalo mai o tatou faanaunauga faaletino? Pe ua tatou saunia ea e usitai i tulafono amiotonu? Afai e mafai ona tatou tali atu ma le faamaoni i nei fesili, ua mafai ona tatou fai atu i le fefe e alu ese mai o tatou olaga. E moni e mafai ona fuatia le fefe i o tatou loto e ala i lo tatou sauniuni e ola amiotonu—ola i se ala e tatau ona ola ai Au Paia o Aso e Gata Ai i taimi uma ma vaitau uma.

O le avanoa, faamanuiaga, ma le tiutetauave o le ola ai i aso e gata ai.

Sei ou faaiu atu i se tasi o faamatalaga aupito sili sa ou faitau i ai mai le Perofeta o Iosefa Samita, o le sa feagai ma faigata matuia i lona soifua, ma o le foi, na totogia le tau faaiu o lona manumalo. Ae sa manumalo o ia, ma o ia o se tagata fiafia, malosi, ma tumu i le faamoemoe. O i latou sa iloaina o ia, sa lagonaina lona malosiaga ma le lototele, e oo lava i taimi aupito pogisa. E lei nofoai o ia i le lotovaivai pe tumau i se taimi umi i le leai o se faamoemoe.

Na ia saunoa e faatatau i o tatou taimi—lou taimi ma lo’u taimi—o lo tatou taimi “e uiga ese le fiafia i ai o perofeta, [i tausaga ua tuanai] faitaulaga ma tupu; [o nei molimau uma anamua mo le Atua] ua latou tulimatai atu ma le naunautaiga fiafia i aso ua tatou ola ai; ma le musuia i le fiafia ma le naunautaiga faalelagi ua latou pepese ai ma tusia ai ma valoia ai lo tatou taimi lenei; … o i tatou o tagata filifilia o e ua [filifilia] e le Atua ina ia aumaia le mamalu i Aso e Gata ai Ai”[Aoaoga a Peresitene o le Ekalesia: Iosefa Samitta, 197].

O se avanoa e le laumaua! O se faamamaluga tele! O se tiutetauave maoae! Ma o se olioli ina a tele! Ua ia te i tatou mafuaaga uma i le olaga nei ma le faavavau e olioli ai ma tuuina atu le faafetai mo le maualuga o o tatou olaga ma folafolaga ua tatou maua.⁹

Fautuaga mo Suesuega ma le Aoaoina Atu

Fesili

E mafai faapefea ona fesoasoani ia i tatou le iloa ai o faigata o se vaega o le fuafuaga a le Atua mo lo tatou alualu i luma e faavavau? (Tagai vaega 1.) E te manatu i se a o faigata o se vaega e tatau ai o le olaga nei?
Toe iloilo aoaoga a Peresitene Hunter i le vaega e 2 e uiga i nisi o faamoemoega o faigata. O faapefea ona e vaai atu i faigata o ni o tatou faamanuiaga? E mafai faapefea ona tatou vaai atu i faigata mai le silafaga e faavavau a le Alii?
E pei ona aoao mai Peresitene Hunter, aisea ua i ai ia te i tatou ni mafuaaga e fiafia ai ma tumu i le faamoemoe i taimi o faigata? (Tagai vaega 3). E mafai faapefea ona tatou atiina ae le faamoemoe ia faateleina i taimi faapea? O a nisi o faamanuiaga tatou te maua pea i taimi e aupito sili ona ogaoga ai faigata?
E faapefea ona tatou talia le valaaulia a le Faaola e tuu atu ia te Ia e tauaveina mafatiaga ma faamama a tatou avega? (Tagai vaega 4.) O le a le uiga o le tauaveina o Lana amo i o tatou luga? Na faapefea ona fesoasoani le Faaola ia te oe i taimi o faigata?
Ua aoao mai e Peresitene Hunter o lagona o le fefe i faafitauli o aso amuli, e le mai le Atua (tagai vaega 5). E faataumaoi faapefea le ola i le fefe? E mafai faapefea ona tatou ola i le faamoemoe ma le faatuatua ae le o le fefe?

Mau Fesootai

Ioane 14:27; 16:33; Eperu 4:14–16; 5:8–9; 1 Nifae 1:20; Alema 36:3; MF&F 58:2–4; 101:4–5; 121:7–8; 122:7–9

Fesoasoani mo Suesuega

“E toatele ua iloa o le taimi sili e suesue ai o le taeao pe a mavae le malologa o le po. … O isi e sili ai ona suesue i itula paganoa pe a uma le aso ma popolega o galuega. (Howard W. Hunter, “Faitauina o Tusitusiga Paia,” Liahona, Mati. 1980, 88).}