Octubre re 1830–febrero re 1831

Laj Newel ut li xAnn Whitney neke’xnaw ru li profeet aj Jose

Li tijok chi wan li paab’aal sumenb’il xb’aan li Qaawa’

Li xAnn ut laj Newel Whitney wan jun xk’ayib’aaleb’ aran Kirtland, Ohio. Naq yoo chi k’iik, li xAnn ink’a’ nawulak sa’ junaq iglees chi moko kitzolok chirix li Qaawa’, a’ut kiraj xnawb’al ru a’an. Chirix naq kisumla rik’in laj Newel, ke’tijok chi kok’ aj xsa’ ut ke’xtz’aama re li Qaawa’ naq a’an tixb’eresiheb’.

Santos, 1:111–12

Sa’ jun q’ojyin naq yookeb’ chi tijok, li xAnn ut laj Newel ke’ril jun k’utb’esinb’il matk’. Sa’ li k’utb’esinb’il matk’, jun choql kikana sa’ xb’een li rochocheb’. Ke’nujak rik’in lix Musiq’ li Dios. Li choql kixsuteb’ rix. Toja’ naq ke’rab’i jun xyaab’ kuxej nachal chaq sa’ choxa. Kixye reheb’, “Kawresihomaq eerib’ re xk’ulb’al li raatin li Qaawa’, xb’aan naq chal re.”

Santos, 1:111

Chirix wiib’ oxib’ kutan, kiwulak laj Parley Pratt aran Kirtland. A’an ut eb’ li rochb’een yookeb’ chixjultikankil lix evangelio li Jesukristo. Naq li xAnn kirab’i li ke’xk’ut, kixnaw sa’ junpaat naq yaal a’an. Kisutq’i sa’ rochoch re xwotzb’al li esil a’an rik’in laj Newel. Moqon ke’kub’e xha’.

Santos, 1:112

Wiib’ po chik chirix a’an, ke’chal jun winq ut jun ixq sa’ lix k’ayib’aal laj Newel. Laj Newel ink’a’ naxnaweb’ ru, a’b’an li winq kixchap li ruq’ laj Newel ut kixye xk’ab’a’ laj Newel. “Laa’in laj Jose li profeet,” chan li winq. A’an kixye naq li Qaawa’ yoo chixsumenkileb’ lix tij laj Newel. A’an kixtaqla li xEmma ut laj Jose aran re xnawb’al ru li xAnn ut laj Newel.

Santos, 1:113

Laj Newel ut xAnn ke’xk’e reetal naq yoo chi tz’aqlok ru li k’utb’esinb’il matk’ ke’xk’ul. Ke’xpatz’ re laj Jose ut li xEmma naq te’kanaaq rik’ineb’ sa’ rochocheb’. Li xAnn ut laj Newel ke’xra li Jesus ut lix evangelio. Ke’xk’e reheb’ laj santil paab’anel ut re lix Iglees li Kolonel chixjunjil li wan reheb’.

Tzol’leb’ ut Sumwank 38:23–27, 34–42; Santos, 1:114