« Te ari’i o te mau ’āti Lamana ato’a », Te mau ā’amu o te Buka a Moromona (2023)
« Te ari’i o te mau ’āti Lamana ato’a », Te mau ’ā’amu o te Buka a Moromona
Te ari’i o te mau ’āti Lamana ato’a
’Ua hina’aro e ha’api’i mai nō ni’a i te Fatu
E ari’i tō te ’āti Lamana e fa’atere nei i ni’a i te tahi atu mau ari’i tā’āto’a tō rātou. E metua tāne ’oia nō te ari’i Lamoni. ’Ua mana’o ’oia e ’enemi te mau ’āti Nephi. I te hō’ē mahana, ’ua ’ite ’oia ia Lamoni ’e ’o Amona. ’Ua ui te ari’i ia Lamoni, e aha tāna e rave ra ’e te hō’ē ’āti Nephi. ’Ua parau Lamoni i te ari’i ē, tē haere nei rāua e tātara mai i te mau taea’e o Amona i rāpae i te fare tāpe’ara’a.
Mosia 10:11–17 ; Alama 20:1–12
’Ua riri te ari’i. ’Ua mana’o ’oia ē, tē ha’avare nei te mau ’āti Nephi nō te tāmata e ’eiā i te mau ’āti Lamana. ’Ua parau ’oia ia Lamoni e taparahi pohe ia Amona ’e ’ia haere mai nā muri iāna.
’Aita Lamoni i hina’aro e taparahi pohe ia Amona. ’Ua parau ’oia i te ari’i ē, e peropheta Amona ’e tōna mau taea’e nā te Atua. ’Ua parau ’oia ē, e tauturu ’oia i te mau taea’e o Amona.
Rave mai ra te ari’i i tāna ’o’e nō te ha’apēpē ia Lamoni, ’ua tāpe’a rā Amona iāna. ’Aro atu ra te ari’i ia Amona. ’Ua pāruru Amona iāna iho. ’Ua ha’apēpē ’oia i te rima o te ari’i, ’ia ’ore te ari’i ’ia ’aro mai. ’Ua ri’ari’a roa te ari’i nō te pūai o Amona. ’Ua fafau ’oia e hōro’a i te ’āfara’a o tōna bāsileia nō Amona, mai te mea e vaiiho Amona iāna ’ia ora.
’Aita Amona i hina’aro i te bāsileia. ’Ua ani rā ’oia i te ari’i ’ia tu’uhia mai tōna mau taea’e i rāpae i te fare tāpe’ara’a. ’Ua ani ato’a ’oia i te ari’i ’ia fa’aea i te riri ia Lamoni. ’Ua parau Amona i te ari’i ’ia vaiiho ia Lamoni ’ia fa’atere mai tāna i mana’o e mea maita’i a’e.
’Ua māere te ari’i i te ’itera’a i te here rahi o Amona ia Lamoni. ’Ua fa’ari’i ’oia e rave i te mau mea ato’a tā Amona i ani.
’Ua hina’aro te ari’i e ’ite rahi atu ā nō ni’a i te mea tā Amona ’e Lamoni i parau iāna nō ni’a i te Atua. ’Ua ani ’oia ia Amona ’e tōna mau taea’e ’ia haere mai ’e e ha’api’i iāna.
’Ua haere Amona ’e ’o Lamoni i te fenua nō Midoni. Tei reira te mau taea’e o Amona i te tāpe’ara’ahia i roto i te fare ’āuri. ’Ua tā’amu’amuhia rātou i te taura ’e ’aita i hōro’ahia te mā’a ’e te pape. ’Ua roa’a ia Lamoni i te tītau i te ari’i o Midoni ’ia tu’u i te mau taea’e o Amona i rāpae i te fare ’āuri.
I te mātarara’a mai rātou i rāpae, ’ua haere atu te mau taea’e o Amona i te metua tāne ra o Lamoni. ’Ua tāhopu atu rātou i mua i te ari’i ’e ’ua ani ’ia riro rātou ’ei tāvini nōna. ’Ua parau te ari’i, ’aita. Maori rā, ’ua hina’aro ’oia ’ia ha’api’i rātou iāna i te ’evanelia. Te hō’ē o te mau taea’e ’o Aarona te i’oa. ’Ua tai’o ’oia i te mau pāpa’ira’a mo’a i te ari’i ’e ’ua ha’api’i iāna nō ni’a i te Atua ’e ia Iesu Mesia.
’Ua ti’aturi te ari’i ia Aarona. ’Ua parau ’oia ē, e ha’apae ’oia i tōna bāsileia ato’a nō te ’ite i te Atua. ’Ua ani ’oia ia Aarona e aha te mea e ti’a iāna e rave. ’Ua parau Aarona i te ari’i ’ia tātarahapa ’e ’ia pure i te Atua ma te fa’aro’o. ’Ua tātarahapa te ari’i i tāna mau hara ato’a ’e ’ua pure.
Topa atu ra te ari’i i raro. ’Ua horo atu ra te mau tāvini o te ari’i e fa’a’ite i te ari’i vahine.
Haere mai ra te ari’i vahine ’e ’ite a’e ra i te ari’i i raro. ’Ua mana’o ’oia ē, ’ua taparahi pohe Aarona ’e tōna mau taea’e i te ari’i. ’Ua riri roa te ari’i vahine.
’Ua parau te ari’i vahine i te mau tāvini ’ia taparahi pohe ia Aarona ’e tōna mau taea’e. ’Ua mata’u rā te mau tāvini. Tē parau ra ē, e mea pūai roa Aarona ’e tōna mau taea’e. I teienei, ’ua mata’u te ari’i vahine. ’Ua tono atu ’oia i te mau tāvini, ’ia haere e fa’a’ite i te nūna’a o te ’oire i te ’ohipa i tupu. ’Ua ti’aturi ’oia ē, e taparahi pohe te mau ta’ata ia Aarona ’e tōna mau taea’e.
’Ua ’ite Aarona ē, e riri te mau ta’ata. ’Ua ’ite ato’a ’oia ē, ’aita te ari’i i pohe. ’Ua tauturu ’oia i te ari’i ’ia ti’a mai i ni’a. ’Ua ho’i fa’ahou mai te pūai o te ari’i ’e ’ua ti’a mai i ni’a. ’Ua māere roa te ari’i vahine ’e te mau tāvini.
’Ua ha’api’i te ari’i i te ari’i vahine ’e i te mau tāvini nō ni’a ia Iesu. ʼUa ti’aturi pā’āto’a rātou ia Iesu. ’Ua hina’aro te ari’i i tōna nūna’a ato’a ’ia ha’api’i mai nō ni’a ia Iesu. ’Ua hōro’a ’oia i te hō’ē ture ē, e nehenehe Aarona ’e tōna mau taea’e e ha’api’i i te ’evanelia nā te mau vāhi ato’a i roto i tōna bāsileia. ’Ua ha’api’i rātou i te nūna’a ’e ’ua pi’i i te mau tahu’a ’e te mau ha’api’i i roto i te fenua.