Folasaga

Ua faavaeina e le Au Peresitene Sili ma le Korama a Aposetolo e Toasefululua le faasologa o Aoaoga a Peresitene o le Ekalesia e fesoasoani ai ia te oe ia sili atu ona e latalata i lou Tama Faalelagi ma faaloloto lou malamalama i le talalelei toefuataiina a Iesu Keriso. A o faaopoopo e le Ekalesia voluma i lenei faasologa o tusi, o le a e fausia se faaputuga o tusi faasino o le talalelei mo lou aiga. Ua mamanuina nei tusi e faaaoga mo suesuega faaletagata lava ia ma mo aoaoga i le Aso Sa. E mafai foi ona fesoasoani e saunia ai ni lesona o afiafi faaleaiga, saunia isi lesona po o lauga, ma tali ai fesili e uiga i aoaoga faavae o le Ekalesia.

O le tusi lenei ua faaalia ai aoaoga a Peresitene Howard W. Hunter o lē na auauna atu o se Peresitene O Le Ekalesia a Iesu Keriso o le Au Paia o Aso e Gata Ai mai le aso 5 o Iuni, 1994, e oo atu i le aso 3 o Mati, 1995.

Ata

Howard W. Hunter

Ata

saini

Suesuega Faaletagata Lava Ia

A o e suesue i aoaoga a Peresitene Howard W. Hunter, ia saili ma le agaga tatalo ia musumusuga a le Agaga Paia. O fesili i faaiuga o mataupu taitasi o le a fesoasoani ia te oe e mafaufau loloto ai, malamalama, ma faaaoga aoaoga a Peresitene Hunter. E mafai foi ona fesoasoani manatu nei.

Tusi mafaufauga ma lagona e oo atu ia te oe mai le Agaga Paia a o e suesue.
Vase ia fuaitau e te manao e manatua. Mafaufau e tauloto fuaitau nei pe tusi foi i au tusitusiga paia i autafa o fuaiupu fesootai.
Faitau se mataupu po o se fuaitau ia sili atu ma le tasi ina ia e malamalama atili ai.
Fesili ifo ia te oe lava ni fesili e pei o le, E faapefea ona faateleina e aoaoga a Peresitene Hunter lo’u malamalama i mataupu faavae o le talalelei? O le a se mea e finagalo le Alii ou te aoaoina mai nei aoaoga?
Fesili ifo ia te oe lava, pe faapefea ona fesoasoani aoaoga o lenei tusi ia te oe i luitau ma atugaluga patino.
Faasoa atu mea ua e aoaoina i tagata o lou aiga ma au uo.

Aoao Atu mai Lenei Tusi

O le a fesoasoani nei taiala ia te oe e te aoao atu ai mai lenei tusi, i le fale po o le lotu.

Sauni e Aoao Atu

Saili atu i le taitaiga a le Agaga Paia a o e sauniuni e aoao atu. Suesue ma le agaga tatalo le mataupu ina ia mautu lou malamalama i aoaoga a Peresitene Hunter. O le a e aoao atu ma se mana tele pe a uunaia oe lava i ana upu (tagai MF&F 11:21).

O le tele o mataupu e tele naua mea o loo avatu ai nai lo le mea e mafai ona talanoaina i se vasega e tasi. Ia filifili ma le lototatalo ia aoaoga e te lagona e sili ona fesoasoani ai i tagata.

Fautuaina i latou e te faiaoga ai e vave suesue muamua i le mataupu, ina ia saunia lelei ai i latou e auai i le faatinoga o talanoaga ma fefaamalamalamaa’i ai le tasi ma le isi.

I le sauniaina e faaauai i latou e te faiaoga ai, ia gauai faapitoa atu i le vaega o “Fautuaga mo Suesuega ma le Aoao Atu”o loo i le faaiuga o mataupu taitasi. I le vaega lena, o le a e maua ai fesili, mau, ma se fesoasoani mo suesuega po o le aoao atu. O fesili ma mau e ogatusa ma mea o loo i ai i le mataupu. O fesoasoani mo suesuega ma le aoao atu e faatatau tele i le aoaoina mai ma le aoao atu o le talalelei.

Folasia le Mataupu

A o e folasia atu le mataupu, saili e faavae se siomaga e mafai ai ona pa’i atu le Agaga i loto ma mafaufau o le vasega. Atonu e te manao e faaaoga se tasi pe sili atu foi o manatu nei:

Faitau pe toe iloilo le vaega ua faaigoa “Mai le Soifuaga o Howard W. Hunter” i le amataga o le mataupu, ona talanoaina lea.
Talanoaina se upusii, ata, po o se mau mai le mataupu.
Usu faatasi se viiga.
Faasoa se aafiaga puupuu faaletagata lava ia e uiga i le autu.

Uunaia se Talanoaga e uiga i Aoaoga a Peresitene Hunter

A o e aoao atu mai lenei tusi, valaaulia isi e faasoa mai o latou manatu, fai fesili, molimau atu, ma aoao e le tasi le isi. A latou auai lelei i le faatinoina, o le a sili ona latou saunia e aoao ma maua faaaliga faaletagata lava ia.

Faataga ni talanoaga lelei e faaauau nai lo le taumafai e fai uma ia aoaoga. Taiala ia talanoaga, ina ia taulai atu i aoaoga a Peresitene Hunter.

O fesili o loo i le faaiuga o mataupu taitasi, o ni punaoa taua mo le uunaia o talanoaga. E mafai foi ona e atiae au lava fesili e patino ia i latou o loo e aoaoina. O loo tuuina atu i lalo nisi manatu e uunaia ai talanoaga:

Fesili i le vasega e faasoa mai mea sa latou aoaoina mai a latou suesuega faaletagata lava ia o le mataupu. E mafai foi ona fesoasoani le faafesootai muamua o ni nai tagata ma fai i ai e o mai sauniuni e faasoa mai mea sa latou aoaoina.
Atofa ni fesili e filifilia i le faaiuga o le mataupu i ni tagata taitoatasi po o ni vaega toaitiiti. Fai i le vasega e vaavaai mo aoaoga i le mataupu e fesootai ma fesili. Ona valaaulia lea o i latou e faasoa mai o latou manatu ma malamalamaaga.
Faitau faatasi nisi o aoaoga a Peresitene Hunter i le mataupu. Fai i le vasega e faasoa mai ni faataitaiga mai tusitusiga paia ma mai o latou lava aafiaga, e fesootai i na aoaoga.
Fai i le vasega e filifili mai se vaega se tasi ma faitau le leoa. Valaaulia i latou e nonofo i ni vaega taitoalua pe toatolu, o e e filifilia le vaega lea e tasi ma talanoaina mea latou te aoaoina.

Uunaia le Faaaogaaga ma le Faasoa Atu

O le a sili ona ‘anoa aoaoga a Peresitene Hunter pe a faaaoga e tagata taitoatasi i o latou olaga, ma faasoa atu i isi. Atonu e te manao e faaaoga se tasi pe sili atu foi o manatu nei:

Fesili i le vasega pe mafai faapefea ona latou faaaogaina aoaoga a Peresitene Hunter i le fale, i le Ekalesia, ma isi faatulagaga. Mo se faataitaiga, e mafai ona e valaaulia i latou e mafaufau loloto ma talanoaina pe mafai faapefea ona latou faaaogaina ana aoaoga i le avea ai ma tane, ava, matua, atalii, afafine, faiaoga o aiga, po o faiaoga asiasi.
Valaaulia le vasega e faasoa o latou aafiaga po o le poto masani i le faaaogaina o mea sa latou aoaoina.
Uunai tagata e faasoa atu nisi o aoaoga a Peresitene Hunter i tagata o le aiga ma uo.

Faaiu le Talanoaga

Fai se aotelega puupuu o le lesona pe fai i se toatasi pe toalua e faia lena mea. Molimau atu i aoaoga sa outou talanoaina. Atonu foi e te manao e valaaulia isi e faasoa mai a latou molimau.

Faamatalaga e uiga i Punaoa o Nei Aoaoga

O aoaoga i lenei tusi o ni upusii tuusao mai saunoaga ma tusiga a Peresitene Howard W. Hunter. O saunoaga mai punaoa na faasalalauina, o loo faatumauina lava ia faailoga, o sipelaga, faamataitusi tetele, ma parakalafa o uluai punaoa, sei vagana ai o suiga faafaatonu pe faalomitusi sa tatau ai ina ia faaleleia lona faitauga. Ona o le tausisia o le faamaoni aiai i punaoa ua faasalalauina, atonu o le a e matauina se faiga e le o ogatusa i le tusiga. Mo se faataitaiga, o soanauna e faasino i le Atua o loo faamataitusi laiti i nisi o saunoaga ae faamataitusi tetele i isi.

Sa tele ina faaaoga e Peresitene Hunter ia faaupuga alii, tane, ma tagata e faasino ai i tagata uma, o le tane ma le fafine. Sa tele foi ina ia faaaogaina ia soanauna o le o iama le lona e faasino ai i itupa uma e lua. O ia faaaogaaga o le gagana o se mea masani i lona vaitau, ma sa ia faasino atu lava i alii ma tamaitai pe a ia faaaogaina.