Eb’ li seraq’ sa’eb’ li loq’laj hu
Laj Elijah Able

“Laj Elijah Able,” Eb’ li Seraq’ sa’ li Tzol’leb’ ut Sumwank (2024)

“Laj Elijah Able,” Eb’ li Seraq’ sa’ li Tzol’leb’ ut Sumwank

1838

Laj Elijah Able

Jun mision re paab’aal ut kawil ch’oolej

Laj Elijah Able naxkub’si xha’ li xEunice Franklin.

Li Qaawa’ kixb’oq jun winq, aj Elijah Able xk’ab’a’, re k’anjelak jo’ misioneer. Laj Elijah kixk’ut lix evangelio li Jesukristo chiru li xEunice ut laj Charles Franklin. Kiraatinaheb’ chirix lix Hu laj Mormon ut li profeet aj Jose Smith. Li xEunice ut laj Charles ke’xpaab’ li raatin ut ke’raj ok sa’ li Iglees. Laj Elijah kixkub’siheb’ xha’.

Santos, 1:316

Laj Elijah wan jun xmatk’.

Laj Elijah ki’el aran re xwotzb’al li evangelio sa’ jalan chik li tenamit. Sa’ jun q’ojyin, wiib’ oxib’ po chirix a’an, laj Elijah kiwan jun xmatk’ chirix li xEunice, li ramiiw. Sa’ li matk’, li xEunice ink’a’ chik naxnaw chi ch’olch’o ma yaal lix Hu laj Mormon ut naq laj Jose Smith a’an jun profeet. Naq ki’aj laj Elijah, kisutq’i re rilb’al li xEunice.

Tzol’leb’ ut Sumwank 75:27; Santos, 1:315–316

Laj Elijah na’aatinak rik’in li xEunice.

Li xEunice kisach xch’ool naq kiril laj Elijah chirix rokeb’aal li rochoch. Tz’aqal yaal lix matk’ laj Elijah: li xEunice ink’a’ chik naxpaab’ lix Hu laj Mormon chi moko laj Jose Smith.

Santos, 1:317

Laj Elijah najultikan aatin sa’ jun tzoleb’aal.

Laj Elijah kixpatz’ re li xEunice naq taachalq chirab’inkil chi jultikank aatin sa’ jun tzoleb’aal. Naq a’an kirab’i li raatin laj Elijah, kireek’a wi’chik li Santil Musiq’ej. Kixnaw naq yaal li evangelio!

Santos, 1:317

Laj Elijah na’aatinak rik’ineb’ li kristiaan chirix li tzoleb’aal.

Laj Elijah kixyeechi’i re li xEunice naq taasutq’iiq sa’ wiib’ xamaan re jultikank wi’chik. A’b’an ke’wan li kristiaan li ink’a’ neke’raj naq taasutq’iiq. Chirix naq xikenaq laj Elijah, ke’xye reheb’ chixjunileb’ naq laj Elijah a’an aj kamsinel. Ke’xyeechi’i tumin re li ani natawok re.

Santos, 1:318

Li xEunice naxwech’i rib’ rik’ineb’ li kristiaan sa’ li tenamit.

Li xEunice kixnaw naq tik’ti li neke’xye li kristiaan chirix laj Elijah. Maa’ani kixkamsi. A’an jun winq chaab’il xch’ool ut xmoos li Dios. Kixnaw naq li tik’ti ink’a’ tixram naq taasutq’iiq laj Elijah re jultikank aatin. Li xEunice kixye reheb’ li kristiaan naq taasutq’iiq laj Elijah. “Li Dios taakoloq re,” chan.

Santos, 1:318

Laj Elijah nasutq’i sa’ li tzoleb’aal.

Kisutq’i ut laj Elijah. Kisutq’i sa’ li tzoleb’aal ak kijultikan wi’ aatin. Nujenaq li tzoleb’aal rik’ineb’ li ke’ajok re naq taak’ehe’q sa’ tz’alam. Laj Elijah kixaqli chiruheb’ li kristiaan. Kixye naq wi te’raj xtz’apb’al sa’ tz’alam, anajwan te’xb’aanu, rub’elaj naq taa’ok chi jultikank aatin. Wi ink’a’, te’xkanab’ chi k’utuk.

Santos, 1:318

Eb’ li kristiaan neke’xka’ya laj Elijah naq yoo chi k’utuk.

Maajun reheb’ ki’eek’an. Maak’a’ kixb’aanu laj Elijah, a’b’an ch’anch’o naq ke’kana li kristiaan. Laj Elijah kixb’icha jun b’ich, kitijok, ut kixk’ut lix evangelio li Jesukristo. Kiwan lix wankil li Dios rik’in. Chirix naq kixraq xk’utum, ki’aatinak rik’ineb’ li ramiiw, li xEunice ut laj Charles, ut toj kik’anjelak sa’ xyaalal sa’ xmision.

Santos, 1:319