“Fakatapui,” Ngaahi Tefitó mo e Ngaahi Fehuʻí (2023)
Vakai Fakalūkufuá
Fakatapui
ʻOku ʻuhinga ʻa e fakatapui ha meʻá ke foaki kakato ia ki ha taumuʻa toputapu. Kuo fakatapui ʻe he kāingalotu ʻo e Siasí ʻi he kuonga kotoa pē ʻa e ngaahi talēnití, taimí, mo ha ngaahi maʻuʻanga tokoni ke fokotuʻu mo langa hake ʻa e puleʻanga ʻo e ʻOtuá ʻi he māmaní.
Ki ha fakamatala fekauʻaki mo e founga kuo moʻui ʻaki ai ʻe he kakai ʻa e ʻEikí ʻa e fono ʻo e fakatapuí ʻi he kuohilí, vakai ki he “Fakatapuí mo e Lakanga Tauhí.”
ʻI he ʻaho ní, ʻoku kole ki he Kau Māʻoniʻoni ʻi he Ngaahi ʻAho Kimui Ní ʻoku maʻu honau ʻenitaumení ʻi ha temipalé ke fakahoko ha fuakava ke fakatapui honau ngaahi talēnití, taimí, mo e koloá ki he ʻOtuá. ʻOku nau fakahoko ia ʻi ha ngaahi founga kehekehe, kau ai ʻa e kau ki he ngāue ʻo e fakamoʻuí mo e hakeakiʻí, ʻa ia ʻoku kau ai ʻa e ngāue fakaetauhi ki he niʻihi kehé, vahevahe ʻa e ongoongoleleí, totongi vahehongofulú, fua faivelenga ʻo e ngaahi uiuiʻí, mo tokangaekina ʻo kinautolu ʻoku faingataʻaʻiá. ʻI he meʻa kotoa pē ʻoku nau faí, ʻoku nau foaki honau lelei tahá ki he ʻEikí.
Ko kinautolu ʻoku fakatapui fakamātoato honau ngaahi talēnití, taimí, mo e maʻuʻanga tokoní ki he ʻEikí, ʻoku nau fakatapui ai kinautolu kiate Ia. Naʻe akonaki ʻa ʻEletā Niila A. Mekisuele ʻo pehē: “ʻOku tau faʻa lau pē ko e fakatapuí ko ha tukuange ia ʻetau koloa fakaemāmaní ʻi he taimi ʻoku tuʻutuʻuni fakalangi mai aí. Ka ko e tumutumu ʻo e fakatapui moʻoní ko hono fakamoʻulaloaʻi kita ki he ʻOtuá.” Kuo akoʻi ʻe Palesiteni Lāsolo M. Nalesoni ʻoku tau fakahoko ʻeni ʻi heʻetau ʻai ʻa e ʻOtuá “ko e ivi tākiekina mālohi taha ʻi heʻetau moʻuí.”