O le Molimau a Peresitene Polika Iaga i le Perofeta o Iosefa Samita.

I se tasi o lauga i le Au Paia e faatatau i le galuega ma le misiona a Iosefa, na molimau mai ai Peresitene Polika Iaga: “Ou te lagonaina lo’u alaga Aleluia, i taimi uma, pe a ou mafaufau ua leva ona ou iloaina Iosefa Samita, o le Perofeta o le na faatuina ma faauuina e le Alii, ma o ia lea na tuuina uma atu i ai ki ma le mana e atinaeina ai le Malo o le Atua i le lalolagi ma lagolagoina ai” (DBY, 458). I lona soifuaga atoa i le avea ai ma se taitai o le Ekalesia, na ia faailoa mai ai lona alofa ma ana saafiafiga mo le Perofeta o Iosefa Samita: “E mafai ona ou fai atu moni e faapea, ua ou iloaina o ia ua atoatoa i soo se mea i le avea ai ma perofeta moni i tagata, ma o se tagata lelei atu e le mafaia, e ui lava e i ai ona vaivaiga; ae o ai ea se tagata i lenei lalolagi e leai ni ona vaivaiga?” (Brigham Young to David P. Smith, 1 June 1853, BYP). June 1853, BYP). O le talitonuga maumaututu o Peresitene Iaga sa i ai i lona olaga atoa e uiga i le Tali Faaaliga ma lana galuega, sa faamautuina i nai toe taimi mulimuli a o lei maliu i ana toe upu o le aloaiaina ma lona talitonuga: “Iosefa, Iosefa, Iosefa” (LSBY, 362).

Aoaoga a Polika Iaga

Na faataatia e le Perofeta o Iosefa Samita le faavae o le Ekalesia a Iesu Keriso i lenei tisipenisione.

Na faalauiloaina mai i fautuaga o le faavavau, a’o le’i taitai ona faavaeina le lalolagi, e faapea, o ia lava, o Iosefa Samita, e tatau ona avea ma tagata mulimuli o le tisipenisione o lenei lalolagi, e aumaia le afioga a le Atua i tagata, ma mauaina le atoatoaga o ki ma le mana o le Perisitua a le Alo o le Atua. Na maitauina o ia e le Alii, faapea foi ma lona tama, ma le tama o lona tama, ma ona augatama uma e tau atu lava i tua ia Aperaamo, ma mai ia Aperaamo e tau atu i le lolo, ma mai le lolo e tau atu ia Enoka, ma mai ia Enoka e tau atu ia Atamu. Na maitauina e le Alii lena aiga ma lena toto, ao fegasoloai ai mai lona amataga e oo mai i le fanau mai o Iosefa Samita. Na muai faauuina o ia i le muai olaga, ina ia pulefaamalumalu i le tisipenisione mulimuli (DBY, 108).

[O le Alii] na valaauina lana auauna o Iosefa Samita le Itiiti ao tamaitiiti o ia, ina ia faataatia le faavae o lenei Malo mo le taimi mulimuli. Aisea na ia valaauina ai Iosefa na te faia? Aua o le Alii lava ia na fuafuaina e faia e Iosefa. Pe sa na o Iosefa Samita ea le tagata sa i luga o le fogaeleele e mafai ona ia faia lenei galuega? E leai se masalosalo e toatele isi sa i ai, o e mafai ona faia le galuega i lalo o le taitaiga a le Alii; ae ua filifilia e le Alii le ua ia fiafia i ai, ma ua lava lea (DBY, 460).

E masani ona faitio tagata i Faifeautalai, pe a latou o atu e talai atu, e faapea o Iosefa Samita, o le na faavaeina la latou Ekalesia ma le lotu, ua na o se tamaitiiti faatauvaa e leiloa faitau tusi ma tusitusi. Sa foliga mai e pei sa malosi lena tuuaiga ma avea o se tasi o finauga malosi lea e mafai ona fefinauai ai i aoaoga o le talalelei, le au popoto ma aoaoina o lenei lalolagi, e ui lava e le o i ai se fefinauaiga tele o i ai. Sa tatau i le Alii ona faaali ifo o ia lava i nisi o faitaulaga aoaoina po o ni tagata talenia o na vaitaimi, ma fai atu i ai, o i latou na e mafai ona latou faia ni mea lelei ma tauaveina le Talalelei ina ia manumalo, e ala lea i o latou aafiaga ma aoaoga, ae le o le faaali atu i se tagata mativa, le malamalama, ma se talavou e lei aoaoina lelei. E le toatele ni tagata popoto, e le toatele ni tagata maoae, e le toatele ni tagata taualoa, e tautatala i le malamalama o tagata, e valaauina; ae ua filifilia e le Atua mea valea a le lalolagi e faamaina ai e popoto, o mea vaivai o le lalolagi, ina ia faamaina ai mea malolosi; ma mea faatauvaa a le lalolagi—mea o le a inosia ai e le lalolagi, ua filifilia e le Atua i lona faautauta; ioe, ma mea e leai, ina ia faaleaogaina e ia mea o i ai, ina nei mitamita se tagata e toatasi i ona luma [ 1 Korinito 1:26–29] (DBY, 321–22).

Na ou lagonaina i na aso [ae ou te lei auai i le Ekalesia], afai e na ona ou vaai lava i fofoga o se perofeta, e pei ona soifua ai i aso ua tuanai, o se alii o loo i ai faaaliga, o le na tatalaina ai le lagi, o le na te silafiaina le Atua ma ona uiga, o le a faigofie lava ona ou savali faataamilo i le lalolagi i o’u lima ma o’u tulivae; na ou manatu e leai se faigata o le a ou le oo i ai, afai e mafai ona ou iloaina se tagata na te iloaina po o ai le Atua ae po o fea foi o i ai, o lona uiga, ae po o le a foi le faavavau (DNW, 8 Oct. 1856, 3).

O le a le natura ma le matagofie o le misiona a Iosefa? … Ina ua ou faatoa faalogo muamua lava ia te ia o lauga mai, na ia aumaia faatasi le lagi ma le lalolagi (DBY, 458).

Na faataatiaina e Iosefa Samita le faavae o le Malo o le Atua i aso mulimuli; o isi o le a latou fausiaina luga ae o le faavae (DBY, 458).

Ou te lei vaai lava i se tasi, seia oo ina ua ou feiloai ia Iosefa Samita, o le na te mafai ona tau mai ia te au soo se mea e faatatau i le uiga, natura ma le afioaga o le Atua, po o soo se mea e faamalieina ai e uiga i agelu, po o le sootaga o le tagata i lona Matai. Ae peitai sa ou matuai maelega atoatoa, nai lo se isi tagata ina ia taumafai e suesue i nei mea (DBY, 458).

Na ia tatalaina le lagi ma aumaia i lalo i le lalolagi; ma ia faamaualugaina le lalolagi, ma faailoaina mai i le faigofie mea a le Atua; ma o le matagofie lena o lana misiona. Sa i ai sa’u molimau, e leva atu nai lo lena e faapea, o ia o se Perofeta a le Alii, ma o se faamafanafanaga lena. Pe lei faapea foi le mea na faia e Iosefa i lou mafaufau? Pe na te lei faafaigofie ea ia Tusitusiga Paia ina ia mafai ona malamalama ai tagata uma? E faapea mai uma tagata, “Ioe, e matuai taliaina lava; ua tuufaatasia ai le lagi ma le lalolagi,” ae mo le taimi nei, ua leai se isi mea, ua na o le aoao lava, pe faapefea ona ola i le faavavau (DBY, 458–59).

Ou te faamamaluina ma faaaloalogia le suafa o Iosefa Samita. Ou te fiafia e faalogo i ai; ou te alofa i ai. Ou te alofa i ana aoaoga (DBY, 458).

O mea ua ou mauaina mai le Alii, na ou mauaina lea mai ia Iosefa Samita; o ia lea sa avea ma mea faigaluega aoga. Afai ou te le talitonu ia te ia, e tatau ona ou tuueseina nei aoaoga; e lei faaalia ma faailoaina mai lava, pe ua faamatalaina mai foi e se isi lava tagata talu mai le taimi o le Au Aposetolo. Afai ou te le talitonu i le Tusi a Mamona, e tatau foi ona ou teenaina o Iosefa o se Perofeta; ma afai ou te le talitonu i aoaoga ma ou musu e talai atu le faapotopotoina o Isaraelu ma le fausiaina o Siona, e tatau foi ona ou teenaina le Tusi Paia; ma, o le mea e iu i ai, e sili ai ona ou alu atu i le fale, nai lo le talai atu e aunoa ma nei mea e tolu (DBY, 458).

E leai se tagata e faapea ua mauaina le avanoa e faalogo ai i le ala o le ola ma le faaolataga ua i ona luma e pei ona tusia ai i le Feagaiga Fou, ma le Tusi a Mamona, ma le tusi o Mataupu Faavae ma Feagaiga, e se Au Paia o Aso e Gata Ai, e mafai ona faapea mai o loo soifua Iesu, o lana Talalelei e moni, ae faapea mai foi i le taimi lava lea e tasi, o Iosefa Samita, e le o se Perofeta a le Atua. O se molimau malosi lena, ae e moni. E leai se tasi e mafai ona faapea mai o lenei tusi (ao faasino lona lima i le Tusi Paia) e moni, o le afioga a le Alii, o le ala, o le faasino ala, ma o se auala e mafai ai ona tatou suesue i le finagalo o le Atua; ae o le taimi foi lea e tasi e faapea mai ai o le Tusi a Mamona e le moni; pe afai e leai se tagata ua mauaina le avanoa e faitau i ai, po o le faalogo foi o faitauina, ma aoao ai i ona aoaoga. E leai se tagata i luga o le fogaeleele ua i ai le avanoa e aoao ai i le Talalelei a Iesu Keriso mai nei tusi e lua, ae faapea mai o le isi e moni, ae o le isi e sese. E leai se tagata o le Au Paia o aso e Gata ai, e leai se alii po o se tamaitai, e mafai ona faapea mai o le Tusi a Mamona e moni, ae faapea mai foi i le taimi lava lea e tasi o le Tusi Paia e sese. Afai e moni le tasi, e tatau ona moni uma; afai e sese le tasi, e sese uma lava. Afai o loo soifua Iesu ma o le Faaola o le lalolagi, o Iosefa Samita o se Perofeta a le Atua, ma o loo i ai o ia i le fatafata o Aperaamo. E ui lava ua latou fasiotia lona tino, ae peitai o loo ola pea o ia ma faauta o loo vaavaai o ia i fofoga o le Tama o i le Lagi; ma o ia e mama atoatoa, e pei o agelu o loo siomia le nofoalii o le Atua; ma e leai se tagata o loo i le lalolagi, e mafai ona faapea mai o loo soifua Iesu, ae teena i le taimi lava lea e tasi la’u faamatalaga, e uiga i le Perofeta o Iosefa. O la’u molimau lea, ma e malosi (DBY, 459).

Na aoaoina e le Alii Lana auauna o Iosefa Samita e ala i faaaliga,“o lea upu moni e faaopoopo atu i lea upu moni.”

Mai le aso na mauaina ai e Iosefa, ma luma atu o le taimi lena, na tuuina atu ai e le Alii ia te ia faatonuga. Na ia taitaiina o ia i lea aso ma lea aso ma taimi uma (DBY, 461).

Na faaauau pea ona mauaina e Iosefa faaaliga e faaopoopo atu i lea faaaliga, o sauniga e faaopoopo atu i isi sauniga, o upu moni e faaopoopo atu i isi upu moni, seia oo lava ina ua ia mauaina mea uma e manaomia, mo le faaolataga o le fanau a tagata (DBY, 461).

O tagata uma lava o i le lalolagi ua valaauina e le Atua; ua valaauina i latou ina ia salamo ma papatisoina mo le faamagaloina o agasala (DBY, 461).

Ua tatou pasi mai se isi mea e agai atu i se isi mea, ma e mafai ona ou faapea atu mai se tasi tulaga o le malamalama i se isi tulaga. Ina ua faatoa mauaina lava e Iosefa sona malamalama e uiga i papatusi o loo i le mauga o Kumora, na te lei mauaina ai loa iina ma ki o le Perisitua Arona, na ona ia mauaina o se malamalama o loo i ai iina ia papatusi, ma o le a aumaia lava e le Alii… . Na ia mauaina le malamalama faapea [o uluai tagata na nofoia Amerika] sa latou mauaina muamua le Talalelei, ma e talu mai lena taimi sa ia faaauau pea, i lea laasaga i lea laasaga, seia oo lava ina ua ia mauaina papatusi, ma le Urima ma le Tumema ma ua i ai le mana e faaliliuina ai papatusi. E lei avea ai o ia ma Aposetolo ona o lea mea, e lei tuuina atu ai foi ia te ia ki o le Malo, pe na avea ai foi o ia ma Toeaina i Isaraelu. O ia o se Perofeta, ma na ia mauaina le agaga o valoaga, ma na ia mauaina nei mea uma ao lei faauuina o ia e le Alii. Ae ina ua poloaiina o ia e le Alii e ala i se faaaliga ina ia alu atu i Pennsylvania, sa ia faia lava, ma faamaeaina ai le faaliliuina o le Tusi a Mamona; ma ina ua poloaiina o ia e le Alii i se isi faaaliga ina ia toe foi atu i le Setete o Niu Ioka, ma alu atu i le Tama Matua o Uitimera, o loo nofo i se nofoaga e faafesagai ma Waterloo, ma taofi ai iina, sa ia faia lava, ma faia ai fonotaga, ma faapotopotoina ai ni nai tagata ua talitonu i lenei molimau [tagai i le HC, 1:48–51]. Na ia mauaina le Perisitua Arona, ona ia mauina ai lea o ki o le Perisitua Mekisateko, ma faatulagaina ai le Ekalesia [vaai MFF 13; 20; 128:20]. Na ia muai mauaina le mana e papatiso ai, ma na te lei iloaina ai lava foi pe na te toe mauaina nisi mea mai le Alii seia oo ina ua tauina atu e le Alii ia te ia o loo tele isi mea mo ia. Ona ia mauaina ai lea o ki o le Perisitua Mekisateko, ma maua ai le mana e faamau ai ina ua uma ona papatisoina o ia, lea e lei faia muamua lava. Semanu o le a tumau ai pea lona tulaga po o le pule o loo ia te ia e pei o Ioane le Papatiso, pe ana le auina mai e le Alii ana avefeau o Peteru, Iakopo, ma Ioane, ina ia faauuina Iosefa i le Perisitua Mekisateko … . Ona [tatou] mauaina ai lea o isi sauniga (DBY, 461–62).

I le taimi lea [1840] na oo mai ai se faaaliga e faapea e mafai ona tatou papatiso mo a tatou uo ua maliliu, ae i le taimi muamua e lei faaalia mai ai e tatau ona teuina se faamaumauga o i latou ua papatisoina; ae ina ua ia mauaina se isi faaaliga faaopoopo mo lena faamoemoega, ona tausia ai lea o se faamaumauga (DBY, 462).

Na aoaoina atu ma le manino e le Perofeta o Iosefa Samita ia upu moni o le talalelei.

E na o le pau lava le mea na faia e Iosefa Samita o le talai atu lea o le upu moni—le Talalelei e pei ona faaalia atu i ai e le Alii ia te ia—ma tau atu i tagata pe faapefea ona faasaoina, ma o e faamaoni i le loto na taufetuli faatasi ma faapotopoto faatasi i ona tafatafa ma alolofa ia te ia e pei ona latou faia i o latou lava olaga. E mafai ona ia faia nisi mea e sili atu nai lo le na o le talai atu o mataupu faavae moni, ma o na mataupu faavae moni o le a faapotopotoina ai le Au Paia i aso mulimuli, o e ua faamaoni i le loto. O i latou uma e talitonu ma usitai i le Talalelei a Iesu Keriso o ana molimau ia i le moni o nei faamatalaga (DBY, 463).

O le maualuga o le mamalu o uiga o le Uso o Iosefa Samita sa ia mafai ai ona faafaigofieina mea faalelagi ina ia malamalama ai i latou e le lava lo latou malamalama. Ina ua ia talai atu i tagata—ma faaali atu i ai mea a le Atua, o le finagalo o le Atua, o le ata o le faaolataga, o faamoemoega o Ieova, o lo tatou sootaga ma ia ma le aiga Atua uma, na ia faaitiitia aoaoga ina ia fetaui i tulaga o tane, fafine, ma tamaiti, ma faafaigofie e pei o se auala teuteuina lelei. Ua tatau ai ona faatalitonuina soo se tagata e faalogo ia te ia i lona mana ma le pule paia, aua e leai se isi tagata e mafai ona aoao atu e pei ona ia faia, ma e leai se tagata e mafai ona ia faaalia mai mea a le Atua, ae ala mai i faaaliga a Iesu Keriso (DBY, 463).

E leai se tagata ua mauaina e mafai ona ia aoaoina atu le salamo ma le papatisoga mo le faamagaloina o agasala, faatasi ai ma le pule e faataunuuina ai sauniga, seia oo ina ua tofiaina e le Atua ia Iosefa Samita, ma auina mai o ia faatasi ma ana poloaiga i tagata. Ao lei oo mai i lena taimi, sa ou sailia ai faamatalaga uma e faatatau i isi lotu; sa ou saili i se tagata e mafai ona ia tauina mai ia te au se mea e uiga i le Atua, o le lagi, o agelu ma le ola e faavavau. Ou te talitonu i le Atua le Tama, ma Iesu Keriso, ae sa le mafai ona ou talitonu ua i ai i le lalolagi le Ekalesia a Iesu Keriso (DBY,463).

Atonu sa mafai ona ou faaauau ona suesueina le Tusi Paia ma isi tusi uma ua maea ona tusiaina, ae ana le seanoa le faaaliga mai le Atua semanu e avea au e pei o se apamemea taalili po o se sumepalo tagitagi, i le leai o sou malamalama e uiga i le Atua, o lana ekalesia moni, o le togiolaina o e ua maliliu; semanu ou te ola ma oti ma le le malamalama; ma o le tulaga lea o tagata ola uma o le lalolagi (DBY, 463).

O le fesili sa fesiligia i le tele o taimi e uiga ia Iosefa Samita, e se alii o le na malaga mai e feiloai ma ia ma ona tagata, “E faapefea ona mafai ona e puleaina ou tagata ma le faigofie tele? E foliga mai e leai se mea o loo latou faia ae o le mea o loo e tautala ai; e faapefea ona e puleaina i latou ma le faigofie tele?” Na ia faapea atu, “Ou te le o puleaina lava i latou. Ua faaalia mai e le Alii ni mataupu faavae ma’oti mai le lagi lea e ao ona matou ola ai i nei aso e gata ai. Ua latalata mai le taimi e faapotopotoina ai e le Alii ona tagata mai e amioleaga, ma o le a ia faapuupuuina lana galuega i le amiotonu, ma o mataupu faavae na ia faaalia maia ua ou aoaoina atu i tagata ma o loo latou taumafai ina ia ola e tusa ai, ma latou puleaina i latou lava.”

Uso e, o le mea faalilolilo lena i le puleaina o nei tagata. E manatu nisi o au lea ou te puleaina i latou, ae leai. E faapei foi ona mafai ona ou puleaina o au lava ia ma tausia lo’u lava tagata ina ia sa’o ma aoaoina tagata i mataupu faavae e tatau ona latou ola ai (DBY, 470).

Ou te toe tomanatu i le tele o taimi pe a manatunatu loloto ai le Uso o Iosefa pe toafia nisi o le a omai i totonu o le Malo o le Atua ma toe foi ese atu, ma o le a faapea mai, “Uso e, ou te lei liliuese lava, ma ou le o lagonaina e tatau ai.” O le toatele o outou, e aunoa ma se masalosalo, emafai ona toe mafaufau i ana upu. E tatalo Iosefa i taimi uma, faatinoina lona faatuatua, ola ai i lona talitonuga, ma faalauteleina lona valaauga, ina ia maua ai ni asiasiga a le Alii, ma ia tausia o ia lava ina ia tumau i le faatuatua (DBY, 469).

O lenei, e pei o le tulaga o au ma o’u uso nei, ma e pei o le mamao ua matou i ai mai le sini ina ia atoatoa, ma mai avanoa e tatau ona matou olioli ai, afai e mafai e Iosefa Samita le Itiiti, le Perofeta ona vaai i tagata i ona taimi o loo naunau e usiusitai i lona leo, e pei ona i ai i latou i aso nei ina ia faalogo i le siufofoga o le Peresitene, semanu e avea lava o ia ma se tagata fiafia. Na ia soifua, ma galue, tigaina, ma mafatia; o lona lototele e pei o le lototele o se agelu, ma o lona finagalo e pei o le finagalo o le Silisiliese, ma sa ia galue seia oo lava ina ua latou fasiotia o ia (DBY, 464).

Na faamaufaailogaina e le Perofeta o Iosefa Samita lana molimau i lona toto.

O le toatele o perofeta na faamaufaailogaina a latou molimau i o latou toto, ma ia agai atu i luma a latou molimau ma le malosi… . E pei ona i ai i aso anamua, e faapea foi i aso nei. Ina ua faamaufaailogaina e Iosefa Samita lana molimau i lona toto, o lana molimau mai lena taimi sa matuai malosi ma tatau ai mo le lalolagi atoa; oi talofa ia i latou o e tetee i ai (DBY, 467).

Ina ua alu atu [Iosefa Samita] i Karefasi (Carthage) na ia faapea mai, “Ou te alu atu e oti; e pei o le tamai mamoe a fasia; ou te alu ma lo’u loto i ai”(DBY, 467).

O ai na laveaiina Iosefa Samita mai lima o ona fili [seia oo] lava i le aso o lona maliu? O le Atua; e ui lava sa toe aumaia o ia mai le oti i lea taimi ma lea taimi, ae tusa ai ma le malamalama o tagata, e le mafai lava ona laveaiina, ma sa leai foi se avanoa e toe faasaoina ai o ia. Ina ua falepuipui o ia i Misuri, sa leai se tagata e faamoemoe o le a ia mafai ona sola ese mai lima o ona fili, sa ia te au le faatuatua o Aperaamo, ma ou tauina atu i le usoga, “E pei ona soifua le Alii le Atua, e tatau foi ona toe alu ese mai o ia mai o latou lima.” E ui lava sa ia valoia e le aulia e ia le fasefulu o ona tausaga, ae peitai sa matou talotalo uma ina ia faaseseina lena valoaga, ma ia matou faatasi pea ma ia e faavavau; na matou manatu o lo matou faatuatua, o le a faaumiumi ai lona soifua, ae na sese i matou—na iu lava ina ua faamaturoina o ia i lona talitonuga. Na ou faapea atu, “O loo lelei mea uma; o lea o le a matuai malosi lava le molimau; ua ia faamaufaailogaina lava i lona toto” (DBY, 469–70).

O lona tofiga e lei aveeseina mai ia te ia, ua na ona alu atu o ia e galue i se isi matagaluega o le fuafuaga a le Silisiliese. O loo avea pea o ia ma se Aposetolo, ma se Perofeta, ma o loo ia faia se galuega a le Aposetolo ma se Perofeta.; ua laasia le isi laasaga e sili atu nai lo i tatou ma mauaina se manumalo lea tatou te lei mauaina lava (DBY, 468).

Ou te iloa o [Iosefa Samita] na valaauina e le Atua, ma ua ou iloa lenei mea e ala i faaaliga a Iesu Keriso ia te au, faapea ai ma le molimau a le Agaga Paia. Ana ou le aoaoina lenei upu moni, semanu e le tatau ona valaauina au o se “Mamona,” e le tatau foi ona ou i ai iinei i le aso (DNW, 22 Oct. 1862, 2).

Fautuaga mo Suesuega

Na faataatia e le Perofeta o Iosefa Samita le faavae o le Ekalesia a Iesu Keriso i lenei tisipenisione.

O le a le matafaioi na faatinoina e augatuaa o Iosefa Samita i le sauniaina o ia ina ia avea ma uluai perofeta i lenei tisipenisione? O a ni auala ua aafia ai lou olaga ona o ou augatuaa? O le a se mea e mafai ona e faia ina ia i ai se aafiaga amiotonu i au fanau?
O a ni itu lelei mai le valaauina e le Alii o se tamaitiiti e faataatiaina le faavae o le malo i nei aso mulimuli? O faapefea ona fesoasoani lenei mea ia te oe ina ia e iloa ai le aao o le Alii o loo galue i lou olaga?
Na saunoa mai Peresitene Iaga e faapea, o le Perofeta o Iosefa Samita na faataatiaina le faavae o le Ekalesia a Iesu Keriso i aso e gata ai, ma o isi o le a latou fausiaina luga ae o le faavae. O le a lena faavae? (Vaai foi MFF 5: 9–10; 135:3.) O le a le vaega i luga ae o le faavae? O a ni faamaoniga ua e vaaia ua fausia lena vaega i luga a’e o le faavae o le Ekalesia? E mafai faapefea ona tatou tofu sao uma i lenei galuega?
O le a le fautuaga na tuu mai e Peresitene Iaga, e uiga i le natura ma le matagofie o le misiona a Iosefa? E mafai faapefea ona tatou mulimuli i le aoaoga a le Perofeta o Iosefa Samita i le auala e faalatalata atu ai le aoaoga, i a tatou fanau ma isi?
Na faapefea ona aoaoina i tatou e le Perofeta o Iosefa Samita, i le “auala tatou te ola ai i le faavavau”? E faapefea ona faatatau nei aoaoga i o tatou olaga faaletino?

Na aoaoina e le Alii Lana auauna o Iosefa Samita e ala i faaaliga,“o lea upu moni e faaopoopo atu i lea upu moni.”

O le a sou manatu aisea na faaalia mai ai e le Alii Ana upu moni e ala mai i lea faaaliga e faaopoopo i lea faaaliga nai lo le aumaia uma i le taimi e tasi?(Vaai foi MFF 93:11–14.) Na faapefea ona faamaonia lenei mea i le soifuaga o le Perofeta o Iosefa Samita? Na faapefea ona faamaonia i lou olaga?

Na aoaoina atu ma le manino e le Perofeta o Iosefa Samita ia upu moni o le talalelei.

Aisea na avea ai le Perofeta o Iosefa Samita ma se faiaoga alofagia ma tali leleia? O le a lana auala faalilolilo mo le puleaina o tagata o le Alii? E mafai faapefea ona tatou faatatauina lenei mataupu faavae i o tatou tiutetauave i le fale, i le galuega, ma le Ekalesia?
Na faapefea ona mafai e le Perofeta o Iosefa ona “mauaina faaaliga a le Alii, ma tumau i le faatuatua”? E mafai faapefea ona tatou iloa le finagalo o le Alii e uiga ia i tatou? Aisea e tatau ai ona tatou faaauau ona tatou faatuatua ina ia mafai ai ona faatumauina a tatou molimau i le talalelei?

Na faamaufaailogaina e le Perofeta o Iosefa Samita lana molimau i lona toto.

Aisea na talafeagai ai ia Iosefa ma Ailama Samita ona faamaufaailogaina a laua molimau i o laua toto? (Vaai foi MFF 135; 136:39.)
Na faamatala mai faapea e Peresitene Iaga, “Ou te iloa o [Iosefa Samita] na valaauina e le Atua, ma ou te iloa lenei mea e ala i faaaliga na tuuina mai e Iesu Keriso ia te au.” O a ni ou lagona e uiga i le Perofeta o Iosefa Samita? E mafai faapefea ona e fetufaai atu ou lagona i lou aiga, o au uo, ma e tou te masani? Mafaufau ina ia tusitusi ma faamaumau i se mea ou lagona e uiga i le Perofeta mo lau fanau.