Eb’ li seraq’ sa’eb’ li loq’laj hu
Li ch’utlaak aran Ohio

“Li ch’utlaak aran Ohio,” Eb’ li Seraq’ sa’ li Tzol’leb’ ut Sumwank (2024)

“Li ch’utlaak aran Ohio,” Eb’ li Seraq’ sa’ li Tzol’leb’ ut Sumwank

Diciembre re 1830–mayo re 1831

Li ch’utlaak aran Ohio

Lix paab’aal li xLucy Smith ut jun sachb’a-ch’oolej

Li xLucy Smith ut lix junkab’al neke’xkawresi rib’ re xik aran Ohio.

Aran Ohio, naab’aleb’ li kristiaan yookeb’ chaq chi ok sa’ li Iglees. Li Qaawa’ kixye re laj Jose Smith naq eb’ laj santil paab’anel sa’eb’ li jar na’ajej tento te’ch’utlaaq aran Ohio. Jwal najt li xik toj aran. A’b’an li Qaawa’ kixyeechi’i naq chirix naq ak ch’utch’uuqeb’, a’an tixk’ut lix chaq’rab’ chiruheb’ laj santil paab’anel ut taarosob’tesiheb’ rik’in li wankilal re xb’aanunkil lix k’anjel a’an.

Tzol’leb’ ut Sumwank 37; 38:32; Santos, 1:109–110

Li xLucy ut xkomoneb’ chik li kristiaan neke’ok sa’ jun li jukub’ taaxik aran Ohio.

Lix na’ laj Jose, xLucy, ut 80 chik chi komon sa’ li Iglees ke’el chaq sa’ rochocheb’ aran Nueva York ut ke’q’axon toj aran Ohio. Ke’ok sa’ jun jukub’ li tixk’ameb’ chiru jun raqal xk’ihal li b’e. Chirix wiib’ oxib’ kutan, kiteneb’aak li jukub’ chi xaqliik. Kirame’ xb’eheb’ xb’aan li saq ke sa’ li ha’.

Santos, 1:121–122

Ramb’il xb’e li jukub’ xb’aan li saq ke sa’ li ha’.

Eb’ laj santil paab’anel tento ke’royb’eni naq taajore’q li saq ke. Lub’luukeb’, yoo xtzʼokajikeb’, t’aqt’aqeb’, ut ke neke’reek’a.

Santos, 1:122

Eb’ laj santil paab’anel neke’sach xkuyum ut neke’ok chi wech’ok-ix.

Ch’a’aj li oyb’enink. Ke’wan laj santil paab’anel li ke’ok chixwech’b’al rib’ chirib’ileb’ rib’.

Santos, 1:122

Li xLucy naxye reheb’ laj santil paab’anel naq te’xtz’aama re li Dios naq a’an tixjor li saq ke sa’ li ha’.

Li xLucy naraho’ xch’ool naq kirab’iheb’ laj santil paab’anel chi wech’ink. Kixnaw naq tento tixq’useb’. “B’ar wan b’i’ lee paab’aal?” chan reheb’. Li xLucy kixye reheb’ laj santil paab’anel naq wi te’tz’aamanq chiru li Dios, a’an tixjor li saq ke re naq te’ruuq chixchapb’al wi’chik xb’eheb’.

Santos, 1:122–123

Jun b’e nak’utun sa’ xyi li saq ke.

Sa’ junpaat, ke’rab’i naq wan k’a’ru yoo chi eek’ank jo’ li kaaq naq yoo chi jore’k li saq ke. Kiteeli jun b’e sa’ xyi li saq ke, tz’aqal xnimal re naq taanume’q li jukub’.

Santos, 1:123

Eb’ laj santil paab’anel neke’xch’utub’ rib’ re b’antioxink chiru li qaChoxahil Yuwa’.

Eb’ laj santil paab’anel ke’sach xch’ool ut ke’b’antioxin. Ke’xch’utub’ rib’ re tijok ut b’antioxink chiru li qaChoxahil Yuwa’. Li jukub’ kib’eek sa’ xyaalal toj aran Ohio.

Santos, 1:123

Eb’ laj santil paab’anel neke’k’ulub’aak aran Ohio.

Naq ke’wulak laj santil paab’anel aran Ohio, eb’ li komon re li Iglees aran ke’xk’uleb’ ut ke’xtenq’aheb’ chixtawb’al xna’ajeb’. Jo’ xyeechi’ihom chaq, li Qaawa’ kixk’ut lix chaq’rab’ chiruheb’ ut kixk’e li wankilal reheb’ re naq te’xb’aanu lix k’anjel.

Tzol’leb’ ut Sumwank 42; Santos, 1:126