Mataupu 12

Foi Mai ma Taumamafa i le Laoai a le Alii

“Aapa atu i e ua le toaaga mai ma iloa ai le olioli o le a e maua faapea ma i latou e te fesoasoani i ai.”

Mai le Soifuaga o Howard W. Hunter

O le aso na avea ai Howard W. Hunter ma Peresitene o le Ekalesia, sa ia tuuina mai ai se valaaulia agaalofa i tagata o le Ekalesia o e ua le auai mai atoatoa:

“Ia i latou ua solitulafono pe ua i ai se mea e tiga ai, matou te fai atu, foi mai. Ia i latou ua tiga ma o loo tauivi ma le fefe, matou te fai atu, ia tatou tutu faatasi e soloi o outou loimata. Ia i latou o e o fenumiai ma mafatia i mea sese mai soo se itu, o mai i le Atua o mea moni uma ma le Ekalesia o faaaliga faifai pea. Foi mai. Tutu faatasi ma i matou. Faaauau pea. Ia talitonu. O loo lelei mea uma, ma o le a lelei pea mea uma. Taumamafa i le laoai ua i o outou luma i Le Ekalesia a Iesu Keriso o le Au Paia o Aso e Gata Ai ma taumafai e mulimuli i le Leoleo Mamoe Lelei o le na sauniaina [le laoai]. Ia i ai le faamoemoe, tuu i ai le faatuatua, ia maua—ma foai atu—le alofa, le alofa mama o Keriso.” ¹

I lana lauga muamua i le konafesi aoao o se Peresitene o le Ekalesia i nai masina mulimuli ane, na saunoa ai Peresitene Hunter sa uunaia o ia e faaauau lenei faamamafa. “Foi Mai,” na ia toe saunoa ai. “Talia moni le valaaulia [a le Faaola] e ‘o mai, ma mulimuli mai ia te au.’ … Ua na o Ia le ala mautinoa; o ia o le malamalama o le lalolagi.”²

I lona soifuaga atoa, sa fesoasoani ai Peresitene Hunter i le tele o tagata o le Ekalesia e toe toaaga mai. I le faamatalaina o lena aafiaga mai le popofou o le avea ma tagata matua, fai mai a ia:

“Na tofia au e le epikopo o la’u uarota e avea o se faiaoga o le uarota i se uso na mimitavale fai mai o ia o le tiakono aupito matua i le Ekalesia. O faiaoga o aiga o faiaoga faaleuarota ia i na aso. O lona faafitauli o le fiafia lea e taalo tapolo i Aso Sa. Sa faavaivai loto le feiloai ma ia ma lona toalua i lea masina ma lea masina, ma sa lei vaaia se alualu i luma. Ae mulimuli ane, na sa’o le upu sa ta’u atu ia te ia ma taia ai o ia i se mea na tali mai ai. O le upu o le feagaiga Na ma fesili atu ia te ia, ‘O le a le uiga o le feagaiga o le papatisoga ia te oe?’ Na suia ona foliga, ma o le taimi muamua lea na ma vaaia ai sona foliga popole. Na iu ina sau i la matou vasega, ua lafoai le tapolo, ae ave lona toalua i le malumalu.”³

“E tatau ia i tatou taitoatasi ona faitau ma saga faitau i le faataoto i le mamoe na se. … Ou te faamoemoe o le a uunaia e le savali o lena faataoto loto o i tatou taitoatasi.”

O Aoaoga a Howard W. Hunter

Ua aoao mai i tatou e le faataoto i le mamoe na se, ia saili i latou ua leiloloa.

Ua [tuuina mai] e le Au Peresitene Sili i tagata o le Ekalesia se valaaulia taua …

“Ia i latou ua le toe toaaga mai ma i latou ua faitio, matou te fai atu, ‘Foi mai. Foi mai ma taumamafa i le laoai a le Alii, ma toe tofo i fua suamalie faamalieloto o le faaaumea faatasi ma le Au Paia.’

“Ua matou mautinoa e toatele ua moomoo e toe foi mai, ae e lagona le faigata ona fai. Matou te faamautinoa atu o le a outou maua ni lima mafola e taliaina outou ma ni lima e naunau e fesoasoani ia te outou.” (Ensign, March 1986, p. 88.)

Ou te manatu na uunaia i tatou uma i lenei valaaulia lautele e pei o lea na ta’ua e le perofeta o Alema i le Tusi a Mamona e faatatau i se valaaulia lea na tuuina mai e le Alii. Fai mai a ia:

“Faauta, ua ia auina mai se valaaulia i tagata uma ona ua faaloaloa mai ia te i latou aao o le alofamutimutivale ma ua ia fetalai: Ia salamo, ona ou talia lea o outou.

“Ioe, ua fetalai mai o ia: O mai ia ia te au ma o le a outou aai ai i le fua o le laau o le ola; ioe, o le a outou aai ma feinu saoloto i le areto ma vai o le ola;

“Ioe, o mai ia ia te a’u ma aumai galuega o le amiotonu.” (Alema 5:33–35.)

E tatau ia i tatou taitoatasi ona faitau ma toefaitau i le faataoto i le mamoe na se o loo maua i le mataupu e sefululima o le Luka, e amata mai i le fuaiupu e fa:

“O ai ea so outou e ana mamoe e selau, afai e leiloa le tasi, e le tuua e ia le ivagafulu ma le iva i le vao, ae alu ma saili i le na leiloa, seia maua?

“A maua, ua faafuata ma le olioli.

“A oo atu foi i lona aiga ua faapotopoto ai i ana uo ma e tuaoi ma ia ua fai atu ia te i latou, Ia tatou olioli ia aua ua ou maua la’u mamoe na leiloa”[Luka 15:4–6]. …

Na faia e le Perofeta o Iosefa Samita se suiga taua o se fuaiupu se tasi i le Faaliliuga a Iosefa Samita. E faitauina: “O ai ea so outou e ana mamoe e selau, afai e leiloa le tasi, e le tuua e ia le ivagafulu ma le iva i le vao ae alu ma sailii le na leiloa, seia maua?” (FIS, Luka 15:4; faaopoopo le faatusilima.)

O lena faaliliuga ua ta’u mai ai na tuua e le leoleo mamoe lana lafu o loo saogalemu, ae alu i le vao—o lona uiga, alu i le lalolagi e sue mai le ua leiloa. Leiloa mai le a? Leiloa mai le lafu lea e i ai le puipuiga ma le saogalemu. Ou te faamoemoe o le a avea le savali o lena faataoto ma mea e uunaia ai loto o i tatou taitoatasi.⁴

O loo faamoemoe mai le Alii ia avea i tatou ma leoleo mamoe i lalo o Lana taitaiga e o e laveai mai i latou o loo tauivi pe ua leiloloa.

O le a se mea tatou te fai e fesoasoani ai ia i latou ua leiloloa lo latou ala i le vao?

Ona o le mea na fetalai ai le Matai e uiga i le tuua o le ivasefulu ma le iva ae o i le vao e saili le tasi ua leiloa, ma ona o le valaaulia a le Au Peresitene Sili ia i latou ua le toe toaaga mai, pe ua faitio ina ia “foi mai,” o lea matou te valaaulia ai outou ia auai i le laveaiga o agaga. Aapa atu i e ua le toaaga mai ma iloa ai le olioli o le a oo mai ia te outou ma i latou tou te fesoasoani i ai, ma o le a latou auai foi i le tuuina atu o le valaaulia e foi mai ma taumamafa i le laoai a le Alii.

Ua faamoemoe mai le Alii, lo tatou Leoleo Mamoe Lelei, ia avea i tatou ma leoleo mamoe i lalo o Lana taitaiga e saili mai i latou o loo tauivi pe ua leiloloa foi. E le mafai ona matou ta’uina atu pe faapefea ona fai, ae a oo ina e aofia ai ma sailia musumusuga, o le a manuia a outou taumafaiga i lo outou eria, … siteki, ma uarota. Ua tali mai nisi siteki i aioiga talu ai, ma ua matuai faamanuiaina lava.

O loo i ai le valaaulia a le Faaola ia i tatou i upu o se viiga masani:

Ua Ia valaau mai,
Ma Ia aioi mai:
“Ia outou saili mai,
A’u mamoe ua se?”

Ma o lena viiga, e usu soo, o loo ta’u mai ai la tatou tali e tatau ona i ai:

“Fai matou ma au auauna;
Ma ia e alofa mai.
Auina atu i le toafa,
Saili mamoe ua se.”

(Viiga, 1985, nu. 135.)

Afai tatou te faia lenei mea, o le a tatou maua faamanuiaga o le faavavau. ⁵

Saili e ua leiloloa, e ua faalogogata, ma e ua faatalale i le galuega a le Alii. … O le olega lototatalo a Alema o se faamanatu lelei lea o le paia o la tatou galuega:

“Le Alii e, sei e tuu mai ia te i matou ia mafai ona matou maua le manuia i le toe aumaia o i latou ia te oe ia Keriso.

“Faauta, Le Alii e, e taua o latou agaga.” (Alema 31:34–35.)⁶

“Le Alii e, sei e tuu mai ia te i matou ia mafai ona matou maua le manuia i le toe aumaia o [agaga] ia te oe ia Keriso. Faauta, Le Alii e, e taua o latou agaga”(Alema 31:34–35).

O lo tatou faamoemoega autu o le fesoasoani i tagata ia toe foi atu i le afioaga o le Atua.

Ua tele tausaga sa faia ai e le Ekalesia ni taumafaiga maoae e laveai mai ai i latou ua le toe toaaga mai. … Mo le a le faamoemoega? Ia faasaoina agaga o o tatou uso ma tuafafine ma vaai ua latou maua sauniga o le faaeaga.

A o avea au ma peresitene o se siteki i le eria o Los Angeles, sa matou talosagaina ma o’u fesoasoani ia epikopo ina ia filifilia ma le faaeteete ni ulugalii se toafa pe toalima o e mananao e faalautele lo latou alualu i luma i le Ekalesia. O nisi sa le toaaga mai, o isi o ni tagata faatoa liliu mai—ae sa faaosofia i latou ia alualu i luma faaleagaga. Sa matou faapotopotoina i latou i se vasega a le siteki ma aoao i latou i le talalelei. Nai lo le faamamafaina o le malumalu, sa matou taulai i sootaga sili atu ma lo tatou Tama Faalelagi ma lona Alo, o Iesu Keriso. O la matou faiga filifiliga ma le faaeteete na mautinoa ai le manuia, ma o le toatele o nei ulugalii na oo ina toaaga ma o i le malumalu.

Sei ou faamatalaina [se isi] aafiaga. … Sa i ai se alii i se tasi o uarota sa lei sau lava o ia i se fonotaga. E le lotu lona toalua. E fai lava si ona fiamisa, o lea sa le mafai ai ona matou auina i ai ni faiaoga o aiga i le fale. Sa ta’u atu e le epikopo i lea uso e i ai sana sootaga ma le Faaola e manaomia ona ia faalautele ma faateleina. Sa faamatala e lea uso i le epikopo le faafitauli o lona toalua e le lotu, o lea sa talanoa ai le epikopo i le tamaitai, ma faamamafa atu i ai lea lava mea—o se sootaga ma le Alii ua manaomia ona faalautele. Sa lei talia lava e le tamaitai ae sa fiafia o ia ina ua ia iloa e talitonu le Au Paia o Aso e Gata Ai ia Keriso, ma amata ai ona tau le faamisamisa.

E lei faapea na vave ona manuia, ae o i latou sa asiasi i le aiga sa faamamafaina pea le sootaga a le ulugalii ma le Alii. Na oo mai le taimi ua avea ma se uo, ma sa iu ina malie o ia e o mai ma lana tane i le vasega a le siteki sa faiaoga ai uso a fautua maualuga. Sa matou faamamafaina ia feagaiga e osia e se tagata i le papatisoga, ma isi feagaiga. Na iu ina avea lea tamaitai ma tagata o le Ekalesia ma sa avea le alii ma se taitai perisitua aoga. …

Na faagaeetia lava au i se faaupuga i le itulau faaulutala o le Tusi a Mamona o loo faamatala mai ai faamoemoega o lena tusi paia: “Ina ia latou [Aiga o Isaraelu] iloafeagaiga a le Alii.” (faaopoopo le faatusilima.) O le faamamafa lena sa uunaia i matou o se au peresitene o le siteki e fai ia i latou o e ua le toaaga mai. Sa matou taumafai e valaaulia i latou i le tulaga taua o feagaiga sa latou osia ma le Alii; ona matou aoaoina lea o i latou i le taua o le feagaiga o le papatisoga ma isi feagaiga e mafai ona latou faia lea e tuufaatasia ai i latou o se aiga e faavavau. ⁷

O le faamoemoega atoa lava o le galueaiina lelei o le Ekalesia i le lotoifale, o le faaagavaaina lea o tagata taitoatasi e toe foi atu i le afioaga o le Atua. Na pau le mea e mafai ai lena mea, o le mauaina lea o sauniga ma osia feagaiga i le malumalu. ⁸

O a tatou taumafaiga e taulai i le osia o feagaiga faaola ma ia maua sauniga o le talalelei e tagata uma: i tagata e le lolotu e ala i a tatou galuega faafaifeautalai; i e ua le toaaga mai e ala i le faaaumea ma taumafaiga e toefaatoaaga mai ai; i tagata toaaga o le ekalesia e ala i le auai ma le auaunaga i le Ekalesia, ma i latou ua fai i lagi, e ala lea i galuega mo le togiolaina o e ua maliliu.⁹

O loo tatou taumafai ia ausia le faamoemoega e tasi mo tagata taitoatasi o le Ekalesia. O le mauaina lea o sauniga o le talalelei e tagata uma ma osia feagaiga ma lo tatou Tama Faalelagi ina ia mafai ai ona latou toe foi atu i lona afioaga. O lo tatou faamoemoega autu lena. O sauniga ma feagaiga o auala ia e ausia ai le natura paia lea e toe faafoi atu ai i tatou i lona afioaga. …

Manatua le faamoemoega: ia valaaulia tagata uma e o mai ia Keriso. …

Ou te molimau atu, ou uso e ma tuafafine, i lona paia ma le mana e faasaoina ai i latou o le a o mai ia te ia ma loto momomo ma agaga salamo. E ala i sauniga ma lona Agaga Paia, e mafai ai e tagata taitoatasi ona mama. ¹⁰

Fautuaga mo Suesuega ma le Aoaoina Atu

Fesili

Ua fautuaina e Peresitene Hunter tagata uma o le Ekalesia e faitau ma toe faitau i le faataoto i le mamoe na se (tagai vaega 1; Luka 15:4–7). O a ni savali ua e maua mai lena faataoto ma isi aoaoga i le vaega muamua? Mafaufau pe mafai faapefea e na aoaoga ona taiala oe a o e auauna atu i le Ekalesia.
O le a lo tatou tiutetauave o ni leoleo mamoe i lalo o le taitaiga a le Alii? (Tagai vaega 2.) E mafai faapefea ona tatou fesoasoani i tagata e toe toaaga i le Ekalesia? Ua faapefea ona faamanuiaina oe (po o se tasi e te iloa) e se tagata sa aapa atu ia te oe ina ua e “tauivi pe leiloa”?
O le a se mea e mafai ona tatou aoao mai aafiaga na faamatalaina e Peresitene Hunter i le vaega e 3? E mafai faapefea e le faamamafaina o feagaiga ona fesoasoani i tagata o le Ekalesia ia toe toaaga mai?

Mau Fesootai

Esekielu 34:1–16; Luka 15:11–32; Ioane 10:1–16, 26–28; 13:35; 1 Ioane 1:7; Mosaea 18:8–10; Helamana 6:3; 3 Nifae 18:32; Moronae 6:4–6; MF&F 38:24

Fesoasoani mo Suesuega

O se mataupu faavae o se upumoni lea e taialaina ai faaiuga ma faatinoga. “A o e faitau, fesili ifo ia te oe lava, ‘O le a le mataupu faavae o le talalelei o loo aoao mai i lea savali? E mafai faapefea ona ou faaaogaina i lo’u olaga?” O Le Aoao Atu E Leai Se Isi Valaauga E Sili Ai [1999], 17).