O se Valaau mo le Lotogatasi, o se Molimau, ma se Faamanuiaga

I lona talavou, sa saili ai Polika Iaga mo se talitonuga faalelotu e faamalieina ai lona naunau faaleagaga, ae sa le mafai ona ia mauaina se tasi. Ina ua mavae ona faailoa atu i ai le Tusi a Mamona i le 1830, ma sosoo ai ma lona suesueina o le talalelei toefuataiina mo le toeitiiti lua tausaga, na ia iloa ai, ua ia mauaina le upu moni. Na papatisoina o ia i totonu o le Ekalesia, ma e talu mai lena taimi, e lei toe maluelue lana molimau i le talalelei, lea na ia faapea mai ai, “o loo fusia ai mea tonu uma o i le lagi ma le lalolagi… . Po o fea lava o loo maua ai nei mataupu faavae i foafoaga uma a le Atua, o le talalelei a Iesu Keriso, ma Lana faatulagaga, ma le Perisitua o loo fusia uma ai” (DNSW, 5 May 1866, 2). O lana molimau malosi, ma le atoatoa o lona naunautai i le Ekalesia, na musuia ai ia uluai Au Paia ina ia faafetaiaia ia luitau o le faatulagaina o fale i le vao, ma ua lotogatasi i le usiusitai i le poloaiga a le Alii, ina ia fausia Lana Ekalesia ma talai Lana talalelei i le lalolagi atoa. Na ia faailoa mai: “O le Atua, o agelu, ma alii lelei, o o’u fesoasoani ia, o le a ou le solomuli lava e tauivi, seia oo lava ina tatou manumalo ma mauaina le Malo. O lo’u lagona ma lo’u faatuatua lena, ma o le a tatou ausiaina lava, ou te vavalo atu, i le suafa o le Alii o Iesu Keriso, o le a tatou mauaina lava le Malo o le Atua i luga o le lalolagi atoa” (DBY, 453). O le molimau a Peresitene Polika Iaga ua faaauau pea, ina ia musuia ai i tatou i aso nei, a o tatou galulue faatasi ai i le fausiaina o le malo o le Atua.

Aoaoga a Polika Iaga

O soo moni o Iesu Keriso e tauivi ina ia lotogatasi— tasi le loto ma le mafaufau.

U a tatou o mai iinei e fausia Siona. E faapefea ona tatou fai? … E ao ona tatou aufaatasi i a tatou taumafaiga. E ao ona tatou galulue ma le faatuatua e tasi, e pei o le loto o se tagata e toatasi; ma pe o le a lava le mea tatou te fai, e ao ona faia i le suafa o le Alii, ona faamanuiaina lea o i tatou ma faata- maoaigaina i mea uma tatou te fai. O loo i ai le galuega e fai, o lona tele e le mafai ona faamatalaina (DBY, 284).

O le faatuatua o le Talalelei a Iesu Keriso, ua fuafuaina ina ia faatasia ai tagata, ma ina ia aumaia ai i latou i le lotogatasi ma le faatuatua o i latou na usitai i le Talalelei anamua, ma aumaia ai i latou i le mamalu (DBY, 283).

Ou te tatalo, ou uso e, o Epikopo, o Toeaiina, o Fitugafulu, o Aposetolo, ioe, soo se alii ma soo se tamaitai ma fanau o e ua valaauina i le suafa o Keriso, ina ia tasi le loto ma le mafaufau, aua afai e le tasi i tatou i le loto ma le mafaufau, e mautinoa lava lo tatou fano ai i le ala [vaai Moses 7:18] (DBY, 281).

O se lotogatasi atoatoa, o le a faasaoina ai tagata, aua o ni tagata atamamai e le mafai ona faatasia i latou i le atoatoa, sei vagana ai ua galulue e faatatau i mataupu faavae, ia e faatatau i le ola e faavavau. O tagata amioleaga, e mafai ona tuufaatasia se vaega i le leaga; ae, i le natura lava o mea, o lena faatasiga ua na o sina taimi puupuu. O le leaga lea, o loo faavae ai lo latou tuufaatasia, o le a ia faafofoaina mai ai le fefinauai ma le feeseeseai (DBY, 282).

O le talitonuga o le lagi e faatasia ai loto o tagata ma avea ai i latou ma tagata e tasi. E mafai ona e faapotopotoina faatasi ni tagata, ma e leai se afaina po o le a le eseese mamao o i latou i upufai, ae o le talalelei a Iesu Keriso, o le a faatasia ai i latou, e tusa lava pe maua uma ia i latou tagata o vaega eseese uma o faiga faaupufai i le atunuu (DBY, 285).

E le o i ai i la tatou faalapotopotoga se li’o o ni tagata taualoa. E tusa pe laeiina e se uso se pulou taugata po o se pulou taugofie, e tutusa uma lava ia i tatou. Afai o se tagata, o ia o se auauna faatuatua ma le faamaoni a le Atua, tatou te le teena lona malaga mai i fonotaga, e ui lava ua na o sina fasi pa’u pafalo o loo ufiufi ai lona ulu. Tatou te taumamafa faatasi ma ia i le Faamanatuga, faafeiloai atu ia te ia i le ala o se tasi o uso po o se uo, talanoa ma ia, feiloai ma ia i faatasiga faitele ma faamasani ia te ia e pei lava o isi tagata (DBY, 283–84).

Na saili pea lava pea le Faaola, ina ia faagaeetiaina mafaufau o Ona soo e faapea o le lotogatasi atoatoa, o le a mautofi ma i latou uma i le selesitila— ma o le Tama ma le Alo ma lo latou Aoao, le Agaga Paia, sa tasi lava i latou i la latou taitaiga i le lagi faapea foi ma tagata o i lenei lalolagi… . Pe a na fai e le lotogatasi i latou i le lagi, semanu o le a matuai le talafeagai lava e nofo ai… . ma le Tama, o le Pule o le vanimonimo (DBY, 282).

Na tatalo … Iesu i le Tama ina ia tasi Ona soo, e pei ona tasi o Ia ma Lona Tama. Na ia silafiaina afai e le tasi i latou, e le mafai foi ona faasaoina i latou i le Malo selesitila o le Atua. Afai e le mafai e tagata ona vaai ia te ia ao i ai o ia i la le tino, ma faalogo e pei ona Ia faafofoga ai, malamalama e pei ona Ia malamalama ai, ma avea e faapei tonu lava o ia, e tusa ai ma o latou valaauga ma tiute, e le mafai lava ona latou mau faatasi ma Ia ma Lona Tama [vaai Ioane 17:20–21; 3 Nifae 19:23] (DBY, 281).

E faapefea ona tutusa lagona ma malamalama o le Au Paia o Aso e Gata Ai, ma tasi loto ma mafaufau, e tusa lava po o fea, ae o anafea foi latou te maua ai le Talalelei, pe maua ai i le itu i matu, po o le itu i saute, i sasae po o sisifo, e oo lava i tuluiga o le lalolagi? Latou te mauaina le mea lea na folafolaina atu e le Faaola, ina ua amata ona Ia tuua le lalolagi, lea e taua o le Fesoasoani, ma o lana galuega paia mai luga lea e iloa ai e tasi le Atua, tasi le faatuatuaga, tasi le papatisoga [vaai Efeso 4:5], o lona mafaufau o le finagalo lea o le Atua le Tama, o iina lea e i ai le tuufaatasia o le faatuatua ma galuega, ma e leai so latou fevaevaeai po o le feeseeseai; pe a latou mauaina le isi lea malamalama, e le afaina pe na latou vaai i ai pe leai, o le mea sili ua avea i latou ma uso ma tuafafine, ua avea i latou ma aiga o Keriso e ala i sootaga o le feagaiga e faavavau, ma e mafai ona latou valaau uma atu, i le gagana matagofie a Ruta, “ O lou nuu e fai ma o’u nuu, ma lou Atua e fai ma o’u Atua”! [Ruta1:16] (DBY, 282–83).

Afai e tasi i tatou, e tatau ona tatou faamaonia atu i le lagi, i le Atua lo tatou Tama, ia Iesu Keriso lo tatou Uso Matua, i au agelu, i le lelei i le lalolagi, ma tagata ola uma o i tatou o soo o le Alii o Iesu Keriso. Afai e le tasi i tatou, e le o ia te i tatou le uiga moni o le upu, o soo o le Alii o Iesu [vaai MFF 38:27] (DBY, 281).

Ua faaauau pea ona tuuina mai le molimau a Peresitene Iaga, e uiga i le talalelei a Iesu Keriso.

O le talalelei o le faaolataga, ua patino lona fuafuaina, ina ia aveesea ai le Au Paia mai le agasala, ina ia faatoilaloina ai le leaga i le lelei, ina ia faapaiaina ai, ia aveesea ai tagata amioleaga, o tagata leaga, ma ia avea o ni tagata sili ona lelei. Soo se amioleaga lava o loo ia i tatou, soo se lagona leaga lava o ia i tatou, o le a fesoasoani le Talalelei ia i tatou, ina ia faatoilaloina le leaga. Na te tuuina mai ia i tatou le aafiaga, o le mana, o le atamai, o le faautauta, ma le malamalama ina ia faatoilaloina ai o tatou vaivaiga, ma ia faamamaina i tatou lava i luma o le Alii lo tatou Atua (DBY, 448–49).

O loo aoaoina i tatou e la tatou lotu i le upu moni, mama, paia, faatuatua i le Atua ma lona Alo o Iesu Keriso. Na te faaalia mai mea lilo, na te aumaia i le mafaufau mea ua tuanai ma le taimi nei—e faailoa manino mai ai mea o le a oo mai. O le faavae o galuega uma a le lalolagi; o le Agaga na te tuuina atu le atamai i soo se tagata ola o loo i le lalolagi. O mafaufauga moni uma e puna mai i le punavai lea tatou te maua mai ai le faautauta, atamai, upumoni, ma le mana. O le a le mea o loo ia aoaoina mai ia i tatou? Ina ia alolofa i le Atua ma o tatou uso a tagata; ina ia alolofa, ma ia tutumu i le alofa tunoa, faapalepale, ma onosai i e le usiusitai ma i latou o e le malamalama. O loo i ai se mamalu i la tatou lotu, lea e le i mauaina lava e se isi lotu, talu ona faavaeina i le lalolagi, ona o le leai o le perisitua moni, lea e umiaina—O le puna lea o le atamai uma; o le aumaia lea o le lagi i le lalolagi ma faaeaina le lalolagi i le lagi, ina ia saunia ia atamai uma, ua tuuina mai e le Atua i loto o le fanau a tagata, ina ia faatasia ma le atamai lea e mafuta i le faavavau, ma ia siitia ai mafaufau uma i luga a’e o mea faafatiatamai ma fenumiai o le taimi nei, lea o loo taumafai e tosoina i tatou ina ia faaleagaina. Na te faasaolotoina le mafaufau o se tagata mai le sese ma le le malamalama, ae tuuina atu ia te ia le atamai, lea e sau mai le Lagi, ma agavaa ai o ia e faataunuuina mea uma (DNW, 1 June 1859, 1).

O lo tatou talitonuga o le a aumaia ai le filemu i tagata uma, ma o le talalelei lea i tagata uma o le lalolagi. O le a uunaiina i latou uma e mulimuli i ai ma le faamaoni i lana taitaiga, ina ia seleseleina le amiotonu ma le filemu; ina ia nonofo ma le filemu i o latou aiga; ia viia le Alii i le taeao ma le afiafi; ia tatalo faatasi ma o latou aiga, ma o le a faatumulia ai i latou e le agaga o le filemu, ina ia le faaseseina pe faamalaiaina ai soo se tasi seiloga lava ua tatau ai. O le a latou ala a’e i le taeao ma o latou agaga lelei, e pei o le la i lona oso ae, ma aumaia le ola ma le mafanafana i le lalolagi; e pei o le malu o le savili i se afiafi o le taumafanafana. E leai se ita, leai se lotoa, leai se finauga po o se feteenai (DBY, 449–50).

Afai e mauaina e tagata lenei Talalelei, o a mea latou te ositaulagaina? Aisea, o le oti faaleagaga mo le ola e faavavau. O mea nei latou te tuuina atu: pouliuli mo le malamalama, sese mo le sa’o, masalosalo ma le le talitonu mo le malamalama ma le mautinoa o mea a le Atua (DBY, 450).

O le Au Paia i augatupulaga uma ua puipuia, lagolagoina ma vaavaaia e se Mana Silisiliese i o latou puapuaga, ma o le mana o le lotu a Iesu Keriso sa lagolagoina lava i latou (DBY, 450).

O la tatou lotu o se tausamaaga faifaipea lea mo au. Ou te lagona ai lo’u fia alaga E Mamalu! Aleluia! Viia le Atua! Nai lo le faanoanoa ma le tiga. Aumaia ia te au le atamai, o le mana, ma faamanuiaga ia ou te agavaa ai mo le mauaina, ma ou te le popole ai i le Tiapolo po o fea e sau ai, poo soo se mea foi e uiga ia te ia; ou te manao i le faautauta, atamai, ma le mana o le Atua. Aumaia ia te au le lotu e siitia ae ai a’u i luga i se fua faatatau o le atamai—lea e aumaia ai ia te au le mana ina ia tumau ai—ina ia ou mauaina ai le tulaga o le filemu, ma nofo saunia mo le amiotonu, o le a mafai ai ona ou olioli i le faavavau atoa, i le mafutaga a e paia (DBY, 451).

Ua ou lagona le fiafia. O le “talitonuga faamamona” ua ou oo ai i nei tulaga uma, ma le alofa ma le mana ma le faautauta o le Atua o le a avea ai au ma se tagata o le a i ai, po o le taimi nei po o le faavavau (DBY, 451).

Ua faamanuiaina au e le Alii, ua ia faamanuia soo ia te au; mai le taimi sa ou amata ai ona fausia Siona. Ua matua faamanuiaina lava au. E mafai ona ou faamatala atu ni mea matua tulaga ese ona uiga, e faatatau i le taitaiga a le Atua ia te au, ina ia faapea ifo ai uso ma tuafafine i o latou loto, “E faigata ona ou talitonu i lenei mea” Ae ua tasi i lo’u loto, ina ia faia le finagalo o le Atua, ina ia fausiaina lona Malo i le lalolagi, ina ia faavaeina Siona ma ona tulafono, ma ia faasaoina tagata… . Ou te le alofa, auauna pe mata’u i le Alii, ina ia teenaina ai lo’u faasalaina, pe mo le mauaina ai foi o ni meaalofa silisili, po o ni faamanuiaga i le faavavau, ae talu ai ona o mataupu faavae ua faaalia mai e le Atua mo le faaolataga o tagata o le lalolagi e mama, e paia, ma faaeaina lo latou natura. I totonu o na mataupu faavae, o loo i ai le mamalu ma le faatupulaia e faavavau, latou te taitai mai lea malamalama i lea malamalama, o le malosi i le malosi, mamalu i le mamalu, atamai i le atamai, ma le mana i le mana (DBY, 452).

Ou te matuai faafetai lava … Ua ou maua le avanoa e fegalegaleai ai ma le Au Paia, ma avea ai ma se tasi o le Malo o le Atua, ma ua ou maua ai ni uo i le Ekalesia a le Atua Soifua (DBY, 452).

“O le talitonuga faaMamona” ua na faia mea uma mo au i le lalolagi; ua faafiafia ai au; … ua faatumulia ai au i lagona lelei, ma le olioli ma le fiafia. Ae peitai, ae ou te lei mauaina le agaga o le Talalelei, sa ou le mautonu i mea o loo faitio mai ai nisi, ma o taimi na, ou te lagonaina ai lo’u faanoanoa, le mautonu ma le le fiafia, faatasi ai ma mea uma lava e foliga mai ia te au, o se vaaiga faanoanoa (DBY, 452).

Ae ina ua ou mauaina le Talalelei e le sili atu ma le afa minute, e tusa ai ma lo’u manatunatuga, e leai se mea e foliga mai ia te au, o se vaaiga e faanoanoa (DBY, 453).

Ina ua siosiomia e tagata leaga, faatasi ai ma le oti ma le faatafunaina ua taufaamata’u mai i itu uma, ou te lei iloa se isi lagona sei vagana ai lo’u lagonaina o le olioli, e pei lava o lo’u agaga, e pei ona i ai nei. Atonu e foliga mai le lumanai e le mautonu, ae ou te lei vaaia lava se taimi i lenei Talalelei ou te lei iloaina ai o le taunuuga o le a faamanuiaina ai galuega o le upu moni ma le alofagia o le amiotonu, ma ua ou lagonaina pea le olioli e faailoa atu le alofa o le Alii i mea uma (DBY, 453).

O le Atua, o agelu, ma alii lelei o o’u fesoasoani ia, o le a ou le solomuli lava e tauivi, seia oo lava ina tatou manumalo ma mauaina le Malo. O lo’u lagona ma lo’u faatuatua lena, ma o le a tatou ausiaina lava, ou te vavalo atu, i le suafa o le Alii o Iesu Keriso, o le a tatou mauaina lava le Malo o le Atua i luga o le lalolagi atoa” (DBY, 453).

Na folafola atu e Polika Iaga faamanuiaga i le Au Paia faatuatua.

Uso e ma tuafafine, talu ai ona o loo ia te au le aia tatau ma le avanoa paia, e ala i le Perisitua, ou te faamanuia atu ia te outou i le suafa o le Alii, ma faapea atu, ia outou manuia. O o’u lagona nei i le Au Paia o Aso e Gata Ai, ma e faapena foi i le fanau uma a tagata, pe afai latou te mauaina la’u faamanuiaga (DBY, 456).

Ia faamanuiaina e le Atua tagata lelei uma. Ia faamanuia e le Atua galuega o le natura, ia faamanuia e le Atua ana lava galuega, ma ia aveesea e amioleaga, ma e le amioatua, ma i latou o e faaleagaina o latou uso a tagata, ia aveesea taua, ma le feainai i le lalolagi. Le Alii e, ia aveesea nei tagata mai tofiga ma ia tuu tagata lelei e faauluulu i atunuu, ina ia mafai ona latou aoao ia lå toe i ai ni taua, ae ia amata ona pei o ni tagata aoaoina lelei, ma lagolagoina le filemu i le lalolagi, ma le faia o mea lelei i isi [vaai Isaia 2:4] (DBY, 456).

Ua ou lagonaina le faaauau pea ona faamanuiaina o outou; o lo’u olaga o loo iinei, o lo’u fiafia, o lo’u mamalu, o lo’u mitamitaga, o lo’u faamafanafanaga, o mea uma ua ou maua o loo iinei, ma o mea uma ua ou faamoemoe e mauaina, i le faavavau atoa o loo fusia i totonu o lenei Ekalesia (DBY, 456).

Afai ou te mauaina le mana, ou te mautinoa lo’u faamanuiaina o tagata uma, i mea uma o loo moomoo i ai o latou loto, pe afai latou te le agasala.… Ma afai e i ai i lo’u mana, o le a ou faamanuiaina tagata uma o le lalolagi, i mea uma e mafai ona latou viia ai le Atua, ma faamamaina o latou lava loto (DBY, 457).

Afai e i ai i le lalolagi ni tagata e talitonuina atoatoa e le Alii, e leai se faamanuiaga i le faavavau a lo tatou Atua, e mafai ona latou mauaina i la le tino, o le a ia lå sasaaina mai i o latou luga. E le mafai e laulaufaiva ona tautau faamanuiaga a le Alii, o loo i ai mo ona tagata, o e ua latou faamaonia lo latou agavaa i ona luma [vaai 1 Korinito 2:9–14] (DBY, 455).

Nai lo le matua saisaitiaina o le amiotonu, o le a faaauau pea ona faateleina lo latou saolotoga, ao tatou faateleina pea ona faatuatua, ma mauaina le mana faatasi ma le lagi ma mana sili o le Atua i luga o i tatou. Tatou saili ia ma le maelega i le Alii, seia tatou mauaina le faatuatua o Iesu i lona atoatoa, aua o i latou o e mauaina lenei faatuatua e moni lo latou faasaolotoina (DBY, 455).

Ou te moomoo maimau pe ana mafai e tagata ona iloa latou te savavali, ola, ma usiusitai i le afioaga o le Silisiliese. O e faatuatua, e i ai mata e vaai ai i mea latou te vaaia, ma e tatau ona outou iloaina lena mea i le totonugalemu o le faavavau ma le afioaga o e paia, ma ua leva ona tatou faatalitali ina ia tatou olioli ai i lo latou faatasi ai. Ua matuai faamanuiaina lava outou (DBY, 454–55).

Ia faia mea e pei ona outou iloa ai i mea uma, ia aua lava nei faatagaina outou, ina ia faia se gaoioiga sei vagana ua faamaonia atu e le Agaga o le Atua ia te outou le faataunuuina [vaai Moses 6:60]. Ma afai tou te ola ai i aso uma o o outou olaga, e tusa ai ma le malamalama sili ma le atamai ua outou mauaina, ia viia ai le Atua, lo tatou Tama Faalelagi, i le mea e gata mai ai lo outou atamai, o le a ou folafola atu ia te outou, le ola e faavavau i le Malo o le Atua (DBY, 455).

Ia faamanuia outou e le Atua! Ia ia te outou le filemu! Ia faamaoni i le agaga, lotomaualalo, aoaoina, ma le tatalo, tausia lelei o outou lava, ia taumafai e faasaoina outou lava, ma soo se mea lava tou te mafai ona faia, o lau tatalo faifai pea lea mo outou i le suafa o Iesu Keriso. Amene (DBY, 456).

Fautuaga mo Suesuega

O soo moni o Iesu Keriso e tauivi ina ia lotogatasi— tasi le loto ma le mafaufau.

O le a le uiga, mo e mulimuli ia Keriso ina ia “lotogatasi atoatoa,” po o le “ia tasi le loto ma le mafaufau”? (Vaai Ioane 17:20–21..)
Aisea e taua ai le lotogatasi o le Au Paia pe afai o le a tatou fausiaina le malo o le Atua? Aisea e le mafai ai ona faasaoina soo se tasi o i tatou i le malo selesitila pe afai tatou te le loto gatasi ma isi?
E mafai faapefea e le talalelei ona faatasia tagata o le Ekalesia e i ai ni eseesega i tulaga lautele, tamaoaiga, faiga faaupufai, ma faaleaganuu i le galuega a le Alii?
E mafai faapefea ona avea moni i tatou ma tagata ua “tasi le loto, tasi le mafaufau” ma o tatou uso a tagata ma lo tatou Faaola o Iesu Keriso?

Ua faaauau pea ona tuuina mai le molimau a Peresitene Iaga e uiga i le talalelei a Iesu Keriso.

O a ni aafiaga o le talalelei na faamatalaina e Peresitene Iaga? O faapefea ona e vaaia o loo tutupu nei aafiaga i lou olaga po o olaga o isi i ou tafatafa?
O a ni auala o loo fesoasoani mai ai le talalelei ia i tatou ina ia “aumaia le lagi i le lalolagi ma faaeaina le lalolagi i le lagi”?
Na faatatau le tautalaga a Peresitene Iaga i lana lotu o se “tausamaaga faifaipea.” E mafai faapefea ona tatou taumamafa i le talalelei? O a ni aoaoga a Peresitene Iaga i le tusi lesona ua fesoasoani ia te oe ina ia e malamalama lelei ai ma talisapaia le talalelei?
O faapefea ona faatumulia oe i le olioli ma le fiafia ona o le talalelei a Iesu Keriso?

Na folafola atu e Polika Iaga faamanuiaga i le Au Paia faatuatua.

E mafai faapefea e tagata o le Ekalesia ona faamaonia i latou lava i luma o le Alii ma faaali atu ua latou agavaa mo faamanuiaga silisili o loo ia te Ia mo i latou?
E faapefea e le “faateleina o le faatuatua” ona taitaiina atu i le “faateleina o le saolotoga” ma le mana? Aisea e faasaoloto ai i tatou e le usiusitai ma le faatuatua?
E mafai faapefea ona e “ola i aso uma o lou olaga e tusa ai ma le malamalama sili ma le atamai ua e mauaina”?
O faapefea ona faatosinaina lou olaga i le molimau le maluelueina ma le maelega a Peresitene Iaga?