Faamamaluina o le Sapati ma le Faamanatuga

I se tasi aso ina ua taunuu i le Vanu i Sate Leki, sa saunoa puupuu ai Peresitene Polika Iaga i le au paionia e uiga i le faamamaluina o le Sapati. Ona o le tau faatoaina o le togavao, totoina o laau ma isi galuega manaomia i lea taimi, “sa ia tau atu i le au uso … e le tatau ona latou galulue i le Aso Sa, afai [ua latou faia] o le a latou faalima ona le maua mea sa tatau ona latou maua, ma e le tatau ona latou tulimanu pe fagogota i lena aso.” Sa ia faapea atu “o le a i ai se sauniga i Sapati uma i lenei nofoaga poo mea uma tatou te nonofo ai” (WWJ, 25 Iulai 1847). Sa faaauau pea ona lapatai atu Peresitene Iaga i le Au Paia ina ia faamamalu i le Sapati “ina ia manatua ai lo tatou Atua ma lo tatou talitonuga paia” (DBY, 165).

Aoaoga a Polika Iaga

O le faamamaluina o le Sapati e maua ai faamanuiaga faaletino ma le faaleagaga.

Ave lenei tusi (o le tusi o le Mataupu Faavae ma Feagaiga) ma o le a outou faitau ai iinei, e ao i le Au Paia ona faapotopoto faatasi i le aso Sapati [vaai MFF 59:9–16]… . O tagata nei ua taua o le Au Paia, e manaomia e tusa ai i faaaliga ua tuuina mai e le Alii, e faapotopoto faatasi i lenei aso. I lenei poloaiga ua manaomia ai i tatou e potopoto faatasi ma salamo ia tatou agasala ma ta’uta’u atu a tatou agasala ma taumamafa i le faamanatuga e faamanatu ai le maliu ma puapuaga o lo tatou Alii ma le Faaola (DBY, 164).

Afai e faapotopoto tagata e tapuai, e ao ona latou tuua o latou popolega faalelalolagi i mea e tatau ona tuu ai, ona i ai lea o o latou manatu i le tulaga e tatau ai e tapuai ai i le Alii, e valaau atu ia te ia i le suafa o Iesu, ma ia maua lona Agaga Paia, ina ia latou faalogo ma malamalama i mea e pei ona i ai i le faavavau, ma iloa ona malamalama i le puipuiga a lo tatou Atua. O le taimi lenei e ao ona mataala ai o latou mafaufau, ina ia maua mea lilo a le Atua, ua ia faailoa mai e ala i lona Agaga (DBY, 167).

E ao i tagata uma ona fifilemu pe a tatou potopoto iinei e tapuai i lo tatou Atua. Ia manatua ma taumafai e tausia le fifilemu i le atoatoa, ma ia aua nei musumusu, talanoa, pe faapao o outou vae (DBY, 167–68).

Pe a tuua o tatou fanua mo se vaitau, ma faapotopoto faatasi e tapuai i lo tatou Atua, ou te tautino atu ia te outou o le a faaleleia a tatou meatoto nai lo le faaalu o lo tatou taimi atoa i o tatou fanua. E mafai ona tatou faasusu ma toto ma galulue, ae ao ona aua nei galo ia i tatou o le Atua o loo ia faatupu teleina; ma o le faapotopoto faatasi, o le a faaleleia ai lo tatou soifua maloloina ma agaga, o le a foliga lelei i tatou, ma o mea o lenei lalolagi o le a faateleina mo i tatou, ma o le a tatou iloa lelei le ala e faaaoga lelei ai (DBY, 167).

E ao ona tatou tausi [le Sapati] mo le lelei o o tatou lava tulaga faaletino ma le manuia faaleagaga. Afai tatou te vaai i se faifaatoaga o loo faavavevave atu, e auai i lana seleselega, ma le saunia o vao mago, faia o pa, poo le faapotopotoina o ana manu i le aso Sapati, e tusa ai ma lou iloa, ou te faitau o ia o se tagata vaivai i le faatuatua. Ua ia le maua le agaga o lana tapuaiga. Ua lava le ono o aso tatou te galulue ai [vaai Esoto 20:9–11], ma afai tatou te mananao e taaalo, taaalo i le ono aso, afai tatou te mananao e alu se tafaoga, faaaoga se tasi o aso e ono, ae o le aso fitu, o mai i le nofoaga o tapuaiga (DBY, 165).

Nai lo le faia o a tatou galuega e faaaoga ai le Sapati, … e ao ona tatou faia ni gaioiga laiti e mafai ai; afai e alagatatau ona kuka meaai, ona faia lea; ae afai e mafai ona tuu, e sili atu lena. Ae o le tausia o le Sapati e tusa ai ma le tulafono faa-Mose, ioe, ou te le mafai; aua e toeitiiti sili ese ma lou malosi. Ae peitai, e tusa ai ma le feagaiga fou, e ao ona tatou manatua ona faapaia le aso e tasi o le vaiaso o se aso e malolo ai— o se faamanatuga o le aso malolo o le Alii ma tagata uma o le Au Paia; ma e mo se lelei foi mo lo tatou faaletino, aua ua faatuina mo le faamoemoega faapitoa e manuia ai tagata. Ua tusia i lenei tusi [Tusi Paia], ua faia le Sapati mo le tagata. O se faamanuiaga mo ia. Ia itiiti ni galuega e talafeagai ai e ao ona faia i lea aso, e ao ona faamanuia o se aso e malolo ai, ia faapotopoto faatasi i se nofoaga ua filifilia, e tusa ai ma faaaliga [vaai MFF 59:10–12], tautau atu ai a tatou agasala, ia aumaia ai a tatou sefuluai ma taulaga, ma tuuina atu i tatou lava i luma o le Alii (DBY, 164).

O lenei, ia manatua, ou uso e, o i latou ua faasee i le aisa po o le alatele, tietie tafafao i aso Sapati—ma e tele naua lenei amio—ua vaivai i le faatuatua. Mulimuli ane, i se tulaga itiiti i lea taimi ma lea taimi, o le a tea ese ai le agaga o lo latou talitonuga ma o latou loto ma lagona, ma a maea sina taimi, o le a amata ona latou maitau masei o o latou taitai, masei i mataupu faavae o le Ekalesia, masei i le faalapotopotoga, ma mulimuli ane ua latou tuua le malo o le Atua ma oo atu ai i le malaia. Ou te faamoemoe o le a outou manatua lenei mea, ma tau atu i o outou tuaoi (DBY, 165).

Pe tatou te mauoa pe matitiva, afai ua tatou faagalo ia tatou tatalo ma a tatou sauniga faamanatuga, ua tatou faagalo i le Agaga o le Alii, ma o le agaga o le pouliuli o le a oo mai i o tatou luga (DBY, 170).

Ua ia te i tatou le tulaga alagatatau o le faapotopoto iinei mai lea Sapati i lea Sapati, ma fonotaga a le Uarota, … e aoao, talanoa, tatalo, pepese, ma apoapoai. Aisea? Ina ia tatou manatua pea lo tatou Atua ma lo tatou talitonuga paia. Pe alagatatau lenei aganuu? Ioe; aua e mafai ona galo ia i tatou–ma agai atu i le malaia, ua tatou manaomia ai le Talalelei e logoina pea o tatou taliga faatasi, faalua, pe faatolu i le vaiaso, pe, faauta, o le a tatou toe liliu atu i o tatou tupua (DBY, 165).

Ua totoina e le Alii i totonu ia i tatou le faaleatua; ma o lena agaga ola faaleatua e manaomia le fafagaina. Pe aoga ea meaai faale-lalolagi mo lenei faamoemoe? Leai; o le a mafai ona ola ai pea le tino pe afai e i ai pea le agaga i totonu, ua maua ai e i tatou le avanoa e faia ai le lelei. O lena faaleatua i totonu ia i tatou e manaomia meaai mai le Faavae e mafua mai ai. E le o le faalelalolagi, ae mai le lagi. O mataupu autu o le ola e faavavau, o le Atua ma le amioatua, pau lea o le mea e fafagaina le tino ola pea o le tagata ma maua ai le fiafia moni (DBY, 165).

O le o mai i lenei fale tatalo e tapuai ai ma faia le finagalo o le Atua mo le aso e tasi i le vaiaso, ma faia ai pea o tatou manaoga ma gaioiga poo o tatou loto i isi taimi uma, ua valea; ua le aoga, ma o se tauemu atoa i le galuega a le Atua. E ao ona tatou faia le finagalo o le Atua, ma faaalu o tatou taimi uma mo le faaleleia o lona faamoemoe, pe tatou te i totonu o fale tatalo poo isi nofoaga (DBY, 166).

Aso Gafua, Aso Lua, Aso Lulu, Aso Tofi, Aso Faraile, ma le Aso Toonai e ao ona faaalu i le viiga o le Atua, e faapei o le Aso Sa, po ua tatou le faataunuuina le faamoemoe o loo tatou tulimatai i ai [vaai MFF 59:11] (DBY, 166).

Ua tatou potopoto faatasi e faamalosi atu ma faamalosia i tatou.

O le aso nei [o le Sapati] ua mafai ai ona tatou faapotopoto faatasi e talanoa le tasi i le isi, e faamalosi ma faia le lelei mo tagata taitasi (DBY, 167).

Ao tatou maua le faamanuiaga o le talanoa o le tasi i le isi, e ao ona tatou tautala i upu e faamafanafana ma faalaeiau. Afai ua uunaia outou e le Agaga o le paia ma le mama, ia pupula atu lo outou malamalama, ae pe a faaosoosoina outou ma faafefeteina e Satani, ia taofi o outou mafaufauga ia te outou lava—tapuni o outou fofoga; aua o le tautala e maua mai ai fua, o le amio lelei poo le leaga (DBY, 166).

Afai e tatalaina pe tapunia [e se tasi] se fonotaga i se tatalo, o alii, tamaitai, ma tamaiti uma o le faapotopotoga o e ua taua o le Au Paia e ao ona le i ai se lagona poo se upu i o latou loto ma fofoga sei vagana ai mea ua tautala ai le [tagata] o le ua avea ma fofoga mo le faapotopotoga uma (DBY, 170).

Afai ua lagona e so outou ua leai se ola i le fonotaga, e pei ona masani ona ou faalogo i ai i taitai o faapea mai, ona avea ai lea ma a outou tiute le o atu ma faaola i lena fonotaga, ma faia lau galuega ina ia maua ai se faateleina o le Agaga ma le mana o le Atua i fonotaga i o outou nofoaga (DBY, 170).

O le a ou maua le agaga saoloto e fautua ai i uso o e o loo laugaina le faapotopotoga e ao ona faapupuu a tatou lauga, ma pe a le faatumulia i le ola ma le agaga e ao ona faapupuu ia i latou, aua e leai se taimi i lenei Konafesi e tuu atu ai i Toeaiina uma o loo lauga e faauumi ai lauga, ae i ai le taimi e fai ai ni nai upu i le faia o ni molimau, e tuuina atu ai ni nai upu faufautua e faamalosia ai le Au Paia, e faamalosia ai e vaivai, ma taumafai ai e faamaonia i latou o e o loo o ese, ma ia faaalualu ai i luma le galuega a le Atua (DBY, 167).

Uso e ma tuafafine, ou te faia se fautuaga mo outou. Afai tou te tautala, tautala ina ia mafai ona matou lagona ma malamalama ia te outou… . Afai e leai se mea tou te fia tau mai, ia faia lau fautuaga, ma nofo i lou nofoa. Afai e i ai se mea o outou fia tau mai, tau mai, ma afai e uma ona tau mai, ona lava lea. O outou lagona e ao ona puipuia ma pulea e mataupu autu o le ola e faavavau, e faapei o fanau a le Atua, ua fiafia i le upumoni ma le amiotonu (DBY, 167).

O lou naunauga sili i lou Tama ma le Atua ia mafai ona ou tautala ina ia talia e ia ou manatu ma faamanuia ai i latou ua faalogo mai ia te au (DBY, 168).

Pe a ou taumafai e tautala i se faapotopotoga, ou te … fesili i le Atua lou Tama oi le Lagi, i le suafa o Iesu Keriso, ina ia aumai ia te au lona Agaga, ma ia tuu i totonu o lou loto mea o loo ia finagalo ou te tautala i ai (DBY, 168).

Ou te manaomia le faalogologo o le faapotopotoga ma le faatuatua o i latou o i ai le faatuatua, ou te manaomia le atamai o le Atua ma lona Agaga ina ia i ai i lou loto ina ia mafai ai ona ou tautala ina ia malamalama tagata. E ui ina sa ou failauga i nofoaga faitele mo le tolu sefulu fitu tausaga, e seasea ona ou tulai i luma o se faapotopotoga e aunoa ma se lagona e pei o se tamaitiiti loto vaivai, afai ou te ola i le soifuaga o Metusela, ou te leiloa pe o le a ou tea ese mai lena mea. E i ai mafuaaga mo lenei mea ou te malamalama i ai. A o ou vaai atu i fofoga o tagata popoto ou te vaai atu i le faatusa o le Atua o loo ou auauna i ai. E leai se isi seia vagana ai se vaega o le amio faaleatua o loo i totonu ia i latou; ma e ui o loo faaofuina i tatou i tino ua foliga i lo tatou Atua, o lenei tulaga, o le a maui i luma o le vaega o le amio faaleatua ua tatou maua mai i lo tatou Tama. O le mafuaaga lena o lou loto vaivai (DBY, 168).

I le tautala atu i se faapotopotoga, e ui ina o le failauga e le mafai ona tautala i le sili atu i le afa taseni fuaiupu, ma ua le lelei ona fausia, afai o lona loto ua mama i luma o le Atua, o na fuaiupu faaletonu ua sili lo latou aoga nai lo le failauga lelei ana faaupuga ae aunoa ma le Agaga o le Alii, ma e i ai sona aoga taua i le silafaga a le Atua, agelu, ma tagata lelei uma. Pe a tatalo, e ui o ni upu a se tagata e itiiti ma le logo lelei lona tauina mai, afai ua mama le loto i luma o le Atua, o lena tatalo o le a sili le aoga nai lo le poto o le tautala a Cicero [o le failauga Roma o le uluai seneturi B.C.]. O le a le finagalo o le Alii, o lo tatou Tama uma, e uiga i le auala tatou te tautala ai? O le loto faigofie, faamaoni e sili lona tauaogaina i le Alii nai lo le viiga, faamaualuga, matautia, ma le poto e tautala o loo faia e tagata. Ao ia silasila ifo i se loto ua tumu i le ootia, amiotonu, ma faigofie e faapei o se tamaitiiti, ua ia silafia ai se mataupu autu o le a tumau e faavavau—”O le agaga lena o lou lava malo—o le agaga ua ou tuuina atu i au fanau” (DBY, 169).

Ou te talitonu o lo tatou tiute le faia o mea uma e mama, matagofie, logoleleia, ma tauleleia. E ao ona tatou faataitai i failauga maoae, ma suesue e faaali atu o tatou manatu o le tasi i le isi i le gagana sili ma le filifilia, aemaise pe afai ua tatou tau atu le upumoni sili o le Talalelei o le filemu i tagata. Ou te masani ona faaaoga le gagana sili ou te mafai ona faaaoga (DBY, 169).

[Ae peitai,] ou te talitonu … afai ua ia te au le malamalama maualuga i le gagana ua le i maua lava e le tagata suesue, o le a sili ona fiafia lou agaga i le talanoaga faapei o tamaiti, ma o lena foi, i le gagana faigofie, nai lo le tele o ituaiga o gagana ua faaaogaina. O le auala faigofie, manino e faaali ai manatu ua sili ona matagofie ia te au (DBY, 69).

O le aso anapogi ua tuuina mai e fesoasoani ai i e matitiva ma faamalosia ai molimau.

Tou te iloa o le aso Tofi muamua o masina taitasi [o lea ua aso Sa muamua] sa matou faaaoga o le aso anapogi? E toafia o loo iinei ua iloa le amataga o lena aso? Ao le i totogiina sefuluai, sa lagolagoina tagata matitiva i foai. Sa latou o mai ia Iosefa ma manaomia le fesoasoani, i Katelani, ma ia faapea mai ua tatau ona i ai se aso anapogi, ma e sa faia loa le tonu. Sa faapea e faatasi i le masina, e pei ona i ai nei, ma o meaai uma lava sa tatau ona ai i lena aso, o falaoamata, poo aano o manu fasi, poo pata, poo fua o laau, poo soo se mea, e ao ona auina atu i le sauniga anapogi ma tuuina atu i lima o tagata ua filifilia e faamoemoe na te vaaia ma faasoasoa mo tagata matitiva (DBY, 169).

I le aso o sauniga anapogi, e feiloai ai le Au Paia e fetufaai o latou lagona ma faamalosi le tasi i le isi i lo latou faatuatua i le Talalelei paia (DBY, 169).

E le o maua ea e outou le agaga o le atamai, le agaga o le poto, ma le aafiaga o le Agaga Paia, e mafai ai ona tutulai tagata ma molimau i mea o le Atua ua latou iloa, o mea ua latou ola ai i latou lava? E le aumaia faapitoa e lena mea i o outou mafaufau le agalelei o le Alii e faaalia ai ia te outou le upumoni o le Talalelei? E le faamalosia e lena mea lou faatuatua, faateleina ai lo outou talitonuga ma molimau ia te outou o outou o fanau a le Atua? E faamaonia sili le mafai. O lea, afai e molimau se tasi i mea o le Atua, e faamalosia ai o latou uso, e faapei ona faia i aso anamua ina ua latou faataunuuina le poloaiga o le, “Talanoa soo o le tasi i le isi,” “faamalosi i le au uso,” ma isi foi (DBY, 170).

O le aai i le faamanatuga, tatou te manatua ai le Faaola ma faafou a tatou feagaiga ma lo tatou Tama o i le Lagi.

Ou te faapea atu i le au uso ma tuafafine, i le suafa o le Alii, o lo tatou tiute ma e manaomia mo i tatou, e lo tatou Tama oi le Lagi, e ala i le agaga o la tatou tapuaiga, e ala ia tatou feagaiga ma le Atua ma isi, tatou te talia sauniga o le maota o le Atua, ma aemaise lava i le aso Sapati, e auai i sauniga Faamanatuga o le Talisuaga ma le Alii. Ona tatou auai lea i fonotaga a le Uarota ma Korama (DBY, 171).

I le sauniga [faamanatuga] ua tatou auai nei … , ua tatou faaali atu i lo tatou Tama tatou te manatua Iesu Keriso, lo tatou uso matua, tatou te molimau ia te ia lo tatou naunautaiga e ave i o tatou luga lona suafa. Ao tatou faia lenei mea, ou te manao ia i ai mafaufau iinei e faapena ma tino. Ou te manao i le tagata atoa iinei pe a outou o mai i sauniga (DBY, 171).

Ou te apoapoai i ou uso ma tuafafine e latou te talia lenei sauniga i Sapati uma, afai tou te potopoto faatasi… . ou te tatalo ia te outou, ou uso ma tuafafine, ina ia manatunatu loloto i lenei sauniga, ma saili atu i le Alii i o outou loto atoa ina ia outou maua faamanuiaga ua folafola mai e ala i le usiusitai i ai. Aoao i fanau le ala e tausia ai; faamalosi ia i latou lona taua. O lona tausia ua alagatatau mo lo tatou faaolataga e faapei foi o isi sauniga ma tulafono ua faatuina ina ia faaeaina tagata, ina ia faamanuia Iesu ia i latou ma tuuina atu i ai lona agaga, ma fesoasoani ma taitai i latou ina ia faamautuina ia i latou lava le ola e faavavau. Faamamafa le paia o lenei sauniga taua i mafaufau o a outou fanau (DBY, 171–72).

Tatou te [talia le faamanatuga] o se faamanatuga o le maliu o lo tatou Faaola, e manaomia ia ona soo seia toe afio mai o ia, poo le a lava le umi. E le afaina pe fia augatupulaga e o mai ma o ese atu, o e talitonu ia te ia e ao ona aai i le areto ma inu i le vai o le faamanatuga o lona maliu ma puapuaga seia toe afio mai o ia. Aisea e manaomia ai latou te faia lea mea? Ina ia molimau atu ai i le Tama, ia Iesu ma agelu o i latou ua talitonu ma ua naunautai e mulimuli ia te ia i le toe fanau faaleagaga, tausia ana poloaiga, fausiaina o lona malo, faapaiaina lona suafa ma auauna atu ia te ia ma le loto atoa, ina ia agavaa ai i latou e aai ma inu ma ia i le malo o lona Tama. O le ala lea e talia ai e Tagata o le Au Paia le sauniga o le Talisuaga a le Alii (DBY, 172).

O fea e ala mai ai faamanuiaga tatou te maua mai lenei sauniga? E ala mai le usiusitai i poloaiga a le Alii. Afai tatou te usiusitai i poloaiga a lo tatou Tama oi le Lagi, afai e i ai so tatou malamalamaaga moni i sauniga o le maota o le Atua, o le a tatou maua folafolaga uma e o faatasi ma le usiusitai o loo tuuina mai i ana poloaiga (DBY, 172).

O se tasi o faamanuiaga sili e mafai ona tatou maua o le o mai i luma o le Alii, ma luma o agelu, ma luma o le tasi ma le isi, ma molimau tatou te manatua o le Alii o Iesu Keriso sa maliu mo i tatou. O le a faamaonia ai i le Tama tatou te manatua a tatou feagaiga, tatou te alolofa i lana Talalelei, tatou te mananao e tausia ana poloaiga, ma faamamaluina le suafa o le Alii o Iesu i luga o le fogaeleele (DBY, 172).

Fautuaga mo Suesuega

O le faamamaluina o le Sapati e maua ai faamanuiaga faaletino ma le faaleagaga.

O a mea e manaomia e le Alii e tausia ai le paia o le aso Sapati? O a faamanuiaga o le tausia paia o le Sapati? (Vaai MFF 59:9–16.)
Na saunoa mai Peresitene Iaga “Ua ia te i tatou le tulaga alagatatau o le faapotopoto ai … i sauniga.” O le a le mea na ia tau mai tatou te fai pe a tatou “faapotopoto e tapuai”? O a ni mea e faatosina ese mai ai i tatou mai le faapotopoto e tapuai i le Atua i le Sapati?
E tusa ma le saunoaga a Peresitene Iaga, o le a le mea e tupu “o si mea itiiti mai lea taimi i lea taimi” pe a tatou le usiusitai i poloaiga e tausia ai le paia o le Sapati? Faalagolago i luga o le saunoaga a Peresitene Iaga, o a nisi o fesili tatou te fesili ai ia i tatou lava e faailoa ai le talafeagai o nisi o gaioiga o le aso Sapati? (Mo se faataitaiga: O se gaioiga e mo lo tatou ola faaleagaga? Pe fafagaina ai ea lo tatou faatuatua? Pe fesoasoani ea tatou te faamanuiaina ai nisi?)
Aisea tatou te tapuai ai i le Alii i aso uma ae ua le na o le Sapati? (Vaai MFF 59:11.) E faapefea ona tutusa pe eseese le tapuai i aso o le vaiaso ma le tapuai i le Sapati? E faapefea ona faaaoga aso uma “e viia ai le Atua”?

Ua tatou potopoto faatasi e faamalosi atu ma faamalosia i tatou.

Aisea e taua ai ona tatou faapotopoto faatasi e tapuai i le Sapati? O le a so tatou faamoemoega ao tatou feiloai atu i isi, talanoa, poo le aoao i a tatou sauniga o le Sapati? (Vaai MFF 43:8–9.) E faapefea e la outou fegalegaleaiga ma isi o le Au Paia ona fesoasoani ia te outou?
O le a le fautuaga a Peresitene Iaga ia i latou ua valaauina e lauga i sauniga o le Ekalesia? Aisea e sili ai le taua o le uunaiga a le Agaga Paia nai lo le poto e faaaoga o upu? O le a le mea na manaomia e Peresitene Iaga mai tagata o le Au Paia o loo i le faapotopotoga? E faapefea ona tatou “aumai le ola” i a tatou sauniga? (Vaai MFF 50:21–24.)

O le aso anapogi ua tuuina mai e fesoasoani ai i e matitiva ma faamalosia ai molimau.

E tusa ai ma le saunoaga a Peresitene Iaga, aisea na amataina ai aso anapogi?
O le a se aafiaga e oo i le tagata ona o lona totogi o se taulaga anapogi ma le limafoai?
I Aso Sa Anapogi tatou te maua ai avanoa e tuuina atu ai molimau a le tasi i isi. O le a le uiga o le tuuina atu o se molimau? Aisea e taua ai ia i tatou le tuuina atu o molimau ma faalogo i isi o faia foi lea mea? E faapefea ona tatou uunaia isi pe a tatou molimau i mea a le Atua? E faapefea ona aafia ai i tatou i lenei mea? E faapefea ona faamalosia lo tatou faatuatua i molimau a isi?

O le aai i le faamanatuga, tatou te manatua ai le Faaola ma faafou a tatou feagaiga ma lo tatou Tama oi le Lagi.

O le mea e sili ona taua tatou te fai ia tatou sauniga o le Aso Sa o le aai lea i le faamanatuga. Aisea e manaomia ai e le Alii le auai ma le mafaufau loloto i le faamanatuga? (Vaai MFF 27:2.)
O le a la tatou feagaiga pe a tatou talia le faamanatuga? (Vaai le tatalo o le faamanatuga i le MFF 20:75–79 poo le Moronae 4; 5.) O le a le uiga o le ave i o tatou luga o le suafa o Keriso? O le a le folafolaga a le Alii ia i latou e talia le faamanatuga ma le agaga atoa? E faapefea ona tatou maua nei faamanuiaga folafolaina?
E faapefea e le talia o le faamanatuga ona faamalosia ai lo tatou tuuina atu atoatoa i le Faaola i aso uma o le vaiaso? (Vaai MFF 59:9–12.)