« Nō ni’a i te Buka a Moromona », Te mau ’ā’amu o te Buka a Moromona (2023)
Nō ni’a i te Buka a Moromona
Iesu Mesia ’e tōna mau ta’ata i te mau fenua Amerika
E pāpa’ira’a mo’a te Buka a Moromona. Tē ha’api’i nei te reira ia tātou nō ni’a i te Fatu ’o Iesu Mesia ’e tōna tere i te mau fenua Amerika e mea maoro i teienei. Nā roto mai i te Buka a Moromona, e nehenehe tātou e ha’api’i mai nō ni’a i te ’evanelia a Iesu. Tē ha’api’i nei te reira ia tātou nāhea i te fa’ari’i i te hau i teienei ’e nāhea tātou e ora fa’ahou ai i pīha’i iho i te Atua ’e ia Iesu ’ia tae i te hō’ē mahana.
’Api upo’o parau o te Buka a Moromona ; ’ōmuara’a nō te Buka a Moromona ; 3 Nephi 11
’Ua pāpa’ihia te Buka a Moromona e te mau peropheta a te Atua. ’Ua pāpa’i rātou i ni’a i te mau ’api ’āuri tei pi’ihia te mau ’api. E tauturu tā rātou mau ’ā’amu ’e tō rātou ’itera’a pāpū ia tātou ’ia fa’ari’i i te fa’aro’o ia Iesu. ’Ua pāpa’i rātou nō ni’a i te mau pupu ta’ata e rave rahi tei ora na i te mau fenua Amerika e mea maoro i teienei.
’Api upo’o parau o te Buka a Moromona ; ’ōmuara’a o te Buka a Moromona
’Ua tae mai te hō’ē pupu mai Ierusalema i te mau fenua Amerika e 600 matahiti hou tō Iesu fānaura’ahia. ’Ua riro mai rātou ’ei nā nūna’a e piti tei pi’ihia te ’āti Lamana ’e te ’āti Nephi.
’Ōmuara’a o te Buka a Moromona ; 1 Nephi 1:4
Nā mua atu rā, e pupu tei fa’aru’e i te patu nō Babela nō te fano atu i te mau fenua Amerika. ’Ua pi’ihia rātou te ’āti Iareta.
’Ōmuara’a o te Buka a Moromona ; Etera 1:33–43
’Ua ha’api’i te mau peropheta a te Atua i te nūna’a ta’ata. ’Ia fa’aro’o ana’e te ta’ata ’e ’ia ha’apa’o i te mau fa’auera’a a te Atua, ’ua tauturu ’oia ia rātou. ’Ua ha’api’i te mau peropheta nō ni’a ia Iesu ’e ’ua parau ē, e fānauhia ’oia i Ierusalema. ’Ua ha’api’i mai te ’āti Nephi ’e te ’āti Lamana ē, e haere Iesu e fārerei ia rātou i muri a’e i tōna pohera’a.
2 Nephi 1:20 ; 25:12–14 ; 26:1, 3, 9 ; Mosia 3:5–11 ; Alama 7:9–13 ; Helamana 3
’Ua haere mai Iesu mai tā te mau peropheta i parau. I muri a’e i tō Iesu ti’afa’ahoura’a,’ua haere ’oia e fārerei i terā nūna’a. ’Ua vaiiho ’oia i te ta’ata tāta’itahi ’ia fāfā i te mau puta naero i roto i tōna nā rima ’e i tōna nā ’āvae. ’Ua ’ite ho’i rātou ē, e Tamaiti Iesu nā te Atua. ’Ua ha’api’i ’oia i tāna ’evanelia, ’e ’ua pāpa’i te mau ta’ata i te reira. ’Ua paraparau rātou nō tō Iesu haerera’a mai e rave rahi matahiti i muri i iho.
3 Nephi 11:7–15, 31–41 ; 16:4 ; 4 Nephi 1:1–6, 13–22
E peropheta ’o Moromona i ora na ma’a hānere matahiti i muri a’e i tō Iesu haerera’a mai. I roto i te orara’a o Moromona, ’ua fa’aea te mau ta’ata i te pe’e i te Fatu. ’Ua fa’ari’i Moromona i te mau pāpa’ira’a a te mau peropheta tei ora i mua iāna. ’Ua tu’u ’oia e rave rahi o tā rātou mau pāpa’ira’a i roto i te hō’ē putura’a ’api. ’Ua riro mai teie mau pāpa’ira’a ’ei Buka a Moromona.
’Ōmuara’a o te Buka a Moromona ; Te mau Parau a Moromona 1:2–9 ; Moromona 1:2–4, 13–17
Hou te pohera’a o Moromona, ’ua hōro’a ’oia i te mau ’api i tāna tamaiti ’o Moroni. I roto i te orara’a ’o Moroni, tē rave ra te mau ta’ata i te mau ’ohipa ’ino roa. ’Ua hina’aro rātou e ha’apohe i te ta’ata tei ti’aturi ia Iesu. ’Ua hina’aro Moroni e tauturu i te ta’ata nō muri iho, nō reira ’ua pāpa’i rahi atu ā ’oia i ni’a i te mau ’api ’e ’ua huna nō te pāruru i te reira.
’Ōmuara’a o te Buka a Moromona ; Te mau Parau a Moromona 1:1–2 ; Moromona 8:1–4, 14–16 ; Moroni 1
E rave rahi matahiti i muri mai, i te matahiti 1823, ’ua haere mai Moroni ’ei melahi i te peropheta Iosepha Semita. ’Ua parau Moroni ia Iosepha i hea e ’itehia ai te mau ’api. Nā roto i te tauturu a te Atua, ’ua ’īriti Iosepha i te mea i pāpa’ihia i ni’a i te mau ’api.
’Ōmuara’a o te Buka a Moromona ; Iosepha Semita––’Ā’amu 1
E tono mai te Atua i te Vārua Maita’i nō te tauturu ia ’outou ’ia ’ite ē, e parau mau te hō’ē mea. ’Ia tai’o ’outou i te Buka a Moromona, e nehenehe ’outou e pure ’e e ani i te Atua e parau mau ānei te reira. Mai te reira ato’a, e nehenehe tā ’outou e ’ite ē, ’o Iesu tō ’outou Fa’aora ’e ’ua here ’oia ia ’outou.