« Isema’ela ’e tōna ’utuāfare », Te mau ’ā’amu o te Buka a Moromona (2023)
Isema’ela ’e tōna ’utuāfare
Te ’āmuira’a atu i te tere i te fenua i parauhia ra
’Ua ora te ’utuāfare o Lehi ’e ’o Saria rātou ana’e i roto i te mēdēbara. I te hō’ē mahana, ’ua fa’aue te Fatu ia Lehi ’ia tono atu i tāna mau tamāroa, Lamana, Lemuela, Samu ’e ’o Nephi i Ierusalema. ’Ua tonohia rātou nō te ani ia Isema’ela ’e tōna ’utuāfare ’ia ’āmui mai ia rātou. E nehenehe tā rātou nā ’utuāfare e fānau i te tamari’i i te fenua i parauhia ra.
’Ua hina’aro ’o Isema’ela ’e tōna ’utuāfare e pe’e i te Fatu. ’Ua ti’aturi rātou ē ’ua hina’aro te Fatu ia rātou ’ia ’āmui atu i te ’utuāfare o Lehi ’e ’o Saria. ’Ua mā’iti rātou e fa’aru’e ia Ierusalema ’e e fārerei ia Lehi i roto i te mēdēbara.
I tō rātou haerera’a, ’aita te tahi mau ta’ata i hina’aro fa’ahou e ha’apa’o. ’Ua hina’aro rātou e ho’i fa’ahou i Ierusalema. ’Ua ani Nephi ia rātou ’ia fa’aro’o i te Fatu.
’Ua parau Nephi e nehenehe te Fatu e rave i te mau mea ato’a mai te mea e fa’aro’o tō rātou. ’Āre’a rā ’ua riri Lamana ’e ’o Lemuela. ’Ua tā’amu rāua ia Nephi ’e ’ua hina’aro rāua e fa’aru’e iāna i roto i te mēdēbara.
’Ua pure Nephi nō te ani i te tauturu. ’Ua topa te taura, ’e ’ua ti’a mai Nephi. Terā rā tē hina’aro noa ra Lamana ’e ’o Lemuela e ha’amāuiui iāna. ’Ua pāruru hō’ē o te mau tamāhine a Isema’ela ia Nephi. ’Ua pāruru ato’a tōna metua vahine ’e hō’ē o tōna mau taea’e iāna. ’Ua fa’aro’o Lamana ’e ’o Lemuela ia rāua ’e ’ua fa’aea i te tāmata i te ha’amāuiui ia Nephi.
’Ua tātarahapa Lamana ’e ’o Lemuela nō te ’ohipa tā rāua i rave. ’Ua ani rāua ia Nephi ’ia fa’a’ore i tā rāua hapa. ’Ua fa’a’ore Nephi i te hapa a tōna mau taea’e. I muri iho, ’ua pure ’o Lamana ’e ’o Lemuela ’e ’ua ani i te Fatu ’ia fa’a’ore i tā rāua hapa.
’Ua tāmau ā rātou pā’āto’a i tō rātou tere ’e ’ua tāpae i te ti’ahapa o Lehi ’e ’o Saria. ’Ua ’āmui atu ra ïa nā ’utuāfare to’opiti. ’Ua ha’amāuruuru rātou i te Fatu ’e ’ua ha’amori iāna.