O le Aafiaga o le Agaga Paia

Na saunoa Peresitene Iaga: “Ina ua ou vaai i se tagata e le lelei lana tautala, poo se taleni e lauga ai i nofoaga faitele, ae ua na ona faapea mai, ‘Ou te iloa, i le mana o le Agaga Paia, o le Tusi a Mamona e moni, o Iosefa Samita o le Perofeta a le Alii,’ o le galuega a le Agaga Paia mai lena tagata na faapupulaina ai i lou iloa, ma le malamalama, mamalu, ma le tino ola pea e pei ona faaali mai ia te au.” Sa ia faapea mai sa siosiomia ma faatumuina o ia e i latou, ma sa ia iloa ai e ia lava o le molimau a le tagata e moni (DNW, 9 Fepuari. 1854, 4). Sa aoao atu e Peresitene Iaga o le Agaga Paia o le “meaalofa faapitoa a le Tama” (DBY, 160), ua tuuina mai e tusa ai ma lo tatou faatuatua, ma e mafai ona aoaoina i tatou i mea uma ma taitai tatou i le faaatoatoaina.

Aoaoga a Polika Iaga

O le Agaga Paia o le meaalofa mai le Atua tatou te talia e tusa ai ma le poto o le Atua ma lo tatou faatuatua.

Ina ia tatou malamalama i muai mataupu faavae o le Talalelei—ia sao le malamalama i ai, e ao i le tagata ona i ai le poto e sau mai luga; e ao ona faapupulaina o ia e le Agaga Paia; o lona mafaufau e ao ona tatala i faaaliga; e ao ona ia fiafia i faamanuiaga o le faaolataga ia te ia lava ao le i faasafuaina atu i isi tagata (DBY, 152).

O a mea e manaomia tatou te fai pe a tatou oo i tausaga tatou te tali atu ai mo i tatou lava? E manaomia i tatou ona o le faatulagaga a le lagi, o le amataga e le mafai e oe ma au ona faamatala, talu ai o se mafuaaga faigofie ona e leai sona amataga, e mai i le vavau e oo i le faavavau—e manaomia i tatou e o ifo i le vai o le papatisoga. O le puna poo le elemene lenei, e talafeagai ma le mama o le faavavau. O ifo i le vai, ma papatisoina ai mo le faamagaloina o agasala, ma faaee atu lima i o outou luga ma faamaonia o ni uso o le Ekalesia a Iesu Keriso o le Au Paia o Aso e Gata Ai. Ma ia maua le Agaga o le Upumoni, poo le agaga Paia (DBY, 159).

I le Feagaiga Fou ma le Tusi a Mamona, ua tatou aoao ai afai o le a laugaina le Talalelei ma aoao tagata ina ia talitonu i le Alii o Iesu Keriso, e salamo i a latou agasala, papatiso mo le faamagaloina o agasala, ma maua le Agaga Paia e ala i le faaee o lima; o le Agaga Paia ua avea ma meaalofa faapitoa a le Tama ma o lana galuega. Ua ia tuu atu foi le poto e ala i agelu, faapea foi ma le musumusuga a le Agaga Paia, ma tatala mafaufau o le Au Paia ina ia maua faaaliga e pei ona i ai i le faavavau. Afai e aoaoina mataupu faavae moni, e ui ina fou i e faalogo, ae o aoaoga faavae o loo iai iina e atoatoa i lona natura ma e faigofie ona malamalama i ai, i le auala e manatu ai e ua faalogo iai, ua leva ona latou iloa nei mea. O lenei mea ua tupu ae mai le faatosinaga a le Agaga o le Upumoni e ala i le agaga o le poto o loo i totonu o tagata taitasi [vaai MFF 6:15]. O le aafiaga e sau mai le lagi o loo aoaoina fanau a tagata i taimi uma lava (DBY, 160).

O meaalofa o le Talalelei ua tuuina mai e faamalosia ai le faatuatua o le ua talitonu (DBY, 161).

Tatou te talitonu e agavaa i tatou i le meaalofa a le Agaga Paia… . e tusa ai ma le finagalo ma le poto o le Atua ma lo tatou faatuatua; o le meaalofa e faamanatu mai ai ia i tatou, le taimi tuanai, le taimi nei, ma le taimi o lumanai, e tatau ia i tatou ona iloa, ma e afai e saunia lelei o tatou mafaufau e talia le poto o le Atua e pei ona faaali mai e Sui atamamai. O le Agaga Paia o le avefeau a le Atua, ma ua tuu iai le pule e asiasi ai i atalii ma afafine o tagata. O tagata popoto uma o loo i ai i le lalolagi ua aoaoina mai le puna lava e tasi (DBY, 160–61).

Faalogologo ma galue i le uunaiga a le Agaga Paia e taitaia ai i tatou i le atoatoa.

O lou iloa, afai e te mulimuli i aoaoga a Iesu Keriso ma ana Aposetolo, e pei ona faamauina i le Feagaiga Fou, o le a maua e alii ma tamaitai uma le Agaga Paia… . O le a latou iloa mea o loo iai, o le a iai, ma sa iai. O le a latou malamalama i mea i le lagi, o mea i le lalolagi, ma mea i lalo o le lalolagi, o mea o taimi, ma mea o le faavavau, e tusa ai ma o latou valaauga eseese ma le tomai (DBY, 161).

Afai e te manao i le finagalo ma le agaga o le Atua… . , e te maua, e tutusa lava lou tofi faatasi ma soo se tasi lava o le Ekalesia ma le malo o le Atua. O lou tofi ma le tiute le ola ina ia e iloa pe a fetalai mai le upu a le Atua ia te oe, ma pe a faaali mai le finagalo o le Atua ia te oe.

Ou te faapea atu o lou tiute le ola ina ia e iloa ma malamalama i nei mea uma (DBY, 163).

Ona ola ai lea e tusa ma upu uma e tulei mai i le fofoga o le Atua, e ala mai i ana auauna ua ia filifilia iinei i luga o le fogaeleele, seia atoatoa i tatou (DBY, 159).

Fautuaga mo Suesuega

O le Agaga Paia o le meaalofa mai le Atua tatou te talia e tusa ai ma le poto o le Atua ma lo tatou faatuatua.

O le a le mea e ao ona maua e le tagata ina ia “malamalama moni” ai i uluai mataupu faavae o le talalelei? Aisea? (Vaai Isaia 55:8–9.)
E tusa ai ma le saunoaga a Peresitene Iaga, “pe a folafolaina atu le talalelei” o le a le mea o aoaoina ai tagata? O le a le uiga o faamanuiaga, e ala mai le aoaoina o le talalelei i lou olaga?
O le a le galuega a le Agaga Paia i lou olaga? E faapefea e le faatosinaga a le Agaga Paia ona faailoa mai mataupu faavae fou e faapei ua leva ona masani ai? E faapefea ona e iloa o lagona, manatu, ma faalogona e mai lou lava loto ma manatu pe mai i le Agaga Paia?
E tusa ai ma le saunoaga a Peresitene Iaga, o le a le tulaga tatou te “agavaa ai i le meaalofa o le Agaga Paia”? O le a le matautia o le ola e aunoa ma le aafiaga o le Agaga Paia, poo le i lalo foi o le aafiaga o puna leaga o le malamalama?
O a mea na saunoa ai Peresitene Iaga e fesoasoani mai ai le Agaga Paia tatou te iloa? O le a lo tatou tiute tatou te maua ai lenei malamalama? O le a lo tatou tiute pe a uma ona tatou maua lenei malamalama?

Faalogologo ma galue i le uunaiga a le Agaga Paia e taitaia ai i tatou i le atoatoa.

E faapefea ona tatou iloa le “manatu ma le finagalo o le Atua”? Aisea e taua ai le iloa o lenei mea? O a faamanuiaga e maua mai i le sailiili ma mulimuli i musumusuga a le Agaga Paia ma auauna filifilia a le Atua?
O a ni mea na tutupu i o outou olaga ma isi ua fesoasoani tou te talitonu ai e fesoasoani le Agaga Paia ina ia outou malamalama ma usiusitai i le manatu ma le finagalo o le Atua i o outou olaga i aso uma? (Vaai 1 Nifae 22:2 ma le 2 Nifae 32:2–3.)