O le Ata o le Faaolataga

I le avea ai o se perofeta ma se faiaoga o le ata o le faaolataga, sa aoao mai Peresitene Polika Iaga “o le faatulagaga ma le faamoemoe a le Pule Silisiliese” (DBY, 49) o le maua lea o le avanoa e Lana fanau e maua ai le fiafia e faavavau. E tusa ai o lana “ala mo le fiafia” tele [Alema 42:16], o fanau a le Atua ua tatou ola ai i Lona afioaga ao le i o mai i le lalolagi faaletino, ua faamanuiaina ai e maua tino faaletino ma filifili ai e usiusitai i tulafono a le Atua. E tusa ai ma lo tatou faatuatua, o le a aumaia e Iesu Keriso ia i tatou le malo o le mamalu.

Aoaoga a Polika Iaga

E finagalo le Atua ia tatou ola e faavavau i le malamalama, upumoni, ma le fiafia.

Ole olaga lenei o loo tatou iai, e mo le faavavau. Mafaufau i le manatu o tagata faamanuiaina i le mana atoa ma le poto ua tatou maua, ua faaumatiaina, i le o ese mai le olaga, ma faamutaina, ma taumafai e faaleleia ma o tatou lagona ma o tatou olaga i le taimi nei. E leai se tagata poto e mafai ona ia fai. E na o le Agaga lava o faaaliga e mafai ai ona tatou malamalama i nei mea [vaai 1 Korinito 2:11]. E ala mai i faaaliga a le Alii o Iesu ua tatou malamalama i mea e pei ona sa iai, e pei ona faaalia mai ia i tatou; o mea o loo i le olaga o loo tatou fiafia ai nei, ma mea e pei ona o le a iai [vaai MFF 93:24], e le o lona tulaga atoatoa, ae o mea uma ua faatulaga e le Alii e ao ona tatou malamalama iai, e aoga mo i tatou, ina ia tatou maua ai le poto masani e tatau ai i lenei olaga e saunia ai i tatou e maua le fiafia i le olaga e faavavau i le taimi o mulimuli mai (DBY, 47).

Afai tatou te malamalama i le filosofia moni ina ia malamalama ai i lo tatou foafoaga, ma lona faamoemoega—o le a le fuafuaga ma le faamoemoega o le Pule Silisiliese o loo iai i le faatulagaina o mea ma aumaia i le tulaga ua ou tuuina atu ai ia te outou iinei i le aso, e mafai ona tatou malamalama ai e le mafai ona faaleaogaina mea—e faalagolago i le fuafua ma le le fuafua; ma malamalama ai e mafai ona fuafua mea ina ia maua ai le atamai, ma ia maua ai le atamai sili ma ia faaauau ai pea ona faateleina i lena atamai; ma aoaoina ai i na mataupu faavae ua fuafuaina ai mea uma e avea ma manu, fualaauaina, ma tagata atamamai; ma iloa ai galuega mamana, ma faasalalau atu ai mataupu faavae i mea e maua mai ai tagata atamamai ma faaolaina ai i latou—i le a? Fiafia. E iai se mea e le mafai ai ona faaatoatoaina le faamalieina o agaga ua tutupu i totonu ia i tatou? Leai [vaai MFF 131:7](DBY, 49).

O i tatou o fanau agaga a le Atua.

E leai se tagata soifua ua iai le mana e faatulaga ai e ia lava lona soifuaga. Aua e iai le e sili atu na i lo i tatou. Ua na o i tatou ea o i totonu o o tatou tino? Ua na o i tatou ea i totonu o o tatou agaga? E lå o i tatou i tatou lava. O i tatou e o tatou tuaa—e o lo tatou Tama ma lo tatou Atua [vaai Galuega 17:29] (DBY, 50).

Na muai foafoaina mea i le agaga; sa fanauina e le Tama ia agaga, [vaai MFF 76:24], ma sa aumaia ma nonofo faatasi ma ia. Ona ia amatalia lea o le galuega o le foafoaina o tino faaletino, e pei ona sa ia foafoaina i lenei tino o ia lava, i le faaaogaina lea o mea sa fuafuaina ma o loo faia ai le fogaeleele, … mulimuli ane o tino faaletino o lana fanau sa foafoaina mai i mea o loo maua i le fogaeleele (DBY, 50).

Sa ou faalogo sa faapea mai se alii tautaua o Mr. [Henry Ward] Beecher, o Brooklyn, o le masei sili ua oo i le tagata, o le fanau mai; ae ou te faapea atu o le manuia sili e le i tupu muamua lava pe mafai ona tupu i tagata soifua, o le fanau mai lea i le lalolagi, ua maua ai le avanoa i le ola ma le faaolataga; ua maua ai le faamanuiaga o le faatoilaloina o le oti, ma le manumalo i le agasala ma le amioletonu, o le faaaogaina i o latou olaga o mataupu faavae uma o le ola ma le faaolataga ma le ola e faavavau ma le Atua (DBY, 51).

O agaga ua nonofo i nei tino faaletino sa mama e pei o le lagi ina ua muai ulufale i ai. Ua latou ulufale mai i tino faaletino ua faaleagaina, i la le tino, ona o le pau o le tagata. Ua faapea mai le fai Salamo, “Faauta ua fanaua au i le amioleaga; na ou iai foi i le manava o lou tina ma le agasala” [Salamo 51:5]. Ua faatuina e lenei mau i manatu o nisi le mataupu faavae o le lotoleaga atoa— o lea e le mafai lava ia i latou ona iai se lagona lelei se tasi, ua agasala atoa i latou, e leai se lelei, leai se mafaufau loloto, leai se manuia faaleagaga ia i latou. Ua le sao lea, ae ua iai le feteenaiga ia i tatou. Ua tatou feteenai ma le tiapolo, poo le fatu o le agasala ua iai i le tino e ala i le pau. O agaga mama o loo i totonu o nei tino faaletino ua aafia, ma o lona saolotoga foi lea ua aumaia ai i latou nei i nei tino faaletino ina ia tumau ai le taua sili, ma ia tuuina atu pea le Agaga o le upumoni e faaaafia ai le agaga o tagata, ina ia manumalo silisili ai i o tatou tino faaletino, o le Atua ma le Alii o galuega uma (DBY, 51–52).

Ua tatou saoloto e filifili le lelei mai le leaga, faaeaga mai le faanoanoa.

[Na fesili le Tama,] “O ai na te faaolaina le lalolagi, o ai o le a oo atu ma faia le taulaga mo le lalolagi ma mea uma o loo iai? Na tali le Alo Matua: “O Au lenei”, ma ia faaopoopo, “Auina atu Au,” A o le lona lua, o “Lusifelo, le Atalii o le Taeao,” ua faapea mai, “Le Alii e, o au lenei, auina atu au, o le a ou faaolaina atalii ma afafine uma o Atamu ma Eva o loo ola i le lalolagi, ma o le a ola i le lalolagi.” Ae peitai,” ua faapea mai le Tama, “ o le a le lava lena. O le a ou tuuina i tagata taitasi lana filifiliga saoloto; ia faaaogaina e tagata uma ina ia maua ai le faaolataga i lou malo; ao iai ia i latou lena mana o le filifiliga e ao ona latou faaaoga lena mana. O i latou o au fanau; o uiga o loo outou vaai mai ai ia te au, o loo iai i lau fanau ma e ao ina latou faaaoga lo latou filifiliga saoloto. Afai ua e saunia e faasaoina tagata uma, e ao ina e faasaoina i latou i lo latou amioletonu ma faiga leaga [vaai Aperaamo 3:23–28; Mose 4:1–4] (DBY, 53–54).

Ina ua iai feetenaiga i le lagi, o le faamasinoga sa faatatauina i le fua faataoto ma le amiotonu i le fua faatautau, ma e sa tulia ese le tiapolo (DBY, 54).

O le Alii Silisiliese sa puapuaga i lenei feeseeseaiga i le lagi ma iloa ai le galuega a ona tagata e saunia ai mo le oo mai i le lalolagi (DBY, 54).

Ao i latou [agaga fouvale] e ao ona o ifo mai le lagi, e le tatau ona nonofo i latou iina, e ao ona tuliese ifo i le lalolagi e tofotofoina atalii o tagata, ma faia a latou galuega o le faafeagai i mea uma, ina ia maua ai e i latou o loo nonofo i le lalolagi le avanoa e faaleleia ai le poto ua tuuina ia te i latou, le avanoa e manumalo ai mai le tiapolo, ma aoaoina i mataupu faavae e pulea le faavavau, ina ia faaolaina ai i latou (DBY, 54).

E le mafai ona maua e se tagata le faaeaga sei vagana ua latou iloa le tiapolo, le agasala, faanoanoa, ma le malaia, aua e leai se tagata e mafai ona malamalama, faafetaia ma fiafia i le faaeaga i luga ae o se isi lava mataupu faavae (DBY, 55).

E te manatu ua silafia e le Alii le tele o tagata? … Ou te manatu e leai se tasi o loo i luga o le fogaeleele i le taimi nei, sa ola muamua ia i tatou, pe mulimuli mai foi ia i tatou, e le i iloa e ia. Sa ia silafia i latou o le a faauuina; sa ia silafia i latou i taimi uma lava, e pei ona sa ia silafia Mose, Farao, Aperaamo, Mekisateko, ma Noa, o le sa filifilia e fausia le vaa e faasaoina ai i latou mai le lolo (DBY, 55).

O se manatu sese e faapea ua tuuina atu e le Atua mea uma e oo mai, mo le saolotoga o tagata e gaioi ai. E mafai ona e fesili ifo pe e te talitonu i le muai faauuina; ioe, e malosi e faapei lava o soo se tagata i le lalolagi. Tatou te talitonu o Iesu sa muai faauuina ao le i faavaeina le lalolagi, ma o lana misiona sa valaauina ai o ia i le faavavau e avea ma Faaola i le lalolagi, ae ina ua sau o ia i la le tino sa ia te ia le saolotoga e filifili ai pe musu foi e usitai i lona Tama. Ana ia filifili e aua le usiusitai i lona Tama, po ua avea o ia ma atalii o le malaia. U iai foi ia i tatou le saolotoga e filifili ai pe faafitia mataupu faavae o le ola e faavavau. Ua tuuina mai ma muai faamanuiaina e le Atua le tele o mea ua oo mai, ma o le a faaauau pea ona faia e ia o ia mea; ae afai ua ia tuuina mai ia faamanuiaga e tele i luga o nuu poo tagata taitasi, e tuuina atu e ia e fuafua i ni tuutuuga faapitoa. Afai e tuuina atu e ia ni mala se tele ma faatafugaga i luga o nuu poo tagata, e oo mai nei mea ua le mafai e na nuu ma tagata ona tuuese lo latou amioleaga ma liliu atu i le Alii. Sa tuuina atu ina ia faatamaia Nineva i le fasefulu o aso, ae peitai e le i faataunuuina ona o le salamo o tagatanuu o Nineva. E pule ma taitai le Atua, ma e ua ia faasalotoina lana fanau e faapei o ia, e filifili i le sao poo le sese, ona faamasinoina ai lea o i tatou e tusa ai ma a tatou galuega (DBY, 55).

E tusa ai ma lo tatou Faatuatua, o le a aumaia e Iesu Keriso ia i tatou le malo o le mamalu.

O le ata lenei o le faaolataga. O le a le taofia e Iesu lana galuega sei vagana ua aveina ae uma tagata i le fiafia o le malo i le maota o lona Tama, o loo iai le tele o malo ma mamalu, e talafeagai ma galuega ma le faatuatua o tagata uma o loo soifua i luga o le fogaeleele. O nisi o le a usiusitai i le tulafono faaselesitila ma maua lena mamalu, o nisi o le a usiusitai i le terasitila ao nisi, o le telesitila, ao nisi o le a le maua se mamalu (DBY, 56).

O le miliona o tagata ua maliliu, o e i le lalolagi Kerisiano ma e faapaupau, e tusa la latou amiotonu, amiolelei ma amiosa’o, o nisi o loo ola i le lalolagi i le taimi nei. Ua faapea mai le lalolagi Kerisiano ua leiloa i latou; ae ua faasaoina i latou e le Alii, poo lenei, o i latou uma ua maua le Talalelei. O le ata o le faaolataga ua faaali mai e Iesu, ma o loo tatou folafolaina atu, ua oo atu i e sili ona maulalo ma tauleaogaina o le fanau a Atamu o loo leiloloa (DBY, 60–61).

Fautuaga mo Suesuega.

E finagalo le Atua ia tatou ola e faavavau i le malamalama, upumoni, ma le fiafia.

E mafai faapefea ona tatou iloa o le “olaga o loo ia te oe ma a’u, e mo le faavavau”? O le a le suiga e te oo i ai, pe a e iloa e faavavau le ola?
O le a le fuafuaga ma le faamoemoe o le Atua i le faatulagaina o le lalolagi?
Sa aoao mai Peresitene Iaga o le faamoemoe autu o le olaga o le “maua lea o le poto sili ma faaauau le faateleina o lena poto.” O le a le faiã i le va o le faateleina o le poto, poo le malamalama ma le upumoni (vaai le MFF 93:36; 130:19), ma le maua o le fiafia e faavavau? O le a le moni o lenei mea i lou lava olaga?

O i tatou o fanau agaga a le Atua.

O le a sou lagona i lou iloa o oe o se atalii agaga o lo tatou Tama oi le Lagi? O le a se suiga o lou olaga e i ai ona o lena mea?
Aisea e avea ai le “toe soifua mai i lenei lalolagi” o se “manuia sili ua maua e tagata ola”? Faitau ma mafaufau i le MFF 95:33. O a faamanuiaga e o faatasi ma lou agaga ma lou tino ua faatasia e le mavaevae?
E tusa ai ma le saunoaga a Peresitene Iaga, o le a le faasalaga o le pau o le tagata? O le a se faaiuga sese ua manatu iai nisi tagata e tusa ai ma le pau? O le a le matafaioi a le Agaga o le Upumoni i le taua o loo faia i totonu o i tatou” I le va o le lelei ma le leaga? E faapefea ona tatou avea le Agaga o le Upumoni ma aafiaga sili ona malosi i o tatou olaga?

Ua tatou saoloto e filifili le lelei mai le leaga, faaeaga mai le faanoanoa.

E tusa ai ma le saunoaga a Peresitene Iaga, o le a le galuega e faia e la tatou filifiliga saoloto e maua ai lo tatou faaeaga? Aisea na le taliaina ai e le Atua le fuafuaga a Lusifelo e galue o ia mo i tatou taitoatasi? (Vaai 2 Nifae 2:15–16.)
Aisea na faatagaina ai e le Alii le “vaevaega i le lagi”? O le a le “galuega” a i latou na tulieseina mai le afioaga o le Tama? Aisea e iai le “faafeagai i mea uma”? Aisea e tatau ai ona tatou malamalama i le “tiapolo” ma le “agasala, faanoanoa, ma le puapuaga” ina ia maua ai le faaeaga (vaai 2 Nifae 2:11.)
O le a le mea e ao ona e faia e faaatoatoa ai le finagalo o le Alii ma ola ai i le maualuga o lou tomai?
E faapefea ona tuuina mai ma muai faauuina e le Atua nisi o tulaga patino, ae tumau pea ia i tatou le saolotoga e filifili ai?

E tusa ai ma lo tatou Faatuatua, o le a aumaia e Iesu Keriso ia i tatou le malo o le mamalu.

O afea o le a faamaea ai le galuega faaola a Iesu Keriso?
E ala i le Togiola a Keriso, o tagata uma lava sei vagana le atalii o le malaia “o le a aumaia i luga i le fiafia o le malo i le maota o lona Tama.” Sa saunoa mai foi Peresitene Iaga e “tele malo ma mamalu.” Aisea ua tele ai malo? O ai e faia le faaiuga pe o fea le malo e alu i ai le tagata?
E faapefea e le Togiola a le Faaola ona “oo ifo i le tulaga sili ona maulalo ma le le manuia” e faapea foi i le “tagata faamaoni, loto mama ma le amio sao”?