Matthew 26; Luke 22; John 13–14

Ewe Saingon Faf

Jises a ngeni kich ewe sakrament

Jises me Neun kewe Aposel ra nomw Jerusalem ar repwe apwapwai ewe Passover. Ekkewe aramasen Jew rakan apwapwai Passover iteiten ier. A anisir ar repwe chechemeni pwe, chommong ier a no, ar kewe famini ra chon angang weires non Egypt, me Kot a anisir ne suno.

Exodus 12:27

Nupwen ar nomw Jerusalem, Jises me Neun kewe Aposel a wor ar kametip fengen mi echipwer. Jises a fen esukusuku an epwe aea fengen ei mwongo ngenir.

Luke 22:7–15

Mwirin ra wes me mwongo, Jises a amasoa ew pwon ngeni konik. I a pwopwuta ne tenu apachapachen Neun ewe Aposel.

John 13:4–5

Nupwen a tori an Peter fansoun, a eis pwata Jises a fori ei. Tenu apachapach ina ew mettoch kewe chok chon angang rekan fori.

John 13:6

Jises a apasa pwe a tenu apachapacher pwe epwe ew nenien appiru ngenir. I a mwochen repwe angang me tong fengen nefiner usun chok an a fen tonger. Ika ra fori ei, aramas repwe sinei pwe iir Neun chon kaeo.

John 13:14–16, 34–35

Jises a ereni Neun kewe chon kaeo pwe ekiseno I epwene mano. Peter a apasa pwe i mi mwochen mano fan iten Jises.

John 13:36–38

Nge Jises a fen sinei pwe fansoun weires repwene feito. A apasa ngeni Peter pwe me mwen chuko repwe kokko ewe nesosor mwirin, Peter epwe apasa fan unungat pwe I ese sisinei Jises.

John 13:38

Jises a fen sinei pwe Neun kewe Aposel repwe eurek me nuokus. A pwon pwe Kot epwe tinato ngenir ewe Ngun mi Fel. Ewe Ngun mi Fel epwe oururur, aitir, me anisir ne chechemeni met Jises a fen aiti ngenir. I a apasa ngenir pwe resapw eurek ika nuokus. A apasa, “Ika ouwa tongeiei, anomwu ai kewe annuk.”

John 14:1, 15–16, 26–27

Mwirin Jises a fori mettoch mi amwaramw an epwe anisi Neun kewe Aposel ar repwe chechemeni i iteiten fansoun meinisin. Iwe A ngenir ewe sakrament. Ewin, A efeiechu ewe pinawa, a kinietiw, me a ngeni Neun kewe Aposel. Jises a apasa ngenir pwe repwe ekieki usun Inisin nupwen ra mwongo ewe pinawa. A tungor repwe chechemeni pwe I epwe mano fan iter.

Matthew 26:26; Luke 22:19

Jises mwirin a ninanong ewe wain non ewe kap. I a efeiechu ewe wain me a apasa ngeni kewe Aposel pwe repwe unumi. Jises a apasa ngenir pwe repwe ekieki Chaan nupwen ra unumi ewe wain. I a tungor repwe chechemeni pwe I epwe riafou, pwuu chaan, me mano fan iten metekin me tipisin aramas meinisin pwe sipwe tongeni aier me mwusono.

Matthew 26:27–28; Luke 22:20

Iwe Jises a awewei pwe I a usun efoch ira, me Neun kewe chon kaeo ra usun panan kewe. Ika ewe panan a pachengeni ewe ira, iwe a awora uwan. Ewe panan ese pachengeni ewe ira epwe mano me esapw awora uwan. Jises a mwochen pwe Neun kewe chon kaeo repwe arap I ren ar tong fengen nefiner me apwonueta an kewe annuk.

John 15:4–12

Mwirin an aiti osukuna ekkei mettoch, Jises me Neun kewe Aposel ra kenu echo ken. Ra fetan ngeni ew atake itan Gethsemane.

Matthew 26:30