Puipui mai le liliuese faaletagata.

A o i ai i Katelani, na silafia e Peresitene Polika Iaga se vaega ua liliuese o e sa faufau leaga i le Perofeta o Iosefa Samita i totonu lava o puipui o le malumalu. Sa ia faapea mai, “Sa ou tulai, ma i se lagona faigofie ae malosi sa ou tau atu ia i latou o Iosefa Samita o se Perofeta, ma sa ou iloa, latou te tetee malosi ma faaleaga ia te ia i le malosi latou te fiafia i ai, ae le mafai ona latou faaleagaina le filifiliga o le Perofeta a le Atua, ua na ona latou faaleaga i o latou mamalu, vavae ese mai le sootaga a i latou ma le Perofeta a le Atua ma faatoina i latou i seoli” (“History of Brigham Young,” DNW, 10 Feb. 1858, 386). I Katelani, Misuri, Navu, ma Iuta, sa molimauina ai e Peresitene Iaga le leaga na oo mai i olaga o i latou ua gauai atu i le liliuese. O le toatele o e ua liliuese o e na galulue felataai ma ia. Na ia silafia o “mataupu le taua” o le amataga o lo latou o ese mai le upumoni, ma e sa ia fautua malosi ina ia latou taitasi ma puipui ma le faaeteete mai le faia o soo se ituaiga o mea sese.

Aoaoga a Polika Iaga

O le Liliuese o le alu ese lea mai le Ekalesia ma iu ai lava ina teena le faatuatua.

Ole a le mea e liliuese ai tagata mai lenei Ekalesia? O mea laiti e amata mai ai, o lo latou o ese mai le ala sao. Afai tatou te mulimuli i se tapasa, ma sona nila e le faasino i le mea sao, o se eseesega laitiiti mai le amataga o le a taitaiina i tatou, pe a tatou malaga i se vaitaimi, mamao ese mai le faasinomaga tonu o loo tatou fuafua i ai (DBY, 83).

Afai e le tausisia e le Au Paia le tatalo, ma soli le aso ua faatulagaina mo le tapuaiga i le Atua, o le a latou le maua lona Agaga. Afai o le a tuuina atu e le tagata ia lava e pulea e le ita, ma le fetuu ma le faia o gagana mataga, ma tau fua le suafa o le Alii, o le a le tumau ia te ia le Agaga Paia. I se aotelega, afai e fai e se tagata se mea ua ia iloa e sese, ma lå salamo, o le a ia le maua le Agaga Paia, ae o le a savali i le pouliuli ma mulimuli ane ua teena le faatuatua (DBY, 85).

O se mea e sili ona ofoofogia i mataupu faavae uma o le poto e tapunia ai mata o alii ma tamaitai uma i mea o le faavavau ina ua maea ona latou faamasani i ai, ma ua avea … mea o lenei lalolagi, o tuinanau o mata, ma tuinanau o le tino, ua saisaitia ai o latou mafaufau ma aveesea ai i latou mai mataupu faavae o le ola (DBY, 82).

Sa taua iinei i lenei taeao e leai se tagata na liliuese e aunoa ma le solitulafono. O le le faia o le tiute e mafua ai le faia o le agasala (DBY, 82).

E masani ona outou faalogo i le tele o tagata ua fai mai, “O au o le tagata o le Au Paia, ma e ou te le liliuese lava,” “O au o le tagata o le Au Paia, ma o le a tumau ai seia ou oti.” E le mafai ona ou faia lenei faasalalauga, ma o le a le faia lava. Ou te manatu ua ou iloaina, o au lava ia e leai sou malosi, ae ua faatulagaina lou tagata ina ia faateleina lou atamai, poto, ma le malosi, i le maua o lenei ma lena. Ae ina ua tuua na o au lava, sa leai sou malosi, ma o lou atamai o le valea lea; ona ou faalatalata atu lea i le Alii, ma e i ai lou malosi i lona suafa. Ou te manatu ua ou aoao i le Talalelei ina ia ou iloa ai, o au lava ia ua na o se mea noa [vaai Alema 26:12] (DBY, 84).

Afai o se alii poo se tamaitai o le ua talia le malosi atoa o le Atua, vaaiga ma faaaliga, ua liliu ese mai poloaiga paia a le Alii, ua foliga mai ua aveesea o latou mafaufauga mai ia i latou, o lo latou malamalama ma le faamasinoga o le amiotonu ua aveesea, ua latou o atu i le pouliuli, ma ua avea e peiseai o se tagata tauaso ua tau piipii i le pa [vaai Isaia 59:9–10; Teuteronome 28:29] (DBY, 82–83).

E toatele ua talia le talalelei ona ua latou iloa e moni; ua latou talitonu i la latou faamasinoga ma e tonu; e tele finauga ua faamalumalu mai ia i latou, ma ua faamalosia i latou e tau atu le moni o le Talalelei e sili atu i lo se isi faamasinoga. Ua latou gauai i ai, ma usiusitai i ona muai mataupu faavae, ae le saili e faamalamalamaina e le mana o le Agaga Paia; o i latou ia e masani ona pauu ese mai le ala (DBY, 86).

Pe a tatou suesue masei i taitai o le Ekalesia, ua amata ona aveeseina i tatou lava mai le Ekalesia.

Afai e i ai ni uiga o loo faaalia mai i se tasi o tagata o le Ekalesia e fesiligia ai le aia a le Peresitene o le Ekalesia aoao e taitaia ai mea uma lava, ua e iloa ai faamaoniga o le liliuese—o le agaga, pe a fautuaina, o le a oo atu ai i le liliuese mai le Ekalesia ma le faatafunaga mulimuli; afai e i ai se uiga e faaalia ai le faatuiese i soo se tasi ua mau tofiga i lenei Malo, poo le a lava le valaauga ua valaauina e galue ai, afai e faaauau pea, o le a mulimuli mai le faaiuga lava e tasi; o le a latou savavali i le tino i le tuinanau o le eleelea, ma inoino i malo. E maualuga o latou loto, finau vale; ma ua le fefefe e upuleaga i e ua mamalu” [vaai 2 Peteru 2:10] (DBY, 83).

Pe a amata ona suesue e le tagata mea sese, fesili e uiga i lenei, lena, ma isi ma faapea mai, “E foliga mai ea le mea nei poo lena e pei ua faatonu mai e le Alii?”ua e iloa ai o lena tagata ua i ai le agaga o le liliuese. O tagata uma o i lenei malo, poo i luga o lenei fogaeleele, o e o loo saili ma le loto atoa e faasaoina ia lava, ua tele ana galuega e fai e faapei ona talafeagai ona ia auai atu i ai, e aunoa ma le fesiligia o le mea e leai sana aia i ai. Afai o le a manumalo o ia i le faasaoina o ia lava, ua lelei ona faaaoga tatau o lona taimi ma lona maelega. Vaai o loo sao oe lava; vaai o le ua agasala ma le ua valea ua le tulai mai ma le la e oso pea (DBY, 83).

E toatele ua tulai mai ma le manatu e mafai ona latou avea ma taitai e aoaoina mataupu faavae sa le i aoaoina muamua. Ua latou le iloa o le taimi lava latou te talia ai lenei mafaufauga o le a i ai le mana o le Tiapolo i o latou luga ma taitaiina i latou i nofoaga le paia; e ui o se lesona lenei e tatau ona latou aoao ai i le taimi ua mavae, ae o se lesona sa aoaoina e le toaitiiti i le taimi o Iosefa (DBY, 77–78).

O lenei tagata o le a talai valoaga sese, e ui o le a ia faia i le agaga o valoaga; o le a ia lagona o ia o le perofeta ma e mafai ona vavalo, ae ua faia e ia i le isi agaga ma le mana e ese mai lena na tuuina atu ia te ia e le Alii. Ua ia faaaoga le meaalofa e pei foi ona faaaogaina e oe ma au (DBY, 82).

O se tasi o muai laasaga o le liliuese, o lou vaavaai masei i lau Epikopo; ma ina ua maea lena, pe a le salamo o le a vave ona oo mai le vaega lona lua, ma e mai lea taimi i lea taimi, o le a liliuese mai lenei tagata mai le Ekalesia, ma o lona iuga lena. Pe ete tuuina atu oe lava e te saili masei i lau Epikopo? (DBY, 86).

E leai se tagata ua maua sona mana mai le Atua ina ia faatupu faalavelave ai i soo se lala o le Ekalesia. O lenei ituaiga mana ua maua mai le Tiapolo (DBY, 72).

E o ese mai tagata mai lenei Ekalesia, ae latou te o ese ona ua oo i latou i le pouliuli, ma o le aso lava ua latou manatu ai e ao ona fai se palota faatemokarasi, poo se isi itu, ina ia i ai ni o tatou sui tauva se lua mo le Perisitua faamalumalu i totonu o tagata o le Au Paia, o le iuga o i latou, o tagata liliuese. E leai se mea e tau o se le malamalama, vaevaega, fefinauai, feitagai, mataua, femisaai poo le lua o ni tali o se fesili i le maota o le Atua; e na o le tasi le tali o le fesili iina (DBY, 85).

O i latou ua leai se Agaga ua faatumulia i le pouliuli ma le le malamalama

Pe a aveesea mai i le tagata le agaga o le galuega ua tuuina mai tatou te fai, ua avea i latou ma e ua le talitonu i o latou lagona. Ua latou faapea mai ua latou le iloa pe moni le Tusi Paia, pe moni le Tusi a Mamona, poo faaaliga fou, poo i ai se Atua pe leai. Pe a aveesea mai ia i latou le agaga o lenei galuega, ua aveesea le malamalama o mea o le Atua i le taimi nei ma le faavavau; o le a aveesea mai ia i latou mea uma (DBY, 83–84).

E amata ona liliuese tagata e ala i le manatu ua ia te i latou le malosi, e ala i le gauai atu i musumusuga a le fili o le ua taitaiina i latou i le malaia i se mea itiiti, seia oo ina faapotopotoina ia i latou lava mea ua latou taua o le poto o le tagata; ona amata lea ona latou o ese mai le Atua, ma ua nunumi o latou mafaufau (DBY, 84).

O le a le mea e liliuese mai ai le Au Paia? O mea lelei uma lava, mama, paia, faale-Atua, faaolataga, faalauteleina o manatu, o le poto o tagata ua auina mai e lo tatou Tama oi le Lagi i luga o le fogaeleele. O le a le mea latou te maua e sui ai? Ou te malamalama i ai i ni nai upu itiiti. O upu nei e ao ona ou faaaoga: oti, seoli ma le tuugamau. O le mea lena latou te maua e sui ai. E mafai ona tatou oo atu i mea faapitoa o mea sa latou faia. Sa latou i ai i le pouliuli, valea, masalosalo, tiga, faanoanoa, faavauvau, le fiafia, e leai se isi e tiga alofa i le taimi o puapuaga, leai se isi e faalagolago i ai i le taimi o le malaia, leai se tagata e alofa mutimutivale pe a mafatia ma faaleaogaina; ma e ou te malamalama i ai i le faapea atu o le oti, seoli ma le tuugamau. O le mea lenei latou te maua e sui ai lo latou liliuese mai le Talalelei a le Alo o le Atua (DBY, 85).

Ua outou iloa tagata o e sa i ai i le Ekalesia, sa toaaga, sa soifua ma tumu i le poto; ae ina ua o ese mai i le Ekalesia, ua faaitiitia lo latou malamalama, ua faapogisaina o latou mafaufau ma o mea uma lava ua avea ma mea e le faamatalaina ia i latou, ma o mea tau i le Atua, ua faapei i latou o tagata o le lalolagi, o e ua mafaufau, faamoemoe ma tatalo o nei mea o le a faapea, ae ua latou le iloa se mea itiiti e uiga i ai. O le tulaga maoti lenei o i latou ua o ese mai le Ekalesia; ua latou o atu i le pouliuli, ua le mafai ona latou faia ni faamasinoga, mafaufau pe malamalama i mea e pei ona i ai. Ua faapei i latou o le tagata ua onã—ua ia manatu ua leaga tagata uma i le ava malosi ae sei vagana ai o ia, ma ua na o ia lava le tagata e malamalama le mafaufau i le vaiaai. Ua manatu tagata ua liliuese, e sese tagata uma ae vagana ai i latou (DBY, 84).

O i latou ua o ese mai le Ekalesia ua faapei o se fulufulu manu ua feleleai mai lea itu i lea itu i le ea. Latou te le iloa le mea ua agai atu i ai; ua latou le malamalama i se mea e uiga i lo latou soifuaga; lo latou faatuatua, faamasinoga ma le faaaogaina o o latou mafaufau ua le mautonu e faapei o le feleleai a le fulufulu manu o loo opeopea i le ea. Ua leai se mea tatou te pipii i ai, ua na o le faatuatua i le Talalelei (DBY, 84).

E mafai ona tatou tutumau e ala i le ola ai i lo tatou talitonuga ma saili i le Agaga Paia.

O le a i ai pea le liliuese? Ioe, uso e ma tuafafine, e ao ona e iloa e o mai tagata i le Ekalesia ona liliuese lea. E ao ona silafia o nisi o tagata o le a tutumau mo sina vaitau, ona pau ese atu lea i le ala (DBY, 85–86).

Aisea e liliuese ai tagata? Ua outou iloa o loo tatou i ai i le “Vaa Tuai o Siona.” Ua tatou i ai i le ogatotonu o le vasa. A oo mai faafitauli, ma e faapei ona faapea mai seila, ua ia galue ma le malosi. “O le a ou le nofo iinei,” ua faapea mai ai le tasi; “Ou te le talitonu o le ‘Vaa lenei o Siona.” “Ao loo tatou iai i le ogatotonu o le vasa.” “Ou te le popole, ou te le nofo iinei.” “Ua tatala le peleue, ona ia oso lea i lalo. Mata e le malemo o ia? Ioe. E faapena i latou o e o ese mai lenei Ekalesia. O le “Vaa Tuai o Siona,” e ao ona tatou nonofo ai (DBY, 85).

O le Atua o loo i le foeuli o lenei vaa tele, ma ou te lagona fiafia ai… . Tuu pea i latou e liliuese pe a mananao i ai, ae o le a faasaoina e le Atua i latou uma ua naunau ina ia faaolaina (DBY, 86).

Afai e ola tagata i lo latou talitonuga, o le a leai se liliuese ma o le a le faalogo i se muimui poo le suesue masei. Afai ua fiaaai tagata i upu o le ola e faavavau, ma o latou agaga atoa ua taulai atu i le atinaeina o le Malo o le Atua, o le a saunia loto ma lima uma ma le naunautai ma o le a alualu i luma le galuega i le atoatoa ma o le a siitia e pei ona tatou taumafai i ai (DBY,84).

Tatou te mananao e ola ina ia maua le Agaga i aso uma, i itula uma o le aso, i minute uma o le aso, ma o tagata uma o le Au Paia e mafai ona latou maua le Agaga o le Atua, i le mana o le Agaga Paia, e taitaiina o ia i ona tiute taitasi (DBY, 82).

Fautuaga mo Suesuega

O le Liliuese o le alu ese lea mai le Ekalesia ma iu ai lava ina teena le faatuatua.

Sa tautino mai e Peresitene Iaga nisi o mea e o ese ai mai i le upumoni e foliga mai e taatele ma “faalavelave laiti.”Sa ia faaaoga le faatusa o le “tapasa, o le nila e le faasino sao.” E faapefea ona avea le talalelei e faapei o se tapasa moni ma le sao? O a ni eseesega laiti mai i o tatou olaga e ono taitaiina ai i tatou i le malaia? O le a le auala sao e ao ona tatou faia?
O le a le lapataiga na tuuina atu e Peresitene Iaga i le tagata e mitamita vale, “O au o le tagata o le Au Paia, ma e le mafai ona ou liliuese” (vaai 2 Nifae 28:25; MFF 20:31–34.)
O le a le lapataiga faavaloaga na valoia e Peresitene Iaga mo i latou o le Au Paia ua latou talia le “mana o le Atua” ma ua “liliuese mai poloaiga”?
Aisea e le lava ai le poto e faaali ai manatu e faatumau ai i tatou i le ala i le ola e faavavau?

Pe a tatou suesue masei i taitai o le Ekalesia, ua amata ona aveeseina i tatou lava mai le Ekalesia.

O a ni auala e avea ai lo tatou faia o o tatou lava valaauga, ae le o le fesiligia o musumusuga o taitai i taimi nei, e faamalosia ai i tatou taitasi, aiga, uarota, ma tagata uma o le Ekalesia?
O le a le lapataiga a Peresitene Iaga ia i latou o loo faitio i o latou taitai o paranesi ma uarota? O a mea tatou te fai i le lotu ma aiga e lagolagoina ai le epikopo o la tatou uarota, peresitene o la tatou paranesi, poo isi taitai o le Ekalesia? A oo mai feeseeseaiga faamaoni, o le a le ala tatou te uia ina ia maua ai le agaga tuufaatasi? (Vaai Mataio 18:15; Luka 11:34.)
E tusa ai ma le saunoaga a Peresitene Iaga, e le tatau ona i ai se “palota faatemokarasi i le va o ni “sui tauva se toalua mo le Perisitua pulefaamalumalu” i le Ekalesia. (Vaai MFF 28:2, 6–7.) E faapefea ona eseese le lagolagoina e ala i le “maliliega autasi” ma le “palota faatemokarasi”? (vaai MFF 20:65; 26:2.)
Ua valaauina i tatou e tuuina atu la tatou lagolago i taitai o le Ekalesia. E faapefea ona avea lo tatou naunau e lagolago taitai e faamalosia ai le Ekalesia aoao? E faapefea ona avea lo tatou le naunau e lagolago ia i latou e faavaivaia ai le Ekalesia?

O i latou ua leai se Agaga, ua faatumulia i le pouliuli ma le le malamalama

O le a le uiga o le saunoaga a Peresitene Iaga ina ua ia faapea mai, o e ua liliuese ua latou manatu ua latou maua le malosi? O le a le faigata o le faalagolago i lou lava malosi? (Vaai Helamana 4:13.) Aisea e filifili ai e nisi le “poto o le tagata” ae le o le poto o le Atua e pei ona faaalia e le Agaga? (Vaai Isaia 29:13–14; 1 Korinito 2:12–14.)
Faitau tali a Peresitene Iaga i nei fesili: “O le a le mea e liliuese mai ai tagata o le Au Paia?” “O le a le mea latou te maua e sui ai?”
E faapefea ona faaaoga lo tatou faatuatua e fesoasoani ai ia i latou e faapei o “fulufulu manu ua feleleai mai le tasi itu i le isi itu i le ea?”

E mafai ona tatou tutumau e ala i le ola ai i lo tatou talitonuga ma saili i le Agaga Paia.

Aisea e faaauau ai pea le liliuese i totonu o le Ekalesia? E faapefea ona tatou taofia le amatalia o le liliuese mai le oo mai i o tatou olaga? E faapefea ona avea isi uso o le Ekalesia ma le aafiaga a le Agaga e fesoasoani e faatumau ai le faatuatua pe a faaosoosoina oe “e tau o se vaitau e te ola lelei ai”?
Afai tatou te nonofo i le “Vaa Tuai o Siona,” o le a le folafolaga mo i tatou?