Noviembre re 1830–julio re 1831

Li xMary ut li xCarolina Rollins

Xraab’aleb’ li loq’laj hu chi anchal ch’oolej

Li xMary Rollins kab’laju chihab’ wan chaq re naq ke’wulak li misioneer aran Kirtland, Ohio xb’een wa. Kirab’iheb’ chi aatinak chirix lix Hu laj Mormon. Sa’ li kutan a’an, wan yal jun lix Hu laj Mormon aran Kirtland, ut wan rik’in jun laj jolominel sa’ li Iglees, laj Isaac Morley xk’ab’a’.

Li xMary kiwulak sa’ li rochoch li Hermano Morley ut kixpatz’ ma naru taaril li hu. Li Hermano Morley kixkanab’ chixchapb’al sa’ ruq’. Li xMary kixpatz’ ma naru tixk’am sa’ rochoch.

Li Hermano Morley ink’a’ kiraj xto’ninkil li hu re li xMary. Maji’ naril lix k’ihal. Li xMary kixtz’aama chiru li Hermano Morley naq tixto’ni re.

Li Hermano Morley kixk’ulub’a naq tixk’am. A’an kixye naq li xMary naru tixk’am li hu sa’ rochoch wi tixsutq’isi wulajaq eq’la. Li xMary kiril jo’ jun nimla b’ihomal. Kixnumsi lix k’ihal li q’ojyin chirilb’al li hu.

Naq li xMary kixsutq’isi li hu, li Hermano Morley kisach xch’ool naq naab’al ak xril. “At ixqa’al,” chan, “k’am li hu ut choy rilb’al. Naru twoyb’eni.”

Li xMary a’an li xb’een aran Kirtland li naril chixjunil lix Hu laj Mormon. Chirix naq kixchoy rilb’al, kixnaw ru li profeet aj Jose Smith. Naq kixk’e reetal lix rahom li xMary choq’ re lix Hu laj Mormon, laj Jose kixye naq naru naxk’am lix hu li Hermano Morley. A’an tixk’e jun chik li hu re li Hermano Morley.

Moqon sa’ li chihab’ a’an, xMary ut lix junkab’al ke’q’axon toj aran Independence, Misuri. A’an kisaho’ xch’ool naq kirileb’ laj jolominel sa’ li Iglees chixk’uub’ankil jun ak’ hu, li Hu re Taqlahom nayeeman re. Tz’iib’anb’ilaq sa’ li hu naab’aleb’ reheb’ li na’leb’ kixk’utb’esi li Jesukristo chiru laj Jose Smith.

Tzol’leb’ ut Sumwank 67; 70:1–4; Santos, 1:178

A’b’an wankeb’ li kristiaan aran Independence li xik’ neke’ril li Iglees. Ke’raj naq te’elq laj santil paab’anel. Sa’ jun kutan, eb’ li josq’ aj winq ke’ok sa’ li kab’l nak’uub’aman wi’ li Hu re Taqlahom. Ke’xkut li k’anjeleb’aal re k’uub’ank hu chiru li ventaan ut ke’xjek’iheb’ li perel hu re li Hu re Taqlahom chiru li b’e.

Santos, 1:177–178

Li xMary ut li xCaroline, li riitz’in, neke’xmuq rib’ chirix li korral. Li xMary kixye re li xCaroline naq naraj xxokb’aleb’ li perel hu rub’elaj naq te’sachq. Li xCaroline yoo xxiw xb’aaneb’ li josq’ aj winq. “Toohe’xkamsi,” chan. A’b’an li xMary ut li xCaroline ke’xnaw naq tz’iib’anb’il li raatin li Dios chiruheb’ li perel hu a’an.

Santos, 1:178

Ke’oyb’enin toj reetal naq ink’a’ chik neke’k’aak’alen li winq. Ke’xseeb’a rib’ ut ke’xxokeb’ jo’ k’ihal li perel hu kiru chiruheb’. Naq yookeb’ chi eelelik, ke’ile’ xb’aaneb’ li winq ut ke’xpatz’ reheb’ naq te’xaqliiq. Li xMary ut li xCaroline ke’xq’aluheb’ li perel hu ut ke’xseeb’a rib’ chi ok toj sa’ li k’al.

Santos, 1:178–179

Wiib’eb’ li winq ke’xtaaqeheb’ a’an toj sa’ xyi li k’al. Najt xteram li k’al, jo’kan naq li xMary ut li xCaroline ink’a’ neke’ril b’ar yookeb’ chi xik. Ke’xkut rib’ chi ch’och’ ut ke’xmuqeb’ li perel hu rub’el lix tib’eleb’. Ke’ab’in chi ch’anch’o naq eb’ li winq yookeb’ chixsik’b’aleb’ sa’ xyi li k’al.

Santos, 1:179

Eb’ li winq ke’xkanab’ xsik’b’aleb’. Ke’kole’ li xMary ut li xCaroline. Eb’ a’an ke’xkoleb’ li perel hu wankeb’ wi’ lix k’utb’esinb’il na’leb’ li Qaawa’ choq’ re li Hu re Taqlahom. Sa’ li kutan a’in, eb’ li k’utb’esinb’il na’leb’ a’an neke’tawman sa’ li Tzol’leb’ ut Sumwank.

Santos, 1:179