Föfför 6–7

Stephen a Pwarata usun Jises Kraist

Emon chon angang mi nukuchar a fang manauan ren an kapasen pwarata.

Ewe Mwichefen a fokkun mwitir marinon. A fokkun weires ngeni ekkewe Aposel ar repwe tumunu meinisin ekkewe memper.

Föfför 6:1–2

Ekkewe Aposel ra finata repwe kokkori fumon mwan repwe tongeni anisir. Ra tingorei ekkewe memper repwe kukuta ekkewe mwan mi tipachem me uren ewe Ngun mi Fel.

Acts 6:3

Emon me nein ekkewe aramas a kefinita iei Stephen. Ekkewe Aposel ra efeiochu i. Stephen a fokkun wate an nuku me a fori watte manaman ngeni ekkewe aramas.

Foffor 6:5–6

Stephen a afanafan usun Jises Kraist ren an tipachem me ren ewe Ngun. Nge ekkewe souemwenin eu synagogue rese sani met a afanafana. Ra apasa pwe a kapasen ungeni Moses me ungeni Kot. Ra uweato Stephen mwen mesen ewe souasor mi nap me ekkewe souemwen.

Foffor 6:9–15; 7:1

Mesen Stephen a usun mesen emon chon nang. A achema ngeni ekkewe souemwen pwe Kot a tinato Moses an epwe tumunu ekkewe chon Israel, nge rese chok aneasosich ngeni Moses iteitan. Stephen a apasa pwe Moses a usun Jises Kraist. Kot a tinato Jises an epwe tumunu Noun aramas, nge ekkewe souemwen rese aneasosich I. Ekkewe souemwen ra song ngeni Stephen.

Foffor 7:20–43, 51–54

Ureno ren ewe Ngun mi Fel, Stephen a sacheta nang. A kuna Jises Kraist a ukuta peniefichin Samach won Nang.

Föfför 7:55–56

Nupwen Stephen a ereni ekkewe souemwen met ra kuna, ra fen wesen song. Ra puchor non ar ningeringer me turufi Stephen. Iwe ra urau i nukun ewe neni.

Föfför 7:57

Ra isetiw ufer kewe won pechen emon mwan itan Saul. Iwe ra monei ngeni Stephen faw an epwe mano. Saul a tipeeu ngeni met ra fori. Stephen a iotek. A tingor ngeni ewe Samon epwe omusano tipisin ekkewe aramas ekkewe ra ni. A pwan tingorei ewe Samon epwe angei ngunun non nang.

Foffor 7:59–60; 8:1