Nak’uub’aman lix Iglees li Jesukristo

“Nak’uub’aman lix Iglees li Jesukristo,” Eb’ li Seraq’ sa’ li Tzol’leb’ ut Sumwank (2024)

“Nak’uub’aman lix Iglees li Jesukristo,” Eb’ li Seraq’ sa’ li Tzol’leb’ ut Sumwank

Abril re 1830

Nak’uub’aman lix Iglees li Jesukristo

Jun xchaq’al ru ch’utam sa’ li Iglees

Laj Jose Smith naxk’uleb’ li kristiaan sa’ li rochocheb’ laj Whitmer choq’ re li xb’een ch’utam sa’ li Iglees.

Lix Hu laj Mormon ak isinb’il chik chiru hu ut lix wankilal li tijonelil re li Dios ak wan wi’chik sa’ xb’een li ruchich’och’. Li Qaawa’ kixye re laj Jose Smith naq ak xwulak xhoonalil xk’uub’ankil li Iglees.

Santos, 1:84

Eb’ li kristiaan neke’xtaqsi li ruq’ re xxaqab’ankil xwankil laj Jose ut laj Oliver jo’ aj jolominel sa’ li Iglees.

Sa’ li 6 xb’e li po abril re 1830, haye’ kak’aal chi winq ut ixq ke’wulak sa’ rochoch li junkab’al Whitmer re xk’uub’ankil li Iglees. Li Qaawa kixb’oq laj Jose ut laj Oliver re xb’eresinkil lix Iglees. Laj Jose ut laj Oliver ke’xpatz’ reheb’ li tenamit naq te’xtaqsi li ruq’ re xk’utb’al naq neke’xxaqab’ xwankileb’ jo’ aj jolominel.

Tzol’leb’ ut Sumwank 20:1–3; Santos, 1:84

Eb’ li ak’ komon sa’ li Iglees neke’saho’ xch’ool chixk’ulb’al li loq’laj wa’ak.

Chirix a’an, laj Jose ut laj Oliver ke’rosob’tesi li loq’laj wa’ak. Ke’xk’e a’an reheb’ li kristiaan re xtenq’ankileb’ chixjultikankil li Jesukristo. Chirix a’an, laj Jose ut laj Oliver ke’xk’e li ruq’ sa’ xb’eeneb’ xjolom li kristiaan ke’kub’e xha’. Ke’xk’ojob’eb’ a’an jo’ komon sa’ li Iglees ut ke’xk’e li maatan re li Santil Musiq’ej reheb’.

Tzol’leb’ ut Sumwank 20:75–79; Santos, 1:85

Laj Jose naxtzoleb’ li ak’ komon sa’ li Iglees.

Li Qaawa’ kixk’e re laj Jose jun esil choq’ re li ak’ Iglees. Kixye re naq tixtz’iib’a li k’a’ru taak’ulmanq sa’ li Iglees. Kixye naq laj Jose Smith a’an lix profeet. Kixyeechi’i reheb’ li komon sa’ li Iglees naq wi te’xtaaqe li taqlahom kixk’e a’an re laj Jose, a’an taarosob’tesiheb’. Maak’a’aq xwankil laj tza sa’ xb’eeneb’.

Tzol’leb’ ut Sumwank 21:1–6; Santos, 1:85

Laj Jose Smith ut lix yuwa’ neke’xq’alu rib’.

K’a’jo’ xsahil xch’ooleb’ li kristiaan xb’aan naq wan chik lix Iglees li Jesukristo! Chirix li ch’utam, naab’aleb’ chik li kristiaan ke’kub’e xha’, jo’ lix na’ ut lix yuwa’ laj Jose Smith. Naq lix yuwa’ ki’el chaq sa’ li ha’, laj Jose kixq’alu a’an chi kaw. “Xwan inyu’am re rilb’al lin yuwa’ chi kub’eek xha’ sa’ lix Iglees li Jesukristo li tz’aqal yaal!” chan.

Santos, 1:86

Laj Jose nareek’a xb’antioxihom xb’aan naq xtenq’an chixk’ojob’ankil wi’chik li Iglees.

Sa’ li q’ojyin chik, laj Jose naxik sa’ li k’iche’ re taawanq xjunes. K’a’jo’ xsahil li raam. Ak lajeeb’ chihab’ chik kinume’ chalen chaq naq kiril xb’een wa li qaChoxahil Yuwa’ ut li Jesukristo. Naab’al li k’a’ru kinume’ chalen li hoonal a’an. Laj Jose kireek’a xb’antioxihom xb’aan naq kitenq’an chixk’ojob’ankil wi’chik, malaj chixk’amb’al chaq wi’chik, lix Iglees li Jesukristo!

Santos, 1:86