“Laj Sidney ut li xPhebe Rigdon,” Eb’ li Seraq’ sa’ li Tzol’leb’ ut Sumwank (2024)
“Laj Sidney ut li xPhebe Rigdon,” Eb’ li Seraq’ sa’ li Tzol’leb’ ut Sumwank
Octubre–noviembre re 1830
Laj Sidney ut li xPhebe Rigdon
Neke’xjal lix yu’ameb’ re xk’ulub’ankil li evangelio
Laj Parley Pratt ut wankeb’ chik xkomon li kristiaan yookeb’ chi xik chixwotzb’al li evangelio rik’ineb’ laj ral ch’och’ aj Estados Unidos. Sa’ li b’e, laj Parley kiraj xaqliik ut rula’aninkil laj Sidney Rigdon, li ramiiw. Laj Sidney a’an jun aj jultikanel aatin li kik’utuk chiru laj Parley chirix li Jesukristo sa’ li Santil Hu. Anajwan laj Parley kiraj xtzolb’al laj Sidney chirix li Jesus ut chirix lix Hu laj Mormon.
Tzol’leb’ ut Sumwank 32; Santos, 1:99
Laj Parley kiraatina laj Sidney chirix lix Hu laj Mormon ut kixb’oq chirilb’al. Laj Sidney moko jwal kiraj ta, a’b’an xb’aan naq laj Parley a’an jun ramiiw, kixye naq tixb’aanu.
Santos, 1:100
Naq laj Sidney kiril lix Hu laj Mormon, kixnaw naq nachal chaq rik’in li Dios. Kixwotz li reek’ahom rik’in li rixaqil, xPhebe.
Santos, 1:101
A’b’an laj Sidney ink’a’ naxnaw k’a’ raj chik ru naru naxb’aanu. Wi nakub’e xha’, ink’a’ raj chik taaruuq chi trab’ajik jo’ aj jultikanel aatin sa’ lix iglees. K’a’ raj ru tixb’aanu re rilb’al li xPhebe ut lix waqib’ chi kok’al? K’a’ raj ru te’reek’a li kristiaan sa’ lix iglees? Kitijok chiru li qaChoxahil Yuwa’ re xpatz’b’al xtenq’ankil ut kireek’a xtuqtuukilal.
Santos, 1:101; Tzol’leb’ ut Sumwank 19:23
Laj Sidney kixpatz’ re li xPhebe ma wan xch’ool chixkanab’ankil lix chaab’il wanjik ut ok sa’ li ak’ Iglees a’in rochb’een a’an. “A’an li wajom xb’aanunkil li rajom li Dios,” chan, “ma re li yu’am malaj re li kamk.” Ke’xsik’ ru kub’eek xha’.
Santos, 1:101
Chirix chik a’an, laj Sidney kixnaw ru li profeet aj Jose Smith. Li Qaawa’ kixk’e jun esil re laj choq’ re laj Sidney. Kixye naq xril li k’a’ru us yoo chixb’aanunkil laj Sidney ut kirab’i lix tij. Li Qaawa’ kixye re laj Sidney naq wan jun xk’anjel a’an choq’ re. Ninq li k’a’aq re ru tixb’aanu laj Sidney.