O le Perisitua

Sa faauuina ia Peresitene Polika Iaga o se tasi o uluai Aposetolo e Toasefululua i lenei tisipenisione. O se vaega o le faamanuiaga na tuuina atu mo ia i lona faauuga, sa faapea ona tau atu ia te ia, “o le Perisitua Paia ua tuuina atu ia te ia, ina ia ona faia ai mea ofoofogia i le suafa o Iesu; ina ia mafai ona ia tulieseina ai temoni, faamalolo i e mamai, faatutu e ua oti, faapupula mata o tauaso, ia o atu mai lea laueleele i lea laueleele mai lea sami i lea sami” (HC, 2:188–89). Sa ia folafola atu o le perisitua ua tuuina mai ia te ia o se “faatulagaga atoatoa o le malo, o tulafono ma sauniga,” pe afai e “malamalama lelei i ai,” e faamalosia ai le amiotonu ina ia latou “maua faamanuiaga a le Alii” (DBY, 130, 131).

Aoaoga a Polika Iaga

Ua taitaiina e le Alii Lana galuega i le lagi ma le fogaeleele e ala i le perisitua.

Afai e i ai se tasi e manao na te iloa le Perisitua o le Alo o le Atua, o le tulafono o loo i ai le lalolagi i le taimi nei, sa i ai, ma o le a faaauau i le faavavau. O le faatulagaga e aumaia le lalolagi e nofoia ai e tagata, tuuina atu ia i latou o latou faataamilosaga—o latou aso, vaiaso, masina, tausaga, o o latou tau ma taimi ua taataaia ai i latou e pei o se tusi, e pei ona i ai, ma oo atu ai i se vaega maualuga o lo latou ola (DBY, 130).

O le Perisitua o le Alo o le Atua, o loo i ai ia i tatou, o se faasologa atoatoa ma faatulagaga faalemalo, ma o lenei lava e tasi e mafai ona faasaoina le aiga o tagata mai agasala uma ua faaleagaina nei tagata o le Au Paia, ma faamaonia ai lo latou maua o le fiafia tele i le taimi mulimuli ane (DBY, 130).

O lenei perisitua sa i ai i le fogaeleele i le tele o taimi. Sa i ai ia Atamu, sa ia Setu, sa ia Enoka, sa ia Noa, sa ia Aperaamo ma Lota, ma e sa faasolo mai i lalo i taimi o Perofeta, i le umi lava ina ua maea aso anamua. O lenei Faitaulaga Sili na te pulea, taitaia, ma faatonuina isi Perisitua uma, aua e sili lona maualuga i mea uma (DBY, 131).

Afai tatou te talanoa i le tulafono selesitila ua faaalia mai le lagi, o lona uiga, o le Perisitua, ua tatou talanoa i le mataupu faavae o le faaolataga, o se faatulagaga sili o se malo, o tulafono ma sauniga, e mafai ai ona tatou saunia e ui mai le tasi faitotoa i le isi, mai le tasi fitafita i le isi, seia tatou oo atu i le afioaga o lo tatou Tama ma le Atua (DBY, 130).

E le ona o lou i ai i le vaega ua taua o le Au Saluu, o se Metotisi poo se “Mamona” o le mafuaaga lea o le feitagai i le va o nei vaega malolosi e lua— Keriso ma Pelialo [le tagata agasala]; ae o le mea moni o le Atua sa ia faatuina lona malo i luga o le fogaeleele ma toefuataiina le Perisitua paia ua maua ai e alii le pule ma le mana e galulue ai i lona suafa (DBY, 76).

Ua aumaia e le Atua ia i tatou le Perisitua Paia, sa toefuataiina i le fanau a tagata. O loo iinei ki o le Perisitua, o loo i ai ia i tatou; e mafai ona tatou tatala, ma e mafai ona tatou tapuni. E mafai ona tatou maua le faaolataga, ma e mafai ona tatou galulue i ai (DBY, 130–31).

Afai ua faamalieina outou, i lagona o lo outou malosi ma le poto, ua faaalia e le Atua le Perisitua paia, faatuina lona Malo i luga o le fogaeleele, toefuataiina le atoatoaga o le Talalelei, ma saunia ona aao e faapotopoto i le Aiga o Isaraelu, o le a talia ai lo outou faamoemoe e faapei ua outou o atu i le lagi sei outou vaai lava outou i ai (DBY, 429).

Sa le i ai muamua lenei tulafono i le fogaeleele; ma a o le’i i ai, sa tuuina mai isi tulafono i le fanauga a tagata mo lo latou alualu i luma, mo a latou aoaoga, mo lo latou malo po o le tausiga, ma tofotofoina ai i latou pe o a mea latou te faia pe a latou pulea i latou lava; ma mea ua tatou ta’ua nei o tu masani ua tulai mai ona o nei tulaga (DBY, 130).

E leai se galuega a se tagata o le Au Paia—leai se tiute e manaomia—leai se taimi e tuuina atu, e ese ma tutoatasi mai le Perisitua. O mea uma e faalagolago i ai, poo le talaiga, pisinisi, poo se isi lava galuega e faatatau i le amio e tatau ai i lenei olaga (DBY, 133).

O le Alii Silisiliese o le a ia le faatigaina i lana Perisitua ma toe aveesea mai le fogaeleele (DBY, 131).

Afai o le a o atu uso faatuatua, o loo umia le perisitua, i le lalolagi o agaga, o le a latou ave faatasi ma i latou le mana ma le Perisitua lava lea sa ia i latou a o i ai i le tulaga faaletino (DBY, 132).

E tele mea ua taua e uiga i le mana o le tagata o le Au Paia. Poo tagata ea o loo taua o le Au Paia o loo i ai le mana, poo le Perisitua ea? O le Perisitua; ma afai latou te ola ai e tusa ma lena Perisitua, e mafai ona latou amata la latou galuega iinei ma maua le tele o manumalo, ma saunia ai e maua le mamalu, tino ola pea, ma le ola e faavavau, ma pe a latou o atu i le lalolagi o agaga, o la latou galuega o le a sili maoae nai lo se isi lava tagata e le i faamanuiaina i ki o le Perisitua iinei (DBY, 131–32).

O ki o le Perisitua “e maua ai faamanuiaga a le Alii”

O le Perisitua ua tuuina atu i tagata faatasi ai ma ki, ma, afai e malamalama lelei i ai, e mafai ona latou maua ai faamanuiaga a le Alii, ma talia ai i lo latou atoatoaga. Ae ona o lo tatou lava vaivaiga, ona o le natura o tagata soifua, ua le mafai ai ona tatou maua ia mea (DBY, 131).

Pe sa latou faaleaga le Mamona ina ua latou fasioti ia Iosefa? Leai. “O le Mamona” ua i ai iinei, o le Perisitua ua i ai iinei, o ki o le malo ua i ai iinei i luga o le fogaeleele; ma ina ua alu ese Iosefa, e lei aveesea ia mea. Ma afai e manumalo le amioleaga i le aveesea o lou ola, o le a i ai pea ki o le malo i le Ekalesia (DBY, 134).

O sauniga o le maota o le Atua e mo le faaolataga o le aiga o tagata. Ua na o i tatou lava i luga o le fogaeleele i le taimi nei, ua i ai so tatou malamalama, i e o loo umia ki o le faaolataga ua tuuina mai mo fanau a tagata mai le lagi e le Alii Silisiliese, ma e ao ia i latou o loo umia ia ki, e taua le tatau ona faaaoga mo le faaolataga o le aiga o tagata. O le fausia o malumalu, o nofoaga o loo faia ai sauniga mo le faaolataga, ua alagatatau e faataunuu ai le fuafuaga o le togiola, ma o se mataupu mamalu e ao ona talai atu i le Au Paia (DBY, 396–97).

Matou te tautala i le upumoni ma e le pepelo, o ai lava e talitonu o Iosefa Samita, le uii, o le Perofeta na auina mai e le Atua ma sa faamanuiaina e ia e maua ma umia ki o le Perisitua paia, e tusa ma le faatulagaga a le Alo o le Atua, ma le mana e fausia ai le malo o le Atua i luga o le fogaeleele, e faapotopoto i le Fanauga a Isaraelu, e taitaiina i latou uma ua talitonu ma usiusitai i le togiola, e toefuataiina mea uma ua leiloa ona o le solitulafono—poo ai lava e talitonu i lenei, talitonu i le Alii, ma usiusitai i ana poloaiga seia oo i le iuga o o latou ola, o le a le tineia o latou igoa i le tusi o le ola a le Tamai Mamoe, ma e o le a latou maua le pale o viiga, le tino ola pea, ma le ola e faavavau (DBY, 5).

O le mauaina ma le faaaogaina o le mana o le perisitua e manaomia ai le amiotonu faaletagata.

O se tagata o loo umia le Perisitua, ma faaauau ma le faamaoni i ona valaauga, o le a maua pea le fiafia i le faia o mea o loo manaomia ai o ia e le Atua, ma faaauau ai i le olaga i le faia o tiute uma o le a faamaonia ia te ia lava e le gata o le faamanuiaga o le mauaina, ae o le poto i le auala e maua ai mea a le Atua, o le a ia iloa ai le finagalo faifaipea o le Atua, ma o le a mafai ai e ia ona iloa le sao mai le sese, le eseesega o mea tau le Atua ma mea e le a le Atua. O le Perisitua—o le Agaga o loo i totonu ia te ia, o le a faateleina seia oo ina avea faapei o se puna o le vaiola, seia faapei o le laau o le ola; seia avea o se tasi o punavai faifaipea o le atamai ma faatonuga i lena tagata (DBY, 132).

A alii o ipu o le Perisitua paia, o e ua faatuatuaina i upu o le ola e faavavau i le lalolagi, e ao ona taumafai pea i o latou manatu ma galuega ma le faia pea i aso uma e faamamalu ai le paia o lo latou valaauga ma tofiga o loo galulue ai ma avea ai ma sui o le Alii Silisiliese (DBY, 130).

Ao i ai le Perisitua paia i luga o le fogaeleele, ma ua oo mai i tagata le atoatoaga o le Malo o le Atua, ua manaomia ai le usiusitai atoatoa i mataupu uma o le tulafono ma mataupu faavae ma sauniga uma ua faaalia mai e le Alii (DBY, 132).

Sa tulimatai ea lo outou faatuatua i mea taua, ua le maluelue lo outou faamoemoe, ua mama ma paia o outou ola, ua faataunuuina e tagata taitasi tiute uma o o latou valaauga e tusa ai ma le Perisitua ma le tomai ua tuuina mai i o outou luga, o le a faatumulia outou i le Agaga Paia, ma o le a le mafai e soo se tasi na te faaoleole ma taitaiina outou i le faatafugaga e pei o se fulufulu manu ua le mafai ona mu i se afi vevela lava (DBY, 132).

O le a le mafai lava ona faalauteleina lo tatou Perisitua paia e pei ona tatau ai, sei vagana ua faatafea ese mai o tatou mafaufau le manatu faapito ma le manatu o le tagata ia te ia lava, ma ia tatou manatu i le manuia lautele (DBY, 133).

O le Perisitua paia e aumaia faamanuiaga paia i tagata taitoatasi ma aiga.

Ua toefuataiina le Perisitua, ma i lena pule e ao ona tatou fesootai ma o tatou tuaa, e ala i sauniga o le faamauga, seia o tatou faia se fesootaiga atoa mai le Tama o Atamu seia oo mai i ona po nei [vaai MFF 128:18] (DBY, 400). Ou te ole atu i Toeaiina o Isaraelu i lea aso ma lea aso, pe a maua sou avanoa, ina ia ola i lo latou talitonuga—ia ola ina ia avea le Agaga Paia ma a latou aumea tumau; ma o le a latou agavaa ai e avea ma faamasino o Isaraelu, e pule faamalumalu o ni Epikopo, Toeaiina, ma Fautua Maualuga, ma tagata o le Atua, e ave o latou aiga ma uo ma le alofa ma taitai i latou i le ala o le upumoni ma le mama, ma mulimuli ane i le Malo o le Atua (DBY, 136–37).

Fautuaga mo Suesuega

Ua taitaiina e le Alii Lana galuega i le lagi ma le fogaeleele e ala i le perisitua.

E tusa ai ma le saunoaga a Peresitene Iaga, o le a le perisitua? (Vaai MFF 84:17–22.)
E faapefea i mea uma tatou te fai “e faatatau i le amio e tatau ai i lenei olaga” ona faalagolago i le perisitua? E faapefea ona aafia ai au gaioiga i le aiga, lotu, aoga, ma le galuega?
O a mea e faatagaina e le perisitua ia toeaiina faatuatua latou te fai i le lalolagi o agaga?
E faapefea e i tatou o tagata o le Ekalesia ona ola e faatatau i mataupu faavae ma le faatulagaga o le perisitua? (Vaai MFF 20:38–60.) O le a le aafiaga a le perisitua i lou olaga? E faapefea ona e faaaoga le aafiaga ma le mana o le perisitua i le ala sili i lou olaga ma le olaga o lou aiga?

O ki o le Perisitua “e maua ai faamanuiaga a le Alii”

Aisea na le aveesea ai ki o le perisitua mai le Ekalesia ina ua maliu ia le Perofeta o Iosefa Samita?
E faapefea e ki o le perisitua ona “maua mai ai faamanuiaga a le Alii” ma aumai ai le faaolataga i le aiga o tagata?
O le a le aoaoga a Peresitene Iaga e uiga i ki o le perisitua (vaai MFF 107:18–20, 35; 132:7.) O a mea ua mafai ona fai e auauna a le Alii i na ki?

O le mauaina ma le faaaogaina o le mana o le perisitua e manaomia ai le amiotonu faaletagata.

E faapefea e le olaga faaletagata o le ua umia le perisitua, ona aafia ai lona agavaa e galue ai mo le Alii? Aisea e taua tele ai le amiotonu faaletagata? (Vaai MFF 107:99–100; 121:41–46.)
E faapefea “ e alii ua avea ma ipu o le Perisitua paia” ona faamamalu i o latou tiute ma valaauga? O a faamanuiaga e maua e tagata o le ekalesia e faataunuuina o latou tiute ma valaauga?
E faapefea ona feteenai ia le manatu faapito ma le mana o le perisitua? Aisea e ao ai ona tatou lafoai i le manatu faapito pe afai tatou te faalautele i le perisitua? (Vaai MFF 121:37.) O a ni auala ua avea ai le manatu faapito ma faafitauli ia i tatou i aso nei? E mafai faapefea ona taofia le manatu faapito?

O le Perisitua paia e aumaia faamanuiaga paia i tagata taitoatasi ma aiga.

E faapefea ona faamanuia ma faamalosia e le perisitua lou aiga? Aisea e taua tele ai le mana o le perisitua i le fausiaina o aiga e faavavau? (Vaai MFF 128:18; 131:1–4; 132:19.)
O le a se mea e ao ona fai e i latou ua umia le perisitua ina ia “ave o latou aiga ma uo ma le alofa ma taitai i latou i le ala o le upumoni ma le mama”?