Luke 24:1–12, 36–49; John 20

I a Manausefan

Jises Kraist a okkufu mano fanitach meinisin

Neun Jises kewe chon kaeo ra watiw Inisin ewe non ewe peias. Ir ra mwochen repwe fori chommong ar repwe tumunu Inisin we, nge a kan ngeni Sabbath. Ir ra ekieki repwe niwin safan mwirin ewe Sabbath a wes.

Luke 23:52–56

Non nesossorusich non ewe eunungatin ran mwirin an Jises mano, Mary Magdalene me ekkoch ra feino ngeni ewe peias.

Luke 24:1; John 20:1

Nupwen ra waroto, ir ra kuna pwe ewe fau a pineano ewe peias a fen sekununo. Ir ra feino non ewe peias, me inisin Jises ese nomw ikewe.

Luke 24:2–3; John 20:1

Mary a ereni Peter me John pwe emon a fen angeiano inisin Jises. Peter me John ra sa ngeni ewe peias.

John 20:2–4

Nupwen ir ra tori ewe peias, Peter me John ra feino non. Ir ra kuna pwe inisin Jises ese chiwen nomw. Ewe mangak I a fen tukutuk non mi chok nomw ikewe.

John 20:5–7

Peter me John ra feino ngeni imwer, nge Mary a nomwetiw ren ewe peias, a kechiw. A nenong non ewe peias me a kuna ruemen chon nang. Ir ra eisini pwata a kechiw. A apasa pwe emon a angei inisin Jises, me ese sinei ian a nomw ian.

John 20:11–13

Iwe Jises a feito, nge Mary ese sinei pwe I ewe. Jises a eisini, “Fefin, pwata ka kechiw?” Mary a ekieki pwe I ewe chon atake. A eisini I ika I mi sinei ian inisin Jises a nomw ia.

John 20:14—15

Jises a apasa, “Mary.” A kunu safan. Iei a sinei pwe i Jises. A apasa ngeni I, “Masta.” Jises a tungorei epwe ereni ekkewe ekkoch chon kaeo pwe I epwene feino ngeni Saman non Nang. Mary a kuna ekkewe ekkoch chon kaeo me a erenir pwe i a fen kuna Jises me I a manausefan!

John 20:16–18

Ena nekunionun, chommong ekkewe Aposel ir mei nomw fengen. Ir ra esipano kewe asam, nuokus pwe ekkewe souemwenin Jew repwe achocho ne kuter. Mwitir chok, ir ra kuna Jises a uta nefiner. Akomw ir ra nuokus. Ir ra ekieki pwe I emon ngun. Jises a apasa, “kinamwe epwe nomw remi.”

Luke 24:33–38; John 20:19

Jises a tungorei kewe Aposel repwe atapa peun me pechen. I a mwochen ir repwe sinei pwe I a wor inisin, esapw chok ngunun. I a fen mwongo iik me honeycomb rer. Ekkewe chon kaeo ra fokkun pwapwa ar ewe ra kuna I!

Luke 24:39–44; John 20:20

Iwe Jises a anisi Neun kewe Aposel repwe weweiti ekkewe pukefel ra aiti usun An mano me Manausefan. I a mochen repwe aiti meinisin pwe pwokiten I, ir repwe tongeni aier me repwe musono. Ekkewe Aposel repwe Neun chon pwarata.

Luke 24:44–48

Ewe Aposel Thomas ese nomw ikewe nupwen Jises a feito. I a apasa pwe esapw nuku pwe Jises a manau nukun chok ika i epwe kuna kewe asisinen chufon non Peun kewe.

John 20:24–25

Wanu ran mwirin, ekkewe chon kaeo ra chufengen. Jises a pwato sefan. Ei fansoun Thomas a nomw ikewe.

John 20:26

Jises a tungorei Thomas epwe atapa kewe kinas non Peun kewe me nepekin. I a apasa ngeni Thomas, “Kosapw nukunukumang, nge kopwe nukunuk” Thomas a apasa, “Ai Samol me ai Kot.” Iei Thomas a nuku pwe Jises a manausefan.\ Jises a apasa pwe aramas ra feiech nupwen ir ra nuku, inamwo ika ir rese fen kua I.

John 20:27–29