Malamalama i le Oti ma le Toetu

I sauniga o le maliu o Elder Thomas Williams i le aso 13 o Iulai 1874, salauga atu ai Peresitene Polika Iaga i le mataupu lea o le oti: “E maeu lena vanu ma lena ata lafoia ua tatou taua o le oti! O le pasia atu lea o lenei tulaga o le ola e o tatou tino faaletino, i se tulaga o le tuugaogaoina, e maeu le maofa o lenei mea! E maeu le pogisa o lea vanu! E maeu le le mafaamatalaina o lenei ala, ma tatou te faimalaga ai lava na o i tatou. Ou te manao ou te faapea atu ia te outou, o a’u uo ma uso e, afai e mafai ona tatou vaai atu i mea e pei ona i ai, ma e pei ona mafai ona tatou vaai atu ma malamalama i ai, o lenei ata lafoia ma lenei vanu pogisa e matuai leai lava sona taua ma e tatau ona tatou liliuina ma tilotilo i ai ma mafaufua pe a tatou laasiaina e ala lea i le mana o lona Agaga, e moni lava o le faamanuiaga sili lenei o lo’u olaga atoa, ona ua ou pasi mai le tulaga o le faanoanoa, faavauvau, tagiaue, puapuaga, mala, tiga, mafatia ma le le fiafia i se tulaga o le ola lea e mafai ai ona ou olioli i le olaga i le mea e gata mai ai ona mafai ona faia e aunoa ma se tino. Ua tuusaoloto lo’u agaga, ou te le toe fiainu, ou te le toe fiamoe, ou te le toe fiaai, ou te le toe le lava, ou te tamoe, ou te savali, ou te galue, ou te alu, ou te sau, ou te faia lenei, ou te faia lena, soo se mea lava e moomia mai ia te au, e le lagonaina se tiga po o se vaivai, ua faatumulia au i le ola, ua tumu au i le malosi, ma ou te fiafia i le faatasi ai o lo’u Tama Faalelagi, e ala i le mana o lona Agaga. Ou te manao ou te fia faapea atu i au uo, afai o le a outou ola ai pea i lo outou talitonuga faalelotu, ia ola ai i le matuai faatuatua atoatoa i le Atua, ina ia susulu le malamalama o le faavavau i o outou luga, o le a mafai ona outou vaai ma malamalama i nei mea mo outou lava” (DNSW, 28 July 1874, 1).

Aoaoga a Polika Iaga

O le fiafiaga faalelalolagi e le mafai ona faatusatusa “i le mamalu, olioli ma le filemu ma le fiafia o le agaga” o le ua tuua lenei olaga faaletino i le filemu amiotonu.

Ose matuai faatupu fiafia ma le olioli ma le mafanafana i ana uo le iloaina ua tuua ma le filemu e se tagata lenei olaga, ma ua faamautuina ia te ia lava se toetu mamalu. O le laueleele ma le lalolagi atoa ma mea uma o loo i ai i lenei lalolagi i se tulaga faalelalolagi e leai sona faatusatusaga i le mamalu, olioli ma le filemu ma le fiafia o le agaga e alu ese atu i le filemu (DBY, 370).

O le faavauvau ona o le oti o e ua amiotonu, e mafua mai ona o le le malamalama ma le lotovaivai lea e teuina i o tatou tino, o le faatulagaina o lenei tino e mo le agaga e nofo ai. E le afaina po o a tiga tatou te mafatia ai, e le afaina po o a mea tatou te oo i ai, ia tatou pipii pea i lo tatou tina o le eleele, ma tatou te le mananao i se tasi o ana fanau e tuua i tatou. Tatou te fiafia pea e faatumauina fegalegaleaiga faaleaiga lea tatou te faia i le ma le tasi, ma tatou te le mananao e valavala ma le tasi (DBY, 370).

E moni lava e matuai tiga le tetea ma a tatou uo. O i tatou o ni foafoaga o lagona, o le faamaise, o le alofa, ma e tiga tele ia i tatou le tetea ma a tatou uo. E sili ia i tatou le tumau pea o i latou i o latou tino, e ui lava o le a latou mafatia i tiga. Pe tatou te le o manatu faapito ea i lenei mea? Pe le tatau ea ona tatou fiafia i le malaga ese atu o i latou na o e sa tauleleia o latou olaga i le faia o mea lelei, i se soifuaga matua matagofie (DBY, 371).

Ae afai e mafai ona i ai so tatou malamalama ma iloa atu le faavavau, afai tatou te atoatoa ona saoloto mai vaivaiga, o le tauaso, ma le le lava o le malosi lea o loo avea ma o tatou tulaga i la le tino, o lea e le tatau ai ona i ai sa tatou fuafuaga ina ia tatou fetagisi pe faavauvau (DBY, 370).

O lea ia ola ai ina ia e ala a’e i le lalolagi o agaga ma mafai ona e faapea atu ma le faamaoni, “Sa lei mafai ona ou faaleleia lo’u olaga faaletino, pe ana fai ou te toe ola ai.” Ou te apoapoai atu ia te outou, ona o le Aiga o Isaraelu, ona o Siona lea o loo tatou atinaeina, o lea ia ola ai, i le taimi nei, i ona po nei, e oo i le faavavau, ina ia mafai ona iloiloina totoa ma le faamalieina o outou e tagata paia. Ia outou ola i ni olaga faaatua, lea e le mafai ona outou faia e aunoa ma lo outou ola ai i ni olaga amio lelei (DBY, 370).

O le oti, o le a tuueseeseina ai le agaga mai le tino, e toe foi atu le tino i le eleele, ae ulu atu le agaga i le lalolagi o agaga.

Soo se tagata o loo ia te ia ia mataupu o le ola e faavavau e tatau ona ia vaai i lona tino o le efuefu o le eleele. O o tatou tino e tatau lava ona toe foi atu i le eleele. E moni a, o le toatele lava o tagata e i ai se manatu le fiafia faapea e tatau i o tatou agaga, ona tuueseeseina mai o tatou tino mo se vaitaimi umi pe puupuu foi, ma e faitau afe ma miliona i latou ua gauai atu i lenei le fiafia i o latou olaga atoa. Afai latou te malamalama i le faamoemoega o lenei olaga ma mataupu faavae moni o le ola e faavavau, ua na o se mataupu itiiti lava le oti o le tino (DBY, 368).

E fiafia le Alii e gaosia ni tino faaletino iinei ma tuuina i ai i totonu ni agaga, ma avea ai i latou ma ni tagata atamamai. Pe a mavae sina taimi mulimuli ane, o lenei tino o loo ia te oe, lea e mafai ai ona e lagona, vaai, ma pa’i atu, ma isi mau gaoioiga, o le a foi atu i le eleele. Ua oti ea la le agaga? Leai … . O loo ola pea le agaga, afai e toe foi atu lenei tino i le eleele, o le agaga lea na tuuina e le Atua i totonu o le tino o le a foi atu i le lalolagi o agaga (DBY, 368).

O o tatou tino o loo aofia ai ni mea e vaaia ma tino mai, e pei ona outou malamalama uma i ai; ua outou iloaina foi o o tatou tino e fananau mai i lenei lalolagi. Ona amata lea ona latou fetagofi atu i elemene e fetaui i lo latou atinaeina ma le tuputupu ae, e faaalualu ai i luma le avea ma alii [po o se tamaitai], e faasolo ina matua, e oti, ma toe foi atu i le efuefu. O lea la i le tulaga muamua lava, e ui ina sa ou faamatalaina i le tele o taimi, o le mea ua tatou taua nei o le oti, o le faiga o le ola, o loo i ai lea i mea o loo gaosia ai le tino, ma o lea e mafua ai ona pala pe a mavae ona tuua e le agaga le tino. O le mea moni lena, o le tino, lea na alu ese mai ai le agaga, o le a tumau i le faavavau atoa, e pei lava ona i ai ina ua tuua e le agaga, ma o le a le pala (DBY, 368).

O Iesu Keriso o le uluai fua o le toetutu.

O Iesu o le ulumatua o e ua oti, e pei ona o le a outou malamalama i ai. E oo ia Enoka, Elia, Mose, poo se isi lava tagata sa soifua muamua mai i le fogaeleele, tusa poo le a le atoatoa o lona soifuaga, e le mafai ona maua le faaolataga sei vagana ai ua uma ona toe faatuina mai le tino o Iesu Keriso mai le tuugamau e le agelu. O ia o le ulumatua o e ua oti. O ia o le Matai o le toetu— o le uluai tagata na soifua i le lalolagi ina ua maea ona ia maua le mamalu o le toetu (DBY, 374).

E le o se vavega lenei mea ia te ia. Sa ia te ia le tulaga o le ola poo le oti i lana pule; sa ia te ia le pule e tuuina atu ai ma le pule e toe aumai ai. O lana saunoaga lea, ma e ao ona tatou talitonu i lenei pe a fai tatou te talitonu i talafaasolopito o le Faaola ma saunoaga a Aposetolo o loo faamaumauina i le Feagaiga Fou. O Iesu sa i ai le pule ia te ia lava; sa tuuina atu e le Tama ia te ia; o lana meatotino lea, ma e sa ia te ia le pule e tuuina atu ai lona soifua ma toe aumaia (DBY, 340–41)

O le toto na ia faamaligiina i luga o le Mauga o Kalevaria na te lei toe mauaina i ona alatoto. Na liligi ese, ae ina ua ia toetu mai, sa suia lena toto e se isi elemene. O le a faapena foi i soo se tagata lava na te mauaina le toetu; o le a le toetu mai le toto faatasi ma le tino, aua ua fuafuaina e na o le ola o le tino i le olaga nei e aoga i ai. A faaleaogaina loa, ma ua tatou toe mauaina o tatou tino e ala lea i le mana o le toetu, lea ua tatou taua nei o le ola o le tino, ma o lea e maua mai i meaai ia tatou te aai ai ma vai ia tatou te inuina o le a suia e se isi elemene; aua o le toto ma aano e le mafai ona mautofi i le Malo o le Atua [vaai 1 Korinito 15:50] (DBY, 374).

O lo tatou faatuatua e mafai ona saunia ai i tatou mo se toetu mamalu, o le tuufaatasia lea o o tatou tino ma agaga.

O le Talalelei o le ola ma le faaolataga e faaali atu ai i tagata taitoatasi uma o e latou te mauaina e faapea, o lenei lalolagi ua na o se nofoaga le tumau, e tau ina mapu ai, ma tofotofoina ai. O ona tulaga ma aoga o loo i ai nei ua na o sina taimi puupuu, ae na foafoaina i tatou ina ia faavavau. O e amioleaga e gata mai la latou vaai i lenei lalolagi. Ua tatou malamalama afai o le a tatou tuua lenei olaga, ona saunia lea o i tatou ina ia faaofuina i le tino ola pea—a tatou tuuese nei tino ona tatou tino lea i ni tino ola pea [vaai Alema 11:43–44]. O nei tino o le a toe foi atu i le efuefu, ae o lo tatou faatuatua ma le faamoemoe o le a tatou toe mauaina nei tino mai elemene—o le a tatou toe mauaina le faatulagaga lava lea o loo i ai iinei, ma afai tatou te faatuatua i mataupu faavae o le [talalelei] saolotoga, o lea e tatau ai ona tatou saunia ina ia tumau e faavavau (DBY, 372).

A mavae ona tuua e le agaga le tino, ona tumau ai lea e aunoa ma se tino i le lalolagi o agaga seia oo ina aumaia e le Alii le toetutu o e ua oti e ala i lana tulafono ua faauuina [vaai MFF 93:33–34]. Afai o le a ilia e le agelu o loo i ai ki o le toetutu lana pu, ona toe tuufaatasia ai lea o mea uma na faia ai o tatou tino iinei, pe afai na tatou faamamaluina, e tusa lava pe o i le loloto o le sami, pe o i le itu i matu le isi vaega, pe o le isi i le itu i saute, o le isi i le itu i sasae, o le a toe tuufaatasia e pei o le emo o le mata, ma o le a toe foi mai ia i o tatou agaga. Ona tatou saunia loa lea e mau faatasi ma le Tama ma le Alo, ma o le a le mafai lava ona tatou saunia e mau ma i laua seia oo i ai. O agaga, pe a latou tuua o latou tino, e le nonofo faatasi ma le Tama ma le Alo, ae nonofo i le lalolagi o Agaga, lea o loo i isi nofoaga ua saunia mo i latou. O i latou o e na faamamaluina o latou tino, ma alolofa ma talitonu i le Alii o Iesu Keriso, e tatau ona latou tuuese lenei tino faaletino, a leai e le mafai ona latou ofuina le tino ola pea. O lenei tino e tatau ona suia, a leai e le mafai ona saunia e mau faatasi i le mamalu o le Tama (DBY, 372).

A mavae ona tuueseeseina le tino ma le agaga e le oti, o le a le mea e tatau ona tatou mauaina muamua e tusa ai ma lenei lalolagi? O le tino; o le mea faitino faalelalolagi muamua lava lena e naunau le agaga e faatasi i ai i tua atu o le tuugamau. Tatou te mauaina muamua lava le tino. O le agaga [o se alii po o se tamaitai amiotonu] na te puleaina le tino, ma o le a gauai atu le tino i soo se tulaga lava o lena faamoemoega paia ua uma ona totoina e le Atua i lena tagata. O le agaga o loo i ai i totonu e mama ma manino, ma e toe foi atu ma le mama ma le manino i le Atua, e nofo ma le mama ma le manino i le lalolagi o agaga, a mavae atu sina taimi, o le a maua ai le avanoa e toe foi mai ai ma toe faatasia ma le tino. [O Iesu Keriso,] o loo ia umiaina ki o le toetutu, na ia muamua ona pasia mai lena tulaga, o le a faasafua atu i o tatou tino toetutu, ma o le a i ai iina o tatou agaga ma ua saunia e toe ulu atu i o [tatou] tino. Ma, afai o le a tatou saunia e mauaina tatou tino, o mea faitino faalelalolagi muamua lava na e mafai ona faailoa mai ai le paia e mafai ona maua e se tagata. E na o le tino lava e oti; ae o loo ola pea le agaga (DBY, 373).

Ua tatou i ai iinei i se tulaga ina ia tanumia ai o tatou tagata oti e tusa ai ma le faatulagaga o le Perisitua. Ae o nisi o o tatou tagata o le Au Paia o Aso e Gata Ai na maliliu i luga o le vasa; e lei mafai ona tanumia i latou i se tuugamau i le laueleele, ae sa afifiina i latou i ie mafiafia ma lafoina i le sami, ma atonu pe na o se lua minute talu ona mavae ona lafoina i latou i le sami ae ua i totonu o manava o malie feai, ae peitai o na lava tagata o le a tulai mai i le toetutu, ma mauaina le mamalu e fuafua i lo latou agavaa, ma mauaina le matagofie o le Au Paia toetutu, e pei lava sa tanuina i latou i se pusa maliu auro pe siliva foi, ma se nofoaga faapitoa mo le tanumia aio e ua maliliu (DBY, 373–74).

E leai se tagata e mafai ona ulu atu i le malo selesitila ma faapaleina i le mamalu selesitila, sei vagana ua ia mauaina lona tino toetu (DBY, 375).

E na o le pau lava ‘oa moni o loo i ai mo outou ma au ina ia puipuia mo i tatou o se toetutu paia lea (DBY, 372).

Fautuaga mo Suesuega

O le fiafiaga faalelalolagi e le mafai ona faatusatusa “i le mamalu, olioli ma le filemu ma le fiafia o le agaga” o le ua tuua lenei olaga faaletino i le filemu amiotonu.

E ui lava ina tiga ia i tatou le tetea ma e pele ia i tatou, o le a se tulaga atonu tatou te fiafia ai ma maua ai le faamafanafanaina i lo latou oti?
O le a le fautuaga a Peresitene Iaga e uiga i lo tatou taimi faataitai i le faaletino? Na ia aoao mai foi e tatau ona tatou ola ina ia “mafai ona iloiloina totoa ma le faamalieina outou e tagata paia.” E mafai faapefea ona tatou faamautinoa o le Aso Faamasino o le a avea ma se taimi fiafia mo i tatou?

I le oti, o le a tuueseeseina ai le agaga mai le tino, e toe foi atu le tino i le eleele, ae ulu atu le agaga i le lalolagi o agaga.

Aisea ua avea ai le oti o se “fuafuaga o le olaga”?
O le a le mea na aoao mai e Peresitene Iaga e uiga i le tino pe a tuua e le agaga?

O Iesu Keriso o le uluai fua o le toetutu.

O le a le mea na mafaia ai e Iesu ona toetu?
O le a le mea ua tatou aoaoina e uiga i tagata e toetutu mai le Toetu o Keriso? O le a faapefea ona suia o tatou tino pe a tatou toetutu?

O lo tatou faatuatua e mafai ona saunia ai i tatou mo se toetu mamalu, o le tuufaatasia lea o o tatou tino ma agaga.

E tusa ai ma le saunoaga a Peresitene Iaga, e faapefea ona tupu le toetutu? (Vaai foi Alema 11:43; Filipi 3:21.)
O le a le uiga o le faamamaluina o o tatou tino?
Aisea e avea ai le mauaina o se “toetu paia” ma “oa moni na o loo i ai nei”?