Luke 2; Matthew 2:1–15

Ewe Chon Amanau a Uputiw

An Kot pwon a fis

Joseph me Mary ra nonom non Nazareth. Mary epwene nouni emon monukon ekiseno. Meinisin ra feino ngeni pusin non nenier repwe takises. Wewen ei pwe Joseph me Mary repwe feino ngeni Bethlem, non nenien Joseph. Repwe sai non fansoun nakatam ngeni ikewe.

Luke 2:1–5

Ewe sai ese mecheres ngeni Mary. Pokiten a chommong aramas ra feino ngeni Bethlehem, Mary me Joseph rese tongeni kuna eu neni Mary epwe nouni noun we monukon ie.

Luke 2:6–7

Ra kuna eu neni ewe nenien maan. Non ei tipetekisonen neni, Jises a uputiw ie. Mary me Joseph ra tongei me tumunu ewe monukon Jises. Ra tukumano I non apan epwe anisi I an epwe pwichikar me kinamwe. Ra akonatiw epwe anut non ewe nenien enen maan, ikewe ie ra amongoni maan non.

Luke 2:6–7

Kukuto, ekkewe chon masen siipw ra mamasa nour kewe siipw non ewe pwinin. Mwitir chok, eu waten saram a asaramereno, me we chon nang a pwato. Ekkewe chon masen siipw ra nuokus.

Ewe chon nang a erenir osap nuokus, pun a wor eu porous mi murino! Ewe Chon Amanau afen uputiw non Bethlehem, me ra tongeni kuna a kokon non ewe nenien amongon maan. A chommong chon nang ra feito, me apasa, “Mwareiti Kot non nang mi fokkun tekia, o kinamwe won fonufan ngeni ekkewe mi apwapwai I.”

Luke 7:14–15

Ekkewe chon masen siipw ra mwitir ngeni Bethlehem me kuna ewe monukon Jises, usun chok met ewe chon nang a apasa. Ra aporousa ngeni aramas usun ewe amwararen mettoch ra kuna me rong. Ra sinei pwe Jise i emon semirit mi unusen auchea.

Luke 2:16–17

Mary me Joseph ra uwei ewe monukon Jises ngeni ewe tempel ne uweiato ngeni Kot. Ikewe ra churi emon mwan itan Simeon. Ewe Ngun mi Fel a ereni Simeon pwe epwe churi ewe Chon Amanau me mwen epwe mano. A eki ewe monukon me apasa Jises epwe angasano meinisin noun Kot semirit. Joseph me Mary ra ingeno ren met a apasa.

Luke 2:22–35

Ren ewe tempel mi pwan wor emon aramas itan Anna. Ounuwan a mano non chommong ier ano. Iei Anna a pin ngeni Kot non anein manauan non ewe tempel. A kinisou ngeni Kot ren ewe tufich a churi ewe Chon Amanau. Nupwen a churi emon akan ukuti ewe Chon Amanau, a erenir usun Jises.

Luke 2:36–38

Nupwen Jises a uputiw, ekkewe soutipachem non pwan eu neni ra kuna ewe minefon fuu. Ra sinei wewen pwe emon semieirit mi murino a uputiw i ewe Noun Kot me Chon Amanauen fonufan. Ra poputani ar nakatamen sai repwe churi ewe semirit me pin ngeni I. Ra mochen repwe uweiato ngeni I ar kewe niffang me pwarata ar tongei.

Matthew 2:1–7; see Joseph Smith Translation in notes, 2a

Mwirin ar sai non fansoun nakatam, ekkewe soutipachem ra feito ngeni Jerusalem. Ra apasa pwe ewe minefon kingen Jews, ewe Chon amanau, afen uputie, me ra feito repwe pin ngeni I. Ra eis ian repwe tongeni kuna me ia ewe king.

Matthew 2:1–2

Emon king itan Herod a rong pwe ekkewe soutipachem ra kukuta emon minefon king. A fokkun noninen. Noun kewe pris me scribe ra ereni pwe ewe pukefel a apasa pwe ewe minafon king epwe uputiw non Bethlehem. Herod a ereni ekkewe soutipachem repwe kuta non Bethlehem me niwinsefan me ereni nupwen ra kuna ewe minefon king.

Matthew 2:3–8

Ekkewe soutipachem ra feito ngeni Bethlehem. Ra tapwei ewe fuu, mine a emwenir ngeni Jises. Nupwen ra kuna I me Mary me Joseph, ra ngeni Jises unungat niffang mi fokkun murino me pin ngeni I. Kot a erenir pwe resap niwinsefan ngeni Herod, iwe ra feino won efoch aan.

Matthew 2:9–12

Mwirin ekkewe soutipachem ra feino, Joseph a tan. Non ewe tan, emon chon nang a ereni Joseph pwe Herod a fokkun song. Joseph epwe uweiano Mary me Jises ngeni Egypt pwe repwe tumun.

Matthew 2:13

Joseph a mwitir pwata. A feino ngeni Egypt fiti Mary me Jises nupwen achok pwin.

Matthew 2:14

Mary, Joseph, me Jises ra nom non Egypt tori an ewe chon nang erenir pwe Herod a mano me a tumun ar repwe niwin. Iwe ra niwinsefanino nonom non Nazareth.

Matthew 2:15, 19–23