Tausia o le Upu o le Poto

Mo Peresitene Polika Iaga lava ia, o le talalelei a Iesu Keriso o se talitonuga o faataitaiga. I sana tusi i le 1867 i ona atalii e toalua o loo auauna atu faamisiona, na viia ai e Peresitene Iaga le Au Paia i le Aai o Sate Leki mo le tausiaina o le Upu o le Poto: “O le aufaioloa o le Aai o Uisiki, sa toetoe lava a le mafai ona latou totogiina o latou fale. Ua matuai faailoa malosi atu lava e tagata uiga matou te lei vaaia lava muamua, i le faaaogaina lea o fautuaga na tuuina atu e uiga i le Upu o le Poto ma le usiusitai i mataupu faaleagaga faapea foi ma mataupu faaletino. E leai se pule faamalosi na faaaogaina, leai foi ni feagaiga na moomia. Ua uma ona faatulagaina le mataupu ma e foliga mai ua saunia tagata e taliaina ma faataunuuina ma le naunautai. O le filemu ma le soifua maloloina lelei ua manumalo i le nuu atoa” (LBY, 88). Na ia aoao atu na faaalia mai e le Alii le Upu o le Poto ina ia faaleleia ai le tulaga o o tatou olaga faaletino, ina ia avea ai i tatou ma ni tagata galulue sogasoga i le malo faalelalolagi o le Atua, ma ia fesoasoani ia i tatou e faataunuuina le fuafuaga atoa o lo tatou foafoaga.

Aoaoga a Polika Iaga

Matou te talitonu o le Upu o le Poto o se poloaiga mai le Atua.

Ina ua faatoa faavaeina lava le aoga a perofeta, o se tasi o uluai faaaliga a le Alii na tuuina atu i Lana auauna o Iosefa o le Upu lea o le Poto. O tagata o lena aoga sa le toatele i le uluai taimi, ma sa amataina ona aoaoina i latou e le perofeta i aoaoga faavae ina ia saunia ai i latou e o atu i le lalolagi ma talai atu le talalelei i tagata uma ss… . Na amata ona faatonutonuina i latou e le perofeta i le auala e tatau ona ola ai, ina ia mafai ona saunia lelei i latou ina ia faataunuuina lenei galuega silisili ua valaauina i latou ina ia faataunuuina (DNSW, 25 Feb. 1868, 2).

O Epikopo, Toeaiina o Isaraelu, Faitaulaga Sili, Fitugafulu, o le Au Aposetolo e Toasefululua, o le Au Peresitene Sili, ma le aiga uma o Isaraelu, faalogo maia outou, o’u tagata e! Tausi le upu a le Alii, ia usitaia le Upu o le Poto, ia felagolagomai, ia tausisia le aiga o le faatuatua (DBY, 183).

Ou te iloa e i ai nisi latou te faapea mai o faaaliga nei o loo i ai nei mataupu e le o tuuina mai o se poloaiga. E sao lelei lava, ae ua poloaiina i tatou ina ia usitaia upu uma e oo mai le fofoga o le Atua (DBY, 182–83).

Ua musumusu mai le Agaga ia te au ina ia ou valaau atu i le Au Paia uma o Aso e Gata Ai ina ia usitaia le Upu o le Poto, ina ia aua nei fetagofi atu i le lauti, kofe, ma le tapaa, ma aloese mai le inuina o meainu oona. O le mea lenei na faailoa mai e le Agaga ia te au. Afai e musumusu atu e le Agaga o le Atua lenei mea i ona tagata e ala atu i lo latou taitai, ma o le a latou le faalogo pe le usitai foi, o a la ni taunuuga o lo latou le usiusitai? O le a le maua le fiafia i o latou mafaufau e tusa ai ma mea a le Atua, ma o le a avea lena ma o latou taunuuga; o le a latou le maua le agaga o le tatalo, ma o le a faateleina le agaga o le lalolagi ia te i latou e tusa ai ma lo latou le usiusitai seia oo ai lava ina latou liliuese atoatoa mai le Atua ma ona ala (DBY,183).

O le tino ua i ai i le tagata e tatau ona fafagaina ma faafiafiaina; ma soo se taimi lava tatou te tuuina atu ai i totonu o o tatou tino soo se mea e faamalosia pe faagaoioi ai le tino e sili atu nai lo le malosiaga e masani ai, o le a faapuupuuina ai le olaga. Ua lava lou malamalama faafomai ua ou iloa ai e faapea… . Afai tou te mulimuli i lenei fautuaga, o le a faatumulia oe i le fiafia ma le soifua maloloina, ma o le a faateleina lou atamai, o lou olioli, ma lou faamafanafanaina (DBY, 183).

O lenei Upu o le Poto lea ua pei e foliga mai ua le amanaiaina, ma ua le faamalosia, e pei lava o isi fautuaga uma a le Atua, i lona faamalosia i aso nei e pei lava o taimi muamua. O loo i ai le ola, le ola e faavavau i totonu o lenei fautuaga—le olaga o loo i ai nei ma le olaga a sau (DBY, 184).

O le Upu o le Poto o se faatulagaga musuia o le soifua maloloina.

O lenei Upu o le Poto e faasaina ai le inuina o meainu vevela ma le tapaa. Ua ou faalogoina ia fefinauaiga e faapea o le lauti ma le kofe e le o taua mai ai; e moni lava lena mea; ae o le a le mea sa inuina e tagata e fai ma amioga o le inuina o meainu vevela ina ua tuuina mai lena faaaliga? O le lauti ma le kofe. Tatou te leo masani i le inuina o le vai vevela, ae o le lauti ma le kofe—o meainu ia e masani ona inuina (DBY, 182).

Nai lo le faia o galuega mo aso e lua i le aso e tasi, o le a faamatalaina atu e le poto i le [Au Paia], e faapea afai latou te naunau ia umi o latou olaga ma ola maloloina, e tatau ona latou faatagaina le tino ina ia matuai lava le malolo pe a maea se galuega mamafa, ao lei matuai vaivai lava. A oo ina vaivai, e faitio mai isi faapea latou te moomia nai faaola totoga e pei o lauti, kofe, meainu oona, tapaa, po o se tasi foi o na mea oona lea e masani ona faaaogaina e uunaiia ai lagona ua taufaavaivai ina ia faamalosia. Ae nai lo le faaaogaina o nei mea e faatupu malosi e tatau lava ona latou faamaloloina o latou tino. O le aua le soona galue, aua le soona faia lavalava, ma aua le soona ai, o le a avea ai i tatou ma tagata atamamai, maloloina, ma faatamaoaigaina nai lo le faia o le mea o loo tatou faia nei. E faigata tele ona sailia se isi mea e sili atu ona maloloina e inuina nai lo se vai malulu, e pei o vai ia e tafe ifo mai luga o mauga ma vaipuna. O le meainu lea e tatau ona tatou inuina. E tatau ona avea ma a tatou meainu i taimi uma… . Atonu e faailoa mai faapea o nisi o alii o loo latou inuina ni meainu malolosi ma faaaogaina le tapaa o loo maloloina, ae ou te finau atu lava au e sili atu lo latou soifua maloloina pe ana fai latou te le faaaogaina, ona latou mauaina ai lea o faamanuiaga o loo folafolaina atu ia i latou e usitaia le fautuaga o loo tuuina atu i le “Upu o le Poto” (DBY, 187).

A tatou o i se faigamalaga i nuu i tua ma malolo i se fale o se tagata o le Ekalesia, o le ala latou te faailoa mai o le, “Le Uso e Polika, sei o matou faaali atu lava ia te oe o matou lagona e uiga ia te oe ma lau vaega.” Ou te fai atu i ai ina ia faapea ona faia, ae ia aumaia ia te au se fasi falaoa e faia i le sana; e sili atu lena nai lo a latou pai ma keke ma meaai suamalie. Aumai ia te au se mea o le a faatumauina ai pea lo’u malosi ae ia mama ai pea lo’u tino e taliaina le Agaga o le Alii ma ia saoloto mai le ulu tiga ma soo se ituaiga tiga (DBY, 189).

O tagata Amerika, i le avea ai ma se atunuu, o loo latou fasiotia i latou lava e ala i o latou uiga masani leaga ma le ola i mea taugata. E pei o se meaai e mafai e se tagata ona ai i le afa itula ae latou te foloina i le na o le tolu minute, e foloina i lalo a latou meaai e pei o le [taifau] i lalo o le laulau, lea afai e togi atu i ai i lalo se fasi povi ua leaga, e uma ona ia foloina ao lei mafai ona e fai atu “faalua.” Afai e te manao i se toe faatulagaina, ia tausi le fautuaga lea ua ou tuuina atu. Aveese ia le tele o ituaiga meaai eseese na e ‘ai i le ‘aiga e tasi, ma ia e faalagolago i le mea lenei, o le a sili atu ona lelei ai au taumafaiga i le puipuia lea o lou aiga mai ma’i, faamai ma le oti (DBY, 189).

Pe ua outou iloaina ea o lo outou faamanuiaga le ola ai ina ia mafai e o outou mafaufau ona outou puleaina ma le atoatoa i taimi uma? Suesue ina ia faasaoina o outou tino i le olaga ma ia maloloina, ma o le a mafai ai ona outou puleaina o outou mafaufau (DBY, 190).

O le vaega e mafaufau ai, o le vaega lea e le vaaia, ma o le vaega lena e faataunuuina le galuega o le mafaufau; ona faatinoina ai lea e le tino mo lena faamoemoega ma’oti, ma aumaia ai taunuuga o le galuega a le mafaufau. Ia galulue faatasi le tino ma le mafaufau, ma ia tutusa lelei le la auaunaga, ma afai e aunoa ma ni ‘alofaga, o le a e mauaina ai se mafaufau malosi, se tino taalo, ma le malosi i le faaletino ma le mafaufau (DBY, 191).

Ia outou faaeteete i o outou tino; ia nofouta i le faaaluina o lo outou malosi, aua a outou matutua o le a outou manaomiaina le malosi lea tou te faamaimauina nei. Ia faasaoina o outou ola. Sei vagana ua outou iloa ma faataitaiina lenei mea, e le o outou o ni tagata galulue lelei i le malo o le Atua e le o ni auauna atamamai foi (DBY, 193).

O lea ia aua ai nei o tatou faatalale i la tatou misiona, e ala lea i lo tatou faaaogaina o mea e faamanuaina ai i tatou. O mea nei latou te faataatiaina se faavae o faamai ma le oti i tino o tagata, o mea foi na o loo tuuina atu i a latou fanau, ma o le a oo mai le isi augatupulaga au vaivai i lenei lalolagi. O tamaiti faapena e le lava o latou ponaivi, uaua, maso, ma isi tulaga uma, ma e itiiti se aoga ia te i latou, po o isi foi tagata; e lei saunia i latou mo le olaga (DBY, 185–86).

O le usitaia o le Upu o le Poto e mafai ona fesoasoani ia i tatou ina ia tatou faataunuuina ma le lelei o tatou faamoemoega o le olaga.

O le Upu o le Poto o se vaega o fautuaga lelei lea e naunau le Alii ina ia usitaia e ona tagata, ina ia mafai ai ona latou ola i luga o le fogaeleele i le mea e gata mai ai le atoatoaga o lo latou soifuaga. O le faamoemoega lea na silafia e le Alii i le tuuina mai o le Upu o le Poto. Mo i latou o le a usitaia o le a ia tuuina atu i ai le poto ma le malamalama, e faateleina lo latou soifua maloloina, e tuuina atu i ai le malosi ma le faatumauina i vaega o o latou tino ma mafaufau seia oo i tausaga o lo latou matua i le lalolagi. O lo latou faamanuiaga lenei pe afai latou te usitaia lenei upu ma se loto lelei ma le naunautai ma le faamaoni i luma o le Alii (DBY, 184).

O lea la ua tatou vaai i ai e toetoe lava o uluai aoaoga lava na mauaina e uluai Toeaiina o lenei Ekalesia e faatatau lea i mea e tatau ona ai, mea e tatau ona inuina, ma le faatulagaga e tatau ona faatulaga ai o latou olaga ina ia mafai ai ona latou faatasia e le gata i le faaletino ae faapea foi i le faaleagaga. O le faamoemoega sili lenei o loo i ai i le Atua e tusa ai ma lana tofamamao i lona auina mai lea i le lalolagi, e auala mai i ana auauna, le Talalelei o le ola ma le faaolataga (DBY, 186).

O se tagata e faamalieina i soo se uiga lea e faaleagaina ai le lelei lautele i faataitaiga ma aafiaga, o le a le gata ina avea o ia ma fili ia te ia lava ae o le lautele o tagata i le mamao lava e oo atu i ai lena aafiaga. O se tagata na te le ositaulagaina se uiga leaga mo le lelei o le a avea lena ma mea o le a faapea ane ai tagata, o ia o se tagata e faaleogalua i ona faanaunauga ma moomooga mo le faamaoniga a le lautele (DBY, 186).

O le sauni e oti e le o se apoapoaiga lea i lenei Ekalesia ma le Malo; ae o le saunia e ola o le timaiga lea a i matou, ma ia faaleleia mea uma tatou te mauaina i le olaga a sau, lea o le a mafai ai ona tatou olioli i se tulaga sili ona faaeaina o le atamai, poto, malamalama, iloa, mana, mamalu, ma le faaeaina. Ona tatou saili lea ina ia faalauteleina lenei olaga i le mea e gata mai ai, e ala lea i le usitaia o tulafono uma o le soifua maloloina, ma le fuafua tatau lelei o galuega, suesuega, malolo, ma le faafiafiaina, ma ia saunia mo se olaga lelei. Tatou aoaoina atu nei mataupu i a tatou fanau, ina ia mafai ai i popofou o lo latou olaga ona latou faataatiaina le faavae o le soifua maloloina ma le malosi ma le faatulagaina ma le mana o le olaga i o latou tino (DBY, 186).

Fautuaga mo Suesuega

Matou te talitonu o le Upu o le Poto o se poloaiga mai le Atua.

E faapefea ona saunia lelei i tatou e le Upu o le Poto ina ia faia le galuega a le Alii?
Na saunoa mai Peresitene Iaga e faapea “ua poloaiina i tatou ina ia usitaia upu uma e mai le fofoga o le Atua,” e aofia ai ma le Upu o le Poto.(Vaai foi MFF 89:2). E faapefea ona fesoasoani lo tatou iloaina o le Upu o le Poto o se poloaiga ae le na o se fautuaga lelei ina ia tatou ola ai e tusa ma ona mataupu faavae? O le a le saunoaga a Peresitene Iaga e faatatau i taunuuga o le le usitaia o le Upu o le Poto?
O le a sou manatu o le a le uiga o le saunoaga a Peresitene Iaga ina ua ia faapea mai, “E i ai le ola, le ola lea e faavavau i le “ Upu o le Poto?

O le Upu o le Poto o se faatulagaga musuia o le soifua maloloina.

E tusa ai ma le faamatalaga a Peresitene Iaga, o le a le faamoemoega o le Upu o le Poto? (Vaai foi 1 Korinito 3:16–17; MFF 89; 93:35.)
O le a le fautuaga a Peresitene Iaga mo le foiaina o le vaivai tele? E mafai faapefea ona e faatatauina ia mataupu faavae o loo puleaina ai lana fautuaga i lou olaga?
E faapefea e le usiusitai i le Upu o le Poto “ona mafai ai ona galulue faatasi le tino ma le mafaufau”? E mafai faapefea ona faamanuiaina oe i le faia o lea mea? E mafai faapefea e le Upu o le Poto ona saunia i tatou e mauaina le Agaga Paia?
Na faapea mai Peresitene Iaga, “Aua nei o tatou faatalale i la tatou misiona, e ala lea i lo tatou faaaogaina o mea e faamanuaina ai i tatou.” E faapefea ona faalavelaveina la tatou misiona e mea faapena?

O le usitaia o le Upu o le Poto e mafai ona fesoasoani ia i tatou ina ia tatou faataunuuina ai ma le lelei o tatou faamoemoega o le olaga.

E faapefea ona fesoasoani lo tatou ola e tusa ai ma le Upu o le Poto ina ia faataunuuina lo tatou foafoaga, i le avea ai ma tagata taitoatasi ma se Ekalesia?
E faapefea ona faaleleia lo tatou faaleagaga pe a ola ai i le Upu o le Poto? E faapefea ona faaleagaina le agaga e ala i le le usiusitai i le Upu o le Poto?
Aisea e mafai ai ona tatou auauna ma le atoatoa pe a tatou usitaia le Upu o le Poto?
E mafai faapefea ona e mulimuli i le fautuaga a Peresitene Iaga ina ia “faalauteleina lo tatou olaga nei i le mea e gata mai ai, e ala lea i le usitaia o soo se tulafono o le soifua maloloina, ma ia fuafua lelei le galue, suesue, malolo, ma le faafiafiaina”? E faapefea ona fesoasoani le usiusitai i le Upu o le Poto ia i tatou ina ia tatou ola atoatoa?