Mataupu 6

O Le Togiola ma le Toetu o Iesu Keriso

“O le a tatou toetutu mai le oti faaletino ina ia maua le ola faavavau ona o le taulaga togiola ma le toetu o le Faaola.”

Mai le Soifuaga o Howard W. Hunter

I le aso 20 o Mati, 1934, sa fanau ai le ulumatua a Howard ma Clair Hunter, o se atalii na faaigoa ia Howard William Hunter Jr. ma sa valaau ia Billy. I le taumafanafana sa la matauina ai e foliga e gapelu ia Billy. Sa faailoa mai e fomai e le lava lona toto, ma sa faalua ona tuuina atu e Howard lona toto e tui i ai, ae sa lei suia ai le tulaga na i ai Billy. Sa toe faailoa mai i nisi o suesuega se toatuga matuia i le gaau lea sa afua ai ona alu le palapala o Billy. Sa faia se taotoga e fomai, a o taoto Howard i autafa o lona atalii e tuu atu i ai lona toto, ae sa lei manuia. E tolu aso mulimuli ane, i le 11 o Oketopa, 1934, sa maliu filemu Billy a o nonofo ai ona matua i autafa o lona moega. Sa matua faateia i ma’ua ma sa faatumulia i le faanoanoa a o ma tuua le falemai i lena po,” na tusia ai e Howard. ¹

O le aafiaga i le maliu o Billy ma le oti o isi e pele, sa lagolagoina ia Peresitene Hunter i lana molimau i le Togiola ma le Toetu o le Faaola. “O lo tatou talitonuga mautu [o le Togiola] o se mea moni,” na ia molimau ai, “ma e leai lava se mea e sili atu ona taua i le fuafuaga atoa o le faaolataga nai lo le taulaga togiola a Iesu Keriso. Tatou te talitonu e oo mai le faaolataga ona o le togiola. Ana leai, semanu ua le aoga le ata atoa o le faaolataga. … Ana leai lenei taulaga togiola, semanu o le oti o le iuga lea, ma o le a leai se toetu ma leai foi se faamoemoega i o tatou ola faaleagaga. Semanu ua leai se faamoemoe o le ola faavavau.”²

I konafesi aoao ia Aperila, lea e faia i le taimi o le Eseta, sa tele ina saunoa Peresitene Hunter e uiga i le Toetu o Iesu Keriso. I le konafesi aoao ia Aperila 1983 na ia saunoa ai:

“I lenei vaitaimi o le Eseta, e malosi ai lava lo’u lagona i le taua o lou tiute o le molimau atu i le moni o le toetu o le Faaola. Ou uso e ma tuafafine, o loo i ai se Atua i le lagi o le e alofa ma manatu ia te oe ma au. O loo i ai so tatou Tama o i le Lagi, o le na auina mai lana Ulumatua o ana fanau agaga, o lona Alo e Toatasi i la le tino, e avea ma faataitaiga mo i tatou i lenei lalolagi, ma tauaveina i ona luga agasala a le lalolagi, ma faasatauroina mo agasala a le lalolagi ma toetu mai. …

“Ioe e moni o se savali matagofie tele—o le a i ai se olaga pe a mavae le oti; e mafai ona tatou toe foi atu e nonofo ma lo tatou Tama i le Lagi, ona o le taulaga na faia e le Faaola mo i tatou, ma ona o lo tatou lava salamo ma le usiusitai i poloaiga.

“O le tafa o ata i le taeao o le Eseta ina ua liliu atu mafaufauga o le au Kerisiano o le lalolagi i le toetu o Iesu mo ni nai minute, sei o tatou faaali atu le agaga talisapaia i lo tatou Tama Faalelagi mo le fuafuaga sili o le faaolataga ua uma ona saunia mo i tatou.³

Ua “folafola atu e le [tuugamau avanoa o le Faaola] ‘E le o iinei o Ia, a ua tu’” (Luka 24:6).

O Aoaoga a Howard W. Hunter

O le Togiola o se faatinoga aupito silisili lea o le alofa o lo tatou Tama Faalelagi ma Lona Alo Pele, o Iesu Keriso.

O le Togiola a Iesu Keriso o se tofiga na muai faauuina e lo tatou Tama Faalelagi e togiola ai lana fanau ina ua mavae lo latou tulaga pau. O se faatinoga o le alofa o lo tatou Tama Faalelagi e faataga ai lona Alo Pele e Toatasi e faia se taulaga togiola. Ma o se faatinoga aupito silisili o le alofa o lona Alo pele e faatino le Togiola.

Ua tele taimi sa ou tu ai i le faatoaga o Ketesemane. Sa ou mafaufau loloto ai i puapuaga, ma mafatiaga o le Faaola—lena mafatiaga sa oo i ai ina ua faatagaina o ia e lo tatou Tama Faalelagi, i se ala e le mafai e o tatou mafaufau ona malamalama i ai, e na te tauaveina i ona lava luga le tiga ma agasala a tagata uma. Sa faatumulia lo’u agaga i le faanoanoa a o ou mafaufau i lana taulaga maoae mo tagata.

Sa ou tutu i lalo ifo o Kolokota, o le nofoaga o le ulupoo, ma mafaufau loloto ai i le mataga o le faasatauroga lea na oo i le maliu faaletino o lo tatou Faaola, ae na aumaia ai le tino ola pea mo ia ma tagata uma. Sa toe le magagana foi lo’u agaga.

Ma sa ou tutu i luma o le tuugamau i le togalaau ma mafaufau ai i lena aso mamalu o le toetu ina ua tulai ae le Faaola mai le tuugamau, ua soifua, ua toetu, ma se tino ola pea. I lena manatunatuga loloto, sa matua faatumulia lo’u loto i le olioli.

O nei aafiaga sa ou lagona ai e ao ona sasaa atu lo’u loto i le faafetai ma le talisapaia i lo tatou Tama Faalelagi mo le alofa na ia tuuina mai ma Lona Alo ia i tatou e ala i le taulaga mamalu o le togiola. I upu a Charles Gabriel, “Ou te tu ma ofo i le alofa o Iesu, ma le iloa le ala ua alofa ai ia te au. Ou te tete i lona faalavaau mo au, o se agasala na maliu ma tiga ai. E, maeu le alofa ma lona maliu tiga mo au nei. E maeu lava maeu naua.” …

Ou te tuuina atu la’u molimau, ou uso e ma tuafafine, na auina mai e le Tama Faalelagi lona Alo pele, o Iesu Keriso, i le lalolagi e faataunuu tuutuuga o le a faatino ai le ata o le faaolataga. O le Togiola o le faailoga lea o lona alofa tele mo i tatou.⁴

Na tauaveina e le Faaola i Ona lava luga a tatou agasala, o vaivaiga, faanoanoaga, ma tiga.

Ina ua latou potopoto e faamanatu le Paseka, sa taumamafa Iesu ma ana Aposetolo i faatusa o le faamanatuga na ia faatuina i la latou talisuaga mulimuli faatasi, ona latou o atu ai lea i le Mauga o Olive.

O le faiaoga i taimi uma seia oo i le iuga, sa faaauau pea lana lauga i le autu o le tamai mamoe o le taulaga. Sa ia ta’u atu ia i latou o le a fasia o ia, ma o le a faataapeapeina i latou e pei o mamoe ua leai se leoleo mamoe (tagai Mataio 26:31). “Ae a mavae lou toetu,” na ia fetalai ai, “Ona ou muamua atu ai lea ia te outou i Kalilaia” (Mataio 26:32).

I nai itula na mulimuli mai ai, sa afutoto o ia, sa faatigaina o ia e taitai o e na fai mai o i latou o e e puipuia lana tulafono, ma sa faasatauroina faatasi ma le aufaomea. E pei lava ona valoia e le Tupu o Peniamina o le Tusi a Mamona: “O le a mafatia o ia i faaosoosoga ma tiga o le tino ma le fiaʼai ma le fiainu ma le lailoa e sili atu i lo le mea e mafai e le tagata ona onosaia vagana ai ua oti aua faauta e sau le toto mai ona puafu uma ona o le a tele naua lona mafatia mo le amioleaga ma mea inosia a ona tagata. …

“E afio mai o ia i ona lava tagata ina ia mafai ona oo mai o le olataga i le fanauga a tagata e ala lava i le faatuatua i lona suafa ma e ui lava i nei mea uma o le a latou manatu ia te ia o ia o se tagata ma fai mai ua ia te ia se tiapolo ma o le a latou sasa ia te ia ma o le a latou faasatauroina o ia” (Mosaea 3:7, 9).

Ua tatou nofoaitalafu foi i le perofeta o Alema mo lo tatou malamalama i le fuataga atoa o lona mafatiaga: “Ma o le a afio atu o ia, ma mafatia i tiga mapuapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma maʼi o ona tagata.

“Ma o le a ia ave i ona luga le oti ina ia mafai ona ia tatalaina fusi o le oti ia ua noatia ai ona tagata ma o le a ia ave i ona luga o latou vaivaiga ina ia mafai ona faatumuina lona loto i le alofa mutimutivale e tusa ai ma la le tino ina ia mafai ona ia silafia e tusa ai ma la le tino le ala e fesoasoani ai i ona tagata e tusa ma o latou vaivaiga” (Alema 7:11–12).

Mafaufau i ai! Ina ua aveeseina mai lona tino ma faanatinati atu i se tuugamau na nono, ua uma ona tauaveina e le Alo e leai se agasala o le Atua, e le gata o agasala ma tofotofoga a tagata soifua uma o e o le a salamo, a o o tatou ma’i uma ma faanoanoaga ma tiga o soo se ituaiga. Sa puapuagatia o Ia i nei mafatiaga uma ua tatou oo i ai, e tusa ai ma la le tino. Na oo o ia i nei mea uma. Na Ia faia lenei mea ina ia faaatoatoa ai lona alofa mutimutivale ma lona gafatia e sii ae i tatou i luga mai tofotofoga uma i le lalolagi. ⁵

O le mea moni, atonu o le a tatou faia ni filifiliga sese, o filifiliga leaga, o filifiliga e tiga ai. O nisi foi taimi ua na ona tatou faia o na mea, ae o iina e oo atoatoa mai ai ma le mamalu le misiona ma le alofa mutimutivale o Iesu Keriso. … Sa ia saunia se togiola faapuluvaga mo filifiliga sese tatou te faia. O Ia o lo tatou fautua i le Tama ma sa ia muai totogiina sese ma le valea e masani ona tatou vaaia i le faaaogaina o lo tatou saolotoga. E tatau ona tatou taliaina lana meaalofa, salamo i na measese, ma mulimuli i ana poloaiga ina ia aoga atoatoa ai lea togiola. O loo i ai pea iina le ofo i taimi uma; e tatala pea le ala. E mafai i taimi uma, e oo lava i taimi aupito pogisa ma sese aupito tuga, ona vaavaai atu i le Alo o le Atua ma ola ai.⁶

Na toetu mai Iesu Keriso mai le tuugamau ma o le uluai fua o le Toetu.

Tatou toe foi i le taimi o vaaiga mulimuli i le Nuu Paia. Ua latalata le iuga o le soifua faaletino o lo tatou Alii. Sa Ia faamalolo i e mamai, faatutu mai e ua oti, ma faamalamalama atu tusitusiga paia, e aofia ai valoaga o lona lava maliu ma le toetu. Na Ia fetalai atu i ona soo:

“Faauta o le a tatou o ae i Ierusalema e tuuina ai le Atalii o le tagata i le au faitaulaga sili ma le au tusiupu latou te faasala ia te ia ia oti,

“Latou te tuuina atu foi ia te ia i Nuu Ese ina ia latou faatauemu, ma sasa, ma faasatauro ia te ia, ae toe faatuina o ia i le aso tolu” (Mataio 20:18–19). …

I le tafa o ata i le aso lona tolu, na o mai ai Maria le Makatala ma “le isi Maria” i le tuugamau lea sa taoto ai lona tino ua leai se ola [Mataio 28:1; tagai foi Mareko 16:1; Luka 24:10]. I se taimi muamua atu, na o atu ai le au ositaulaga sili ma le au Faresaio ia Pilato ma tauanau o ia e tuu se leoleo i le faitotoa o le tuugamau, “nei o atu ona soo i le po, ma gaoi ia te ia, ma latou fai atu i le nuu, ua toetu mai ia nai e ua oti” (Mataio 27:64). Ae na faataavale ese e ni agelu silisiliese se toalua le maa mai le faitotoa o le tuugamau, ma sa sosolaese leoleo i le fefefe i le mea na vaaia.

Ina ua oo ane fafine i le tuugamau, sa latou maua atu ua matala ma ua avanoa le tuugamau. Sa faatalitali agelu sei ta’u atu ia i latou le talafou aupito maoae ua faalogo i ai taliga o tagata soifua: “E le o iinei o ia: aua ua toetu mai o ia, pei ona fetalai atu ai o ia” (Mataio 28:6).⁷

E leai se aoaoga faavae i tūsiga paia a le au Kerisiano e sili atu le taua i tagata soifua uma, nai lo le aoaoga faavae o le toetu o le Alo o le Atua. O ia na oo mai ai le toetutu o alii uma, tamaitai, ma tamaiti o e ua soifua mai-—i le lalolagi.

E ui i le taua tele ua tatou tuuina i le toetu i a tatou aoaoga faavae, ae atonu e toatele i tatou e lei tepa atoatoa i lona taua faaleagaga ma le mamalu e faavavau. Afai ua tatou iloa, o le a tatou maofa i lona matagofie e pei ona vaaia e Iakopo, le uso o Nifae, ma o le a tatou gatete i le mea semanu tatou te oo i ai pe ana tatou le mauaina lenei meaalofa paia. Na tusia e Iakopo:

“E, le poto o le Atua, lona alofa mutimutivale ma lona alofa tunoa! Aua faauta, afai e lē toetu mai le tino o le a pulea o tatou agaga e lena agelu na paʼū ifo mai luma o le Atua Faavavau ma avea ma tiapolo e lē toetutu mai”(2 Nifae 9:8).

E moni o le toetu o le totonugalemu o le faatuatua o Kerisiano uma; o le vavega aupito maoae o vavega uma ua faia e le Faaola o le lalolagi. A leai, ua tuua moni i tatou ua leai se faamoemoe. Sei ou faaaogaina upu a Paulo: “Afai e leai se toetu mai o e ua oti, … po ua faaleaoga la matou talai, … ua avea foi i matou ma molimau pepelo i la le Atua; aua ua molimau i matou i le Atua na ia toe faatuina mai Keriso. … Afai foi ua le toe faatuina Keriso, ua faaleaoga lo outou faatuatua; ua nofosala pea outou” (1 Korinito 15:13–15, 17).⁸

A aunoa ma le Toetu, e avea le talalelei a Iesu Keriso ua na o se lisi o faaupuga poto ma vavega e le mafaamatalatalaina-—o ni faaupuga ma vavega e leai se manumalo silisili. E leai, o le manumalo silisili ua i ai lea i le vavega silisili: mo le uluai taimi i le talafaasolopito o le tagata soifua, o le na maliu ae na toefaatuina mai ia lava e avea ma tino ola pea. O Iao leAlo o le Atua, le Alo o lo tatou Tama i le Lagi ua i ai le tino ola pea, ma lona manumalo mai le oti faaletino ma le faaleagaga o le talalelei lea e ao ona tautalatala ai laulaufaiva o Kerisiano uma.

O le upumoni e faavavau e faapea, ua toetu mai Iesu Keriso mai le tuugamau ma o le uluai fua o le Toetu. Tagai 1 Kori. 15:23.) E le mafai ona masalomia ia molimau o lenei mea ofoofogia.

O nisi o molimau filifilia o Aposetolo a le Alii. E moni, o le valaauga e avea ma aposetolo o se tasi o le tuuina atu o le molimau i le lalolagi i le paia o le Alii o Iesu Keriso. Fai mai Iosefa Samita, “O mataupu faavae autu o lo tatou talitonuga o le molimau a le au Aposetolo ma Perofeta e faatatau ia Iesu Keriso, e faapea na maliu o Ia, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.” (History of the Church, 3:30.) …

I aoaoga i ana Aposetolo, na faailoa atu ai e Keriso ia te i latou “e tatau ona tiga le Atalii o le Tagata i mea e tele, e lafoaiina foi o ia e toeaina ma le au faitaulaga sili, ma le au tusiupu, e fasiotia foi o ia; a mavae aso e tolu, i le toetu mai.” (Mareko 8:31.) Ma o le mea lena na tupu. Sa faasatauroina o Ia ma tuu i le tuugamau. I le aso lona tolu, sa toetu mai lava o ia ina ia toe ola ai—le Faaola o tagata uma ma le uluai fua o le Toetu. O le taulaga togiola lea, o le a faasaoina ai tagata uma mai le tuugamau ma o le a toe ola uma ai. O le molimau lava lea faifai pea a Aposetolo, lea foi ua faaopoopo atu i ai ma la’u molimau.⁹

Na faaali atu Iesu Keriso ia Maria le Makatala a o lei leva ona toetu mai o Ia (tagai Ioane 20:1–18).

Na faaali atu Iesu i le toatele ina ua mavae Lona Toetu.

Ina ua mavae ni aso o lona toetu, sa faaali atu le Alii i le toatele. Sa Ia faailoa atu ona manu’a faapitoa e lima ia te i latou. Sa savavali ma talanoa o ia ma i latou, e foliga ina ia faamaonia atili ai o se tino toetu, o se tino faaletino moni lava e i ai aano ma ponaivi. Mulimuli ane sa ia auauna atu ia sa Nifae, o e na ia poloaiina e “tutulaia ma o mai ia te au ina ia outou tuu mai o outou lima i lou itu, ma ina ia outou tagotago foi i tulaga o fao o i ou lima ma ou vae, ina ia outou iloa ai o Au o le Atua o Isaraelu ma le Atua o le lalolagi uma ma sa fasiotia mo agasala a le lalolagi.

“Ma…sa oo ina o atu le motu o tagata i luma ma tuu atu o latou lima i ona itu, ma latou tagotago i tulaga o fao i ona lima ma ona vae, ma sa latou faia lenei mea i le o atu i luma taitoatasi seia oo ina latou o atu uma ma vaai i o latou mata ma tago i ai o latou lima ma latou iloa mautinoa ai ma molimau ai o ia lava lea o le na tusi i ai perofeta o le a afio mai”(3 Nifae 11:14–15).

O le tiutetauave ma le olioli o alii uma ma tamaitai i soo se mea ia “saili lenei Iesu ua [molimauina] e perofeta ma aposetolo”(Eteru 12:41) ma ia maua se molimau faaleagaga o lona paia. O se aia tatau ma se faamanuiaga o tagata uma e sailia ma le lotomaualalo, le faalogo i le siufofoga o le Agaga Paia, o tuuina atu se molimau i le Tama ma lona Alo toetu.¹⁰

O molimau a i latou o e na vaai ia [Iesu] o se tagata soifua ina ua mavae lona maliu, e lei feeseesea’i lava. E le itiiti ifo ma le sefulu po o le sefulutasi ona Ia faaali atu: ia Maria le Makatala ma isi tamaitai i le togalaau, o soo e toalua i le auala i Emau, ia Peteru i Ierusalema, i aposetolo i le taimi sa lei i ai Toma ma le taimi ina ua i ai o ia, i aposetolo i le Sami o Kalilaia, ma i luga o se mauga i le silia ma le 500 uso i le taimi e tasi, ia Iakopo le uso o le Alii, ma i aposetolo i le taimi o le afio a’e.¹¹

I le avea ai ma se tasi ua tofia ma faauuina e molimau atu i le suafa o Iesu Keriso i le lalolagi uma, ou te molimau atu ai i lenei vaitau o le Eseta, o loo soifua o ia. O loo i ai ia te Ia se tino mamalu atoatoa o aano ma ivi. O Ia o le Alo Pele e Toatasi o le Tama i le tino. O Ia o le Faaola, o le Malamalama ma le Ola o le lalolagi. Ina ua mavae le faasatauroga ma le maliu, sa faaali atu o ia o se tagata toetu ia Maria, ia Peteru, ia Paulo, ma le toatele o isi, Sa Ia faaalia ia lava ia sa Nifae. Sa Ia faaalia ia lava ia Iosefa Samita, le perofeta taulealea, ma le toatele o isi i lo tatou tisipenisione. ¹²

O le a tatou toetutu mai le oti ma maua le ola faavavau.

O le Eseta o le faamanatuina lea o le meaalofa mauafua o le tino ola pea ua tuuina mai i tagata uma, ua toefuatai mai ai le ola ma le faamalologa o manua uma. E ui ina o le a oti tagata uma o se vaega o le fuafuaga o le faavavau o le tuputupu ae ma le atinaega, ae e mafai ona tatou maua uma le mafanafana i le faaupuga lea a le fai Salamo, “E afe ane le tagi i le afiafi, a o le agaga fiafia i le taeao.” (Salamo 30:5.)

O Iopu lea na aumaia le fesili lea e ono ta’ua o le fesili o vaitausaga uma: “Afai e oti le tagata, pe toe ola mai ea o ia?” (Iopu 14:14.) E tatagi pea le tali a Iesu Keriso e oo mai i lenei itula: “Ou te ola a’u, o le mea lea e ola ai outou.” (Ioane 14:19.)¹³

E i ai se tuueseesega o le agaga ma le tino i le taimi o le oti. O le toetu o le a toe tuufaatasia ai le agaga ma le tino, ma avea ai le tino o se tino faaleagaga, o se tino o aano ma ivi ae segia e le agaga ae le o le toto. O le mea lea, o o tatou tino pe a mavae le toetu, e segia e le agaga, ona avea ai lea ma tino ola pea e le toe oti. O le uiga lea o faaupuga a Paulo e faapea “e i ai le tino faaletino, e i ai foi le tino faaleagaga” ma “e le mafai ona avea le malo o le Atua ma tofi o i latou ua i ai tino aano ma toto” [tagai 1 Korinito 15:44, 50]. O le tino faanatura, o le aano ma le toto, ae e segia e le agaga ae le o le toto, e mafai ona ulufale atu i le malo. …

Ua i ai so’u talitonuga maumaututu o loo soifua le Atua ma o Iesu o le Keriso. E pei ona sa molimau atu Paulo i le au paia i Korinito e ala i lana tusi i le vaitau o le Eseta i le tele o tausaga ua mavae, ou te faaopoopo atu foi la’u molimau, o le a tatou toetutu mai le oti faaletino ia maua le ola e faavavau, ona o le taulaga togiola ma le toetu o le Faaola. Ou te vaai faalemafaufau ia te ia ma ona lima, o faaloaloa atu ia i latou o e o le a faalogo:

“… O a’u nei o le toetu ma le ola: o lē faatuatua mai ia te a’u, e ui lava ina oti ae ola lava ia:

“O tagata ola uma o e faatuatua mai ia te au e le oti lava e oo i le faavavau.” (Ioane 11:25–26.)¹⁴

O le toetu o Keriso ua aumaia ai faamanuiaga o le tino ola pea ma le avanoa o le ola e faavavau. Ua folafola mai e Lona tuugamau avanoa i le lalolagi, “E le o iinei o Ia, a ua tu.” (Luka 24:6.) O nei upu o loo i ai le faamoemoe, mautinoa, ma le talitonuga e tatau ai, e lagolagoina ai i tatou i o tatou olaga faigata e tumu i le faanoanoa.¹⁵

Fautuaga mo Suesuega ma le Aoaoina Atu

Fesili

Ua ta’u mai faapefea e le Togiola le alofa o le Tama Faalelagi ma Iesu Keriso mo i tatou? (Tagai vaega 1.) E mafai faapefea ona tatou faaali atu le lotofaafetai mo lenei meaalofa o le alofa? (Tagai MF&F 42:29.)
A e toeiloiloina le vaega 2, vaavaai mo vaega e tele ua faamanuiaina ai i tatou e le Togiola. O faapefea ona faateleina lou malamalama i le Togiola ona o aoaoga a Peresitene Hunter ma lona faaaogaina o mau? O a ni aafiaga ua faamalosia ai lau molimau i le Togiola? E mafai faapefea e le mana o le Togiola ona faamalosia oe i taimi o ou tofotofoga?
O a ni ou lagona a o e suesue i aoaoga a Peresitene Hunter e uiga i le Toetu? (Tagai vaega 3.) E mafai faapefea ona tatou talisapaia atili le taua o le Toetu?
Toeiloilo le vaega 4, lea e auiliili mai ai e Peresitene Hunter molimau e toatele i le Toetu o Iesu Keriso. Aisea e taua ai molimau a nei molimau?
Mafaufau i aoaoga a Peresitene Hunter faapea o le Toetu ua maua mai ai “le faamoemoega uma, mautinoa, ma le talitonuga e tatau ai e lagolago ai i tatou i o tatou olaga faigata ma o nisi taimi e tumu i le faanoanoa” vaega 5). E avea faapefea le Toetu ma punavai o le faamoemoe ma le faamafanafanaga ia te oe? Ua faamauoa faapefea lou olaga i se molimau e uiga i le Toetu?

Mau Fesootai

Ioane 10:17–18; 2 Nifae 2:6–9, 22–27; 9:19–25; 3 Nifae 27:13–16; MF&F 18:10–16; 19:15–20; Mose 6:59–60

Fesoasoani mo Suesuega

“Fuafua ni gaoioiga suesue e faateleina ai lou faatuatua i le Faaola” (Talai La’u Talalelei [2004], 22). Mo se faataitaiga, ao e suesue e mafai ona e fesili ifo ia te oe lava fesili faapea: “E faapefea ona fesoasoani nei aoaoga e faateleina ai lo’u malamalama i le Togiola a Iesu Keriso? E mafai faapefea e nei aoaoga ona fesoasoani ia avea atili ai au faapei o le Faaola?”