Atinaeina o Uiga faaKeriso i Isi

Na silafia e Peresitene Polika Iaga le manaomia o le alofa, “le alofa mama o Keriso,” ina ia faafaigofie ai le olaga. O ona uiga agai ia Lucy Groves o ni faataitaiga ia o lona agalelei ma le auauna atu i isi: I le auala agai i sisifo, na pau ai Lucy i lalo o le uili o le taavale solofanua a lo latou aiga, ma gau ai lona vae ma nisi o ona ivi asoaso. Na faataatia e Peresitene Iaga le vae ma tuuina atu ia te ia se faamanuiaga. I nai aso na lumanai ai na sulu ai le tama teine a Lucy i luga o le vae ma toe gau ai foi mo le taimi lona lua. I lona tiga tele i soo se minoi o le povi, o lea na talosaga atu ai loa Lucy i lona toalua ina ia faatafa ese le latou taavale solofanua ae tuu le avanoa i isi e faamuamua e aunoa ma i latou. Na faailoa atu e Peresitene Iaga e faapea, na te le tuua lava i latou i tafatafa o le auala i ni nofoaga faigata. Na ia faatonuina ni alii latou te tipieseina vae o le moega o Lucy ma faatautau ifo le moega mai pou o le taavale solofanua ina ia faigofie ai ona felueai le moega e pei o se faaluega. Ona toe faafouina ai lea e Peresitene Iaga lana faamanuiaga ia Lucy ma tietie faatasi ma ia i ona tafatafa mo le tele o aso ina ia mautinoa e le toe i ai se isi ona faafitauli. “Faatasi ai ma lenei ituaiga mafaufau agalelei,” na tusia e le tama a le tama a Lucy, “na ia manumalo ai i le alofa o Lucy ma ana fanau e faavavau” (HRF, 157–58).

Aoaoga a Polika Iaga

Ia faaofuina outou i le noataga o le alofa.

Tatou te le o i ai iinei na o i tatou ma tuulafoaiina, e ese so tatou fausaga ma sa faia i nisi mea eseese mai le toatele o le lalolagi. O i tatou o ni tagata o lenei lalolagi, ae ui i lea ua tofu uma i tatou ma ni a tatou matafaioi (DBY, 71).

E tatau i le Au Paia o Aso e Gata Ai ona aoaoina i latou o le mea o loo fiafia i ai isi tagata o le Au Paia o Aso e Gata Ai, o le mea foi lena latou te fiafia i ai, po o le a le mafai ona faasaoina i latou i le malo selesitila o le Atua (DBY, 271).

O le a faamanuiaina e le Alii tagata na e tumu i le alofa, agalelei, ma galuega lelei (DBY, 280).

Alofa. E na o le tasi le uiga lelei, e taua, po o le mataupu faavae, lea a faapelepeleina ma ola ai tagata o le Au Paia, o le a faamautinoaina ai le faaolataga i le faitau afe ma afe o tagata. Ou te ta’ua faapuupuu le alofa, po o le agaalofa, lea e aumaia ai le faamagaloga, faapalepale, agalelei ma le onosai (DNW, 11 Jan. 1860, 1).

E tatau ona tatou maua le alofa; e tatau ona tatou faia mea uma tatou te mafaia ina ia toe aumaia ai atalii ma afafine o Atamu ma Eva ua leiloloa, ma toe aumai i latou ina ia faasaoina i le afioaga o lo tatou Tama ma lo tatou Atua. Afai tatou te faia lenei mea, o le a faalauteleina lo tatou alofa i le mea e gata mai ai aua ua fuafuaina le alofa o le Atua e faalautele atu i le mea o loo i ai ona tagata (DBY, 273).

Alofa i lou tuaoi ia pei o oe lava ia te oe [vaai Mataio 22:3939]; ia e faia atu i isi e pei ona e manao e fai mai e isi ia te oe [vaai Mataio 6:12] (DNW, 20 Mar. 1852, 3).

O se matuai faavalevalea lava mo tagata e faapea mai e alolofa i le Atua; ae latou te le alolofa i o latou uso a tagata [vaai 1 Ioane 4:20] (DBY, 271).

E tatau ona tatou amataina a tatou galuega o le alofa ma le agalelei i o tatou lava aiga; ona faalautele atu ai lea i isi tagata (DBY, 271).

Ia mausali, i le pipii atu pea i le upu moni. Aua lava nei uunaiina le ita po o le feainai i o outou loto; aua e le talafeagai i se Au Paia (DBY, 273).

Na ou faapea atu ea, Alofa i o outou fili? Ioe, e faavae i luga o ni mataupu. Ae le manaomia ona outou alolofa i a latou amioleaga; e moomia outou ina ia outou alofa i ai e tusa ai ma se naunautaiga ma taumafaiga ina ia faaliliuese mai i latou mai o latou ala leaga ina ia mafai ona faasaoina i latou e ala lea i le usiusitai i le Talalelei (DBY, 272).

Pe faia ea e nisi o o outou tuaoi se mea sese? Latou te faia. E malaga mai tagata iinei mai atunuu eseese o le lalolagi, ina ia avea lenei atunuu ma se isi atunuu e nonofo ai, ma e faamoemoe i latou o e ua leva ona ola ai iinei ina ia latou usiusitai ma taliaina o latou manatu, aganuu, ma tu, aua a leai ona latou manatu lea e le agavaa nei tagata fou mo le faaaumeaina. I se isi faaupuga, “afai e le galue, mafaufau, ma vaai soo se alii, tamaitai, ma tamaiti e pei o au, o i latou o tagata agasala.” E matuai talafeagai lava le i ai o le alofa ia te i tatou aua o le a ufiufi ai i le tele o mea atonu tatou te manatu o ni agasala (DNW, 11 Jan. 1860, 1).

E tatau ona avea ma se faamaoniga faamalieloto lo outou i ai i le ala o le olaga, pe afai tou alolofa i le Atua ma o outou uso a tagata ma o outou loto atoa (DBY, 271).

Ia mautinoa lelei lou ala ina ia savali ai ou vae i le ola e faavavau, ma ave ai nisi e toatele faatasi ma oe. Ia taliaina i latou i o latou tulaga o loo i ai, malamalama i o latou tulaga o loo i ai, ma feutagai ma i latou i o latou tulaga o loo i ai; vaai atu ia i latou e pei ona vaai o le Atua ia i latou (DBY, 274).

Agalelei. Ia agalelei i soo se tagata e pei o lo tatou Tama o i le Lagi e agalelei. Na te faatoina ifo lana timu i luga o e amiotonu ma i latou e amioletonu; ma faasusulu atu le la i le tagata amioleaga ma le tagata amiolelei [vaai Mataio 5:45]. O lea ia faalautele atu ai lo tatou lelei i galuega uma a ona aao, i mea tatou te mafaia; ae aua nei o tatou gauai atu i le agaga ma aafiaga a le tiapolo (DBY, 272).

Ia tatou faamutaina le faasiasia, ae tuuina atu le agalelei i tagata uma. Ia aoa’i i le taimi e fetaui ai le aoaiga; ae taumafai e faatauanau ae e te lei faaaogaina le faasalaga (DBY, 277).

Afai ua talosagaina oe e te aoaiina se tasi, aua nei e aoai atu e sili atu ma le mea e te mafaia [vaai MFF 121:43] (DBY, 278).

E lei suia lava ou lagona agai i isi tagata, o alii ma tamaitai, e tusa lava pe latou te talitonu i ai pe leai. Pe mafai ona outou faatasi ma a’u o ni tuaoi? E mafai ia te au; ma e leai lava ma so’u atugaluga patino pe tou te talitonu i ai pe leai (DBY, 278–79).

I a tatou [feutagaiga] ma tagata i fafo atu—aua tatou te taua i latou o nuu ese —ia lava ma totoe a tatou faataitaiga e faailoa atu ai i tatou; ona faapea mai ai lea o i latou uma o e faamaoni o i latou na, “Ou te matea e sa’o oe, ou te manatu o le a ou alu atu ma mafuta ma outou (DBY, 279).

Ia agamalu ma agalelei, ia amio maualalo ma faamaoni, ia tumu i le faatuatua ma le sa’o, aua o nei mea uma e mai le Atua; o le agalelei e atagia mai ai se mamalu o le alofa i tagata uma latou te umiaina, e avea lea ma mea e susulu ai o latou foliga i le malamalama, ma o lo latou faauo atu o le a moomia ona o lona lelei. E alofagia i latou e le Atua, e au agelu paia, ma tagata lelei uma o le lalolagi, ae inosia, lotoleagaina, ma mata’ina ma faamatau e le au amioleaga (DBY, 280).

Galuega Lelei. O le fatu o lo tatou talitonuga o le i ai lea o le alofa tunoa i tagata uma, ia faia mea lelei i tagata uma, pe afai latou te faatagaina mai i tatou ina ia fai atu mea lelei ia i latou (DBY, 272).

Ia tatou maua le lagona alofa o le tasi i le tasi, ma ia taumafai i latou o e malolosi ina ia faafaileleina ma le agalelei i latou ua vaivai, ma tuu ia i latou o e mafai ona vaai ina ia taitaiina e tauaso seia oo lava ina mafai ona vaai i latou lava mo i latou (DBY, 271).

Tatalo e le aunoa mo i latou o e o loo mafai ona faamanuiaina ona o le alofa tunoa (DBY, 279).

Afai e te vaai atu i sou tuaoi ua amata ona se ese, ia tatalo mo ia ina ia mafai ona ia mauaina le Agaga o le Talalelei e pei ona sa ia mauaina muamua. Ma afai e te lagonaina lenei Agaga i totonu ia te outou, ia tatalo mo le faateleina o lena malamalama ua outou mauaina ina ua e faatoa mauaina le Talalelei, ma o lea e faaolaina ai oe lava ma lou aiga (DBY, 272).

Manatu la faapea o lenei nuu e toasefulu ni tagata aisi o loo i ai e tuitui atu i lea faitotoa ma lea faitotoa mo sina meaai, ae o le toaiva o i latou na o ni tagata taufaasese ua o e aisi ina ia aua ai nei o atu e faigaluega, ma o loo i ai se lagona leaga e faasese i e alolofa ma lotofoai, ae na o le toatasi o lena toasefulu o e na asiasi atu i o outou faitotoa e agavaa mo a outou faamanuiaga; o le fea mea e sili, o le tuuina atu o meaai mo le toasefulu, ina ia mautinoa ai o loo fesoasoani i e matitiva ma le tagolima, po o le teena o le toasefulu ona e te leiloa po o ai tonu e talafeagai i ai le fesoasoani? O le a e faapea ifo, ia tuuina atu meaalofa fesoasoani i le toasefulu, nai lo le teenaina o le tagata e toatasi o loo agavaa ma le tagata moni o loo moomia le fesoasoani faatasi ma i latou. Afai e te faia lea mea, o le a leai lava se eseesega i ou faamanuiaga, e tusa lava pe e te tuuina atu i le tagata agavaa po o tagata foi e le agavaa, ae o le mea taua o lou aao foai ma le naunautai atoatoa ina ia fesoasoani i le tagata moni o loo manaomia se fesoasoani (DBY, 274).

Aua le faasala atu; ia faamasino i le faamasinoga tonu.

Aua le faamasino atu, ina nei faamasino mai ai outou [vaai Mataio 7:1]. Aua lava nei faamasino fua e le isi tagata ona uso a tagata, sei vagana ua ia iloa o loo ia te ia le finagalo o Keriso ia te ia [tagai foi Moronae 7:16–18]. E moomia lo tatou matuai manatunatu loloto lava i lenei mea; ua ta’u soo mai pea— “O se tagata faapena na te faia se mea sese, e le mafai ona avea o ia ma se Au Paia, pe o le a ia le faia foi faapea.” E faapefea ona e iloaina?… Aua nei outou faamasinoina tagata faapena, aua tou te leiloa le faamoemoega o le Alii e faatatau ia i latou; o lea la, aua nei outou faapea atu e le o i latou o ni Au Paia… . O se tagata e faapea mai o se isi tagata e le o se Au Paia o Aso e Gata Ai, ona o ni feeseeseaiga i le olaga e faamaonia ai e le o ia te ia le Agaga o le Atua. Mafaufau i ai i lenei mea, uso e ma tuafafine; tusi i lalo, ina ia mafai ai ona outou faafouina o outou mafaufau; ia outou tauaveina ma tilotilo pea i ai. Afai ou te faamasinoina ou uso ma ou tuafafine, seiloga lava ou te faamasinoina i latou e ala i faaaliga a Iesu Keriso, o le a leai le Agaga o Keriso ia te au; ae afai e ia te au, e le tatau lava ona ou faamasino atu i soo se tagata (DBY, 277–78).

E ootia lo’u loto i le faanoanoa ona o le toatele o Toeaiina o Isaraelu o e moomoo ina ia oo tagata uma i lo latou tulaga ma ia faatatauina i o latou fua. O nisi tagata latou te faamasinoina isi tagata ma mafaufau o isi tagata e le fetaui ma o latou tulaga e tatau ona faamalosia ina ia latou tausia na faatulagaga (DBY, 279).

Afai latou te vaaia se uso po o se tuafafine ua sese, ma e le fetaui ma o latou lava manatu, o le a latou faia loa se faaiuga faapea e le mafai ona avea o ia ma se Au Paia, ma aveesea ai lo latou faaaumeaina, ma le latou faaiuga e faapea, afai o loo i ai i latou i le ala sa’o o le upu moni, e tatau i isi ona avea faapei lava o i latou (DBY, 279).

Tatou onosai le tasi i le isi. Ou te le vaai atu i mea uma e pei ona outou vaai atu i ai. O lau faamasinoga e le o i ai i mea uma e pei o outou, e le pei la outou faamasinoga e pei o au. Afai tou te faamasinoina se alii po o se tamaitai, ia faamasino i latou i faanaunauga o o latou loto. E le faapitoa na o upu, po o uiga foi, o le a faamasinoina ai tagata i le aso tele o le Alii; ae o upu faatasi ma galuega, o le naunautaiga ma le faamoemoega o le loto o le a taulia, ma o mea nei o le a faamasinoina ai tagata [vaai MFF 137:9](DBY, 273–74).

Ia iloa e le Au Paia uma o Aso e Gata ai, o vaivaiga o isi tagata o le Au Paia o Aso e Gata Ai e le o ni agasala. Afai e faia e alii poo tamaitai se mea sese e lei faamoemoeina, aua nei outou faapea atu ia i latou o lena mea o se agasala. Tatou aoao ina ia tatou iloa ona alofa atu i le tasi; ia faamaluluina e le alofa tunoa ma le agalelei lagona ita ma le ma’ema’ea, ina ia mafai ona avea i tatou ma ni tagata faapalepale ma ia faamanuiaina i a tatou fesootaiga uma ma isi tagata (DBY, 273).

Auauna i le Alii ma taumafai e aua nei saili atu le sese i se tasi [vaai MFF 88:124]. Ia outou ola ina ia aua nei i ai se sese tou te mauaina ia te outou, ma aua le amanaiaina sese o isi o outou uso a tagata, aua e tofu lava le tagata ia ma ona sese (DBY, 280).

Atonu e mafai ona e vaai, po o lou manatu foi na e vaai, i le tele o sese i lou uso; ae peitai e pei lava foi i latou o oe; o i latou o le aano o ou aano, ma le ivi o lou ivi; o i latou o le fanau a lou Tama o le o loo i le lagi; o i tatou uma o Ana fanau, ma e tatau ona faamalieina le tasi i le tasi i le mea e gata ai (DBY, 271).

Ia faaaloalo le tasi i le isi; aua le tautala faatauvaa i le tasi. O nisi, afai latou te lagona se le fiafia i se tagata, ona latou mafaufau lea e sili ai pe ana lafoina lea tagata i le faasalaga, aua e le agavaa o ia mo se nofoaga i le lalolagi. Tagata valea e! Tou te le malamalama ea o i latou ua outou faasalaina o galuega ia a le Atua, e faapei foi o outou! E le silasila le Atua i o latou vaivaiga, ma afai o le a latou faia le lelei, o le a taliaina foi i latou e pei o i tatou. Faafetai i le Atua ua sili atu lo outou malamalama, ma ia tumu i le alofa tunoa ma le agalelei (DBY, 274).

E faamanuiaina e le Atua le tagata lotomaualalo ma le amiotonu, ma e mafai ona i ai Lona alofa i luga o i tatou ona o le vaivaiga o loo i ai i lo tatou natura. Ma a mafaufau atu i le vaivaiga sili ma le teenaina o tagata, o lea ia tatou maua ai ia le fealofani o le tasi i le isi (DBY, 272).

O le tagata alofa e alofaina mai o ia [vaai Mataio 5:7] (DBY, 273).

Ou te matuai faafetai ai lava ona e le o so tatou tiute, i lo tatou tulaga o i ai nei, le faamasino o le lalolagi; ana fai o lea, semanu ua tatou faaleagaina mea uma. E le lava lo tatou atamai, o o tatou mafaufau e le o faatumulia i le malamalama ma le mana o le Atua; e tatau ona puleaina e le agaga o le tagata lona tino seia oo lava ina ia mafai ona faamanuiaina o ia i le faamaualaloina o ona lagona, seia oo atu lava ina ia mafai ona aumaia atoa le agaga atoa ina ia ogatasi ma le finagalo ma le mafaufau o le Atua. Ma e tatau foi ona tatou mauaina le faamasinoga tonu lea na faataitaiina e le Atua i lona mafaia lea ona vaai atu i le lumanai, ma ia mautinoa ma iloa le taunuuga o a tatou gaoioiga i le lumanai, o le faavavau lava lea, ao lei mafai ona tatou faamasino atu (DBY, 278).

Ia fausia le faatuatua o le tasi i le isi ma ia aloese mai le felotoai.

Afai e mafai ona tatou mauaina lena faatuatua ma le mautinoa o le tasi i le isi, ma lo tatou Atua, ma afai tatou te ole atu i se mea tatou te mananao i ai, o le a mafai lava ona tatou faia faatasi ai ma se mautinoa atoatoa ma le malamalama e tatau ona tatou mauaina, pe tou te le malamalama ea o le a taitaiina sa’o atu ai i tatou ina ia tatou faia lea mea o loo mananao ai isi tatou te faia, i soo se vaega ma tulaga uma o le olaga? O le a uunaiina ai i tatou ina ia faia, e le faapea seiloga e talosagaina, ae sili atu. Afai e talosaga atu lou uso ia te oe ina ia oulua o ma ia i le maila e tasi, o le a oulua o ma ia i maila e lua; afai e fia faamasino mai ia te oe i lou ofu tino, ia avatu foi ia te ia ma lou ofu tele [vaai Mataio 5:40–41]. O lenei mataupu e uunaiina ai i tatou uma ina ia tatou faia mea uma e siitia ai le fiafia o isi, ma le faamoemoega o le Atua i le lalolagi, ma po o le a lava soo se mea e finagalo le Alii tatou te faia; e avea lea ma ala e saunia ai i tatou ma tatou naunau e faataunuuina i le taimi lena (DBY, 275).

Ae afai e le lava lo tatou faatuatuaina o le tasi, ma lotoleaga le tasi i le tasi, o le a faaleagaina loa lo tatou filemu. Afai tatou te totoina mataupu faavae o le faatuatuaga e le faamaluelueina o le tasi i le isi, o le a faateleina lo tatou olioli (DBY, 275).

O le galuega o loo aafia ai oe ma au o le toe faatumauina lea o le to’afilemu i mafaufau o tagata; ma afai ou te faalogo atu i ni tulaga ua solia ai e tagata o le Ekalesia ni folafolaga ou te manatu au o se mafuaaga e pa’u lava i le tagata ia. E tatau ona tatou tausia a tatou folafolaga i tagata uma lava. Ma afai e i ai ni o tatou faafaigata po o le le malamalama i isi, ia talatalanoa, ia iloilo lelei le mataupu, ia auiliili ma ia maioio lelei, ma o le a tatou iloaina ai o faigata uma lava o le a fofoina i lenei auala faigofie nai lo se isi lava auala; ma o le a tatou iloaina ai foi e toetoe lava o faafitauli uma e tulai mai i tagata o le lalolagi, e mafua mai lea i le le femalamalamaai; ma afai o i ai se sese i faamoemoega ma manatu, ma afai o le a talanoaina le mataupu, o le a naunau lava le tagata ua sese ia taunuu i se maliliega (DBY, 276).

Afai e tulai mai se eseesega i faamasinoga i le va o ni vaega se lua, tuu atu ia i latou ina ia o mai ma soalaupule faatasi, ma ia latou loto faamaulalo, ma faapea ane, “Uso (po o le tuafafine) ou te manao ia fai le sa’o; ioe, ou te faaseseina foi lava au, ina ia faia ai le mea sa’o.” Tou te le manatu ea o lena ituaiga alii po o se tamaitai na te faia faapea i lona tuaoi, o le a faamaoniaina o ia i le tulafono o Le amiotonu? Ua aufaatasi a latou faaiuga, ma ua latou malilie uma: o le a leai lava se tau manaomia fua o se isi tagata na te faaleleia le eseesega. A maea ona faia lea mea, ma afai lava e le mafai ona outou aufaatasi, ona valaau atu lea i se isi tagata na te faaleleia (DBY,276–77).

O feeseeseaiga e tulai mai pea i le mea e gata mai ai eseesega ma ua leai ai se faatuatuaga o tagata o le Ekalesia i le faamaoni ma le tonu o le isi, pe afai o tagata uma o loo aafia ai i se feeseeseaiga o loo i ai le manatu faapito, le amanaiaina, le malamalama o le tagata lava ia, ma ua oo atu ai lava i le manatu o le o ese o tagata taitasi mai le Ekalesia. E masani lava ona oo mai ni tulaga faapena i ou luma. A maea ona liuliuina le faafitauli, ma ua iloa ai na amataina i se tulaga o le le femamalamalamaai e faatatau i sina tamai mataupu laitiiti; o le faafitauli atoa na aliae mai i se mafuaaga sili ona faatauvaa. Ia aloese mai le faafaileleina o le le malamalama ma avea ai ma faafitauli tuga (DBY, 277).

Afai e talanoa ou tuaoi e uiga ia te oe, ma ua e manatu o loo sese le mea o loo latou faia i le faia o tala leaga ia te oe, aua e te faailoa atu ia i latou na e faalogoina se upu, ma ia puleaina pea lou tagata e pei lava o loo latou faia le mea sao (DBY, 277).

Ia amata atu i lenei taimi ona ola, ina ia tatou atinaeina ai le talitonuga i tagata uma o e tatou te feutagai ma tatou fesootai; ma faatauaina vaega taitasi uma o le faatuatuaina e avea ma se tasi o mea sili e mafai e tagata ona latou umia. Afai ou te faatupuina le faatuatuaina o au e o’u tuaoi i ni mea ou te faia, ou te tatalo ina ia aua lava ne’i ou faia soo se mea e faaleaogaina ai lena faatuatuaina (DBY, 276).

Fautuaga mo Suesuega

Ia faaofuina outou i le noataga o le alofa.

O a “matafaioi o le tasi i le isi” o loo ia i tatou i le avea ai ma ni tagata o se aiga? E faapefea ona aafia lo tatou faaolataga i o tatou uiga ma gaoioiga e faatatau i isi? E mafai faapefea e le alofa ona fesoasoani ia i tatou “e toe aumaia ai atalii ma afafine ua leiloloa”?
Aisea e le moni ai lo tatou alofa i le Atua pe a tatou le alolofa i isi tagata? Aisea e taua ai le “vaai atu i isi e pei ona silasila i ai le Atua”? E mafai faapefea ona faateleina lou mafai ona faia o lea mea?
O le alofa, “le alofa mama o Keriso,” e mafai ona faamatalaina i le tele o auala eseese (tagai, mo se faataitaiga, Moronae 7:45–47). O a nisi o faamatalaga o le alofa na faamamafaina mai e Peresitene Iaga? O a ni auala e mafai ai ona e faaali atu le tele o lou alofa i nisi tou te feiloai? O faapefea ona faaali atu le alofa o isi ia te oe?

Aua le faasala atu; ia faamasino i le faamasinoga tonu.

O le a le mea na fautua mai ai Peresitene Iaga e uiga i le faamasino atu o le tasi? E mafai faapefea ona faaaogaina lenei fautuaga pe a outou fesootai ma i latou ua e manatu o loo ese mai o latou uiga nai lo oe?
O a ni taunuuga e mafai ona oo i ai pe afai tatou te faamasinoina ma le amioletonu o tatou uso a tagata? O le a se mea e mafai ona fesoasoani ia i tatou ina ia tatou faamasino ma le amiotonu pe afai ua tatou i ai i se tulaga o le faamasinoina o se isi tagata? (Vaai foi Moronae 7:14–18.) E taua i se a ona tatou faaalia le alofa tunoa o le tasi i le isi?
E mafai faapefea ona fesoasoani lo tatou manatua o i tatou uma o fanau a le Atua, i a tatou fegalegaleaiga ma tagata o o tatou aiga, o uo, ma e tatou te masani?

Ia fausia le faatuatua o le tasi i le isi ma ia aloese mai le felotoai.

E faapefea ona tatou atinaeina le faatuatua ma le talitonuina i tagata taitoatasi? O a ona taunuuga pe afai tatou te faia? O le a se mea o le a tupu pe afai o le a tatou le mauaina le faatuatuaina o isi tagata?
O a nisi mafuaaga o le fefinauai? (Vaai foi 2 Nifae 26:32–33.) O le a le finauga ae mafai faapefea ona tatou teenaina? O le a se mea na e faia i le taimi ua tuanai ua faamanuiaina ai oe i le teenaina o le fefinauai? O a ni uiga tatou te faaalia na fautuaina ai i tatou e Peresitene Iaga pe a tulai mai ni fefinauaiga ma ni feeseeseaiga?
O le a sou manatu aisea na faamatalaina ai e Peresitene Iaga le faatuatuaina o isi e pei “o se tasi o mea taua sili e mafai e tagata ona umia”? O a ni mea patino e mafai ona e faia ina ia faateleina ai le faatuatuaina ma le talitonuina o oe e isi tagata?