“Laj Jose ut laj Sidney neke’tzolok chirix li choxa,” Eb’ li Seraq’ sa’ li Tzol’leb’ ut Sumwank (2024)
“Laj Jose ut laj Sidney neke’tzolok chirix li choxa,” Eb’ li Seraq’ sa’ li Tzol’leb’ ut Sumwank
Febrero re 1832
Laj Jose ut laj Sidney neke’tzolok chirix li choxa
Jun k’utb’esinb’il na’leb’ chirixeb’ li rosob’tesihom li Dios choq’ reheb’ li ralal xk’ajol
Sa’ jun kutan, laj Jose Smith ut laj Sidney Rigdon yookeb’ chirilb’al li Santil Hu. Ke’ril li nak’ulman rik’ineb’ li ani neke’kam. Laj Jose ut laj Sidney ke’xk’oxla rix li ke’ril, ut ke’raj xtzolb’al xkomon chik li na’leb’.
Li Qaawa’ kixk’utb’esi chiruheb’ a’an jun matk’ k’a’jo’ xnimal ru. Ke’ril li qaChoxahil Yuwa’ ut li Jesukristo chi sutinb’ileb’ rix xb’aaneb’ li anjel. Ut ke’rab’i jun xyaab’ kuxej li kixye naq li Jesus a’an li Ralal li Dios. Li xyaab’ kuxej kixye naq li Jesus kikam sa’ qak’ab’a’, toja’ naq kiwakli chi yo’yo. Xb’aan naq kiwakli a’an, laa’o ajwi’ toowakliiq chi yo’yo.
Tzolʼlebʼ ut Sumwank 76:19–24, 39–43
Laj Jose ut laj Sidney ke’xtzol naq chirix naq toowakliiq chi yo’yo, toowanq sa’ jun reheb’ oxib’ chi awa’b’ejihom sa’ choxa. Li ani ink’a’ neke’xk’ulub’a lix evangelio li Jesukristo te’xik sa’ li teleestil awa’b’ejihom. Li Qaawa’ kixjuntaq’eeta li awa’b’ejihom a’in rik’in xsaqenkileb’ li chahim.
Laj Jose ut laj Sidney ke’ril ajwi’ jun chik li awa’b’ejihom, li terrestil awa’b’ejihom nayeeman re. Sa’ li awa’b’ejihom a’in te’wanq li ani chaab’ileb’ xyu’am a’ut ink’a’ neke’xpaab’ chi anchaleb’ xch’ool lix evangelio li Jesukristo. Li moko kaw ta xpaab’aaleb’ chirix li Jesukristo. Li Qaawa’ kixjuntaq’eeta li awa’b’ejihom a’in rik’in xsaqenkil li po.
Li awa’b’ejihom jwal taqenaq, a’an li choxahil awa’b’ejihom. Eb’ li te’wanq sa’ li awa’b’ejihom a’in neke’ok sa’ sumwank, malaj sa’ aatin, rik’in li Dios, ut neke’xpaab’eb’ lix sumwank. Neke’xjal xk’a’uxl ut neke’xtaaqe li Jesukristo. Neke’wan rik’in li qaChoxahil Yuwa’ ut li Jesukristo chi junelik ut neke’wulak chi wank jo’eb’ a’an. Li Qaawa’ kixjuntaq’eeta li awa’b’ejihom a’in rik’in xsaqenkil li saq’e.
Li Qaawa’ kixye re laj Jose ut laj Sidney naq ink’a’ te’xye resil chixjunil li ke’ril sa’ li k’utb’esinb’il matk’. A’b’an toj kiraj naq te’xtz’iib’a b’ayaq re a’an ut naq te’xwotz rik’ineb’ li kristiaan. Naab’aleb’ li komon sa’ li Iglees ke’raj xyeeb’al resil li k’utb’esinb’il matk’ chiruheb’ li ras riitz’in.
Tzol’leb’ ut Sumwank 76:113–119; Santos, 1:149–150
Ke’wan li kristiaan ink’a’ nawulak chiruheb’ li k’utb’esinb’il matk’. Jwal jalan jalanq li na’leb’ a’an chiru li na’leb’ ak neke’xpaab’. A’b’an lix k’ihaleb’ laj santil paab’anel ke’saho’ xch’ool chixtzolb’al li k’utb’esinb’il matk’ a’in. A’an kixk’ut chiruheb’ naq li qaChoxahil Yuwa’ naxraheb’ li ralal xk’ajol ut naq a’an kixkawresi jun b’e te’ruuq wi’ chi sutq’iik rik’in.
Santos, 1:149–150