Mataupu 2

“O Le Filemu foi Ou Te Avatu ia te Outou”

“E mafai ona maua le filemu e se tagata i le na o le ofoina atu e aunoa ma ni tuutuuga—ofo atu ia te ia o le Alii o le filemu, o le ua i ai le mana e faaee mai ai le filemu.”

Mai le Soifuaga o Howard W. Hunter

Sa faamatalaina e se tasi o paaga a Peresitene Howard W. Hunter i le Korama a le Toasefululua, o ia o se alii o le “onosai uiga ese lea e sau mai le filemu sili i totonu.”¹E tele taimi sa saunoa ai Peresitene Hunter e uiga i le filemu o le loto, ma aoao mai e mafai e se tagata ona mauaina i le na o le liliu atu i le Atua—e ala i le faatuatuaina o Ia, faaaoga le faatuatua, ma taumafai e fai Lona finagalo. O lena filemu sa fesoasoani e lagolagoina ai o ia i le tele o taimi faigata.

I le faaiuiuga o le 1975, sa fautuaina ai e se fomai le faia o se taotoga o le faiai mo le faletua o Peresitene Hunter, o Claire. Sa mafatia Peresitene Hunter pe o le taotoga o se mea e fia manao ai Claire, ona o le a mafatia ai si ona tino augavale, ma e ono le faaleleia ai lona tulaga. Sa alu o ia i le malumalu, sa fefautuaai foi ma tagata o le aiga, ma e lei pine ae lagonaina o le a maua le faamoemoega sili o se mapusaga mo Claire mai le taotoga. I le faamatalaina o ona lagona i le aso o le taotoga, na ia tusia ai:

“Sa ma o atu ma ia i le faitotoa o le potu tipitipi, sa ou kisi atu ia te ia, ona faaui atu ai lea o ia i isi faitotoa. A o faagasolo le taimi, sa ou faatalitali ma tomanatu. … Sa faafuasei ona liua le popolevale i se lagona o le toafilemu. Sa ou iloaina ua faia le faaiuga sa’o, ma ua tali mai a’u tatalo.”²

I le 1989, sa i ai foi se isi aafiaga o Peresitene Hunter i le taimi na ia lagona ai le filemu i se taimi o le vevesi. Sa i Ierusalema o ia e faapaia le Nofoaga Tutotonu o le Iunivesite o Polika Iaga i Ierusalema mo Near Eastern Studies. E tele ni vaega o tagata sa tetee i le i ai o le Ekalesia i Ierusalema, ma sa i ai nisi sa taufaamatau. O se tasi o failauga o le faapaiaga o Elder Boyd K. Packer o le Korama a le Toasefululua, o le na faamatalaina lea mea na tupu mulimuli ane:

“A o ou tautala, sa i ai se vavāō i tua o le faleapitaga. Sa ulufale mai i totonu o le potu ni tagata e toniga faamiliteli. Sa latou auina atu se tusi ia Peresitene Hunter. Sa ou liliu atu ma fesili mo ni faatonuga. Sa ia fai mai, ‘O loo i ai se taufaamatau o se pomu. Pe o e fefe?’ Sa ou fai atu, ‘E leai.’ Sa ia fai mai ‘E faapena foi au; faauma lau lauga.”³ Sa faaauau le sauniga o le faapaiaga e aunoa ma se mea na tupu; sa leai se pomu.

I tulaga faapea, e talitonu Peresitene Hunter i lenei folafolaga o le filemu mai le Faaola, lea e tele taimi na te sii maia: “Ou te tuuina atu ia te outou le manuia: o lou manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

E tatau ona “taulai atu o tatou mata ia Iesu” ma ia le “liliu ese lava o tatou mata mai ia te ia o le e tatau ona tatou talitonu i ai.”

O Aoaoga a Peresitene Howard W. Hunter

O Iesu Keriso o la tatou punavai o le filemu moni.

I le valoiaina o le fanau mai o Keriso i le silia ma le 700 tausaga a o lei tupu, sa faaaoga ai e le perofeta o Isaia ni faalaniga e ta’u mai ai le faamemelo tele. … O se tasi o nei faalaniga e faapitoa le manaia i lo tatou lalolagi i le taimi nei o le “Alii o le Filemu”Isa. 9:6 “E leai se mea e gata mai ai ona tele o lona malo ma le filemu,”na tautino mai ai e Isaia (f. 7). Oka se faamoemoe mataina i se lalolagi ua faavaivaia i taua, ma tumu i le agasala! ⁴

O le filemu o loo momoo i ai le lalolagi o se taimi e le toe i ai se fevataua’i; peitai e le o iloa e tagata o le filemu o se tulaga faatoa oo mai i le tagata, i tulaga ma tuutuuga ua faatuina e le Atua, ae le o se isi lava ala.

I se salamo i le Tusi a Isaia o loo i ai upu nei: “E te leoleoina ia fifilemu lava le ua mausali lona loto; aua ua ia faatuatua ia te oe.” (Isa. 26:3.) O lea fifilemu na ta’ua e Isaia, e oo mai i se tasi i le na o le talitonu i le Atua. E le malamalama ai se lalolagi le talitonu.

I le taimi muliimuli na faia ai e Iesu le talisuaga mulimuli ma le Toasefululua, na ia mulumulu ai o latou vae, tofitofi le areto mo i latou, ma tufa atu le ipu; ma ina ua tuua i latou e Iuta, sa umi se taimi o talanoa atu le Matai ia te i latou. O se tasi o mea sa ia ta’u atu o lona maliu o loo loma ma le measina po o le talatuu sa ia tuua mo i latou taitoatasi. Na te lei aoina ni oloa, meatotino, po o ni oa. O loo ta’ua mai i faamaumauga e leai ni ana meatotino vagana ai laei sa ia ofuina, ma i le aso na sosoo ai ina ua mavae lona faasatauroga, o le a tufatufa ai e fitafita, o e o le a faia le vili po o ai e ave ma ia lona laei. Na tuuina atu Lana meaalofa i ona soo i nai upu faigofie nei ae maoae: “Ou te tuuina atu ia te outou le manuia, o lo’u manuia ou te avatu ai ia te outou: ou te le avatu ia te outou faapei o le lalolagi. Aua le atuatuvale o outou loto, aua foi tou te matatau.” (Ioane 14:27.)

Sa Ia faaaogaina le faa-Iutaia o le faalo ma le ofoalofa faaiu: “O lo’u manuia ou te avatu ai ia te outou.” O le faalo ma le ofoalofa sa le o se mea e pei ona masani ai, aua sa ia fetalai “ … ou te le avatu ia te outou faapei ona avatu e le lalolagi.” E le o ni moomooga faivavale, e le na o se sauniga taua, e faapei ona masani ona faaaoga e tagata ia upu e pei ona masani ai; ae faapei ona tuu atu e le tufuga ma le Alii o le filemu ia te i latou. Sa Ia faaee atu ia te i latou ma faapea atu, “Aua le atuatuvale o outou loto, aua foi tou te matatau.” Toe o ni nai itula ona latou feagai lea ma faalavelave, ae faatasi ai ma lona filemu o le a mafai ai ona latou faatoilaloina le fefe ma tutu atu ma le mausali.

O lana toe fetalaiga ia i latou a o lei faia le tatalo faaiu i lena afiafi lemafaagaloina o le: “ … e maua foi outou e le puapuaga i le lalolagi, a ia outou loto tetele, ua ou manumalo i le lalolagi. (Ioane 16:33.)⁵

Tatou te atiae le filemu pe a tatou ola i mataupu faavae o le talalelei.

E na o le tasi lava le lima taiala i le atulaulau, na o le tasi lava le malamalama moni, tasi le sulu lemafaatoilaloina i le lalolagi. O lena malamalama o Iesu Keriso, o le malamalama ma le ola o le lalolagi, o le malamalama lea na faamatala e se perofeta o le Tusi a Mamona o “se malamalama e le gata, e le mafai lava ona faapouliuligia.” (Mosaea 16:9.)

A o tatou saili atu mo le apitaogalu o le saogalemu ma le filemu, pe o i tatou o ni tamaitai po o ni alii taitoatasi, aiga, nuu, po o malo, ua nao Keriso lava le sulu e mafai ona tatou faalagolago moni i ai. O Ia lea na fetalai e uiga i lana misiona, “O au nei le ala, ma le upumoni, ma le ola. (Ioane14:6.) …

Mafaufau, mo se faataitaiga, i le aoaoga lea mai ia Keriso i ona soo. Na Ia fetalai, “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuaifua mai ma faasaua mai ia te outou.” (Mata. 5:44.)

Mafaufau i le mea o le a faia e lenei apoapoaiga e tasi i lo outou pitonuu faapea foi lo’u pitonuu, i nuu o loo outou nonofo ai ma lau fanau, i malo ia e avea ai i tatou o se aiga tele i le lalolagi. Ua ou iloa ua tuuina mai e lenei aoaoga faavae se lui taua, peitai o se lui sili atu e malilie i ai, nai lo galuega e tulai mai mo i tatou i taua ma le mativa ma le tiga o loo faaauau pea ona feagai ma le lalolagi.⁶

A tatou taumafai e fesoasoani ia i latou e faatiga mai ia i tatou, a tatou tatalo mo i latou e faaaogaina ma le le amiotonu i tatou, e mafai ona matagofie o tatou olaga. E mafai ona tatou maua le filemu pe a tatou lotogatasi ma le Agaga, faapea foi le tasi ma le isi a o tatou auauna atu i le Alii ma tausi ana poloaiga⁷

E manaomia e le lalolagi o loo tatou ola ai, pe lata i le fale pe mamao, le talalelei a Iesu Keriso. Na te aumaia ai le ala e tasi e maua ai e le lalolagi le filemu. … Tatou te manaomia se lalolagi e sili atu le toafilemu, e afua mai i le tele o aiga ma pitonuu ma nuu e toafilemu. Ina ia mautu ma atinae lea filemu, “ e tatau ona tatou alolofa i isi, e oo lava i o tatou fili faapea foi a tatou uo”[Aoaoga a Peresitene o le Ekalesia: Iosefa Samita (2007), 393]. … E manaomia lo tatou tuu atu o le lima faauo. E manaomia ona tatou agalelei atili, agamalu atili, lotofaamagalo atili, ma faatelegese le ita.⁸

O le ala autu a le Atua o le faatauanau ma le onosai ma le faapalepale, ae le o le fai faamalosi ma le taufaafefe. E faatino e Ia ma se talosaga agamalu ma se faatosinaga agalelei.⁹

E leai se folafolaga o le filemu ia i latou e teena le Atua, ia i latou e le tausia ana poloaiga, po o i latou e solia ana tulafono. Na saunoa le Perofeta o Isaia e uiga i le amioleaga ma le piopio o taitai ona faaauau lea o lana apoapoaiga i le faapea mai: “A o e amio leaga e tusa i latou ma le sami ua sousou, e le mafai ona toafilemu, a e lafoia ae e le suasami le eleele ma le palapala. Ua fetalai mai lo’u Atua, e leai se filemu i e amioleaga.” (Isa. 57:20–21.) …

… O le le amanaiaina o le Faaola po o le le tausia o poloaiga a le Atua e maua ai le leai o se saogalemu, le vevesi o le loto, ma le feitagai. O mea faafeagai na o le filemu. E mafai ona oo mai le filemu i le tagata i le na o le ofoina atu e leai ni tuutuuga—ofoina atu i le Alii o le Filemu, o lē o i ai le mana e faaee mai ai le filemu.¹⁰

O faafitauli o le lalolagi e masani ona faaalia i ulutala tomua o nusipepa, e tatau ona faamanatu mai ai ia i tatou e saili mo le filemu lea e maua mai i le ola i mataupu faavae faigofie o le talalelei a Keriso. O vaega iti o e mapuitiga o le a le aveesea ai le filemu o o tatou agaga pe afai tatou te alolofa i o tatou uso a tagata ma faatuatua i le taulaga togiola a le Faaola ma le faamautinoaga filemu na ia tuuina mai o le ola faavavau. O fea tatou te maua ai lena faatuatua i se lalolagi pagatia? Na fetalai le Alii, “Ia outou ole atu, ona foaiina mai ai lea ia te outou, ia outou saili, ona outou maua ai lea; ia outou tuitui atu, ona toina mai ai lea ia te outou. Aua ai se ole atu, e maua e ia; o le saili, e iloa e ia; o le tuitui e toina mai ia te ia.” (Luka 11:9–10.)¹¹

E foliga mai e tatau lava ona talia ia upumoni faavavau e lua e tagata uma, pe afai tatou te mananao ia filemu i lenei lalolagi ma maua le ola e faavavau i le lalolagi a sau. (1). O Iesu o le Keriso, le alo e faavavau o lo tatou Tama Faalelagi, o le na afio mai i le lalolagi mo le faamoemoega tutasi o le togiolaina o tagata mai a latou agasala ma le tuugamau, ma o loo soifua o ia e toe avatu ai i tatou i le afioaga o le Tama. (2). O Iosefa Samita o lana perofeta, na faatulai mai i nei aso e gata ai e toefuatai mai upumoni ia na leiloloa i tagata, ona o le solitulafono. Afai e talia e tagata uma ma ola ai i nei upumoni faavae e lua, o le a maua e le lalolagi le filemu.¹²

Afai e te teena e oe lava … o tofotofoga ma naunau e totogi le tau i aso taitasi, e ola i le Tulafono o le Seleselega e ala i mafaufauga ma faatinoga mama, e ala i fegalegaleaiga tonu ma faamaoni, e ala i le amiosa’o ma le maelega i au suesuega, e ala i le anapogi, tatalo, ma le tapuai, o le a e selesele i le seleselega o le saolotoga ma le filemu o le loto ma le manuia.¹³

O se olaga e faatumulia i le auaunaga le faatuaoia, o le a tumu foi i le filemu lea e sili atu ma le mea e malamalama i ai. … E faatoa mafai ona oo mai lena filemu e ala i le ola ai i mataupu faavae o le talalelei. O ia mataupu faavae o loo i ai le polokalama a le Alii o le Filemu.¹⁴

E tele naua mea ua fatu i lo tatou lalolagi e faaumatia ai … le filemu patino e ala i agasala ma le fiaafe o faaosoosoga eseese. Tatou te tatalo o le a feola le Au Paia i ni olaga e ogatusa ma lea na faatuina mo i tatou e Iesu le Nasareta.

Tatou te tatalo ia faatoilaloina taumafaiga a Satani, ia mafai ona toafilemu ma sologalelei olaga patino, ia mafai ona vavalalata aiga ma popole i tagata uma o le aiga, ia mafai e uarota ma siteki, paranesi ma itu ona fausia le tino tele o Keriso, ia taulima manaoga uma, faamafanafana i e tiga uma, faamalolo i manua uma seia oo ina faia e le lalolagi uma e pei ona aioi mai Nifae, “ia fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. …

“Ou uso pele,” na faaauau ai le tala a Nifae, “o le ala lenei; ma ua leai se isi lava ala.” (2 Nifae 31:20–21.)¹⁵

“O se olaga e tumu i le auaunaga le faatuaoia o le a tumu foi i le filemu lea e sili atu ma le mea e malamalama i ai.”

E mafai ona fesoasoani le Faaola e sue le filemu tusa lava po o a faigata o siomia ai i tatou.

E lei aunoa Iesu ma le faanoanoa ma le tiga ma le lotomafatia ma le sauaina. E leai se laulaufaiva e mafai ona tautala i le mamafa o le avega na ia tauaveina, e leai foi so tatou poto e malamalama ai i le faamatalaina o ia e le perofeta o Isaia “o se tagata faanoanoa.” (Isa. 53:3.) Sa felafoaiina lona sa i le tele o lona soifua, ma i mata faaletino, na faataumaoia leaga i le talafatai gaoa o Kalevario. Ua fautuaina i tatou e aua nei vaavaai atu i le olaga ma mata faaletino; o se vaaiga faaleagaga tatou te iloa ai se mea uiga ese na tupu i luga o le satauro.

Sa i ai le filemu i le fofoga ma le loto o le Faaola tusa lava po o le a le matautia ma le matamataita o le afa. Talosia ia faapena i tatou—i o tatou lava loto, i o tatou aiga, i o tatou atunuu o le lalolagi, e oo lava i sauaga tatou te feagai mai lea taimi i lea taimi i le Ekalesia. E le tatau ona tatou faamoemoe e ola i le olaga taitoatasi pe o ni aiga foi, e aunoa ma ni mea faafeagai.¹⁶

Atonu e ola se tasi i se siosiomaga matagofie ma le toafilemu, ae ona o ni feeseeseaiga e mai totonu e oo ai i se tulaga o faigata faifai pea. I se isi itu, atonu e i ai se tasi i le lotolotoi o faataumaoiga tuga ma le faamaligitoto o taua, ae e i ai lava le toafimalie o le filemu e le mafaamatalaina. Afai tatou te vaavaai atu i le tagata ma ala o le lalolagi, o le a tatou fevesiai ma fenumiai. Afai tatou te liliu atu i le Atua, o le a tatou maua le filemu mo le agaga e leai se mapusaga. Na faamanino mai lenei mea i upu a le Faaola: “E maua foi outou e le puapuaga i le lalolagi” (Ioane 16:33); ma i lana meaalofa i le Toasefululua ma tagata uma, na ia fetalai mai, “Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. …” (Ioane 14:27.)

E mafai ona tatou maua le filemu i le taimi nei i se lalolagi o feeseeseaiga pe afai tatou te taliaina lana meaalofa sili, ma lana valaaulia: “O mai ia te au, outou uma o e tigaina ma mafatia i avega, o au foi e malolo ai outou.

Ia outou amoina la’u amo ma ia outou faaaoao ia te au aua o a’u le agamalu ma le lotomaualalo ona maua lea e outou o le malologa mo outou agaga.” (Mata. 11:28–29.)

O lea filemu e malutia ai i tatou mai vevesiga o le lalolagi. O le iloa ai o loo soifua le Atua, o i tatou o ana fanau, ma e alofa o ia ia te i tatou ma faamafanafanaina le loto tiga. O le tali i le sailiga o loo i ai lea i le faatuatua i le Atua ma i lona Alo, o Iesu Keriso. O le a aumaia ai le filemu ia i tatou e mulimuli ai i le taimi nei ma le faavavau.¹⁷

I lenei lalolagi o le fenumiai ma le televave o le alualu i luma faaletino, e manaomia ona tatou toe foi i le faigofie o Keriso. … E manaomia ona tatou suesue i faavae faigofie o upumoni na aoao mai e le Matai ma aveesea ai le feteenai. E manaomia ona moni lo tatou faatuatua i le Atua ae le taumatemate. O le talalelei toefuataiina a Iesu Keriso e mafai ona mamana ma avea ma faatosinaga musuia, ma o le taliaina moni tatou te maua ai se aafiaga anoa faalelotu. O se tasi o malosiaga sili o le lotu Mamona o le faaliliuga lenei o le talitonuga i le mafaufau ma le amio i aso taitasi. E suia e lenei mea le vevesi ma le fememeai i le filemu ma le toafimalie.¹⁸

O le taulai atu o o tatou mata ia Iesu, e mafai ai ona tatou manumalo i elemene e faatamaia ai le filemu.

Sei ou faamatalaina atu se tasi o tala sili i le manumalo o Keriso i le mea e foliga mai e tofotofoina ai i tatou ma oo mai ai le fefe i o tatou loto. Ina ua agai atu soo o Keriso i se tasi o a latou malaga masani i le Sami o Kalilaia, sa pogisa le po ma sa malolosi ma fetaua’i elemene. Sa matua malolosi galu ma sa matamataita le matagi, ma sa fefefe nei tagata soifua auvaivai. Ae paga lea, sa leai se tasi o i latou e faato’ato’aina ma laveai i latou, aua sa tuua nao Iesu i le apitaogalu.

E faapei ona masani ai, sa ia vaavaaia i latou. Sa alofa o ia ma manatu tele mo i latou. I se taimi o lo latou atuatuvale tele, sa latou vaai atu ai ma iloa se foliga i le pogisa ma se ofutalaloa o loo lelelelea, o savali agai atu ia te i latou i galugalu o le sami. Sa latou tagi atu i le atuatuvale i le vaaiga, ua mafaufau o se aitu o loo savali i luga o galu. Ma o le matagi ma le pouliuli ia i latou—e pei foi i le tele o taimi ia i tatou, i le lotolotoi o pogisa o le olaga, sa foliga ua matuai tele naua le vasa ae ua matua laiti tele o tatou vaa—na oo mai ai le siufofoga faamautinoa o le filemu i se tautinoga faigofie, “O a’u lava; aua tou te matatau.” Ua tali mai Peteru ia te ia, “Le Alii e, afai o oe, ia e fetalai mai ia te au ou te alu atu ia te oe i luga o le vai.” Ma o le tali a Keriso ia te ia e tutusa lava e pei foi o i tatou uma: “Ina sau ia.”

Na oso ifo Peteru nai le vaa, i galu soua, ma a o taulai atu lana vaai i le Alii, atonu sa veuveua lona lauao i le matagi ma susūpala ai ona laei, ae na lelei mea uma. Ae ina ua aveese lana vaai mai le Matai ona o le maluelue o le faatuatua ae tilotilo atu i le matamataita o galu ma le moana uliuli i ona lalo ifo, o iina na amata ai ona magoto. E faapei foi o le toatele o i tatou, sa ia tagi atu, “Le Alii e, ia e faaola mai ia te au.” E lei tuulafoaiina foi o ia e Iesu. Sa faaloaloa atu lona aao ma aapa atu i le soo ua magoto ma tuu atu se aoaiga malu, “O oe na le faatuatua itiiti, [aisea] ua e masalosalo vale ai?

Ona latou vaaia ai lea o le saogalemu o lo latou vaa laitiiti, ma ua mou le matagi ma ua malu foi peau o le sami. E lei pine ae o latou i ai i le malu o lo latou uafu saogalemu, lea e faamoemoe tagata uma o le a tuta i ai i se aso. Sa faatumuina le auvaa ma ona soo i le ofo tele. O nisi o i latou e ta’ua o ia i se faalaniga lea ou te tautino atu i le aso: “O oe o le Alo o le Atua.” (Sii mai le Farrar, The Life of Christ, i. 310–13; tagai Mata. 14:22–33.)

O lo’u talitonuga mausali afai i le avea ai ma tagata taitoatasi, po o aiga, nuu, ma malo, e mafai e i tatou, e pei o Peteru ona taulai atu o tatou mata ia Iesu, tatou te mafaia foi ona savavali manumalo i “galu fafati o le le talitonu” ma tumau le “le fefefe i matagi tō faata’uta’u o le masalosalo.” Ae afai tatou te liliu ese o tatou mata mai ia te ia o le e tatau ona tatou talitonu i ai, lea e matuai faigofie ona fai, faapei ona faigofie i le lalolagi ona faaosooso e fai, afai tatou te vaavaai atu i le malosi ma le matamataita o na elemene matautia ma le faatafuna o loo siomia ai i tatou ae le o ia o le e mafai ona fesoasoani e faasao i tatou, o lona uiga o le a tatou gotouga ifo lava i se sami o feeseeseaiga ma le faanoanoa ma le faavauvau.

O taimi faapena pe a tatou lagonaina ua taufaamatau mai lologa tatou te malelemo ai ma o le a gotouga ifo ai le vaa o lo tatou faatuatua, ou te tatalo ia tatou faalogo atu pea lava i le lotolotoi o lena afa ma le pogisa, i le fetalaiga malu a le Faaola o le lalolagi: “Ia outou lototetele; o a’u lava; aua tou te matatau.” (Mata. 14:27.)¹⁹

Fautuaga mo Suesuega ma le Aoaoina Atu

Fesili

Ua aoao mai Peresitene Hunter o Iesu Keriso o le punavai o le filemu moni (tagai vaega e 1). O a ni aafiaga ua fesoasoani ia te oe e iloa ai lenei upumoni? E mafai faapefea ona tatou maua le filemu ua ofo mai e Iesu?
E faapefea ona tatou maua le filemu i le alolofa atu i isi? (Tagai vaega e 2) E fesoasoani faapefea le ola i le talalelei ia i tatou e maua ai le filemu? Aisea e tatau ai le “ofoina atu e aunoa ma ni tuutuuga” i le Faaola mo i tatou ia maua ai le filemu?
Iloilo aoaoga a Peresitene Hunter i le vaega e 3. O faapefea ona e iloa le faataunuuina e le Faaola o le folafolaga o le “avatu ia te outou le malologa” mai a outou avega pe a outou o mai ia te Ia?
Mafaufau i le tala a Peresitene Hunter ia Peteru o loo savali i le sami (tagai vaega e 4). O le a se mea e mafai ona e aoaoina mai lenei tala pe faapefea ona maua le filemu i taimi vevesi? Ua faapefea ona fesoasoani le Faaola ia te oe “ia outou lototetele” ma “aua le fefe” i taimi faigata?”

Mau Fesootai

Salamo 46:10; 85:8; Isaia 32:17; Mareko 4:36–40; Roma 8:6; Kalatia 5:22–23; Filipi 4:9; Mosaea 4:3; MF&F19:23; 59:23; 88:125}

Fesoasoani mo le Aoaoina Atu

Valaaulia tagata o le vasega e filifili se tasi o vaega i le mataupu latou te mananao e talanoaina, ma faatulaga se vaega ma isi ua filifilia le vaega foi lena. Fautuaina vaega taitasi e talanoaina le fesili e fesootai i le iuga o le mataupu.