John 10:1–18.

Jises I ewe Chon Masen Siip mi murinno

“Nei kewe siip ra rong neuwei, me Ngang uwa siner”

Jises a ereni ekkewe aramas non Jerusalem pwe I a usun emon chon masen siip mi murinno. Neun kewe chon kaeo, ika chon tapweno mwirin, iir ra usun Neun siip. Ewe chon masen siip mi nurinno a tongei noun siip. I a sinei iten emon me emon.

John 10:3, 14; nengeni pwan Ilaman 15:13

Kewe siip ra sinei neuwen ewe chon masen siip mi murinno. Nupwen i a kerir, ra ausening me aneasochis.

John 10:4, 27

Ewe chon masen siip mi murinno an tumunu noun kewe siip. I a emwenir ngeni neni mi fetin, usun chok an Jises Kraist emweni kich ngeni manau esemuch.

John 10:9–10, 28

Nupwen pwan emon epwene emon chon angang an epwe tumunu ekkewe siip, iir rese tapweno mwirin, pwokiten iir rese sinei neuwan. Nupwen efeiengaw a waroto, ewe chon angang a suno. I ese pwan ekieki ekkewe siip usun an ewe chon masen siip mi murinno.

John 10:5, 12–13

Ewe chon masen siip mi murinno ese suno nupwen a wor feiengaw. I a nomwetiw an epwe tumunu Neun kewe siip. I mi mwochen fangono manauan fan iter, usun chok an Jises Kraist fangono Manauan fan itach pwe kich sipwe tongeni ani manau esemuch.

John 10:11, 17–18.

Jises a ureni ekkewe aramasen Jerusalem pwe a pwan wor Neun ekkoch siip ra nomw non ekkoch neni. Jises a fen apasa pwe I epwe churir pwan, me iir repwe rong An afanafan. Ewe Puken Mormon a kapas usun an Jises churi ekkoch Neun kewe siip non kewe fenuen Merika.

John 10:16; 3 Nifai 15:11–24