Mataupu 18

Matou te Talitonu i le Faamaoni

“Afai tatou te mananao i le mafutaga ma le Matai ma le Agaga o le Agaga Paia, e tatau ona tatou faamaoni ia i tatou lava, faamaoni i le Atua, ma o tatou uso a tagata.”

Mai le Soifuaga o Howard W. Hunter

A o faatalitali ai mo se malaga maimoa i le Hearst Castle i Kalefonia, sa agai atu le taavale a Peresitene ma Sister Hunter ma se tasi ulugalii i se faleoloa laitiiti. A o autilo solo i latou i le faleoloa, “sa alu atu Elder Hunter i le laulau faatau ma faitau mai ai ni lole, [ma] totogi atu i le faatauoloa le 10 pene.” Ona toe taliu mai lea o i latou i le taavale ma amata ona toe malaga atu i le maota mo le malaga maimoa. A o malaga i latou, “sa pasi atu e Elder Hunter ia lole, ma toe pasi atu, ona faafuasei lea ona manino ia te ia atonu na sese lana faitau, aua o lea ua 11 lole ae le o le 10 lea na ia totogia.

“Sa ono faigofie lava ona ia faagalo le mea sese. Ae le gata i lea, e na o se pene lava, ma o lea sa fai si o matou faanatinati e maimoa. O ai lava o le a iloaina le eseesega pe popole foi i ai? Ae e lei toe faatali lava o ia. Sa ia faasolomuli le taavale ma toe foi atu i le faleoloa. … Sa ia faamatalaina le faafitauli i se isi faatauoloa sa i ai, ma faatoese ona o le sasi, ma toe totogi le isi pene i le faatauoloa ua te’i.”¹

Ia Howard W. Hunter, sa taua le faamaoni i nai mea iti e faapea foi i mea tetele.

Sa ia aoaoina ona atalii e uiga i le amiosa’o e ala i ana faataitaiga. “O le mea ou te iloa i le faamaoni ma le amiosa’o, e tele se fuataga na ou iloa mai mea sa faamatala mai e tagata ia te au e uiga i lo’u tama,” o le tala lea a Richard Hunter. I se tasi aso na o ai Richard ma lona tama i se fono faapisinisi, lea na talanoaina ai se galuega faatino lavelave. A o i ai i se malologa, sa talatalanoa Richard ma se tasi o tagata e uiga i le fonotaga. Fai mai Richard, semanu e umi se taimi o faatali faatoa amata le galuega faatino ona e manaomia ai se taimi tele mo le faatumuina o pepa. Sa faasa’o e le tagata lea ia Richard i lona fai atu i ai, e mafai ona faagasolo le galuega a o lei faamaeaina ia pepa aua ua iloa e tagata o le a faia e Howard W. Hunter soo se mea e fai mai na te faia. ²

I le 1962, sa lauga ai Peresitene Hunter i le autalavou o le Ekalesia ma sa ta’u atu i ai lona talitonuga maumaututu e uiga i le taua o le faamaoni.

“O le a oo mai se olaga fiafia ia i tatou taitoatasi pe afai o le a tatou faamaoni—faamaoni I o tatou tama ma tina, pe faatatau i a tatou tafaoga faamasani, o a tatou meaaoga, o tamaiti tatou te taufetuli, po o le auai i le lotu; faamaoni i o tatou epikopo—faaaoga a latou fautuaga, ta’u atu ia i latou le mea moni e uiga ia i tatou lava, totogiina o a tatou sefuluai faamaoni, ola i se olaga mama, atoatoa; faamaoni i a tatou aoga—aua lava nei faaimamago i soo se vaega o a tatou gaoioiga, pe o se vasega po o le malae; faamaoni i le totogiina o a tatou pepa, pe o ni taaloga po o tifaga, po o le tauaveina foi o a tatou tiutetauave i se pati; faamaoni i a tatou uo tama ma uo teine—aua lava nei o tatou faaaogaina i latou, aua lava nei faaseseina i latou, aua lava nei taita’iina atu i latou i faaosoosoga; faamaoni i le Alii lava ia.” ³

O Poloaiga e Sefulu e aofia ai apoapoaiga nei: “Aua e te molimau pepelo i le lua te tuaoi”(Esoto 20:16).

O Aoaoga a Peresitene Howard W. Hunter

Ua apoapoaiina i tatou e le Alii ina ia faamaoni.

Ua tumu tusitusiga paia i apoapoaiga ina ia faamaoni, ma e tele poloaiga o loo fai mai i le tulaga lava lea e ao ina tatou faamaoni. Tatou te mafaufau i ai i mataitusi tetele : AUA E TE—aua e te gaoi; aua e te molimau pepelo; aua e te manao fua [tagai Esoto 20:15–17]. …

O nisi nei o faataitaiga masani o le le faamaoni:

1. Gaoi. E seasea o’u faitau i se nusipepa e aunoa ma le maua ai o le tele o lipoti o talepe fale, o mea gaoi, o le se’i atotupe, gaoi i faleoloa, gaoiga taavale, ma le fiaafe o isi mea. E oo lava i o tatou falelotu e i ai foi lipoti o nai gaoiga laiti.

2. Faaimamago. E maua foi i nusipepa tala faapena o faiga taufaasese i faiga tau le saogalemu, o faiga faapisinisi, faaimamago i teugatupe, ma isi mea e aofia ai tagata lautele. E i ai foi nisi e faaimamago i le aoga, o nisi foi e kopi i suega.

3. Solia o tulaga faatonuina o le Upu o le Poto. O tulaga faatonuina ia o le Ekalesia. E le o solia ai tulaga faatonuina o le lalolagi. Ae ua uma ona tuuina atu ia te outou le afioga a le Alii e faatatau i lenei mataupu.

4. Solia o tulafono o le auala. E le mafai e se tasi ona faamaoni ma solia ia tulafono ua faatulagaina e nuu ma le malo mo le soifua manuia o isi tagata. ⁴

“Aua e te molimau pepelo i le lua te tuaoi”[Esoto 20:16]. Muamua, o lenei poloaiga ua faatatau i le molimau pepelo i taualumaga faafaamasinoga, ae ua faalauaitele e aofia ai faamatalaga uma e sese. Soo se mea e le moni ua faamoemoe e faamanualia ai se tasi i ana meatotino, o lona tagata, po o lana amio, e le ogatusa ma le faamoemoega ma le uiga o lenei tulafono. O le nana o le mea moni lea e tulai mai ai le manua lava lea e tasi, o se solia foi lea o lenei poloaiga.

“Aua e te manao i le fale o le lua te tuaoi, aua e te manao i le ava a le lua te tuaoi, po o lana auauna tane, po o lana auauna fafine, po o lana povi, po o lana asini, po o se tasi mea a le lua te tuaoi” [Esoto 20:17]. O le manao o lona uiga o le naunau, o le moomoo, o le mana’ona’o i mea a se isi tagata. O le naunau ia maua ni mea lelei e le o se solitulafono, ae o le manao e aveesea mai se isi i se tulaga e le tatau ai, o se mea sese lea. O le tulaga lea, e lelei ai ona tatou malamalama o le lelei po o le leaga e le amataina pe a tulai mai lona faatinoga, ae pe a i ai le loto o le tagata i se mea.⁵

E inoino le Alii i mata faasiasia; o se laulaufaiva pepelo, o se loto e manatunatu i togafiti leaga, o vae e televavave ona taufetuli i le leaga, o se molimau pepelo e tautala pepelo, [ma] le na te faatupu maseiga [tagai Faataoto 6:16–19]. I le avea ai o ni Au Paia o Aso e Gata Ai, mata e mafai ona faia soo se mea e inosia e le Alii? Ua faafia ona tautalagia e ia le leaga o le le faamaoni!⁶

Tatou te atinaeina le faamaoni i nai mea iti masani o le olaga.

Afai tatou te nofouta i la tatou sootaga ma le Faaola, e tatau ona tatou faamaoni i mea iti faapea foi mea tetele. ⁷

A tatou taumafai e ausia ni mea ma manuia, o le tele o o tatou taimi e alu i le mafaufau ma suesuega o mea lavelave ma e seasea ona tatou faaaluina se taimi mo mea faigofie—o mea faigofie, o mea iti, o le mea moni o faavae ia tatou te galueaiina ai ma a aunoa ma na mea iti, e le mafai ona i ai se faavae malosi. Atonu e maualuga i luga se fausaga, ma atonu tatou te vaai atu i ai ma le maofa ona o lona fausaga ma lona maualuga; ae e le mafai ona tu sei vagana ua taula lona faavae i papa po o uamea ma sima.

E tatau ona i ai i uiga o se tagata lena faavae. Ou te tosina mai la outou gauai i le mataupu faavae o le faamaoni. Aisea ua toatele naua ai e talitonu i mataupu faavae maualuluga o le faamaoni, ae e matua toaitiiti lava e naunau e faamaoni a’ia’i?

[E tele] tausaga talu ai, sa i ai ni pepa faasalalau i faataumata ma faitotoa o o tatou falelotu sa tusia ai “Ia Faamaoni ia te Oe Lava.” O le tele lava sa faatatau i nai mea iti masani o le olaga. O iina e atiina ae ai le mataupu faavae o le faamaoni.

E i ai nisi o le a ioe e matua sese lava le le faamaoni i mea tetele, ae e talitonu e mafai ona talia pe afai e le taua tele na mea. …

Ou te manatua se alii talavou sa i le matou siteki a o ou peresitene i le siteki. E feoai o ia ma se vaega ua manatu o se mea atamai le faia o ni mea e le sa’o. Sa i ai taimi sa maua ai o ia o faia ni nai soligatulafono iti. I se tasi aso sa ou maua ai se telefoni mai le ofisa o leoleo, ma sa ta’u mai ai o la e taofia o ia ona o se solitulafono tau taavale afi. Na maua o ia o alu saoasaoa, e pei ona ia faia i nisi taimi muamua. O le iloa o mea o loo ia faia e ono taofia ai o ia mai le alu i se misiona, o lea sa ia faasa’osa’oina ai, ma ina ua 19 ona tausaga, sa maua lona valaauga i le misiona.

O le a le galo lava ia te au le ma talanoaga ina ua toe foi mai o ia. Na ia ta’u mai, a o i ai o ia i le misiona, sa tele ina mafaufau i mea sese sa ia faia ona o ona talitonuga sese faapea, o le solia o nai mea iti e le taua. Ae ua oo mai se suiga tele i lona olaga. Ua oo ina ona iloaina, e leai se fiafia po o se toafimalie i le solia o le tulafono, pe o se tulafono a le Atua po o tulafono a nuu e tuuina mai ia i tatou. ⁸

E mafai ona tatou auauna atu i le Atua e ala i le faamaoni ma le le faaituau i a tatou fegalegaleaiga faaletagata ma faiga faapisinisi.

O le talitonuga faalelotu e mafai ona avea o se vaega o a tatou galuega i aso taitasi, o a tatou pisinisi, o a tatou fefaatauaiga, gaosigamea, feoaiga, o a tatou matata po o galuega, po o soo se mea tatou te fai. E mafai ona auauna atu i le Atua e ala i fegalegaleaiga paleni faamaoni ia tatou faiga faapisinisi i le ala e tasi tatou te tapuai ai i le Aso Sa. E le mafai ona tuueseese ia mataupu faavae moni o le faa-Kerisiano mai faiga faapisinisi ma a tatou mea e fai i aso faisoo. ⁹

Afai e i ai se taua o talitonuga faalelotu ia i tatou, e tatau la ona avea o se mea e uunaia ai o tatou olaga. Ou te le talitonu o talitonuga faalelotu o le na o le o e faalogologo i le lauga a se faifeau mo se itula i le Aso Sa, ma leai sona uiga i o tatou olaga. Afai e le aafia o tatou olaga i lo tatou talitonuga faalelotu—o tatou olaga faaleaiga—o tatou olaga faapisinisi—ma mea uma tatou te fai, o lona uiga e itiiti sona taua ma ua na o se tupua ua tuu i se mea maualuga e tapuai i ai mo na o ni nai taimi.¹⁰

Se suiga ina a tele o le a oo mai i le lalolagi pe a mafai ona tatou faalagolago i isi e tusa ai ma le faamaoni. O le a i ai i tagata le mautinoa atoatoa i isi i taualumaga faaletagata ma faapisinisi. O le a leai … se le faamaoni i e faigaluega ma pulega. O le a i ai le amiosa’o i ofisa lautele ma mataupu faalemalo, ma o le a i ai le filemu i malo, ae le o tulaga matautia ua tatou iloa i le lalolagi. …

I fegalegaleaiga faapisinisi, e i ai nisi o le a faaaogaina le le faamaoni pe a maua le avanoa e fai ai. Latou te faatatau ma ta’uamiotonuina o latou tulaga i le faapea mai, i le pisinisi e tatau lava ona i ai le tagata e faaaogaina avanoa uma. O na faiga e mafai ona oo atu i se vaega tele o tupe, ae i le tulaga o le mataupu faavae, e leai lava se eseesega ma le le toe faafo’ia o se pene sa totogi faasili e le kesia i se tasi na matauina se mea sese. O se ituaiga o faaimamago. ¹¹

Ou te fia fautuaina atu se faauigaga o le “faigaluega faamamaluina.” O le faigaluega faamamaluina o le faigaluega faamaoni. E tuuina atu le faataua tutusa, ma e leai se taufaasese, faaimamago, po o le talapepelo. E maualuga foi le uiga auaumama o ona fua po o le tautua, ma e tofu maua e le e ona le galuega, le tagata o loo tautuaina ai, tagata fai mai, po o le tagata ma’i, mea e sili atu nai lo le mea sa ia mafaufauina. O le faigaluega faamamaluina e faaleagaga. E leai se mea e aofia ai e ta’u faatauvaaina ai le lelei lautele po o le amiomama. Mo se faataitaiga, e le aofia ai ni fefaatauaiga o meainu malolosi, o fualaau faasaina, po o le peletupe. E aoga tele le faigaluega faamamaluina. E saunia ai oloa po o tautua e avea ai le lalolagi o se nofoaga e sili atu ona lelei e ola ai.¹²

Na tautino mai e Iopu, “Ou te le faateaina lava la’u amiosa’o mai ia te au”(Iopu 27:5).

O le amiosa’o e puipuia ai i tatou mai mea leaga, ma e fesoasoani ina ia tatou manuia, ma o le a laveaiina ai o tatou agaga.

Ua siomia i tatou e faaosoosoga o mea leaga i soo se itu. A aunoa ma le puipuiga a le amiosa’o, tatou te pau atu i ituaiga uma o agasala ma measese.

E lei i ai se faigata o nei faafitauli ia Iopu. Sa puipuia o ia i lana lava amiosa’o. O ona lagona ia:

“O aso uma ua i ai ia te a’u lo’u ola, ua i ai foi i o’u pogaiisu le manava mai le Atua;

“E le tautala ai lava o’u laugutu i se mea le tonu, e le tautala foi lo’u laulaufaiva i se mea pepelo. …

“Ou te taofimauina la’u amiotonu, ou te le tuua lava; e le faaleagaina a’u i lo’u loto i o’u aso uma”(Iopu 27:3–4, 6).

E ese le musuia o lea tala. Ona o lona malosiaga, lea sa leai ai sona popolega i tofotofoga i le taimi muamua, ia e toatele tagata e toilalo ai. Sa galueaiina e Iopu i lona lava olaga se malosiaga ma se tulaga faamalieina, lea e lei mafai e Satani ona sosofaina. E maeu foi le vaaia o le ala na fiafia ai le Atua ia te ia: “E leai se tagata e tusa ma ia i le lalolagi, o le tagata ua sao lana amio ma le amiotonu, o le ua mata’u i le Atua, ma aloaloese i mea leaga ma taofimau pea foi e ia lana amiotonu” (Iopu 2:3).

O loo avanoa mo i tatou lea uiga auaumama tele o le amiosa’o. Afai e faaaoga lelei, o le a foia ai o tatou faafitauli uma i malo, lotu, falefaigaluega, ma o tatou olaga taitoatasi. O le a soloiaese ai mataga o solitulafono, tatalaga o faaipoipoga, mativa, ma le faanoanoa. O le a faamanuiaina ai i tatou iinei ma laveaiina ai o tatou agaga i le olaga a sau.

O se tasi o ausiaga aupito silisili o o tatou olaga o le siitia lea o se amiosa’o faamaoni a’ia’i ia i tatou lava. O lona uiga o le a anoa lo tatou faaleagaga, faamaoni faaleatamai, faamaoni mama, ma fai ma matafaioi le tali atu i le Atua. O le amiosa’o o le ki auro lea e tatalaina ai toetoe lava o soo se faitotoa i tulaga manuia.¹³

O le olioli moni e maua mai i le faamaoni mo i tatou lava, ma isi, faapea ma le Atua.

E tele taimi tatou te ta’ua ai lena mau faatusi paia, “Ua i ai tagata, ina ia latou maua le olioli”[2 Nifae 2:25]. E oo mai le olioli i se tasi e faamaoni. Sei ou faamatalaina atu pe faapefea. O le ala lea e mafai ai ona e maua le mafutaga a le Matai ma mafai ai ona e maua le Agaga o le Agaga Paia. O le solia o le tulafono o le faamaoni o le a taofia ai oe mai le mauaina o nei faamanuiaga sili e lua. Mata e te talitonu, o le tagata e pepelo pe faaimamago … e mafai ona ia maua le mafutaga ma le Matai po o le Agaga o le Agaga Paia?

… E ao ina tatou manatua pea e le tuulafoaiina lava i tatou. E leai se taga e le o matauina; e leai se upu e tautala ai e le o lagonaina mai; e leai se mafaufauga e natia i le mafaufau o le tagata e le silafia e le Atua. E leai se pogisa e mafai ona natia ai mea tatou te fai. E tatau ona tatou mafaufau a o lei faia se taga.

Pe e te manatu e mafai ona na o oe pe a e faia se taga le faamaoni? Pe e te manatu e mafai ona le matauina oe pe a e kopi i se suega, tusa lava pe na o oe i le potu? E tatau ona tatou faamaoni ia i tatou lava. Afai tatou te manaomia le mafutaga a le Matai ma le Agaga o le Agaga Paia, e tatau ona tatou faamaoni ia i tatou lava, faamaoni i le Atua, ma o tatou uso a tagata. E tulai mai ai le olioli moni.¹⁴

E silafia e le Alii o tatou manatunatuga loloto [tagai MF&F 6:16]. Na te silafia aga uma tatou te fai. O le a i ai se aso tatou te feiloai ai ma Ia, ma o le a tatou tilotilo sa’o atu i ona fofoga. Mata o le a tatou mitamita i le tusi o o tatou olaga?

O loo tatou tusia lena tusi i aso taitasi. O taga taitasi, o manatu taitasi o se vaega o lena tusi. Mata o le a tatou mitamita i lena tusi? O le a tatou mitamita ai pe afai sa tatou faia le mea silisili—afai sa tatou faamaoni ia i tatou lava, i e pele ia i tatou, ia tatou uo, ma uso a tagata uma. …

Amuia i latou o e faamaoni. …

Amuia i latou o e usiusitai i le Alii.

O i latou na o e ua saoloto—o e fiafia—o e mafai ona savavali e aunoa ma le maasiasi. E faaaloalogia i latou. Ua ia i latou le faaaloalo a i latou e iloa lelei i latou.

A o le mea silisili, latou te maua le faaaloaloga ma faamanuiaga a lo tatou Tama i le Lagi. Ua valaaulia i tatou e Iesu e mulimuli ia te ia. O ona ala e sa’o ma mama ma sagatonu ma faamaoni. Ina tatou mulimuli atu ia ia te ia i le olaga faamanuiaina o le fiafia. Ua na o le pau lea o le ala.¹⁵

Fautuaga mo Suesuega ma le Aoaoina Atu

Fesili

Toe iloilo faataitaiga o le le faamaoni na ta’ua e Peresitene Hunter i le vaega 1. O a nisi o taunuuga o na faiga le faamaoni? O a ni mea e mafai ona aoaoina ai i tatou e na taunuuga, pe aisea lava ua faamamafa tele ai e le Alii le faamaoni?
Mafaufau i aoaoga a Peresitene Hunter e uiga i le faamaoni i mea iti ma le faaamaoni ia i tatou lava (tagai vaega 2). E manaomia i se a ona tatou faamaoni i nai “mea iti”? O le a le uiga o le faamaoni ia i tatou lava? E mafai faapefea ona faatoilaloina faaosoosoga e faapea e le afaina ni taga iti o le le faamaoni?
Ua faamamafa mai e Peresitene Hunter le manaomia ona avea le talitonuga faalelotu ma se vaega o mea uma tatou te fai i o tatou olaga i aso taitasi (tagai vaega 3). E mafai faapefea ona sili atu lo tatou ola ai i aoaoga i le vaega lenei? E mafai faapefea ona tatou aoaoina lelei le faamaoni i o tatou aiga?
I le vaega e 4, o loo ta’ua ai e Peresitene Hunter ia faamanuiaga e maua mai le ola i le amiosa’o. E atiina ae faapefea e se tagata le amiosa’o? Ua faamanuiaina faapefea oe ina ua e ola moni i tulaga faatonuina a le Alii?
E faapefea ona maua mai le olioli i le faamaoni? (Tagai vaega e 5.) E tatau i se a mo i tatou le faamaoni ina ia maua ai le mafutaga ma le Agaga Paia? E mafai faapefea ona faasaolotoina i tatou e le faamaoni?

Mau Fesootai

Iopu 27:5; 31:5–6; Salamo 15; Faataoto 20:7; Alema 53:20–21; MF&F 10:25–28; 42:20–21, 27; 51:9; 124:15; 136:20, 25–26; Mataupu Faavae o le Faatuatua 1:13

Fesoasoani mo Suesuega

A o e faitau, “vase ma maka ia upu po o fasifuaitau ina ia e iloa ai le eseesega o manatu i se [parakalafa] se tasi. I le amataga o le laina tusi ai le mau fesootai lea o loo faamanino mai ai parakalafa o loo e suesueina…(Talai La’u Talalelei [2004], 23).