ikona e të mësuarit

Mësoni – Koha Maksimale: 45 Minuta

shkalla

Lexoni:Një kërkim i suksesshëm për vend pune ndjek këtë formulë të thjeshtë:

Veproni me Besim + Punoni Fort + Punoni me Mençuri = Sukses

Aftësitë për intervistë ju ndihmojnë të punoni më me mençuri. Ngaqë intervistat janë kaq të rëndësishme, ne do t’ia kushtojmë tre kapitujt e tjerë mësimit e ushtrimit të aftësive për intervista.

Kërkimi i Xhoshit për Vend Pune

Lexoni:Lajme të tjera të mira. Xhuli nga kompania ABC Marketing i telefonoi Xhoshit pasi mori jetëshkrimin dhe letrën paraqitëse të tij. Ajo caktoi një intervistë me të pas dy ditësh për vendin e punës të një tekniku në zyrën e ndihmës. Xhoshi gjithmonë ka qenë nervoz gjatë intervistave për vend pune dhe është i shqetësuar se çfarë pyetjesh mund t’i bëjë Xhuli. Ai është krejt i sigurt se nuk i bëri mirë dy intervistat që ka pasur deri tani, po nuk është i sigurt se çfarë mund të përmirësojë. Xhoshi do që të jetë i përgatitur.

Diskutoni:Në çfarë mënyrash mund të jeni të ngjashëm me Xhoshin?

Shikoni:“The Interview” [“Intervista”], në dispozicion te srs.lds.org/videos. (Nuk keni material filmik? Lexojeni faqen 109.)

ikona e videos

Lexoni:Intervistat janë një nga hapat e fundit në marrjen e një vendi pune. Qëllimi i një interviste është të marrim një ofertë për vend pune. Zoti ka premtuar: “Nëse jeni të përgatitur, ju s’do të frikësoheni” (DeB 38:30). Nëse përgatiteni mirë, ju mund ta zëvendësoni frikën me vetëbesim.

Në këtë kapitull do të mësoni të punoni me mençuri duke zhvilluar aftësitë e mëposhtme për intervistat:

1. Përgatituni përpara intervistës.

2. Hapeni intervistën efektshëm.

3. Përdoreni deklaratën tuaj Unë në 30 sekonda.

4. Përdorni pohime fuqie.

1. Përgatituni Përpara Intervistës

Lexoni:A nuk do të ishte e mirë ta dinit se çfarë pyetjesh do t’ju bëheshin në një intervistë?

Ju mundeni.

Shumica e intervistuesve do të bëjnë një gërshetim pyetjesh të zakonshme interviste dhe pyetjesh të posaçme për vendin e punës. Ju e dini tashmë se si të përcaktoni nevojat e punëdhënësit, kështu që mund ta përdorni atë aftësi për ta kuptuar se çfarë ka gjasa t’ju kërkojë punëdhënësi. Për shembull, Xhoshi është mjaft i sigurt se do ta pyesin rreth shërbimit ndaj klientit, ndreqjes së defekteve dhe komunikimit të gjërave teknike me fjalë të thjeshta.

Veprimtari _{(3 minuta)}

Shikoni te përshkrimi i vendit të punës që sollët me vete, ose mendoni për vendin e punës që doni. Shkruani dy pyetje që mendoni se një intervistues mund t’ju pyesë dhe mandej tregojani grupit.

1.

2.

2. Hapeni Intervistën Efektshëm

Lexoni:Kur filloni një intervistë, ka disa gjëra të thjeshta që mund të bëni për të lënë një mbresë të parë të shkëlqyer. Si grup lexoni me radhë më poshtë listën e gjërave që duhen bërë e që nuk duhen bërë.

Bëni	Mos bëni
Vishuni një nivel më lart se standardi i veshjes i kompanisë.	Vishuni tepër thjeshtë.
Mbërrini 5–10 minuta më herët.	Jini me vonesë ose më shumë se 10 minuta herët.
Përdorni gjuhë trupore pozitive.	Përdorni gjuhë trupore negative.

Veprimtari _{(3 minuta)}

Krahasoni figurat më poshtë. Në të dyja figurat personi në të majtë është atje për një intervistë. Si grup, diskutoni se çfarë përshtypjeje po lë punëkërkuesi në secilën figurë.

i papërgatitur për intervistë

i përgatitur për intervistë

3. Përdoreni Deklaratën Tuaj Unë në 30 Sekonda

Lexoni:Shpesh një nga pyetjet e para të intervistës që do t’ju bëhet, është: “Më tregoni për veten”. Një deklaratë Unë në 30 Sekonda, e përshtatur në një situatë interviste, është një përgjigje e shkëlqyer për këtë pyetje. Deklarata Unë në 30 Sekonda për një intervistë është paksa e ndryshme. Për shembull, zakonisht ju nuk keni nevojë ta përdorni emrin tuaj. Dhe në vend që të kërkoni rekomandime siç do të bënit në rrjetin e krijuar, ju e mbyllni duke treguar interes për kompaninë ose pozicionin.

Veprimtari _{(4 minuta)}

Le t’i lexojmë dy shembujt e njerëzve që u përgjigjen pyetjeve në hapje të intervistës. Zgjidhni role dhe interpretoni pjesën vijuese.

Shembulli i Keq

Intervistuesi: “Përpara se të fillojmë, ju lutem më tregoni pak rreth vetes suaj”.

Punëkërkuesi: “E po, unë u rrita në Kanzas si pjesë e një familjeje të madhe. Jam i martuar dhe kam tre fëmijë dhe një qen të vogël. Neve na pëlqen të udhëtojmë dhe kalojmë sa më shumë kohë që mundemi te liqeni. Vitin e kaluar sapo blemë një barkë të re. Ishte goxha e shtrenjtë, gjë që është një nga arsyet pse po kërkoj punë. Kam shumë përvojë në të punuarit me njerëz. Unë fillova 20 vite përpara, kur isha 19 vjeç, si arkëtar në një bankë. Kështu mësova goxha rreth parasë dhe financave. Për shembull, mësova se bankat nuk i mbajnë paratë tuaja; ato vetëm i marrin dhe mandej i japin hua përsëri për të krijuar interesin. Sidoqoftë, unë e bëra këtë për disa vite dhe mandej shkova në kolegj. Nuk isha shumë i mirë në shkollë. Mua vërtet nuk më pëlqente studimi. Mora një vend pune në biznesin e marketingut të një miku. Unë bëra kryesisht punë administrative – ju e dini, si përgjigje të telefonave, postën, mbledhjet, gjëra të tilla. Por të punuarit me miq jo gjithmonë funksionon, kështu që e lashë atë pozicion dhe kërkova diçka më të mirë. Le ta shohim … punova në disa vende të tjera, por nuk i kujtoj dot emrat e tyre. Oh, vendi i punës më i mirë që pata, ishte ky pozicioni i shërbimit ndaj klientit ku punova nga shtëpia. Unë mund të punoja me pizhame, t’i përgjigjesha telefonit dhe thjesht të punoja në kompjuterin tim. Ajo ishte vërtet mirë. Sidoqoftë, mua më pëlqen të punoj dhe i pëlqej njerëzit. Unë do të bëj një punë të mirë për ju.”

Shembulli i Mirë

Intervistuesi: “Përpara se të fillojmë, ju lutem më tregoni pak rreth vetes suaj”.

Punëkërkuesi: “Pra, karriera ime 20‑vjeçare ka qenë kryesisht në financë dhe punë bankare. Unë fillova si arkëtar në një bankë vendore dhe mandej përparova në menaxhim. Shpejt e kuptova vlerën e arsimimit dhe përfundova një diplomë për financë. Unë shquhem në menaxhimin e njerëzve, kostove dhe arritjen e synimeve të shitjes. Për shembull, në pozicionin tim të mëparshëm mora përsipër një degë që ishte me probleme, dhe brenda gjashtë muajsh po tejkalonim synimet tona për shitjet. Unë jam i interesuar për këtë pozicion, sepse duket se mund të jetë një sfidë e ngjashme.”

Diskutoni:Përse ishte shembulli i dytë më i mirë?

Veprimtari _{(4 minuta)}

Shikoni përshkrimin e vendit të punës që sollët me vete, ose mendoni për vendin e punës që doni. Përfytyroni që do të keni intervistë pas dy ditësh për atë pozicion. Në hapësirën më poshtë shkruani një deklaratë Unë në 30 Sekonda në përgjigje të kërkesës: “Më tregoni rreth vetes suaj”. Mandej ndahuni në dyshe dhe tregojani atë partnerit tuaj në veprim.

4. Përdorni Pohime Fuqie

Lexoni:Pohimet e fuqisë duhet të përdoren për t’iu përgjigjur shumicës së pyetjeve të intervistave. Ato janë mbresëlënëse e të fuqishme dhe do t’ju ndihmojnë të dilni në pah si zgjedhja e qartë.

Kujtohuni të ndiqni formulën e pohimit të fuqisë:

formula e pohimeve të fuqisë

Veprimtari _{(4 minuta)}

Le t’i lexojmë këta shembuj intervistash nga kapitulli 4 përsëri. Zgjidhni role dhe interpretoni pjesën vijuese.

Shembulli Mesatar

Intervistuesi: “Më tregoni rreth një kohe kur ju ofruat një shërbim të shkëlqyer ndaj klientit”.

Punëkërkuesi 2: “Shërbimi ndaj klientit është shumë i rëndësishëm për mua. Klientët janë çelësi i suksesit tonë të vazhdueshëm. Unë kam parë gjithmonë se nëse klientët trajtohen si duhet, ata do t’ju shpërblejnë me biznes të vazhdueshëm. Unë kam shumë përvojë me shërbimin ndaj klientit dhe jam shumë i mirë për këtë. Klientët duan të dëgjohen dhe ta dinë se janë dëgjuar. Është e rëndësishme që ne të bëjmë më të mirën për ta bërë siç duhet që herën e parë dhe ta ndreqim sa më shpejt që është e mundur kur bëjmë gabim. Unë besoj te thënia se klienti ka gjithmonë të drejtë.”

Shembulli i Mirë

Intervistuesi: “Më tregoni rreth një kohe kur ju ofruat një shërbim të shkëlqyer ndaj klientit”.

Punëkërkuesi 3: “Unë jam shumë i aftë në shërbimin ndaj klientit. Për shembull, kur punoja për YZ Sales, ne patëm një klient afatgjatë, i cili, në një rast, nuk mori atë që pati porositur. Kur më telefonoi, ai ishte i nevrikosur dhe kërcënoi se do ta ndërpriste gjithë punën e tij me ne. Unë i kushtova kohë për ta dëgjuar dhe kuptuar gjendjen e tij dhe mandej ofrova një zgjidhje që klientit i pëlqeu. Si rezultat, ne jo vetëm që e mbajtëm klientin, por ai i shtoi porositë e tij te ne me 200 për qind. Unë jam i sigurt se po këto aftësi shërbimi ndaj klientit mund t’i vë në punë për ju.”

Diskutoni:Si e bëri përdorimi i një pohimi fuqie më të efektshëm shembullin e dytë?

Veprimtari _{(6 minuta)}

Përfytyroni sikur tani jeni më thellë në intervistë. Intervistuesi ka gjasa se do t’ju bëjë disa pyetje të zakonshme interviste. Shkruani pohime fuqie për secilën nga pyetjet e mëposhtme.

Cila është një nga pikat tuaja të forta?

Cila është arritja juaj profesionale më e madhe?

Përse duhet t’ju marrim në punë?

Veprimtari _{(6 minuta)}

Si grup lexoni të gjitha udhëzimet, mandej filloni veprimtarinë.

Hapi 1: Ngrihuni që të gjithë dhe lëvizni te një vend i hapur për një ushtrim shpejtësie. Çdo person duhet të jetë përballë një personi tjetër.

Hapi 2: Personi i parë bën një nga tre pyetjet e faqes 105.

Hapi 3: Personi i dytë i përgjigjet pyetjes duke përdorur një pohim fuqie.

Hapi 4: Jepni përshtypje:

• A tregoi personi një shembull me rezultat?

• A ju la mbresa?

Hapi 5: Ndërrojini rolet dhe përsëriteni.

Hapi 6: Ndërroni partnerë dhe përsëriteni veprimtarinë pesë herë.

Përfundimi

Diskutoni:Cilat ishin gjërat më të rëndësishme që mësuat nga ky kapitull?

Lexoni:Ju keni filluar të mësoni disa aftësi interviste që do t’ju ndihmojnë të punoni me mençuri.

Veproni me Besim + Punoni Fort + Punoni me Mençuri = Sukses

Nëse jeni i përgatitur, nuk ka përse të keni frikë. Lutuni për ndihmë dhe mandej përgatituni dhe ushtrohuni sa më shumë që mundni. Në kapitullin tjetër do të mësojmë më shumë aftësi për intervistat.