Mataupu 19

O La Tatou Tautinoga i le Atua

“O se olaga manuia … e manaomia ai le tautinoga—tautinoga ma le agaga atoa, e opoina i le loto, ma faapelepele i ai e faavavau i mataupu faavae ua tatou iloa e moni i poloaiga ua tuuina mai e le Atua.”

Mai le Soifuaga o Howard W. Hunter

Ina ua tofia Howard W. Hunter e avea o se tasi o le Korama a le Toasefululua, sa ia tautino mai, “Ua ou taliaina, e aunoa ma se faatuai, le valaauga … ua tuuina mai ia te au, ma ua ou naunau e tuuto atu lo’u ola ma mea uma ua ou maua i lenei galuega.”¹

Na soifua moni Elder Hunter i lana tautinoga. Ina ua maea ona faauuina o ia o se Aposetolo, sa toe foi o ia i Kalefonia e faamaea ana matafaioi faale-Ekalesia ma pisinisi, ma amata ona tapena e sii mai i le Aai o Sate Leki. Sa faigata ia Elder ma Sister Hunter ona tuua lo latou aiga ma uo i Kalefonia—ma mo Elder Hunter e tuua lona ofisa faaloia. Ina ua ia faamutaina lana galuega o se loia, sa ia tusia:

“O le aso na faauma ai le tele o a’u galuega i le ofisa. Toetoe o mataupu uma lava sa faatalitali, ua maea. Sa na o au i le ofisa i le aso, ma sa ou iloaina o lea ua faamutaina la’u galuega faaloia. Sa ou tuuina ni faamatalaga i luga o faila ma tuu ai i luga o le kesi. Sa ou lagonaina le faanoanoa, ina ua ou tuua le ofisa. Sa ou olioli i le galuega faaloia, ma o lo’u olaga lea mo le fia tausaga ua mavae atu, ae ui o lea, ua ou fiafia e tali atu i le valaauga e sili atu lea ua oo mai ia te au i le Ekalesia.”²

Sa silafia e Elder Hunter mai ona aafiaga patino e faapea, “o le gauai atu i le finagalo o lo tatou Tama e le faigofie i taimi uma.”³ Ae ui o lea, sa ia silafia le taua o le tautino atu ma le atoatoa i le Atua. E faatatau i le tautinoga sa ia tusia ai: “O le toatele o tagata e le malamalama pe aisea e tali atu ai tagata o lo tatou faatuatuaga faalelotu i valaauga e auauna atu po o tautinoga tatou te faia e tuuina atu a tatou mea uma. Sa ou matua fiafia lava i le galuega faaloia, peitai o lenei valaauga ua oo mai ia te au, o le a matua sili mamao atu i lo tulimataiga o le galuega po o tupe maua.”⁴

O se tasi ala e mafai ai ona tatou faailoa atu la tatou “tautinoga atoa” ma le “tuuto atoatoa” o le auauna atu lea ia i latou e le tagolima.

O Aoaoga a Howard W. Hunter

E manaomia e lo tatou Tama o i le Lagi la tatou tautinoga atoa, ae le na o se sao.

A o ou mafaufau i faamanuiaga ua tuuina mai e le Atua ia te i tatou, ma le tele o mea matagofie o le talalelei a Iesu Keriso, ua ou iloa i le gasologa o le ala e talosagaina ai i tatou e faia ni sao patino, o le saofaga atu o taimi po o tupe po o isi punaoa. E taua uma ma e tatau ai nei mea uma, ae e le o aofia ai le tuuina atu atoatoa o i tatou i le Atua. O le mea maualuga lava, o le mea o loo manaomia mai e lo tatou Tama i le Lagi mai ia i tatou, e sili atu i le na o se sao; o le tautino atu atoatoa lea, o le tuuto atoatoa, o tatou tagata uma ma le mea e mafai ai.

Faamolemole ia malamalama, ou te le o tautala atu ua na o se tautinoga i le Ekalesia ma ana gaoioiga, e ui lava e manaomia le faamalosia i taimi uma o lena mea. E leai, ou te tautala atu i se tulaga e sili atu ona patino i se tautinoga e faaalia i a tatou amioga taitoatasi, i lo tatou amiosa’o patino, i lo tatou lotonuu i le fale ma le aiga ma le nuu, faapea foi i le Ekalesia. …

Sei ou toe faamatalaina puupuu na o se tasi o na faataitaiga matagofie mai le tusi paia, lea na tutu atu ai ni alii talavou se toatolu ia latou mataupu faavae, ma tausisi la latou amiosa’o e tusa lava pe na manino mai a latou faia lea mea o le a faaumatia lo latou ola.

Pe tusa ma le 586 tausaga a o lei fanau mai le Keriso, sa faatoilalo ai e Nepukanesa le tupu o Papelonia, le aai o Ierusalema. Sa matua fiafia o ia i le tulaga maualuga ma le aoaoina o le fanauga a Isaraelu, ma o lea sa ia aumaia ai nisi o i latou i le maota o le tupu [i Papelonia].

Na oo mai le atuatuvale i tagata Isaraelu i le aso na faia ai e Nepukanesa se faatusa auro ma poloaiina tagata uma i le itumalo o Papelonia ina ia ifo i ai, o se poloaiga sa teena filemu e ni Isaraelu talavou se toatolu—Satarako, Mesako, ma Apeteniko. Sa “matua toatamai” le tupu, ma sa ia poloaiina e aumai i latou i ona luma. (Tani. 3:13.) Sa ia ta’u atu ia te i latou afai latou te le faapauu i lalo i luma o le tupua auro i le taimi na atofaina, “o le a lafoina i latou i lea lava itula i totonu o le ogaumu e mumu ai le afi.” Ona ia fesili lea ma lona lava lotomalie, “o ai foi se Atua na te laveaiina outou ai la’u pule?” [Tani. 3:15.]

Sa tali atu alii talavou e toatolu ma le faaaloalo, ae e aunoa ma le faatuai:

“Afai o lea,” na latou fai mai ai, “[ua e faamatauina i matou i le oti,] ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi, na te laveaiina mai lava i matou ai lau pule le tupu.

“Ae peitai, a le o lea, ia e silafia e oe le tupu e, matou te le auauna i ou atua; o le tupua auro foi ua e faatuina, matou te le ifo i ai.” [Tani. 3:17–18.]

E moni sa atili ai ona toatamai Nepukanesa nai lo se isi taimi, ma sa ia poloaiina ai ina ia faamumu se tasi o ogaumu ia faafitu lona aasa nai lo le mea e masani ai. Ona ia poloaiina lea ina ia lafoina nei alii talavou lotototoa ma o latou laei i le afi. Ioe, sa pulunaunau atu le tupu ma sa matua aasa le afi, ma o lea na pauu ai fitafita na aveina atu Satarako, Mesako, ma Apeteniko, ma maliliu ai ona o le vevela o le ogaumu a o latou lafoina atu i latou i ai.

Ona oo mai ai lea o se tasi o na vavega maoae lea e aia tatau i ai le au faamaoni e tusa ai ma le finagalo o le Atua. Sa tutu i luga nei alii talavou e toatolu ma savavali solo ma le toafilemu i le totonugalemu o le afi ma sa lei faamuina i latou. Ioe, ina ua toe valaauina i latou mai le afi e le tupu na matua ofo, sa lei afaina o latou laei, sa lei mu o latou pa’u, e leai foi so latou lauulu na afaina. E lei i ai foi se namu ausa na iloa i nei alii talavou lototetele, i la latou tautinoga.

“Ia faafetaia le Atua o Sataraka, Mesako, ma Apeteniko,” le saunoaga a le tupu, “o le na… laveaiina ana auauna na faatuatua ia te ia, … [o e] ua latou tuuina atu o latou tino ina ne’i latou auauna ma ifo i se tasi atua, tau lava o lo latou lava Atua.

“ … Ona tomai lea o Sataraka, Mesako, ma Apeteniko, i le itumalo o Papelonia i le pule a le tupu.” (Tani. 3:28, 30.)

O le tomai e tu atu ai se tasi i ana mataupu faavae, e ola ai i le amiosa’o, ma le faatuatua e tusa ai ma lona talitonuga—o le mea lena e taua, o le eseesega lena i le va o le saofaga ma se tautinoga. O le tuuto lena i mataupu faavae moni—i o tatou olaga taitoatasi, i o tatou fale ma aiga, ma i nofoaga uma tatou te potopoto ai ma faatosina ai isi tagata—o le tuuto lena o loo poloaina ai i tatou e le Atua. …

O se olaga faamanuiaina, se olaga lelei, le olaga amiotonu faa-Kerisiano, e manaomia ai se mea e sili atu i lo le na o se saofaga, e ui ina taua sao uma. E maualuga lava le manaomia ai o le tautinoga—tautinoga ma le agaga atoa, e opoina i le loto, ma faapelepele i ai e faavavau i mataupu faavae ua tatou iloa e moni i poloaiga ua tuuina mai e le Atua. …

Afai tatou te ola e tusa ai ma o tatou mataupu faavae, tautino atu i tatou i se olaga faamaoni ma le amiosa’o, ona le mafai lea e se tupu po o se tauvaga po o se ogaumu aasa ona faamelea i tatou. Mo le manuia o le malo o le Atua i le lalolagi, ia tatou tutu atu o ni molimau ia te ia “i taimi uma ma i mea uma, ma i nofoaga uma [tatou te] i ai, e oo lava i le oti.” (Mosiah 18:9.)⁵

Ia tautino atu e usiusitai i le Alii tusa lava pe o a filifiliga a isi e fai.

Ina ua faatonuina Iosua e faatamaia le aai o Ieriko, lea sa tuu mai luma [o ituaiga o Isaraelu], sa tulai mai papuipui tetele o le aai e pei o ni papupuni malualii faaletino e le mafai ai ona manuia Isaraelu—pe o se tulaga faapena. Na lei iloa le uiga, ae sa mautinoa le iuga, sa faatino e Iosua le faatonuga na tuuina atu ia te ia e se avefeau a le Alii. O lana tautinoga o le usitai atoatoa. O lona popolega o le faia tonu le mea e pei ona faatonuina ai o ia, faapea o le folafolaga a le Alii o le a faataunuuina. E le taumate le uigaese o le faatonuga, ae o lona faatuatua i le taunuuga na uunaia ai o ia e fai. O le taunuuga, ioe, o se tasi o le mau vavega na vaaia e le fanauga a Isaraelu ina o taitaiina i latou e Mose, e Iosua, ma le toatele o isi perofeta o e sa tautino atu e mulimuli i poloaiga ma faatonuga a le Alii.

Ina ua latalata atu Iosua ma lona nuu i Ieriko, sa mulimulitaia lelei faatonuga a le Alii, ma e tusa ai ma le tala a le tusi paia, “ona solo ai lea i lalo o le pa, ona o ae ai lea o le nuu i le aai taitasi i o latou luma, ua latou aea foi le aai.” (Ios. 6:20.)

O loo ta’u mai i faamaumauga ina ua maea ona malolo mai Isaraelu mai taua ma o latou fili, sa faapotopoto e Iosua, o le ua toeaina lava, le fanauga a Isaraelu. I lana saunoaga faatofa, sa ia faamanatu atu ai ia te i latou na latou manumalo aua sa tau le Atua mo i latou, ae a latou le auauna atu nei i le Alii ma tausi ana tulafono, o le a fano i latou. …

Sa uunaia e lenei taitai au sili faamliteli ma le faaleagaga, se tautinoga, ma sa faia e ia lava ma mo lona aiga: “Ina fiifili ia outou i le aso nei po o ai tou te auauna i ai; … a o au ma lo’u aiga, matou te auauna ia Ieova.” (Ios. 24:15.)

O se faaupuga maoae lenei o le tautinoga atoatoa a se tagata i le Atua; o se perofeta i le finagalo o le Alii o Iosua o le tagata o le Atua, o le sa faamanuiaina o ia i le tele o taimi muamua ona o lona usiusitai. Sa ia ta’u atu ia Isaraelu tusa lava pe o le a la latou filifiliga, o le a ia faia le mea ua ia iloa e sa’o. Sa ia faapea mai, o lana faaiuga e auauna i le Alii sa tutoatasi mai soo se mea latou te filifili ai; o le a le aafia lava lana faaiuga ia latou gaoioiga; o lana tautinoga e faia le finagalo o le Alii o le a le fesuia’ia e se soo se mea latou te fai po o se isi lava. Sa tu mausali Iosua i le faafoega o ana gaoioiga, ma sa taulai atu lana vaai i poloaiga a le Alii. Sa tuuto atu o ia e usiusitai. ⁶

“Ai se fiafia o le Alii ina ua faia e Aperaamo le mea sa faatonuina ai o ia, e aunoa ma se fesili ma e aunoa foi ma se faalotolotolua.

Fai nei se tonu e filifili le ala o le usiusitai atoatoa.

Pe a oo ina malamalama i le tulafono o le talalelei ma le finagalo o le Alii e ala i le faitau ma suesue i tusitusiga paia ma upu a perofeta, ona oo mai lea o se isi malamalamasili atu i le mafuaaga e tele ai taimi e ta’ua ai le usitai o le uluai tulafono o le lagi, ma le mafuaaga e taua ai le usitai ina ia faasaoina ai. O iina e aumaia ai i tatou i le suega maualuga. Pe ua tatou naunau ea e usitai atoatoa i le tulafono a le Atua? Ona oo mai ai lea o se taimi e tatau ai ona faia o se tonu mautu.⁷

E moni lava e alofa le Alii, e sili i lo se isi lava mea, i se naunautaiga e le faalotolotolua e usitai i ana fautuaga. E moni o aafiaga o perofeta maoae o le Feagaiga Tuai ua faamaumauina e fesoasoani ia i tatou ia malamalama ai, i le taua o le filifilia o le ala o le usitai atoatoa. Ai se fiafia o le Alii ina ua faia e Aperaamo le mea sa faatonuina ai o ia, e aunoa ma se fesili ma e aunoa foi ma se faalotolotolua. O loo tusia na fetalai atu le Atua ia Aperaamo:

“Ia e ave lou atalii, o lou atalii e toatasi, o le ua pele ia te oe, o Isaako lava, ma e alu i le nuu o Moria; ma avatu ia te ia e fai ma taulaga mu i lea mea i le tasi mauga ou te ta’uina atu ai ia te oe.” (Ken. 22:2.)

O le fuaiupu e sosoo e nao na faapea mai:

“Ona ala tulai lea o Aperaamo i le taeao … ma ave … Isaako lona atalii ma alu i le mea na ta’uina mai ai e le Atua ia te ia.” (Ken. 22:3.)

I tausaga mulimuli ane, ina ua fesiligia Repeka pe e o ma le auauna a Aperaamo e avea ma ava a Isaako, ma le leai o se masalosalo i le misiona a le auauna, o loo i ai le faamanuiaga a le Alii, sa na ona ia tali mai, “Ma te o.” (Ken. 24:58.)

Na mavae se augatupulaga mai lena, ina ua faatonuina Iakopo e toe foi i le laueleele o Kanana, o lona uiga o le a tuua ana mea uma sa galue ai mo le tele o tausaga, sa ia valaauina Rasela ma Lea i le fanua i le mea sa i ai ana lafumanu, ma sa ia faamatala atu i ai le mea na fetalai mai ai le Alii. O le tali a Rasela [ma Lea] sa faigofie ma tuusa’o ma iloagofie ai la [la’ua] tautinoga: “O mea uma ua fetalaia mai e le Atua ia te oe, ina faia ia o lea.”(Ken. 31:16.)

O lea la, ua i ai a tatou faataitaiga mai tusitusiga paia i le auala tatou te mafaufau ai ma iloilo ia poloaiga a le Alii. Afai tatou te filifili e tali atu e faapei o Iosua, ma Aperaamo, ma Repeka, ma Rasela [ma Lea], o le tatou tali o le, e na o le, o ma faia le mea ua poloaiina ai e le Alii.

E iai le mafuaaga lelei e faia ai la tatou faaiuga i le taimi nei e auauna i le Alii. I le taeao nei o le Aso Sa [o le konafesi aoao], pe a aveese ia lavelave ma faaosoosoga o le olaga, ma a tatou maua se taimi ma le naunau i se vaaiga i le faavavau, e mafai ona tatou iloiloina ma le manino mea tatou te maua ai le fiafia sili i le olaga. O le a tatou filifili nei, i le malamalama o le taeao, pe o le a faapefea ona tatou tali atu pe a oo mai matagi o tofotofoga o le olaga.

Ou te tatalo ia tatou maua le malosi e fiifili ai nei e faia le mea e tatau ona tatou fai. Ou te tatalo ia tatou filifili nei e auauna i le Alii.⁸

E le lava le na o le talitonu; e manaomia foi lo tatou faia o le finagalo o le Tama i le Lagi.

Ina ua fetalai atu i le motu o tagata, na fetalai atu le Matai: “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo’u Tama o i le lagi.” (Mata. 7:21.)

A o ou faalogologo atu i nei upu, sa foliga mai ia te au o loo faapea mai le Alii, “E le faapea ona ua iloa e se tagata la’u pule pe ua talitonu foi i lo’u natura paia, pe na o le faapea lava ua faatuatua i a’u aoaoga po o le taulaga togiola sa ou faia, ona faapea ai lea o le a ulufale atu o ia i le malo o le lagi pe maua se tikeri maualuga atu o le faaeaga.” I lona faauigaga o loo ia faapea mai, “E le lava le na o le talitonu.” Ona ia faaopoopo mai lea ma le faamamafa, “ …na o le e faia le finagalo o lo’u Tama,” o lona uiga, o ia le e galue ma teuteuina le tovine ina ia aumaia ai o fua e lelei. …

O le natura uma, i le siomaga o le Atua, e foliga mai o loo aumai ai lea lava mataupu faavae e tasi. O le pi e le “faia” o le a le pine ona tuliesea mai le faamoega. A o ou matauina le pisi o loi i le ala ma faataamilo i le faaputuga a loi, e faagaeetia lava au aua o le au galulue ae le na ona talitonu. E le maua e se matuamoa ni fatu i le na ona satesate; e tatau ona suasua. O se vai e to’a, ma lanumeamata i le limulimu ma ua le tafe, o se nofoaga e tautuufua ai faama’i o faataufusi, ae o se vai manino mai le mauga lea e tafe atu i luga o papa a o tafe atu i le vanu, e oso ai le fiainu o le tagata.

O upu a le Matai e faatatau i le fale e leai se faavae ua ta’u mai ai ia te au, e le mafai e se tagata e papau se tofa ma le faavaea faapea ua lava ia te ia lava, ma e mafai ona ia fauina lona lava olaga i soo se mea e foliga mai e faigofie ma malie i ai [tagai Mataio 7:26–27]. Pau lava le mea ia lelei le tau, atonu e iloagata lona faavalevalea; ae e i ai se aso o le a oo mai ai lologa, o vai palapala o nai lagona faafuasei, ma galufafati o faaosoosoga e lei muai vaaia. Afai e leai sona faavae mautu nai lo le na o le faalele, e ono solovi uma i lalo lona fausaga o le amio pulea.⁹

Fai mai Iakopo, “O lenei lava le amio Atua e lelei ma le faamaoni i luma o le Atua o le Tama lea, ia tauasiasi atu i e matuaoti ma fafine ua oti a latou tane i o latou tiga, ia leoleo foi o ia ia te ia ina nei pisia mai o ia i le lalolagi”Iakopo1:27

I se isi faaupuga, o le talitonuga faalelotu e sili atu i le na o se malamalama i le Atua p o se ta’uta’u atu o le faatuatua, ma e tele atu foi i le na o manatu faalelotu. O le talitonuga faalelotu o le faia lea o le afioga a le Atua. O le avea lea o i tatou ma leoleo i o tatou uso, ma isi mea. …

E mafai ona tatou faalelotu i le tapuai i le aso Sapati, ma e mafai ona tatou faalelotu i o tatou tiute i le isi ono aso o le vaiaso. … [Oka] se taua pe afai o o tatou mafaufauga uma, o upu tatou te tautatala ai, o a tatou taga, amio, fegalegaleaiga ma o tatou tuaoi, fegalegaleaiga faapisinisi, ma a tatou mea uma e fai i aso faisoo e ogatusa ma o tatou talitonuga faalelotu. I upu a Paulo, “Pe o a lava mea tou te fai, ia faia mea uma mo le mamalu o le Atua”(1 Korinito 10:31). Pe mafai ea la ona tatou tuuesea o tatou talitonuga faalelotu mai a tatou mea e fai i aso o le vaiaso ia na o le aso Sapati lava? E mautinoa e leai, pe afai tatou te mulimuli i le apoapoaiga a Paulo. ¹⁰

“O tagata o le ekalesia o soifua,” ia taumafai e tuuina atu se tautinoga atoa.

Ua faaalia mai e le Alii i le faatomuaga o le Mataupu Faavae ma Feagaiga e na “o le pau lenei o le ekalesia moni ma le ola o loo i ai i luga o le fogaeleele.” Ona ia faaopoopo mai lea, “Ua fiafia tele i ai A’u, o le Alii, i le tautala atu i le ekalesia atoa ae le i tagata taitoatasi”(MF&F 1:30). E ao ona tulai mai ai se fesili i o tatou mafaufau i le taua e faavavau: Ua tatou iloa o le ekalesia moni lenei ma le ola, ae pe o au ea o se tagata moni ma le ola o le ekalesia?

… Ina ua ou fesili, “Pe o au o se tagata moni ma le ola o le ekalesia?” o la’u fesili o le, pe ua ou tuuto loloto atu ea ma le atoatoa i le tausiga o feagaiga sa ou osia ma le Alii? Pe ua ou tautino atu atoatoa ea e ola i le talalelei ma avea o se e faia le upu ae le na o se e faalogo? Pe o ou ola ea i o’u talitonuga faalelotu? Pe o le a tumau ea lo’u faamaoni? Pe o ou tu mausali atu ea e faasagatau i faaosoosoga a Satani? …

Ina ia tali atu ioe i le fesili, “Pe o au ea o se tagata o ola o le eklesia?” ua faamautu ai la tatou tautinoga. O lona uiga tatou te alolofa nei ma taimi uma i le Atua ma o tatou tuaoi e pei o i tatou lava. O lona uiga o a tatou amioga o le a atagia ai o tatou tagata ma mea tatou te talitonu i ai. O lona uiga o i tatou o Kerisiano i aso uma, e savavali e pei ona finagalo ai Keriso.

O tagata ola o le ekalesia, o i latou ia o loo taumafai ia tautino atu atoatoa. …

O tagata ola o le ekalesia, e iloa o latou tiute e fetaomi atu i luma. E papatiso e avea ma laasaga muamua o la latou malaga ola. O se faailoga i le Atua, i agelu, ma le lagi o le a latou mulimuli i le finagalo o le Atua. …

O tagata ola o le ekalesia e gauai atu i le Agaga, lea e segia ai le ola faaleagaga. Latou te saiia e le aunoa lana taitaiga. Latou te tatalo mo le malosi ma faatoilalo ia faigata. E le tuua o latou loto i mea o lenei lalolagi ae o mea e le iu. O le faafouga faaleagaga e le ositaulagaina mo le faamalieina o le tino

O tagata ola o le ekalesia e faamuamua Keriso i o latou olaga, ua iloa le punavai e ola ai ma alualu ai i luma. E i ai se uiga o le tagata e tuu ia lava i le totonugalemu o le atulaulau, ae faamoemoe e gauai atu isi i ona manao ma naunauga. Ae e le faamamaluina e le natura lea faamoemoega sese. O le matafaioi tutotonu i le olaga e a le Atua ia. Nai lo le ole atu ia te Ia e faia o tatou loto, e ao ona saili e faaogatusa i tatou lava ma lona finagalo, ona faaauau ai lea o lo tatou alualu i luma o ni tagata ola o le ekalesia. …

O tagata ola o le ekalesia, a liua loa, faataunuu loa le poloaiga e faamalosi i o latou uso ma tuafafine [tagai Luka 22:32]. Latou te naunau e faasoa atu lo latou olioli i isi, ma e le uma lava lo latou naunautai. …

O tagata ola o le ekalesia, e manaomia ona latou faatino o latou talitonuga. E nopiai ma le naunau nei Au Paia i le faataunuuina o le tele o galuega lelei ma le viia i lo latou lava loto malie [tagai MF&F 58:27]. …

O tagata ola o le ekalesia e fealofani. Latou te asiasi atu i e ua matuaoti ma fafine ua oti a latou tane i o latou mafatiaga. Latou te tausisia i latou lava ia le pisia mai le lalolagi [tagai Iakopo 1:27]. …

E i ai so tatou taitonuga maumaututu i le faaupuga o le ekalesia moni lenei ma le ola a le Atua. O le fesili e tatau ona tatou taliina o le: Pe ua ou tuuto atu ea ma tautino atu o se tagata moni o ola o le ekalesia?

Ia tatou tutu mausali atu ma avea o ni tagata faamaoni ma ola o le Ekalesia, ma ia maua le taui folafolaina ia faitaulia faatasi ma i latou o loo ta’ua i le Mataupu Faavae ma Feagaiga “o e o mai i le Mauga o Siona, i le aai o le Atua soifua, o le nofoaga faalelagi, e sili ona paia i aai uma”(MF&F 76:66).¹¹

Fautuaga mo Suesuega ma le Aoaoina Atu

Fesili

Iloilo aoaoga a Peresitene Hunter e uiga i le esesega o le va o se “saofaga” ma le “tautinoga atoatoa” (vaega 1). O le a le eseesega i o tatou olaga pe a tatou tautino atoatoa atu i le Atua? O a faaaogaaga o le tala ia Sataraka, Mesako, ma Apeteniko mo i tatou?
Iloilo le tala a Peresitene Hunter ia Iosua i le vaega 2. O le a se mea o mafai ona tatou aoao mai i le tautino atoatoa atu i le Atua? E mafai faapefea ona tatou atiae se tautinoga e usiusitai i le Atua tusa lava po o a mea o fai e isi? E mafai faapefea ona tatou fesoasoani i tamaiti ma le autalavou e atiae lenei tautinoga?
O a ou lagona a o e iloiloina tala i le tusi paia i le vaega e 3? O a isi faataitaiga i le tusi paia o le usiusitai ua faatosinaina ai oe? Aisea e te manatu ai “e alofa le Alii … i se naunautaiga e aunoa ma le faalotolotolua e usitai i lana fautuaga?
Mafaufau i aoaoga a Peresitene Hunter i le vaega e 4. Aisea “e le lava” ai le na o le talitonu? E fesoasoani faapefea le faia o le finagalo o le Tama Faalelagi e fesoasoani ai e saunia i tatou mo taimi o faigata? E mafai faapefea ona tatou faaaogaina aoaoga a Peresitene Huntr e uiga i le ola i o tatou taitonuga faalelotu?
Iloilo faamalamalamaga taitasi a Peresitene Hunter i le “tagata o ola o le ekalesia” i le vaega e 5. E faapefea ona tatou atiae nei uiga auaumama o “tagata o ola o le ekalesia”? Mafaufau pe mafai faapfea ona sili atu lou avea ma “tagata moni o ola o le ekalesia”

Mau Fesootai

1 Samuelu 15:22–23; Salamo 1:1–3; Iakopo 2:14–26; 2 Nifae 32:9; Ominae 1:26; Mosaea 2:41; Alema 37:35–37; 3 Nifae 18:15, 18–20; MF&F 58:26–29; 97:8; Aperaamo 3:24–26

Fesoasoani mo le Aoaoina Atu

Faitau faatasi upusii mai le mataupu. A uma ona faitau upusii taitasi, fai i le vasega e faasoa mai faataitaiga mai mau ma mai o latou lava aafiaga e fesootai ma aoaoga o i upusii.