“Laj Jose ut laj Oliver neke’xk’ul xlaawil li tijonelil,” Eb’ li Seraq’ sa’ li Tzol’leb’ ut Sumwank (2024)
“Laj Jose ut laj Oliver neke’xk’ul xlaawil li tijonelil,” Eb’ li Seraq’ sa’ li Tzol’leb’ ut Sumwank
Abril re 1836
Laj Jose ut laj Oliver neke’xk’ul xlaawil li tijonelil
Li Jesukristo ut eb’ li anjel neke’rula’ani li santil ochoch re Kirtland
Jun xamaan chik chirix lix q’axtesinkil li santil ochoch re Kirtland, jun mil laj santil paab’anel ke’ch’utla sa’ li santil ochoch re xloq’oninkil li Kolonel. A’an chaq li domingo re Paswa. Laj Jose Smith, laj Oliver Cowdery, ut eb’ li Kab’laju chi Apostol ke’xk’e li loq’laj wa’ak reheb’ laj santil paab’anel.
Tzol’leb’ ut Sumwank 110, xjolomil li tasal; Santos, 1:239
Chirix li loq’laj wa’ak, laj Jose ut laj Oliver ke’xsik’ jun ch’anch’ookil na’ajej sa’ li santil ochoch, chirix jun ramleb’ saqen, re tijok.
Tzol’leb’ ut Sumwank 110, xjolomil li tasal; Santos, 1:239
Naq ke’raqe’ chi tijok, ke’xtaqsi li rilob’aal. Li Jesukristo xaqxo chiruheb’! Kixnaw naq laj santil paab’anel ke’k’anjelak chi kaw re xkab’lankil li santil ochoch. “Xink’ulub’a li ochoch a’in,” chan. Li Jesus kixye re laj Jose ut laj Oliver naq li rosob’tesihom li santil ochoch tixk’am chaq xsahileb’ xch’ool naab’al li kristiaan.
Chirix naq ki’el li Jesus, li profeet aj Moises, re li Najter Chaq’rab’, kixk’utb’esi rib’ chiru laj Jose ut laj Oliver. Kixq’axtesi lix laawil li tijonelil re xch’utub’ankil Israel reheb’ a’an. A’an naraj naxye naq te’ruuq chixb’eresinkil li k’anjel re xjultikankil li evangelio. Te’ruuq chik chixtaqlankileb’ misioneer sa’ chixjunil li ruchich’och’ re xk’amb’aleb’ chaq li kristiaan sa’ lix Iglees li Kolonel.
Chirix a’an, laj Eliyah kixk’utb’esi rib’. Kixk’e re laj Jose ut laj Oliver, li laaw re xk’ojob’ankil wi’chik lix sumwank laj Abraham. A’an naraj naxye naq laj santil paab’anel te’ruuq chixk’ulb’al rik’in li Qaawa’ li sumwank kixk’ul laj Abraham. Te’wanq xwankil re xk’amb’al li evangelio ut li rosob’tesihom li Dios reheb’ li kristiaan yalaq ta b’ar chiru li k’iila chihab’ chalel.
Sa’ xraqik, laj Elias kixk’utb’esi rib’. Kixk’e re laj Jose ut laj Oliver lix laawil li tijonelil re li tz’apok sa’ junajil malaj xjunajinkileb’ li junkab’al choq’ re li junelik q’e kutan. Li k’anjel neke’xb’aanu laj santil paab’anel sa’eb’ li santil ochoch te’k’ulub’amanq sa’ li choxa. Anajwan li Iglees wan xwankil re xb’aanunkil lix k’anjel li Kolonel ut re karwresink choq’ re li hoonal naq taak’ulunq wi’chik sa’ li ruchich’och’.