“Heli,” Ngaahi Tefitó mo e Ngaahi Fehuʻí (2023)
Vakai Fakalūkufuá
Heli
ʻOku fakamatala ʻa e ngaahi fakahā ʻi he ngaahi ʻaho kimui ní ʻo fekauʻaki mo heli ʻi ha founga ʻe ua pe lahi ange. ʻUluakí, ko ha hingoa ia ʻe taha ki he fale fakapōpula ʻo e ngaahi laumālié, ko ha feituʻu fakataimi hili ʻa e māmani fakamatelié maʻanautolu kuo pekia teʻeki ke nau ʻilo ki he moʻoní pe ko kinautolu naʻe talangataʻa ʻi he moʻui fakamatelié. Uá, ko e nofoʻanga tuʻuloa ia ʻo Sētane mo hono kau muimuí pea mo e ngaahi foha ʻo e malaʻiá, ʻa ia ʻoku ʻikai huhuʻi ʻe he Fakalelei ʻa Sīsū Kalaisí.
Ko e fale fakapōpula ʻo e ngaahi laumālié ko ha tuʻunga fakataimi ia ʻa ia ʻe akoʻi ai ʻa e ongoongoleleí ki he ngaahi laumālié pea nau maʻu ai ʻa e faingamālie ke fakatomala mo tali ʻa e ngaahi ouau ʻo e fakamoʻuí ʻa ia ʻoku fakahoko maʻanautolu ʻi he ngaahi temipalé. Ko kinautolu te nau tali ʻa e ongoongoleleí, te nau lava ʻo nofo ʻi palataisi kae ʻoua kuo hoko ʻa e Toetuʻú. Hili ʻenau toetuʻú mo hono fakamāuʻí, te nau maʻu ha tuʻunga ʻo e nāunaú ʻa ia ʻoku taau mo kinautolú. Ko kinautolu ʻoku ʻikai ke nau fili ke fakatomalá ka ʻoku ʻikai ko e ngaahi foha ʻo e malaʻiá, te nau nofo pē ʻi he fale fakapōpula ʻo e ngaahi laumālié ʻo aʻu ki he ngataʻanga ʻo e Nofotuʻí, ʻa ia ʻe fakatauʻatāinaʻi ai kinautolu mei heli mo e tauteá pea nau toetuʻu ki ha nāunau fakatilesitiale.
Ko e ngaahi foha ʻo e malaʻiá ʻa kinautolu ʻoku “ʻikai hanau fakamolemole ʻi he māmaní pe ʻi he maama ka hoko maí—kuo nau fakaʻikaiʻi ʻa e Laumālie Māʻoniʻoní hili ʻenau maʻu iá, pea nau fakaʻikaiʻi ʻa e ʻAlo pē Taha naʻe Fakatupu ʻo e Tamaí, kuo nau kalusefai ia ʻi he ʻakau ʻiate kinautolu mo fai fakahāhā hono fakamāʻí.” ʻE ʻikai maʻu ʻe he faʻahinga peheé ha potu ʻi ha faʻahinga puleʻanga pē ʻo e nāunaú; ʻe kei hokohoko atu ai pē ʻenau ʻi he ngaahi tūkunga ʻo helí.